روايات كاملة

إذا جمعنا القدر فلن يفرقنا البشر

إذا جمعنا القدر فلن يفرقنا البشر للكاتبة خلود شلابي

قصة —☆ إذا جمعنا القدر فلن يفرقنا البشر ✌🏻
حلقة 1

كانت ماما كل مرة تخشلي تنوّض فيا الصبح
عاد أني مقضيتها البارح سهر على فيلم وقعدت للساعة اتنين ونص😂

ماما/ نوضي يا إلهام
تو إنّوض مدايرة منبه متدورينيش
ماما/ تمام

رن المنبه سكّرته وكملت نومتي 😴
لين فقت ع الساعة 7.55
حي عليّا امتحان الرياضيات 😱 يا نهاري الأحرف يا نهاري الأسود 😭
نضت إنّقّز من مكاني نجري جري .. أخواتي مهناش فالمدرسة .. خشيت للحمام وتوضيت للصلاة صليته الصبح نقب 😂😂 وبعدها قعدت ندوّر على بدلة الثانوي لقيت السروال والبلوزة مهناش
أكيدة وحدة من خواتي محولتها من مكانها 😰 وينها يا نهاري ني وخلاص 😭 الإمتحان بيفوتني 😭😭
نوّضت ماما وسألتها قتلي محطوطة ف الدولاب
فتحت دولابي ملقيتهاش .. نوضت أمي من جديد وقلتلها نوضي شوفي وين حطيتيهالي وقت عليّا وامتحان 😭 ناض امي المسكينة وهيا تقوللي كان نلقاها الا منوريك 😤
ماما/ هاكي بلوزتك اهي قدام عيونك 😡
سبحان الله عشرة مرات وأني نفتش فالدولاب ملقيتهاش 😑
ماما/ عيونك مابعدهم من التلفزيون ،، تستاهلي بش مرة تانية معش تسهري وتبدي ترقدي بكري..
لبست البلوزة كانت معكرشة تحشّم 😣 وقمت شعري كيف ما يجي معش لحقت نمشطه ،، حي الوشاح ووين 😭 قعدت ندور ع الوشاح الأسود ملقيتاش ،، ف اضطريت نلبس وشاح أبيض متع أختي اللي فالأعدادي 😭 وملقيتش خلال نشده بيه لان محولتهم اختي من مكانهم فحدفته وخلاص
طلعت نجررري جري منظري زي الشحاتة الشنطة ف جيهة والوشاح ف جيهة 😂 كانت الدنيا كلهاااااا فاضية بحكم صقع وشتاء وجو ممطر طبعا كان التاريخ 25 فبراير 2010 ،، رفعت معاي تيليفوني بش نتصل بخالتي كانت أخصائية اجتماعية بش ادّخلني وميوقفونيش بطابور التأخير و ننحرم من إمتحاني اللي كان ف الحصة الأولى
وأني نمشي نلقى كلب عربي جهة الكنايس ،، منظره مقزز قعد ينبح ويجي لجيهتي وأني وين تلقوني 😰
ياااااربي شن هاليوم 😭😭 بعّد من عليا إمشي
هوا يدور عليا وينبح ،، وأني خايفة كان نجري مرات يبدا يجري وراي قعدت نقدم بالشوية وهوا يدور عليا
قعدت ندور على عصاء بش نحمي نفسي باها ملقيتش ،، خطمت سيارة قعدت نتبع فاها بعيوني لين قربت مني وأني كان نلقى نجري ونركب فاها هالسيارة من الخوف
قعد الكلب يضايق فيا وأني نعيّط والدنيا فاضية لين حس بيا مولى السيارة قرب مني وقعد يخوّف فالكلب ويدير ف كلاكس ،، يقدم ويوخر فالسيارة ويدير ف كلاكس شتت انتباه الكلب قعد يشبحلي من روشن سيارته .. شبحت لعيونه 🔥🔥 ومشيت نجري
وصلت للمدرسة طلعتلي خالتي ودخلتني للفصل .. درت امتحاني وطلعت حجيباتي 😅 وقعدت انقل قعمزت وراء بنت شاطرة .. كنت منحباش الرياضيات نكرهه فالدم 😂😂 باهي جاوبت الحمد لله بعد هالصبح المغبّر 🤪
طلعنا للإستراحة قعمزت أني وصاحباتي نهدرزلهم عالموقف اللي صار ..
تعرفو يا بنات قداش ميهبّل 😍😍 ححي على عيونه 🤤 ولا لحيته 🔥🔥 يشبه لتامر حسني الللللله🤤🤤
سارة / حب من أول نظرة كلب عربي
ههههه إيه هههههه
طبعا سارة صاحبتي الأنتيم 🙈
روحت من المدرسة تاعبة متهتكة صلّيت ورقدت 😴
نضت وأني نفكر ف الشاب اللي تلاقيت معاه بالصبح ❤ مش عارفة شن اللي خلاني هكي نفكر فيه برغم إن مصارش بينا كلام بس نظراته ليا أووف قعدو ف بالي 😍🤤
خشت عليا ماما قتلي إن بتمشي لحوش حناي
ماما / نوضي جهزي روحك بري معانا
لا يا ماما اعفيني تو نمشي لحوش جدي نكسد غادي
ماما/ تي امشي معاي خيرلك قداش ليك معاش مشيتي لحوش حناك ، غاديكا خالاتك متلقطين ومدايرين موالح وشاي بالعالة وتهدريز نوضي فيسع ع خاطري 😊
تمام تو إنّوض هي
مشيت وتيت روحي لبست سروال جينز غامق وبلوزة وردية وسبيركو أبيض .. قعدت ندور على وشاحي المزركش ملقيتاش .. يااااربيييه
خشت مسرة للدار لقيتها لابساته
أرمي وشاحي نبيه ع اللبسة
مسرة/ أرمي بلوزتي حتى إنتي هي 😑
ما فاتتش دقايق حتى تحولت الدار لحلبة مصارعة wwe سماك داون 🤪😂😂
خشت ماما تحز ،، ديما وإنتو تتعاركو زي الفار وقطوس
يما وشاحي يطلع عاللبسة وفيه وشاح تاني يطلع على لبستها متبيش تلبسه 😈
مسرة/ خلاص اسلبي بلوزتي
حتى انتي اسلبي سروالي
ماما/ والنبي معش تلبسو من بعض مدامكم هكي 😡
مفاتتش ثواني حتى تنازلت مسرة وعطتني وشاحي ولبسته 😂😎 وأعلن حاكم المصارعة عن فوزي بالحزام وخديت سيلفي مع جون سينا وأندرتيكر ههههههه نبصر نبببصصصر نكذب عليكم 🤪
،
،
،
اممممم لحظة شوي هوووبّا 👇🏻

خن نعرفكم بنفسي أني اسمي إلهام م 94 نقرا سنة اولى ثانوي علوم أساسية ،، شكلي يشبه لنادين نجيم حسب ميقولولي 🙈 نقشي ع رقيق بس عيوني كبار شفايفي منفوخات 😁 عاد ماهو هذا علاش يقولولي تشبهي لنادين نجيم
أني الكبيرة فعيلتي ،، وبعدها أختي مسرة م96
و منى م 2003 .. وخوي مؤيد 2010 وخوي معاد 2013 وآخر العنقود أختي ميار 2013
يعني أربعة بنات وزوز ولاد .. وأمي خيرية وبوي مختار .. نسكنو بحدا حوش جدي في وسط راس لانوف .. وصاحبتي سارة الإنتيم ❤ وباقي الشخصيات حتعرفوهم مع السرد ✌🏻🔥

_______♡■☆Kd°•Sha▪La`Bi☆■♡_______
🏵💎 روايــــات دمــــعتــي تـــــروي مــــــأســـاتــي 💎🏵

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

مشينا لحوش حنّاي كانو الصبايا وباقي العيلة ملمومين هدرزنا وضحكنا وتعشينا .. ودرت جو مع بنات خالي وخالاتي .. أصلا من موقف اليوم وأني جوّي حلووو ونحس بشعور مش مفهموم 🙈❤
روّحت وتّيت لبسي من الليل ودرت شاور .. وجففت شعري .. قعدت نرضي في مسرة اللي كانت ترقد معاي فالدار ❤😊 كنت داسة شكلاتة فتحتها وقسمتلها وطول رضت 🤪

فاتو أيام قدرت انّظم فيهم وقتي وتكررت لقاءاتي مع نفس الشاب كل صبح على طريق الثانوية .. نقعدو نتبادلو فالنظرات والإبتسامات .. وكنت فرحانة من داخلي 😍😍 بجد حبيته وخشلي خاااااطري هلبااااا بالذات لما قاللي معمريش شفت قمر يطلع الصبح 🤤🤤❤🔥🔥 ويصبّح عليا ❤🔥😍🙈

فيوم 3 مارس 2010 تأنقت زيادة عاللزوم ،، اللي كنت إنّوض بالسيف ومخاطريش نمشي للقرايا بديت انوض بكري وع مهلي ندير ف مانيكير وبدلتي محددة وشوي لمسات ميك أب وبرفيووم ريحته لآخر الدنيا ،، لبست اكسسوارات وساعة وطلعت ..
مشيت لقيته مدرّس سيارته جيهة الثانوية شبحنا بعض 😍🤤 خدودي ولّو حمر بس ثقّلت روحي وكملت طريقي
خشيت للفصل ومشّيت دوامي عادي مع صاحبتي سارة
و كان فيه حصة فاضية قعدت نقنّع ف سارة إنّ ننزلو للساحة نتمشو ونغيرو جونا .. فالبداية رفضت بس بعدين وافقت من كتر ما نلح عليها 🤪🙃
نزلنا وقعدنا نتمشو وندورو ونولو وندورو وإحني منسجمين فالقرمة 🤪😂 وكان الجو عجاج و ريح
سارة/ من كتر العجاج لين الأبلات والمدير مش ملاحظ إن طالعين وهاربين من الفصل 😂
ههههه خير من القعاد فالفصل ملّيت
سارة/ خلاص هيّا نركبو لهّومة
لالا غر خلينا🥺
سارة/ عيوني خلاص ترااااب 😤
خلينا نديرو آخر دورة ونركبو
سارة/ به 😣
رجعنا درنا آخر دورة شفنا واحد خاش من باب الساحة .. أني انصدمت 😳 كان نفس الشاب اللي كنت نتلاقى معاه كل صبح ❤

قعد يقرّب من ناحيتنا لين سارة تباعدت عليّا ومشت تجريله قعدت تسلم عليه وفرحانة تضحك وأني ركبتني ناااار 🔥🔥
زعما من وين تعرفه ومن هوا وشن يقربلها 🥺 يا ربي 😭 🔥

يتبع …❤

تقييم المستخدمون: 4.85 ( 2 أصوات)

1 2 3 4الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock