روايات كاملة

احفاد الشيطان للكاتبة زهور جمال الدين

جميع الحقوق محفوظة للكاتبة

[box type=”success” align=”” class=”” width=””]احفاد الشيطان للكاتبة زهور جمال الدين[/box]

#احفاد_الشيطان

🌷بقلم الكاتبه زهور جمال الدين🌷

الحلقه الاولي

.
.
.
حكايتنا بدت من زمان ….

سنه 77 امنه جابت ولدها ايوب فى حوش بوها
يانارى العارف راجلها رافع كريه للجبل دار حادث في الطريق توفى فى مكانه
قعدت امنه في حوش بوها تربي في ولدها، ، وكل مايجيها حد يخطب ترفض وتصر انها تبي تربي ولدها
لحد مانفد صبر بوها لانه مصر يبي يزوجها بأي طريقه

،
،
،

وبعد خمسه سنين ،،
في سنه 82 بوها شرط عليها تتزوج.. جاها راجل كان واخد اجنبيه زمان لما مشى يقرى فى روسيا ..قعد معاها اربع سنين ومادارش منها صغار ..ولما روح امه قالتله على امنه .. عالاقل جايب صغار وفى الاكيد تحمل

-امنه / كيف يابوي تشرط عليا نتزوج ..وايوب ولدي كيف تبيني نسيبه والله مانقدر
-محمود خوها/ ولدك راجل يا امنه وسيروه يكبر وايدير عويلة
امنه/ وين بنخليه وكيف بندير راهو كبدي
-عمك صالح بوها / اعطيه لحناه من اول امس مشيتلها وخبرتها وقالت ولد ولدي جيبوهولي انا نربيه
– امنه/ يابوي حناه سالمة واعرة وحتي اقاربها وجيرانها مايحبوهاش من وعارتها،، كيف تبين نعطيها ولدي تربيهولي
-محمود / ولدك امتي ماتبي نجيبوهولك هنايا وتشبحيه وتربيه وتعلميه وتوريه
-امنه تبكي/ ياحليلي، ،، ياناس خيره حظي هكي من دون اندادي

______________________________________

بعد عام ايوب طق 6 سنوات ، ،،،،

خداته حناه سالمه من العام اللى فات من لما تزوجت امه بيش يقعد معاها
دارله خاله محمود ملف وحطه في المدرسه القريبه من حوش حناه
سالمه مكسوبها زوز اولاد العارف واسماعيل
العارف توفي واسماعيل عزري مسافر يقرا في امريكا عجبه الجو معش روح ومقطوع عليهم اخباره مايعرفو عليه شي
لا اخبار ولا تليفون

الله غالب عمتك سالمه مراءة مكنديه،،، وتمووووت في المشاكل موت تحب تتعارك مع تريس الشارع وتكبر معاهم دوة

توووة كيف مكمله عركه مع عمك رجب جارهم

-رجب/ تي عيب عليك يا حاجه الكلام اللي تقولي فيه..رانا جيران ..والنبى وصى على سابع جار
-سالمه/ عيب عليا انا ماهو، ،، عيب عليك انت وولدك تضربو ايوب ولدي يا عيلة امسخين يا علية فليت
وبدت تدعى يعطيكم ويجيكم 😁😁
-الطاهر جارهم/ يا حاجه سالمه صلاتك عالهادي،،، توة انتي حاجه بيت الله عيب تكبري كلام مع جارك هكي هدا زي ولدك
-سالمه/ اجعني نعقم قبل مانجيب ضناوي سو زيكم يا جيران العازة

ادن العصر / الله اكبر

– رجب / نوض يا طاهر نمشو للجامع العصر يأدن،، توة علي زوز فرخ اتعاركو دايرتلنا الغبارة هادي كلها
-سالمه/ ريتها الغبارة في وجهك يا ولدالحرام

مشو رجب والطاهر وهما ايتمتمو / موعرها،، تقول للشر انزل ولا نركبلك، ،،،، ربي يهديها

خدت عمتك سالمه ايوب في يدها وخشت بيه للحوش

-سالمه/ هها ريت، ، ريتهم كيف يكرهونا زي ماحكيتلك ولا
-ايوب / ايه شفتهم يا حناي، ، كلهم يكرهونا، ،،،
-سالمه فرحانه/ نبيك تضرب صغارهم كلهك وتغلبهم
…ماتحلى حد منهم يغلبك
-ايوب/حتي انا نكرههم يا حناي وصغارهم لما نقتلهم بالضرب
– سالمه فرحانه/ ايوووه سلم ولدي

————————–————————–——–

وفاتت 4 سنوات
سنه 87

ايوب وصل للصف الخامس، ،،
طالع عدواني من كثر ماتزن حناه علي راسه
دايرينه كوماندا في الفصل
مش غير في الفصل بس، ،، بل بالعكس حتي في المدرسه كلها
مايغلبه حد كان شد ولد وضربه ايخليه هوا والوطا سوا،،، عنده قوة جسديه الله ايبارك، ،بالرغم ربي عاطيه الزين،، لكن الخوف واضح في عيون المدرسه كلها والجيران منه

العام هدا تعرف علي ولديقرا معاه مقعمز في جنبه يقولوله زكريا
بدي الرايس ايوب ، ، وزكريا يده اليمين والتابع متعه
فرخ زكريا حتي هوا مشراني وايده والضرب،،، كانا لقي عركه يخشها يجري تقول زكرة بيرقص فيها

اما عمتك امنه متأثرة وتبكي انها معش تشوف في ولدها

-صالح/ ياودي الفرخ مش متربي حناه سالمه رباته ربايه ناتنه
-امنه تبكي/ توة جاي تقولي في الكلام هدا يا بوي
-صالح / ماكنتش نحسابه بتشربه من حقدها وسمها
-امنه /انا غير ايجيني بس ونشوفه، ، حتي الحسن والحسين خوته يسالو ويقولولى وينه خونا اللى اسمه ايوب
-سالم / توة هما صغار حتي المدرسه مازالو ماخشوهاش وينشدو علي خوهم
امنه تبكي علي ولدها وخلاص

————————–————————–

بعد عامين في بدايه سنه 89
ايوب يقرا سنه اولي اعدادي

كبر شوى وبدى يفهم …ونوعا ما تخلص من تحكم حناه فيه
…وبدى عارف ان معاملته مع الناس كلها غلط ..لان قرر يخدم مادوره حد من جيرانه ..اولا مزال صغير ثانيا يخافو من عمتك سالمه ..لقى ولاد الجيران كلهم يتحاشو فيه خايفيين من المشاكل…

دار برويطه منغير مايقول لحناه سالمه وبدي يخدم في سوق الخضرا الزبون اللي ياخد بضاعه يحطهاله ايوب في البرويطه
ويوصلها لسيارته….
لحد ماشافه عمك عبدالنبي جارهم،، سخف عليه وقرر انه يكورج ويخدمه معاه بياع

استلم ايوب شغله وقرر انه يبطل القراية ويلهي بخدمة سوق الخضرة

ولما سمعت حناه دارت حاله

-حناه سالمه / لاه يا وليدي بتبطل قرايتك،،، مش قلتلك نبيك تكتور زي احمد ولد سعد جارنا الله لا تربحهم اكل
-ايوب / ياودي لا دكتور لا دوة زايدة ،، انا بنخدم علي راسي ياحناي بندير قرش زي الشباب
-سالمه تبكي/ تعيط عليا يا ايوب،،، ماناقص غير ترضبني
-ايوب مايتحملش زعلها جاها باس علي راسها / تي كيف نكشخ عليك يا حناي،، انا قلتلك نبي نخدم وندير فلوس ماعيطش ..نكلم فيك بالعقل
-سالمه/ ومالقيت مع من تخدم غير مع عبدالنبي اللي ديما حاط راسه من راسي ويعارك فيا
-ايوب/ ياحناي عمي عبدالنبي راس قوى في السوق والخدمه معاه فيها فلوس
-سالمه تبكي/ تقول فيها في وجهي كلمت عمي ،، نقولك ايعارك فياوانت تقوله هكي
-ايشالي في ايديه/ باهي كيف ندير،،، انبطل،،، مانديرش فلوس
-سالمه/ اخدم مع اللي يعجبك،، الا هالبسطارديه جيرانا

-ايوب / خلاص امالا زكريا صاحبي بوه فاتح لاوادجو متع غسيل سيارات بنمشي نخدم معاه

العزوز مصرة انه يبطل الخدمه و تبيه يقرا وياخد شهادة
…لكنها اتقدرش تغلبه، ،، ولدلك كلمت خاله محمود ايجي ايدير حل مع ولد اخته، ، هيا مش نيتها القرايه،،هيا المهم الجيران مايتشمتوش فيهاوايقولو ولدها بطل وخدمناه عندنا

خاله محمود مرة ايكشخ ومرة ايسايس،، واقنع ايوب انه عالاقل ياخد الشهادة الاعداديه،،، مدامه معاش بوه متع الضمان مستمر وحناه تصرف عليه منه

اقتنع ايوب ،،، بس شرط عليهم يخدم في اللوادجو كل خميس وجمعه، ، وكمل قرايته وسكت، ، علي اساس عامين ويبدا في الخدمه بالرسمي هوا وجماعته

وفي اللوادجو تعرف علي موسي،،، ولدمبطل من قرايته وايدور من خدمه لخدمه،،تصاحب هوا وياه ودارو قروب يد وحدة هما الثلاثه ايوب وزكريا وموسي
————————–————————–—–

في نفس العام سنه 89 في بدايتها …..

حوش عمك ابراهيم طلعت منه اصوات زغاريت

والجيران كلهم انتبهو،، وبدت التليفونات الارضيه تخبط
زعما شنو في،،، والزغاريت علاش

طلع عمك ابراهيم من الحوش يمسح في دموعه

– الصادق جارهم / انشالله بالبركه يا براهيم ،، انشالله خير نسمعو في الحاجه امك اتزغرت وتلمدو عليه تريس جيرانه

– براهيم يمسح في دموعه / الحمدلله ربي أءدن واعطاني
– عبد الواحد جاره😍/ قصدك؟؟
-براهيم / ايه الحمد لله العيلة طلعت حامل

وبدو جيرانه اللي ايكبر واللي ايهلل / الحمدلله ياابراهيم ربي ماينسي حد
-صالح جارهم الجديد/ الف مبروك خوي ابراهيم ..، قداش ليك عام تراجي في الضنوة
-ابراهيم / 19 عام وانا نجري لا خليت دكاترة ولا خليت شيوخ قران ،،،
-مبروك/ ياسبحان الله،،، امس العيلة عندي اتكلم فيا وقالتلي ان اهلك يبوني نقنعك تخطب وتتزوج
-ابراهيم يمسح في دموعه / مهبوله،،، نسمع فيها كل يوم اتقول لامي كلميه، ، واتصلت حتي بخواتي بيش رجالاتهم ايكلموني .. لكن الحمدلله العاطى حى وربي ماينسى حد
،
،
،

والنساوين جاراتهم كل وحدة لبست فراشيتها واتسقدت لحوش خيريه مرت ابراهيم

وبدت صوت الزغاريت متع الفرح، ،،اللي تخش تسمع بالحمل اطيح اتزغرت، ، كلهم فرحولها

– الحاجه فاطمه عزوزتها / الحمد لله يا ربي اللي طعم وليدي وبل ريق بنية خوي
– سميرة جارتهم / مش قلتلك يا حاجه،،، من اول يوم كلمتني
،،. ووصيتيني نقول لراجلي علي موضوع الزواج عرفتها بتحمل
-الحاجه فاطمه / ارحامها نغرو يا حنه،،، ورحمها رفع
-ربيعه جارتها / الحمد لله يارب

ابراهيم وخيريه متزوجين ليهم 19 عام ،،، ابراهيم من مواليد سنه 1938 ،، وخيريه مواليد سنه 50،، هوا يكون ولد عمتها، ،،تزوجو سنه 70 ،، خيريه وقتها عمرها 20 عام، ، لكن ربي ماكتبش بالصغار، ،،وتوة لما عمرها 39 عام حملت،، شورها يانارى وجعها خاطرها من كثر نقان النساوين عليها في قولت زوجي راجلك خليه ايدير عويلة

————————–————————–—-

كملت السنه ومشي حمل خيريه علي خير ، ،،
وفي يوم 31/12/89

جابت بنت،،، اول فرحتها وفرحت راجلها

وماخلي عمك براهيم من عزم في العقيقه اللي دارهالها
دبح خرفان ودار غدي كبير، ،، وجيرانه جابوله زكرة هديه قعدت تخبط في الشارع والكل يرقص
حتي عمك ابراهيم اللي عمره في الواحد و الخمسين وشعره كله شيب رقصوه، ،، وهوا فرحان ويضحك، ، ماعاطي فرحته لحد
،
،
،
اما في الحوش النساوين كلها اتعول
جتهم ناس ماتوقعوهاش اتجي،،،، زمان الناس اتجي من نفسها عيب النافس تعزم
عالمهم تخلطت عليهم من كل مكان اقارب واحباب وجيران

-الخامسه جارتهم / شن سميتوها يا خيريه
-خيريه / عمتى فاطمه حناها هيا اللى سمتها …سمتها روقيه
-الخامسه / سلم حناها، ، وانشالله بنيتكم طويلة عمر
،
،
وكبرت روقيه ،،،،
سنه 94 وصل عمرها 5 سنوات، ،، وامهاماحملتش بعدها

لما تلعب في الشارع ضروري بوها يقعد جنبها زي الحارس، ،، يخاف عليها من النسمه الطايرة
تعلق بيها هلبا، ،، والبنيه تعلقت بي بوها

مقعمزين الرجاله عالمرشابيدى …ويبانو الصغار يلعبو مش بعاد عليهم ..وابراهيم منتبه غير مع بنته

وهيا تلعب في النقيزة من بعيد وتشاورله / بووووي ،،، شوفني يا بابا دوري قريب راهو
-ابراهيم / نشبح فيك يابابا،،، سلم بنتي

وشرب من طاسه الشاهى/ هالشاهى نوعه باهى..منين خديته ياسالم خلى نشري منه
-سالم / الشاهى باهى وحتي حقه باهي يا سى ابراهيم
-على/ الله غالب السلعه ولت نار..والله ماعاد ملحقين على حاجه
-سالم / اهو لينا عامين واحنا نعانو .. من سنه 92 واحنا نعانو بعد حكايه فرض الحصار علي ليبيا… قلة بضاعه وغلى اسعار
-عبدالواحد / ياودى الحكومة كانا فيها واحد عاقل.. راهو سلم اللى متهمينهم فى القضيه .. وفكنا من هالعازة اللي احنا فيها توة
-ابراهيم / نقص صوتك يا عبدالواحد الحيطان ليها اودان
..وبعتالى بالك مضلموين كيف ايسلموهم
-عبدالواحد / مش غير بالك …انا متاكد انهم مضلموين ..لكن الله غالب هاك تشوف فى الحال …مش عيب كانا زوز بس ضحو على خاطر بلاد وشعب كامل
-علي/ تصدقوني يا جماعه الخير .. قصة الطيارة اللى دارونا على خاطرها الحصار والله مافهمتها مرة يقولو اسمها البانام ومرة يقولو اسمها لوكربي معش عرفت
وتلفت للصغار / معش تتعاركو انت وياه
-عبدالواحد/ الطيارة اسمها البانام زى ما انت اسمك علي.. والمنطقه اللى طاحت فيها اسمها لوكربي ..ومتهمين زوز انفار ليبيين قالو هما اللي طيحوها… ويا سيدى متاعينا هنايا مابوش ايسلموهم..وصار علينا الحصار
-سالم / بي بي تو زوز ليبيين بيطيحو طيااارة … ياودى الكلام بعيد على بعضه
-على / بعيد ولا قريب احنا فيش جينا ..شعب كامل يتعدب علي خاطر نفرين ..تو هدا كلام ..
-سالم / الله غالب يا صاحبي لا طيارات اطير .. ولا سلع اتخشنا مدعومه …تبهدلنا ياراجل
-عبدالواحد/ هدا اللى انقول فيه انا ..وابراهيم ايسكت فيا من بكرى ويقولى الحيوط عندها اودان
-على/ لاااا عندك الحق فى اللى قلته كله ياعبودة
-سالم / هوينا بدو ايبهو فى ارواحهم عالاقل مع الافريقان .. قالو بيردو الخط الحدودى متع تشاد…. المنطقه اللى دارو عليها حرب زمان وخدوها .. اسمها اوزو
-على/ امالا بيخليها ناتنه معاها كلها عالاقل ايسمح وجهه مع جيرانه
-ابراهيم / هييييه … حرب اوزو فى 73 زمان راحت فيها تريس .. زوز اقاربى ماتو فيها …واحد صغاره يتيمو والثانى شاب عزرى …امه تبكى عليه لتوة
-سالم / شوف يا سبحان الله من 73 الى 94 …عمر 21 عام
-عبدالواحد / بعد 21 عام يجو هما بقرار ايردوها لتشاد .
…ودم التريس كله يمشى هدر
-علي/ ياودى البلاد هادى كل يوم براى
-عبدالواحد / قول البلاد انهردت
-ابراهيم / ياناس فكونا من هالكلام توة يجى ولد حرام فايت لاويتنا فى دار خالتك

روقيه تشاور لبوها / بابااااا اهو بنلعب

تلفتلها ابراهيم / نشبح فيك بنتى

… وحدفت الرشادة وبدفها برجلها انحدفت منها بعيد
بدو البنات ايطلعو فيها / اطلعي يا روقيه خسرتي

ناض بوها يجري / لا لا توة دورها عاااد كيف اطلعوها
-عبير بنت جيرانهم قالبه عيونها/ خسرت خلاص ياعمي ابراهيم،، توة دوري انا ليش النغرة
-روقيه تبكي/ الرشادة انحدفت مني بعيد،هيا بروحها مشت انا قاعدة كيف مسيتها هيا طول انحدفت
-ابراهيم / صادقه يابابا شفتها لما نحدفت
وتلفت لعبير / خلاص سلم بنتي،، خلي اختك روقيه تلعب الشوط هدا وبعدها على طول انتي،

سمعو صوت من وراهم سالم بو عبير ينادي/ يا عبير خلي بنت عمك تلعب معليشي بنتي
-عبير/ اوووف باهي العبي وكانا طحتي مادخليش بتطلعى راهو
-روقيه ابتسمت / باهي،
-ابراهيم يمسحلها في دموعها/ معش تبكي يابابا

ومشي قعمز جنب جيرانه وصب طاسه شاهي جديدة ،
-عبدالواحد جاره يضحك/ يعني لازم تنغر يا ابراهيم في لعب الصغار…. مش متحمل ايطلعوها ويقولولها خسرتي
ابراهيم يشرب في الشاهى ويضحك
-علي😁/ تو البنيه ساكته، ،، وهوا اللي نغر
-ابراهيم يضحك/ ياوخييني والله مانقدر نتحمل دموعها،،، كانت بكت ومعش سكتت احتمال تلقوني نبكي وراها
-علي/ لاااا كل شى الا رورو
-سالم / منو رورو هادى
-عبدالواحد / شنو متعرفهاش ..على جارك ايدلع فى روقيه
-على / انا والله الا عاجبتنى البنت واحتمال ناخدها لولدى منير
-ابراهم / ياودى هادى راس بنيه مكسوبى..بنشرط فيها هلبا
-على /اشرط وزى مايعجبك حقك
-سالم / ماهو كانا خديت راينا ياابراهيم ومشيت جبت مراءة ثانيه علي سنه الله ورسوله وسكنتها معاكم في نفس الحوش راك توة داير عيلة وخوتها يلعبو معاها
-ابراهيم يشبح لروقيه / توة بالله عليكم انا كنت نحلم بي هالبنيه اللي تلعب قدامي،،،
باس ايده وجه وضهر / الحمدلله ربي عطاني،،، غير تكبر ونزوجها ونشوف صغارها ماعاد نبي شي

صلاح ولد سالم جاره جي يجري / عمي ابراهيم قالتلك عمتي فاطمه تعاله اجري عمتي خيريه داخت

ومشي ابراهيم قام منال في غمره وبسرعه خش يجرى للحوش وجيرانه في جرته قعدو فم الباب

خش متلهف/ خيرها خيريه يااام
-خيريه باخين عليها اميه / مافيا شي يا ابراهيم غير دوخه بسيطه
-روقيه تبكي/ خيرك يااااام ،،
– خيريه /مافيا شي يانور عيوني تعالي

خدتها وقعمزتها في حضنها،،،

-ابراهيم مشغول /نوضي،،، نوضي نرفعك للمستوصف نعاينك
– خيريه / والله مافيا حاجه يا ابراهيم غير تعب بسيط
-ابراهيم بحزم/ قلتلك نوضي
-عمتك فاطمه / نوضي يابنيتي البسي جلابيتك وبري عايني
.. اكيدة عندك هبوط ليك فترة ماتاكليش
-ابراهيم تلفت لامه / خلي روقيه معاك يمى
-فاطمه / باهي غير سقدو بس

وبالفعل ناضت خيريه لبست جلابيتها
وطلع ابراهيم للشارع لقي جيرانه واقفين ايراجو فيه
جوه كلهم ينشدو

-ابراهيم / مافي شي غير دوخه بسيطه واهو بنرفعها نعاينها

وبالفعل طلعت خيريه مع ابراهيم ومشو المستوصف

ونساوين الجيران سمعو من تريسهم خشو للحاجه فاطمه ينشدو

بعد ساعه روح ابراهيم درس السياره ونزلت خيريه مبتسمه وبدي هوا اينزل في الشكاير وايدخل

والفرحه باينه عليه، ،،،
وبدت صوت الزغاريت تطلع من الحوش..عمتك فاطمه وجاراتها حشيشتهم تزغريط عاد😁

-عبدالواحد/ فرحونا معاكم يا جماعه شن في
-ابراهيم / اللهم لك الحمد العيله حامل

جيرانه في صوت واحد كلها تبارك

-روقيه جنب بوها / هادو شنو الشكاير يا بوى
-ابراهم /هادو لحم وخضرة علي سلامت امك يا بنتي

————————–————————–——–

وفااات عاااام كامل سنه 95

خيريه جابت زوز توامه بنات سماهم بوهم سهام وسماح

ودارلهم غدى دندانى نفس غدى اختهم روقيه

الجيران كلها متلمدة فى المربوعه

-عبدالواحد يوشوش لى ابراهيم / كانا جوك ولاد راهو العيد عيدين
-ابراهيم / والله العظيم ولاد ولا بنات واحد عندى .. ماهو كنت نحلم بيهم انا هالضنوة هادى كلها
-على / ميزتك قنوع يا ابراهيم ربي يحفظهم ليك ويتربو فى عزك
-ابراهيم / مش حكايه قنوع ..ياناس راكم ماجربتوش العقم ربي يبعده عليكم …والله فرحان بيهم صحاح ..فرحان بيهم عندهم اعاقه..كان جوني بنات ..كان جونى ولاد … اقسم بالله اللى رفع السمى عالوطا انها نفس الفرحه
-سالم / ربي يهنيك بيهم ويهنيهم بيك انشالله
-ابراهيم / ربي يحفظكم جميعا

___________________________________

اماايوب فى سنه 95 صار عمره 18 سنه

خدى الشهادة الاعداديه قبل ثلاثه سنين وبعدها وقف القراية
…قد ماشدت فيه حناه يكمل وهوا شى رافض يبي يخدم يدير قرش … وحتى الشهادة الاعداديه ماخداها لين حناه قريب نبت فى لسانها الشيب …هيا يانارى كانت تبيه يطلع تكتور على رايها 😁

كبر ايوب وبدى ماشالله شاب عزرى حناه فرحانه بيه قريب اطير

بالرغم انه غلبها وقعد يخدم … ورايس فى خدمته…
داير محل مواد غدائيه … وجايب معاه موسى وزكريا يعطى فيهم فى معاشات …واحد يخدم الصبح وواحد العشيه..
وهوا لاهى يمشى فى السفينه يجيب فى البضاعه من مالطا دخان المالبورو على نسكافيه على شكلاطه على عصير تانج
وماشيه اموره

امه زادت عليها بنيه سمتها ايناس.. وعلى قد مابعتتله ايجيها وهوا شى لا مشى لا شاف اخته
مزال واجعه خاطره منها … حسها لوحاته ودارت عيله ثانيه مهتمه بيها ..بالرغم يانارى مش دنبها

وبعد 6 شهور …

حناه سالمه قررت تمشى للحج مع المبروك ولد اختها
ماشى فى طيارة التحدى اللى مشت زمان للحج وقت فرض العقوبات…

-ايوب / توة هدا كلام يا حناى..اناى حاجه قبل …علاش مصرة تمشى مرة ثانيه للحج … الطيارة بالك حتى يضربوها بصاروخ لا قدر الله تجى طايحه
-المبروك / بالك تقول ولد خوها شد فيها ولا حاجه ..والله قلتلها يا ايوب ..المشيه واعرة وحتى امى خافت ومابتش تمشى معاى
-سالمه / وجعتولى راسى من بكرى وانتو تنقو عليا …قلتلكم بنمشى يعنى بنمشى…مدامه ولد خوى مش متزوج وامه مابتش تمشى معاه والمكان قعد فاضى
-ايوب متعصب/ يعنى هما خافو على ارواحهم واصغارهم وقعدو وانتى مستبيعتنى ياحناى
-شبحتله / هاك راجل هكى طولك هكى عرضك …كانا متت الحوش هدا نصه ليك مايطلعك منه حد ..وكانى قعدت حيه تو نجيبلك جلابيه وسبحه معاى😁
-ايوب قعمز جنبها / ماتقوليش هكى طويله عمر انشالله…
وتلفت للمبروك / شوفها هى انا اعصابى محروقات وهيا تنكت عليا وتبصر
-سالمه / ماعندك علاش تحرق فى اعصابك ..قولى زينه لانى ماشيه ..شنو بتحكم فيا انت توة حتى جدك زمان ماحكمش فيا

وبالفعل مشت عمتك سالمه مع ولد خوها فى طيارة التحدى

ماوصلت الطيارة للسعوديه وروحت …الا والناس حاطه ايديها على قلوبها …توقعو امريكا تبعتلها صاروخ تفجرها وهيا فى الجو

فى التسعينات كان الشعب الليبي مضغوط بسبب الحصار .. وصارت مجموعه ضغوطات ثانيه بعدها فى الالفينات بسبب قيام الاتحاد الافريقى وفلوسنا اللى ينصرفو برة ليبيا

المهم عمتى سالمه كملت فروضها وغسلت دنوبها وروحت

ماخلت ماجابت ..مانست حد …بالرغم حرفه صرفه مع جيرانها واقاربها اكل …لكن الحج ليه رونق ثانى عاااد …زمان الناس تجيب فى سبح وصلايات وجلابيب … وفى من يجيب حتى فى الدهب

الناس ماشيه جايه عاااد تبارك عالحج… وايوب لابس جلابيه قنينه جايبتهاله حناه ويستقبل فى الضيوف

وجت امنه امايوب تهنى فى عمتك سالمه عالحج …جايبه معاها صغارها

حطها راجلها فم الباب ومشى ..مايبيش يحرج روحه مع ايوب عارفه ماعنداش ليه جو

-امنه / ايووب ..تعالة وليدى خيرك سلم على خوتك
-ايوب/ سلمت عليهم من بكرى …اهو نعاود انسلم
“يساير فيها ”
مد يده للحسن والحسين …سلمو عليه مرة ثانيه وهما يضحكو ..
-ايوب / فيش تقرو انتو توة
-حسن / انا نقرا صف السادس
-حسين / وانا نقرا صف الخامس
-امنه / وهادى اختك ايناس عمرها سته شهور

-ايوب فوق النفس / ربي يحفظها
-مدتهاله / هاك خودها سلم عليها

خداها منها قامها بين ايديه ..البنيه زى العسل وتمسله فى وجهه وتضحك
خلاها فى غمرها ورفعها معاه للمربوعه …
وتلفت لخوته / تعالو معاى مربوعه التريس

مشو وراه …وامهم تشبحلهم الثلاثه وفرحانه

________________________________________

وفاتت الايام …..

سنه 96 حملت خيريه مرة ثانيه وجابت بنوته سموها مرام اللى سمتها اختها روقيه

وصارت هلباااااا احداث فى ليبيا …ومشت السنين

وخشينا الالفين ….

وبدت الناس افضل حال …الاعراس فى الصالات … والفيلو بدى ايجار صعب البنت تشريه بدى غالى

بالرغم فترة الحصار تمت مع سنه 98

وفاتت السنين …….

سنه 2003 خيريه مرت ابراهيم مرضت هلبا …رفعها لتونس
… هيا جاها الورم غير الناس زمان ماتعرفاش المرض العافن هدا الله يلعنه
وقتها روقيه كان عمرها 14 سنه …تقرا فى ثانيه اعدادى
خواتها التوامه صغار اعمارهم 8 سنوات يقرو ثالث ابدائي … اما مرام عمرها 7 سنوات تقرا ثانى ابدائي ..اصدمت بواقع الحياة انها لازم تعتمد على نفسها وتقيم الحوش
طياب على ضمان على غسل اماعين على كنس …تعلم فى خواتها كيف ايعاونوها لكن مش معتمدة عليهم

سنه 2004 توفت خيريه 💔
حزن عليها راجلها وصغارها والشارع كله …هيا نارى مش كبيرة هلبا عمرها 54 عام …غير المرض فيسع ما انتشر فيها

زادت ثقه روقيه فى نفسها انها هيا اساس الحوس والعمود اللى متكيين عليه كلهم

سنه 2007 …

بوها عمرها 68 سنه …كهل كبير …مرة مرة ايقعمز عالمرشابيدى فى الشارع..ولما تخاف عليه روقيه انه يستبرد اتناديه ايخش لداخل

الحياة صارت عاديه وتعودو على فراق امهم …
عمك ابراهيم ايحب البحر .. لما يلمدو بعضهم جيرانه ويمشو
…لااااازم ايشد فى روقيه ترفعه معاهم …دايرين لى سماح سيارة لان روقيه ماتبيش اتسوق
تقعد سهام مع حناها وهما يمشو للبحر

وطول ماهما فى البحر ولا فى اى مكان يطلعوله تلقيها مقعمزة تراقب فى بوها وراده بالها منه وخلاص …زى ماكان هوا زمان ايراقب فيها وراد باله منها
دخله صلاح ولد سالم جارهم للبحر …وهيا تراقب فيه وخلاص بعد ربع سساعه وقفت عالشط
-روقيه تنادى وتشاور لبوها / بوووى هيا اطلع صقع عليك الجو برد
ويبان من البحر صلاح شاد عمه ابراهيم وايطلع فيه من يده وصل للشط
ومدت روقيه يدها لبوها وتلفتت لصلاح/ صحيت
-صلاح / غير ارضى علينا بس

خدت روقيه بوها ودارت روحها ماسمعتاش

وجت 2011 💔💔💔

…..ايوب عمره 34 سنه …فى عزززز النضج والشباب

لكن البلاد فترتها صايرة فيها بلبله

الناس تحكى يقولو فى شهر فبراير بيديرو ثوره على النظام
ناس مكدبه وناس مصدقه ..ناس امأيده وناس معارضه

فى من جيران تعاركو ..وفى من نساوين اطلقو ..وفى من بنات فسخو ..وهدا كله على سبى مؤيد ومعارض

ياما صار فيك ياليبيا هاديكه الفترةة
انا وحدة من الناس خطتنى رصاصه ..لو زاحت 2 ملى بس رانى توة ميته 😁😁😁..ولا تقرو فى كتاباتى ولا هم يحزنون 😊😊

“ومانبوش نخوضو فى ايامات الثورة واللى صار فيها خير مانتعاركو فى التعليقات 😁😁..بالرغم والله متاكدة منكم راااااقييييياااات ”

__________________________________

فى حوش ابراهيم

روقيه وقتها عمرها 22 سنه .. كيف تخرجت من معهد المعلمات
تبى تحقق حلم بوها وامها بان بنتهم تطلع مدرسه ثانوى وتقري اجيال

لكن بوها وحناها كبرو هلبا …بوها عمره 72 سنه …وحناها فى التسعينات بدت تنسى وتودر…العيلة كلها نستها ..ماعدا وولدها ابراهيم …وحفيدتها روقيه

روقيه واهبه نفسها لخدمه بوها وحناها وخواتها بس …
وفى وقت الجديات والعوالة تلقاها هيا بس لاهيا ببوها وحناها مش مدورة خواتها …
وحتى هما مايحبوش الحاجه الا من ايدها هيا بس

بالنسبه ل حناهم فاطمه رايحه زى الكمشه تاكل وتشرب وخلاص شادة تركينتها

التوامه سهام وسماح هايمات مع احمد ومعاد صغار خالتهم
زوز خوت ويبو ياخدوهم هما زوز خوات

خالتهم امكلمه امهم عليهم من لما كانت حيه وهما كانو صغار ….لكن راجلها مزال مامشاش لبوهم
والمشكلة ان بعد ماقامت الثورة كل الامور عند الناس توقفت
الناس كلها خايفه وتترقب بس

وصل شهر فبراير وبالفعل قامت الثورة

ايام سود مشو عالشعب الليبي الله لاتردهم …الناس فى كآبه
المؤيد والمعارض جالس ورا شاشات التلفزيون ويترقب
…ناس شادتها عالجزيرة وناس شادتها على قناة الخضراء
..والكل حالته النفسيه زفته عالوضع اللى صاير فى البلاد ليبي يقتل فى خوه الليبي

وفاتو ايام …وفى يوم 20 فراير

فى حوش الحاجه سالمه ايوب صلى ولبس حوايجه وبيطلع

عمتك سالمه / سلم اوليدى رد بالك من الهدرزة الزايدة ماتقولش حتى كلمه ..احنا لا معا هدا ولا مع هدا ..وكان تخليه الدكان بلا فتح خير
-ايوب / تى كيف بلا فتح يا حناى..ناكلو التراب امالا ..اهو فتحته امس واولامس شن صار …تى حتى النت والفيس سكروهم على شن بنكسد
-سالمه / المهم اهو وصيتك سلم وليدى هنينى

وبالفعل طلع ايوب خدى تاكسى ومشى لمحله متع المواد الغدائية اللى جهه ميدان الغزالة وفتحه

طول اليوم مافى شى …صح الناس شويا واكثرها شادة حياشها … لكن اهو عالاقل ايطلع فى حق الايجار

قيس المغرب صارت هيجه جيهه ميدان الشهداء
سكر ايوب محله وطلع يجرى يشبح شن فى …وزكريا وموسى فى جرته

لقو الشباب يتعايطو ..القدافى هرب لى فنزويلا …القدافى هرب وماسكين صوره ويحرقو فيها
شباب صغير ومشاعرهم غلبتهم …وقت اللى سمعو الخبر المؤيد والمعارض خدو صورة القدافى وبدو يحرقو فيها
والشباب كلها تصور بالتليفونات ..بالرغم مافيش فيس لكن اهو ايصورو وخلاص
شد ايوب صورة وبدى يحرق فيها زيه زى الناس
ويعيط / البوعا هرب …. البوعا شيط لى فنزويلا
“زمان الناس اللى تخاف تقول البوعا ع القدافى”

والاولاد يصورو فيه وفى غيره بالموبايلات

المهم فالاخير جتهم الشرطه وفرقتهم وكلهم هربو …وبالفعل حتى ايوب هرب من الشرطه ومالحقوش عليه هوا وزكريا وموسى … روح للحوش لا سو لا سوية ..وبطل من فتح الدكان
.
.
.
بعدها طلع القدافى يوم 21 وكدب الاشاعات …ودار خطابه الشهير زنقه زنقه
وحتى فى 2 مارس خطب وضاعف للشعب معاشاته
.
.
.

نهايه شهر 3

شوره واحد من الاولاد اللى كانو ايصورو فى ليله لما قالو عالقدافى هرب طالع لتونس دهوارى هوا وجماعته ..
لقى شباب ليبيين معارضين مقعمزين فى قهوة وينزلو فى صور عالفيس

ادكر هادوكا الفيدوات اللى صورهم …قاللهم حتى انا عندى فيدوات ..طلع التليفون وعطاهولهم …
وتكمو الشباب هادوكا الصور ونزلوهم عالفيس
واحد من الفيدوات طالع فيه عمى ايوب وهوا يحرق فى الصورة ويقول البوعا هرب
.
.
انتشرت الفيدوات اللى نزلوهم الشباب …وبدت متداولة …

الامن الليبي شافو الفيدوات على قناة الجزيرة

وقعدو ايدور عالشباب اللى تحرق فى الصورة فى الفيدوات

والمشكلة ان ايوب وجهه طالع وهوا يحرق معاهم …وصلو لاسمه …وخدو نعتت دكانه …ومن نعتت دكانه وصلو لحوشه

مشو ايطقطقو فتحت حناه

الفندى/ هدا حوش ايوب يا حاجه
-سالمه ترعش / ايه حوشه …وانتو منو لابسين شرطه وجايينه .. ..خيره ايوب ولدى شن داير
-الفندى /هوا وين يا حاجه
-سالمه خافت / ايوب مهناش فى الحوش …بايت برة من امس

وجى صوت ايوب من داخل / منو عالباب يا حناى
-الفندى / خشو هاتوه
خشو اللى معاه للحوش شدو ايوب شلابيخ وتيروات / اطلع يا امصخ …اطلع وانت ساكت

وايوب مش فاهم خيرهم ولا هما منهما …

وخلى حناه وراه تعطى فيه بواصى

________________________________________

تمت ويتبع

ماتستعجلوش …القصه لتوة مزال مش باينه …غدوة نشوفو ايوب لما بيحققو معاه
وكيف بيتعرف على روقيه

وللعلم مش حنسامح اى وحدة قرت الحلقه ومانورتنيش بتعليق

نحبككككم

1 2 3 4 5 6 7 8 9 10 11الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock