روايات كاملة

أَغمض عينيك .. ودَع قلبـك يـرآني

جميع الحقوق محفوظة للكاتبة ميرا ياسر

أَغمض عينيك .. ودَع قلبـك يـرآني للكاتبة ميرا ياسر

 

الجزء الآول ~~| 🍃🍓

قصتنا المرة هادي عن بنت اسمها ريان 😌 ريونة هادي طالبة بكلية البشري 💛🏥💉

سنه خامسة عمرها 23 سنة 💊

بنوتة طيوبة وشاطرة هلبا وديما من اوائل الدفعة وتحب تخصصها هلبا وتحلم ب انها تكون دكتورة

هيا بيوضة وشعرها اسود وعيونها زرق 💙
وطولها 165 .. بس كانت في مشكلة صغيرونه 💔
ان وزنها كان 110 💔💔

عندها صاحبة اسمها ياسمين 🌸 صحبتها من الثانوي 👭

و عندها زوز خوت ولاد.. ايهم و عدنان 👬

ايهم 25 سنه وخوها عدنان متزوج وعنده زوز صغار

القصة خفيفة وحلوة وان شاء الله تعجبكم 💓

نجو نشوفوا قصتها …….

ريان.. صباااح الخيير
ياسمين.. صبااح النوور .. قريتي !
ريان.. ايي مية مية مزالي شيت بس مراجعتاش
ياسمين.. مزالك شيت مراجعتيشي وانا كيف مكملة قراية قبل لانجي 😐
ريان..تي انتي حرف الواو تقري فيه 100 مرة باش تفهميه شن نديرلك😂
ياسمين.. تتسهوكي😒👊
ريان.. لالا ان………..😳😱😍😍😍
ياسمين.. ان.. شني ؟ .. هيييييي انتي !! تي وين رحتي
ريان.. تي ضمي فمك يعن هكي الولد طالع طرف بكل اليوم اخخ ياناعليا بندوب 😍💓
ياسمين.. لا وحياتك متدوبيش توا مفيش رافعة بحدانا حاليا باش نقيموك بيها 😂 تي خفي روحك شوويا توا يعرفك ميته عليه 😐
ريان.. عشش خيرني شن درت🙂
ياسمين.. لا وحيياتك مشفتيش روحك!😂 تي طلعولك حتى جوانح غير جيتي رزينه كان هدا ره طرتي 😂💔
ريان.. مبرد وجهك ديما وانتي محطمة مشاعر امي 😐
ياسمين.. غير اسكتي شويا واستعملي فمك ف حاجة تانية غير الماكلة واشرحيلي النقطة هيا 😂
ريان.. تعرفي كان مضميتيش فمك توا بنديرك صونيه بشاميل ونكسد عليك 😑 هاتي جده

وقعمزت تشرحلها …….

نمشوا لل other side ونعرفكم ب الاخ الي كانت بتتشقلب ع خاطره م الفرحة 😂💔

هدا ياحنة ولد طبعا🌚وهوا معاها فلجامعة 😌 اسمه قيس ومعاها فالدفعة .. ابيض وشعره لونه بني فاتح وعنده لحية خفيفة وعيونه عسليات يعني طرف ملاخير 😂

المووهم ….

هدا الكبيدة وفارس الاحلام متع ريان من بداية الكلية💁 وحبيبها وابو العيال والي راسمة احلامها الوردية كلها معاه ☻ بس فلاحلام طبعا 😂 لانه ميعرفش ب وجودها اصلا 💔 وحب من طرف واحد ومن بعييد بككل .. وريان مجتهاش الجرأة انها تكلمه ولا مرة لانها معندهاش تقة ب نفسها ابدا بسبب وزنها وشكلها وهيا عارفة انه ماعمره مايشوفلها ولا يفكر فيها بسبب شكلها.. بس لما توزن فيها وتقرر تضعف باش تعجبه ع اساس تقول يمشي يروح هوا والي جابوه والماكلة غلاها مايفوقه شي 😂😂💔👊

قيس .. اوو صحبة .. ششجو
مؤيد.. مليييح.. تي وين ياراجل من صبح ربي وانا نهرول ف جرتك وانت تاخد ف ام السيارة من هني ومعاش نشوف وجهك 😑
قيس .. الله غالب بتتحملني لين نرد سيارتي من الورشة😂 .. ششد هاك 🔑 وبتجي توصلني فلعشية باش ناخد سيارتي 😎
مؤيد.. شوفير بوك اني مه😐
قيس.. لالا.. شوفير العيلة كلها 😂😂😂😂
مؤيد.. كلب 😂 تحرك قدامي الامتحان قريب يبدا
قيس .. امشي قدامي به😂
مؤيد.. متخافش مش حا ناكلك🙂 لما نطلعوا من الامتحان تو نتفاهموا 😂 .. تعالا ناخدوا قهوة فيسع راسي مسطر نحس فيه باش نعرف نجاوب

ومشو شور الكافتيريا وطلبوا زوز نص نص 🙃

《عند البنات 》

ريان.. وبس يا ستي هدا هوا 😧 فهمتي ؟
ياسمين.. تبي الحق ولا ولد شارعه ؟
ريان.. شني ؟؟😳
ياسمين.. مفهمتش ولا حرف 😂💔
ريان.. تصدقي انا حمارة مقعمزة نضيع ف وقتي معاك.. شيطيلي ريقي وجوعتيني.. نوضي خ ناخد ناكل حاجة
ياسمين.. به ناخدو شكلاطة وعصير وكمليلي 😂
ريان..😐،، نوضي بعدين ساهل

ومشو للكافتيريا باش ياخدو حاجة ياكلوها .. وهما خاشين كانوا قيس ومؤيد طالعين ..

وريان قلبها قريب يطلع من مكانه😂😍💓

ياسمين.. ارخي روحك قلبك نسمع فيه من هنايا 🌚

وجو بيخشو وهما طالعين ريان زي ما انتو عارفين اللهم لاحسد مسدهمش الباب هما ال4 وكان لازم حد ينحسب باش الباقي يخشو😂

وقيس قاعد واقف ومستني وحدة فيهم تتزحزح من مكانها🌚 وريان صارلها ستك وقعدت زي السطمبه ف مكانها وسرحانه فيه وتتأمل ف جماله 😂 لين كرتها ياسمين من باش تحركت وهما طلعوا😂
ياسمين.. معليش سامحونا …

وخدتها وخشت…

مؤيد .. هادي شنو الشيت😳 هادي كان يحطوها ف مبارة الكلاسيكو الاسبوع الجاي حارس مرمى تجييلهم الكاس 😂💔
قيس .. وانت الصادق الكورة تخبط فيها وتطلع برا الملعب مرة وحدة😂😂

وهما خشو وريان خدت سندوتش سكالوب ومشروب وياسمين شكلاطة وعصير ..

ياسمين.. هبلتي انتي ؟ فضحتينا قدامهم الهم الاحرف
ريان.. ياهمي شن ندير 😭 وين نشوفه اعضاء جسمي كلها تستك 💔😭😍
ياسمين.. اي وفمك العضو الوحيد الي ميستكش بكل 🌚
ريان.. احييه 😭منضري كان يحشم بكل ؟😰..
ياسمين.. اي الحق كنتي مدايرة زي الجمل الي شبح باسطي 😂😂
ريان.. ريتيه كيف يضحك هوا وصاحبه اكيد يتسهوكوا عليا 😢😢😓 حي علموقف 💔

ياسمين..قلنالك اضعفي وانتي عالحال هادي مستحيل يشوفلك اصلا ..

ريان.. انلاا 😒الي يحبني يحبني كيف ماني الجمال جمال الروح 👊

وفتحت السندوتش ونتشت منه 😂

ياسمين .. به بشويا عالسكالوب شن دنبه .. ياروحي صح الجمال جمال الروح وانتي روحك حلوة وطيبة وتهبلي وكل شي 💙 بس فالوقت هدا الجمال الخارجي حتى هوا ليه دور ومحدش هايشوف لجمال روحك الا لما ينعجب ب شكلك….

وريان شبحتلها ومردتش عليها.. وكملت ماكلة ☻

مفيش فايدة متحاولوش 😂💔

وكملو ماكله وناضت كل وحدة فيهم خشت علي امتحانها …..

وطلعت ريان خدت سيارتها وروحت …

ريان.. السلام عليكم …
امها.. وعليكم السلام ورحمة الله.. جاوبتي ؟
ريان.. اي الحمدلله .. وين بابا ؟
امها.. مع عمك فلمربوعة.. بدلي وتعالي عاونيني عالغدي
ريان.. به

وبدلت حوايجها ومشت مع امها فلمطبخ وحطت معاهم الغدي وقعمزت بحداهم تتغدى 🙂….

ايهم .. تي هيي انتي 😑 كملتي طرف اللحم بروحك تبيلك خروف بحداك وتكسدي عليه ع الحال هدا ☻
ريان.. امممميي كلمييه 😡😠😠
ايهم.. بتولي عليا ؟ 😂😂
امهاا.. اسس ضمو فمكم انتم الزوز بلا دوشة

وكملو ماكلتهم وخشت ريان لدارها واتكت عالفراش وخدت تليفونها وقعدت تفسفس …

وبعدين قابلها بوست لقروب الدفعة وخشت تقرا فلتعليقات لقت قيس معلق 🙂

وخشت علي ايميله وقعدت تفركس فيه وف اللايكات وتتفرج ع الصور ونظام FBI وهكي يعني 🕵😂

ريان.. 😳😳😳الحمارة مرام مدايرتله لايك😬 معناها ضايغها 😰 زعما في شي بينهم 😢 لا ياربي لااا يارب يطلع مفيش حاجة 😭😭😭 بس هي البنت الوحيدة الي ضايفها اكيد في بيناتهم حاجة 😢اخخ ياقلبي وخلاص😭 عليك حظ💔💔😭😭

ولوحت التليفون وخشت المطبخ وفتحت التلاجة لقت تشيز كيك 🍧🙈
ريان.. الله 😍😍😍ايواان كدةة 😀ياودي مافي غير الماكلة الي نافعتني ويبوني نضعف تي برو روحو ❤💃
وطلعت كاشيك وقعمزت عالطاولة وقعدت تاكل 🍰🙈

واتصلت بيها ياسمين…. ردت وفمها معبي .. انو 😶
ياسمين.. انيوا😂خاطري نتصل بيك مرة وتردي عليا وفمك فاضي هههههههههه
ريان..قولي شن تبي وخلصيني 😶
ياسمين.. شي بنقولك نزلو قوائم الامتحان غدوا ؟ غير معنديش نت ونبيك تشوفيلي اسمي وين
ريان.. ايي صح فتحت مبكري ونسيت نشوف
ياسمين.. امالا علاش فتحتي
ريان.. جيت نشوفهم بعدين لقيت القردة مرام مدايرة لايك لقيس دمي نحرق ونضت ناكل 😭😭😭😭😭😭😭😭💔💔
ياسمين.. تي اديرله لايك ولاينحرقوا شن خصك انتي 😑
ريان..حيوانة😢
ياسمين.. ونضتي كليتي فلاخير 😂
ريان.. بش نرتاح😬
ياسمين.. ياودي انتي متعلفقة تاكلي تبكي تاكلي فرحانه تاكلي شن هيا الحالة الي تبدي فيها متاكليش ؟
ريان..واني راقدة🙄
ياسمين.. حطي ف بالك انه مش هايشوفلك بكل وانتي هكي لو تحبيه بجديات وتبي تعجبيه اضعفي وغير هكي احلمي …
ريان.. اه يعني لازم ينعجب ب شكلي وجسمي باش يحبني ؟؟ غلطانه ياماما الي يحب حد يحب قلبه وروحه قبل شكله
ياسمين.. تعرفي شيطيلي ريقي 5 سنين واني نعاود ف نفس الدسكة خ نمشي نرقد خيرلي سلام😑
ريان.. سلام 🙄..

وسكرت….

ريان..وهانثبتلك انك غلطانه وهاتشوفي كيف هايحبني زي ماني 😒 ….

وردت الكيكة للتلاجة وغسلت ايدها ورجعت لدارها وخدت تليفونها ….

وفتحت ايميل عالفيس ب اسم جمالي سر انوثتي 🙈😂
وخشت ضافت كمشه ناس ماتعرفهمش ونزلت بوستات وتعليقات ف صفحات باش ميبانش انه ايميل جديد عالفيس وهكي يعني 😂😂

وبعتت طلب منه لقيس 😃

وهوا كان اون لاين قبل الطلب اول مابعتتاته ..

ريان.. مصحهه شن يقبل اي طلب يجيه😒👊 توا نوريك لما تقع في حبي بس ☻

وخشتله خاص …>>

ريان.. السلام عليكم🙊
قيس.. وعليكم السلام
وريان ناضت تنقز😍 ررررد ررد رررد رددد😍😍😍😍كيف حالك🙈
قيس.. تمام الحمدلله.. من معاي ؟
ريان.. امممم انا وحدة متعرفهاش 🙄
قيس.. لابالك نعرفك 😜 .. كان نعرفك علاش بنسالك من معاي 😂
ريان.. ☺☺ انا اسمي سارة
قيس.. تشرفنا هههههه وانا قيس..
ريان.. الشرف ليا 🙊🙊
قيس .. كم عمرك ؟
ريان.. “شن نقوله زعما 😳 “… عمري 19 سنه😅
قيس.. ااااه صغنونة يعني ☻
ريان.. اي🙊🙄.. نستاذن منك لازم نسكر توا
قيس.. اذنك معاك … مع السلامة
ريان.. سلام …

ولوحت التليفون و جت بتنقز م الفرحة مقدرتش🙆 مقدرين الوضع انتم😂💔

وقالت.. واخيرااا واخيرا واخيراا😍😍 خييررني اني اررزني شويا عاد مش هكي -.- هانخليه يحبني من غير مايعرف شكلي واكيد لما يحبني مش هايعدل علي شكلي 😍😍 يارب يحبني زي ماني نحبه يارب ❤❤❤❤

《تاني يوم 》

كانت ريان ف امتحان شفوي والدكتور يسأل فيها وهيا تجاوب وزي مامعروف عليها انها كانت شاطرة هلبا ومجتهدة ف دراستها ومعظم الدكاترة عارفينها بالشي هوا ❤

الدكتور.. تمام ممتازة دكتورة كالعادة .. تقدري تتفضلي وموفقة باذن الله…
ريان.. شكرا ☺
الدكتور.. بس بنعطيك نصيحة وياريت تتقبليها مني كا اب او خوك الكبير او الي هوا..
ريان.. اكيد دكتور تفضل..
الدكتور.. ريان انتي من اشطر الطالبات عندنا والقسم كله يشهدلك بالشي هوا… وانتي شابة في بداية حياتك وباذن الله بتتخرجي وبتكوني دكتورة صح ؟
ريان.. باذن الله اي
الدكتور.. تمام تخيلي معاي لو انتي ف المستشفى وسمعتي انهم يبوك في قسم معين وبسرعة .. ولا يبوك ف قسم الطوارئ او هكي … ف انتي عارفة انك لازم توصلي للمكان هوا بسرعة.. والسرعة مطلوبة ف الامور هيا لان دقيقة ودقيقة تفرق ممكن تنقذ حياة بنادم
ريان.. مفهمتش دكتور.. ممكن توضح ؟
الدكتور.. يعني انتي.. زي ما انتي عارفة يعني.. ان وزنك ششويا زايد.. مش شويا الصراحة يعني .. ولو انتي مهتميتيش بصحتك وانتي دكتورة وقارية طب … ومعتقدش انك هاتقدري توصلي فالوقت المحدد وانتي بالشكل هوا….
ريان……….
الدكتور.. لازم تضعفي دكتورة..لعدة اسباب.. لما بتخدمي وتتعيني ف مستشفى هاتجري وتلهدي وتتحركي بسرعة بين قسم وقسم ولازم تبدا حركتك خفيفة ولو قعدتي بالشكل هوا مش هاتقدري 💔 انتي لو ركبتي درجتين هاتحسي بروحك دهشتي ومش قادرة تكملي والدقيقة هادي ممكن تخسري فيها حياة مريض … اسف لو جرحتك بس ياريت تتقبلي النصيحة مني كا اب .. انتي من افضل الدكتورات عندنا بس فكري فلامور هادي بعدين وفالمستقبل هاتلقي انك لازم تنقصي من وزنك.. لصحتك قبل كل شي ومن ثم باش تقدري تمارسي مهنتك بشكل طبيعي.. واكيد لحياتك الشخصية حتى
ريان……. قعدت ساكته شوي بعدين ردت… تمام دكتور فهمت قصدك.. بارك الله فيك عالنصيحة وباذن الله هانحاول
دكتور.. ان شاء الله وفالتخرج نلقى الدكتورة ريان بشكل تاني وصحي وسليم ..
ريان.. باذن الله دكتور .. شكرا..

وخدت شنطتها وطلعت متحطمة 💔 ومن ناحية تفكر في كلام دكتورها وبدت تتخيل ف روحها ف مستشفى وانه لازم تكون حركتها خفيفة… بس هل هاتقدر تعمل بالنصيحة هادي ولا شن بيصير ؟

توا تعرفوا بعدين 😛

اتصلت ب ياسمين وشبحتها وينها ومشتلها فلكافتيريا..

وقعمزت بحداها وكانت مزال تقرا لان امتحانها مزال شوية عليه ..وقعدت تفركس ف تليفونها…ولقت قيس اون لاين … وبعتتله مسج كتبتله “اهلا”

وسمعت صوت رسالة عالماسنجر من تليفون حد .. ولما تلفتت لقاته قيس الي مقعمز عالطاولة الي وراها …….

ريان.. حي حي 😳😳😳😳
ياسمين.. خيرك ؟
ريان.. لا شي 😰

ورد عليها كتبلها “اهلين ”

وقعمزت قباله باش تتفرج علي شكله وهوا يكلم فيها🙂 التكبيد وعمايله ياكبدي 😂💔

ريان.. شن حالك؟!
قيس.. مليييح وانتي
ريان.. تمامم.. شنو وين ؟
قيس.. والله فلكلية .. وانتي وين ؟!
ريان.. حتى انا فلكلية🙊
قيس.. شن تقري ؟
ريان.. اااااه.. نقرا هندسة 🙃🙃
قيس.. ااه مليح مليح مليح..سنه اولى معناها
ريان.. اي سنه اولى🙊.. وانت سنه كم 😇 “تستعبط ع اساس وعايشة فالدور 😂 ” ..
قيس.. شن تعطيني 😎
ريان.. من صورتك ؟!
قيس..اي 😆
ريان.. امممممم شيباني بكل تبان … 30 ؟☺☺
قيس.. نهار حرف 😱 قصدك نبان كبير بكل !
ريان.. اييي حتى لحيتك تبان فيها شعرة بيضاء تقريبا 😇😇
قيس..وانتي ركزتي حتى ف لحيتي 😂💔

مشت دارت سكرين شوت لصورته ودارتله دورة ع الشعرة البيضا الي ف لحيته وبعتتهاله😂😂

وكتبتله .. اهيااا شوف.. لازم تتصرف فيها ولا تديرلها اي راي ولا تصبغها..تطيحلك البرستيج قدام الطروف بعدين🙂

وقيس قري المسج وانفلق بالضحك فسط الكافتيريا وقعدو كلهم يشوفوله 😂

وف نفس الوقت ضحكت ريان لما لقاته يضحك 😂😂😂

ريان.. ياناعليا انا م الضحكة😍😂😂😂❤❤❤
ياسمين.. خيرها هيا 😳 شن جاك ياهبلة انتي ؟

وريان ميته م الضحك ومش قادرة ترد عليها😂

ياسمين.. مش مرتاحتلك انا🌚 شن مدايرة يامصيبتي انتي😂
ريان.. اس اس بعدين نقولك😂😂

ورد عليها .. “ههههههههههه ومن قالك اني معدل عليهم الطروف 😎

ريان.. ايااا تبي تفهمني انه مغيش وحدة ف حياتك😜 no way ☻😌
قيس.. ههههههههه وعلاش no way..هادي الحقيقة مفيش وحدة ف حياتي 🌚
ريان.. اممممم طيب ممكن نعرف السبب 🙃

وكتبلها…هكي ملقيتش بنت مناسبة وخلاص 😛
“وجي بيدير send جهازه استك .. 😅”

قيس.. الشيت وقته توا وقعد يرص عالشاشة باش يخدم ودار اتصال عالماسنجر ب الغلط…..

وشرين تليفون ريان ……….

و..

يتبع

#Mera 💛

1 2 3 4 5 6الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock