روايات كاملة
أخر الأخبار

انتقام ولكن

بقلم Koka Saleh جميع الحقوق محفوظة

 

 

#انـتـقـام_ولـگـن
الـحـلـقة (1)
گـتـابـتـي #Koka_Saleh
“”””””””””””””””””””””””””“””””””””””””
فانزاتي السمحات شكرا الكل وحدة هنتي وباركتلي بجد انحبكم كلكم وفرحانة اني خذيت الترتيب الأول وطلعت عند حسن ضنكن وطلعت نستحق كلامكن ونشجيعكن ليا ?
كملت رواية #حكم_القدر وعارفة نهايتها حزينة وتقهر واسفة عالنهاية البشعة هذي بس هذي النهاية الحقيقية اللي صارت وكله مقدر ومكتوب من عند ربي ولااعتراض علي حكم الله
المهم ان توا ردينا برواية جدية ان شاءلله تعجبكم واتحبوها ونرقى بيها للمرحلة الثانية لان هالمرة امتحان اصعب لازم اتكون رواية قوية بمستوى الاولى وانحاول بقد مانقدر تقعد قريبة مالواقع ?
روايتنا تحكي علي قصة بنت طيبة تتغير حياتها بسبب خوها ولا انقوللكن مش حاكية شيئ خلنا نقرو مع بعضنا وانشوفو تطور الاحداث مع بعضنا
#كوكا_اتحبكم_وحق_ربي?
خلونا نبدو في قصتنا هي توكلنا عالله ??
:::::::::::::::::::::::::::::::::::::::::::::::::::::::::::::::::::::
في صباح يوم مشروق وتحديدا الساعة 9:30 الصبح
عمران في داره ويحكي مع أسيل
عمران:تي كنك ياحبي مش واثقة فيا ولا شنو
أسيل:لا واثقة فيك بس
عمران:بس شنو ياقلبي انا قتلك ناوي الحلال ونبيك وحكيت الهلي عليك والشهر الجاي بنجي نطلبك انتي كنك بس
أسيل:مش عارفة انحس فيها حاجة غلط
عمران:تي شنو الغلط ياهمي انا انقولك نبي نقعد راجلك اب عيالك وانتي تحكي هكي انقولك حاجة اسف اني طلبت منك وهي اوكي
أسيل:قصدك زعلت
عمران:لا مازعلتش وعليش بنزعل انتي حرة وانا مش حنضغط عليك عشان لنا 6 شهور مع بعضنا وعرفتي قديش انا انحبك ومازال مش واثقة في عادي هذا ماايزعلش اصلا
أسيل:والله عارفة انك اتحبني بس انا خايفة وانت عارف عمري ماحكيت مع شاب بكل وانت اول واحد نحكي معاه فخايفة من فكرة اندزلك صورتي
عمران:عشان ماعندكش فيا ثقة بس لو عندك فيا وفي حبي لكي ثقة ماتحكيش هكي
أسيل;والله واثقة فيك وعارفة انك اتحبني لكن هكي خايفة
عمران:اسيل براحتك مش حنضغط عليك معقولة ليا شهر نجدى فيك ادزيلي صورتك وانتي اتكربي هكي عالمهم بنتي قديش اتحبيني
اسيل:عموري حبيبي والله ماتزعل مني
عمران;كل مرة نطلبها منك اديريلي هكي وبعد نزعل تقعد اتلسني فيا وانا عشان طيب وانحبك نرضى بس هالمرة بجد لنقني زعلان منك مش عشان ماتبيش ادزي صورتك لالا عشان مش واثقة فيا وفي حبي
أسيل:حبيبي والله تفهمني وماتزعل?
عمران:شنو بنفهم وانا قتلك انشوفها ونمسحها كل القصة خاطري انشوف شعرك انشوفك هكي بلا وشاح بلبسة سمحة خاطي لبس الجامعة هذا اللي طلبته وحلفتلك ووعدتك الف مرة انشوفها ونمسحها دغري انا راه مانرضش فيك حاجة اتضرك عشان انحبك ونبيك مراتي فهمتي كلامي
أسيل:فاهمة والله فاهمة
عمران;والله مانك فاهمة حاجة واتصدقي في كلام البنات كل يوم جاية حاكيتلي علي وحدة قايلتلك عليا كلام هذا نسونجي هذا كذاب وهذا كله متحملة وحكيت مع هلي عليك عشان نثبتلك اني شاريك وبعدين انتي ناسية اني قعدت شهر نجري في جرتك في الكلية وياما درت عشان وافقتي عليا
أسيل:لا مش ناسية وعارفتك اتحبني وحتى انا انحبك
عمران:واضح انك اتحبيني
اسيل:خلاص حبيبي ماتزعلش الا زعلك خلاص حاظر حندزلك الصورة بس اوعدني اتشوفها وتحذفها دغري
عمران:لا خلاص معش نبي منك شيئ
أسيل;لا والله بندزها لكي اهم شيئ ماتزعلش
عمران:يعني بدزيها بقناعة
أسيل:قناعة ونص وخمسة
عمران:خلاص دزيلي حاجة سمحة هكي
أسيل:حاظر بس اوعدني تحذفها دغري
عمران:نوعدك اول ماانشوفها ونملى عيني منها نحذفها دغري
أسيل:خلاص انت عارف اليوم بيان سكينة بعد نلبس انصور واندزلك الصورة
عمران:خلاص تمام نرجى فيها ياقلبي
أسيل:انحبك يامجنون
عمران:انموت فيك يامراتي
أسيل انحرجت:خلاص انا بنسكر بنجهزو للبيان
عمران:تمام حبيبي وماتنسينيش اشوي اشوي ورني عليا
أسيل:حاااظر
عمران سكر وابتسم مع خشت اخته نجمة عليه
نجمة:عموري بالله عليك صبي شيلني للجامعة تأخرت عالمحاضرة
عمران بعصبية:انتي كيف اتخشي للدار هكي من غير ماادقي
نجمة:معليش بس والله مستعجلة والحاغلة خاربة وراس خيي صبي شيلني
عمران:قتلك فوتيني اهو باتك امشي امعاه
نجمة:بابا مريض حرام عليك كيف بيشيلني
عمران بصوت عالي:مش شوري بيك دبري راسك واطلعي وسكري الباب
صالح بات نجمة كان في داره وسمع صوت عمران عالي
صالح:تعالي ياانجومة توا انشيلك انا
نجمة:حرام عليك بابا مريض وكراعة توجع فيه
عمران:حلي خطيني
نجمة طلعت وسكرت البابا وراها
صالح:كان جاهزة توا انشيلك انا فكك منه هذا مامشش حتى الجامعته
نجمة:انت مريض ومانبيش انتعبك يابابا
صالح:بناخذك من هنا للجامعة مايبي ايصيرلي شيئ
نجمة:لالا يابابا خلاص مش داعي نمشي اليوم
صالح:لا كيف ماتمشي مش ساد ان قاعدات سيارتين قدام الحوش وانتي تمشي في حافلة ويوم اللي الحافلة تخرب اتغيبي ونحن سيارتنا برا والله مااتصير
حورية ام نجمة:ماقتلك علمها السواقة
نجمة:لالا فكوني مالمشاكل مع عمران هو هكي ومش مخليني في حالي
صالح:العيل هذا تعبني امعاه لا يبي يرحم ولا ايخلي رحمة ربي تنزل انا والله ايزيد عليا انلزه مالحوش ومعش نبيه بككل
حوررية:لا ياصالح هذا ولدك غير نحن دلعناه نين خيبناه
صالح:انتي اللي دلعتيه نين خربتيه
حورية:الله غالب ربي ماعطانا الا هو علي بنتين
صالح:الله يرحمك يانوسة ياريتها هي اللي عاشت وهو اللي مات
حورية:لا ياراجل العن شيطانك انت كنك هكي
صالح:الله يلعن الشيطان هي ياانجيمة انشيلك الجامعتك
وخذا نجمة وطلعو
(تعالو انتعرفو علي عيلة صالح وانتعرفو علي بطلتنا اللي عندهم
عيلة صالح تتكون من 5 اشخاص صالح وهذا باتهم راجل عمره 54 سنة موظف عادي متقاعد حاليا حورية هذي الام عمرها 50 سنة وربة بيت
وبنتهم الكبيرة ايناس م 92متوفية من سنتين بسبب حادث هي وباتها هي توفت وباتها جاته الخبطة في راسه وكراعة وبسبب الحادث كراعة انعدمت دارولة كم عملية وركبولة بلتين فيها بس ماصارش منها وقعد عرج ودائما توجع فيه وهذا ليش احالوه عالتقاعد في العمر هذا
وبعدها عمران م 93 عمره 26 سنة شاب مستهتر يعرفش حاجة اسمها مسؤولية ومايحترمش في حد لا اب ولا ام ولا كبير لا اصغير عايش حياته زي ماهو يبي والسبب دلع امه له لانه جاها عيل علي بنتين وتربى عالأنانية وان هو احسن من خواته وان كل شيئ يبيه هو له طبعا يقرا في الإعلام بس القراية اخر همه ودائما يسقط والجامعة بس دايرها للتهييج والمعاكسات والمواعيد مع البنات صايع وعارف بنات علي عدد شعر راسه وكل وحدة يوعدها بالزواج ويقعد مواعيد امعاها وواتهدريز وجو لين ايمل منها وايسيبها وهكي ماشية حياته
انجو توا البطلتنا #نجمة بنوته هااادية وطيبة بككل وماتعرفش ادافع عن حقها واتخاف من عمران موووت نجمة م 96 عمرها 22 سنة وتقرا تقنية معلومات(It) وشاطرة بكككل في قرايتها نجمة بنت مؤدبة ومحترمة حتى في لبسها واسلوبها عندها تجربة حب وحدة ومش تجربة كاملة هي شبه تجربة كان حب من طرف واحد الولد عمها اللي اكبر منها ب 15 سنة بس ولد عمها كان ايشوف فيها اصغيرة وعمره مانظرلها اي نظرة حب وبعد فترة ولد عمها خطب واجوز وهي تأثرت وبعدها قررت معش اتحب حد ولما بتجوز حتجوز زواج عادي(يعني اروادة)
المهم بطلتنا ست بيت شاطرة قايمة بكل حوشهم ومااتخليش في امها ادير في شيئ رغم قرايتها الا انها موفقة بين الحوش والقراية عندها صاحبة وحدة اسمها ريم
مواصفات بطلتنا جسمها حلو لا مليانة ولا ارقيقة طولها 160 سم البشرة قمحية احلى شيئ فيها عيونها الحضر لما اتشوفلهن يسحرنك? وشعرها طويل لونه أسود)

:::::::::::::::::::

طلعت نجمة وباتها ووصلها للجامعة ورد للحوش
تلاقت نجمة مع ريم صاحبتها وخشن للقاعة

::::::::::::::::::::::::

#في_ماليزيا
سند مقمعز وماسك فونه ومكسد عالنت وجنبه صاحبه خالد مع رنت فونه
سند:خير ياامي
خيرية:خير يااسنودة شن اخبارك واخبار قرايتك
سند ضحك;انا كويس وقرايتي كملتها ياامي ولا انسيتي
خيرية:يي انسيت والله خالطة عليا باهي قولي صار من جيتك الخميس
سند:لالا ياامي ماصارش منها
خيرية بحزن:باهي عليش معقولة مرايفين عليك لنا 4 سنين ماحقيناك
سند:مافيش حجز الليبيا الا الاسبوع الجاي وبعدين خلاص توا انروح ونقعد امعاكم ديما
خيرية:يارررب والله تعبت من بعدك عليا
سند:خلاص هانت
خيرية:ان شاءلله يارب اتروحلي طيب ونفرح بيك
سند يضحك:هذا الي تبيه انتي
خيرية:خلاص شن بنزيدك بالله توا عمرك قريب 30 سنة
سند:لا والله ياامي توا عمري 34 سنة
خيرية:شوف خلاص راك شايب
سند:ماهو كنت نقرا ماكنتش نلعب
خيرية;واهو قرايتك كملتها المفروض توا انجوزك
سند يضحك:خلوني نوصل الليبيا قبل وبعدها ساهل
خيرية:باهي قولي امتى تبي اتجي الاسبوع الجاي
سند:مش عارف بالك الاحد
خيرية:لا لازم اتأكدلي عشان نبو انديرو عشاء
سند:خلاص توا انأكدلك بعد نحجز
خيرية:باهي
سند:شن اخبار سكينة
خيرية:زايطة وفرحانة وتوا بتمشي للكوافير
سند:سلميلي عليها واجد وقوليلها اللي طلبتها جبتها الها
خيرية:واسيل حي عليك كان ماجبتلها اللي تبيه
سند:معقولة ننسى اسولي انا هذي بنتي وبعدين دازتلي ليستت طلبات جبتهن الها كلهن
خيرية:ربي ايخليك الهن
سند:وايخليهن ليا
خيرية:خلاص انا بنسكر ورايا حوسة واجد
سند:سلميلي عالبنات وباتي
خيرية:يوصل وسكرت
خالد;كنك ماقلتلهم اتروح الخميس
سند;اول حاجة نبيها مفاجئة وثاني حاجة نبي يوم اللي انروح انتريح مش نلقاهم لامين العيله كلها وصداع معش ايفض
خالد:في هذي صدقت ياريتني فكرت كيفك وماقلتش الهلي بنروح الخميس
سند:فرق اعقول ياباشا?

::::::::::::::::::::::::::::::::

#في_ليبيا
وتحديدا في حوش الحاج جمعة الساعة 3 م اسيل ومودة صاحبتها قاعدات في دار اسيل

أسيل:ها يافرخة شن رايك في لبستي
مودة:للمرة الالف انقولك اتهبل
أسيل:ياغبية بندز صورة العموري كان شينة انغيرها
مودة:وحق ربي طالعة اتجنني بس كان تسمعي مني فوتيها قصة الصورة والله عمران هذا مش متريحتله انا
أسيل:مش مشكلة انتي اتريحيله اهم شيئ انا متريحتله وبعدين عموري حكى الهله عليا ونهاية الشهر هذا بيخطبني
مودة;ان شاءلله وانا شن انودلك بس انتي عارفته وعارفه قصصه مع البنات هذا نسونجي درجة اولى
أسيل:كان نسونجي وتربى علي ايديا ولا انسيتي قعد شهر يجري في جرتي عشان انوافق عليه
مودة:مش ناسية بس والله قلبي مش متريحله
أسيل:ودة خلاص حبي انا قررت وبندزله صورتي وبعدين والله هو ايحبني وحق الله ماهو ناوي ايضرني
مودة;ان شاءلله
أسيل:تعالي عاوديلي علي شعري بالأستشوار عشان انلحق انصور صورة سمحة قبل ماايجي حد
مودة:هي تعالي
وجت اسيل قمعزت عالكرسي قدامها ومودة قعدت اتعاودلها علي شعرها
(تعالو انتعرفو مع بعضنا علي عيلة الحاج جمعة
الحاج جمعة راجل حاج ويعرف ربي وطيب بككل عمره 65 سنة عنده مكتب امتاع رحلات حج وعمرة مراته خيرية عمرها 50 سنة فاتحة مشغل خياطة هي واختها بس اكثر الوقت تقعد فيه بنت اختها واسمها نورهان
عندهم ثلاث اولاد بنتين وعيل
الكبير سند وهو بطلنا م 85 عمره توا 34 سنة مش متجوز والسبب ان حب ايكمل قرايته برا وماعندش اي تجربة حب مش اعتراض عالحب بس لعند توا ماقابلش البنت اللي تاخذ قلبه له 4 اسنين في ماليزيا ايحظر في دكتوراه في مادة (شبكات Netwoork )
المهم هو شاب حلوو بكككل وجذاب عنده شخصية اتهبل جامع بين الجد والبصارة والحناطة ايحب هله وخواته بكل وبذات أسيل ماايتحملش فيها شيئ ايقول انها بنته مش اخته ?صاحبنا اجتماااعي بكل وعنده اصحاب واااجد بس اقرب واحد له هو خالد يعرفو بعضهم مالابتدائي
مواصفاته طويييل واسمر جذاااب بككل ولحية سودة وعيون سود جسمه رياضي ? ايميل دائما في ستايل لبسه لستايل الشاب العاقل ?
بطلنا عنده اختين سكينة م 94 متخرجة من الاقتصاد ومخطوبة الولد خالتها من هي صغيرة واليوم كيف طلع بيانهم
أسيل هذي دلوعة العيلة ودلوعة سند بالدرجة الاولى أسيل بنوتة طيووبة بكل وعسولة وحانطة بس عندها طبع مغروووورة عمرها ماتعرفت علي شاب بسبب غرورها عليهم وهي جميلة بكككل وطبعا أسيل م 96 عمرها 22 سنة وتقرا في تقنية معلومات(It) )

::::::::::::::::::::::::::::::::
في حوش صالح
تغدو وكملو غداهم وشالت نجمة الصفرة وقعدت تغسل في العوايز

::::::::::::::::::::::::::::::::
#في_دار_عمران
طبعا عمران راقد لان سهور الليل كله لعند الصبح وفي النهار يرقد
عمران وعى علي رنة فونه ولقاها اسيل
عمران بصوت ناعس:خير اسولي
اسيل:هي حبيبي افتح نت بسرعة بندزلك الصورة
عمران بفرحة:هي هي حبيبي وسكر وفتح نت( ودزتله اسيل صورتها بفستان احمر قصير ومن فوق سيور وطالقة شعرها الطويل ومدايرة مكياج حلو وطالعة في الصورة اتهبل?)
عمران شاف للصورة وبعدها رن علي اسيل واسيل ردت
عمران:طالعة اتهبلي ياقلبي
أسيل انحرجت:شكرا
عمران:ماانجاملش فيك والله اتهبلي
اسيل:خلاص معش تحرجني ?
عمران:نجيها الخجولة
أسيل:خلاص انا بنسكر الناس بدت اتجي وانت حبيبي وراسي تمسح الصورة
عمران:توا هالوقت نمسحها ماااتشيليش في بالك ولا اتفكري فيها تي انحبك انا
أسيل;وانا انحبك ?وسكرت
عمران ضحك:قال امسحها قال ? خذا فونه لاخر ورن علي منير ومنير رد
منير:اوو يادنجوان الحب شن جوك
عمران:تمام ياشبح موتيين الرهان
منير:جبت الصورة
عمران:قاعدة ياشبح
منير:جيبها واللي اتفقنا عليه يقعد واتي اليومين الجايات
عمران:لا ياشبح مانتعبش 7شهور وفي الاخير اتقولي يومين وتي الفلوس والتذاكر ونعطيك الصورة غير هكي لا
منير:خلاص موعدنا بعد يومين
عمران:تم ياشبح وسكر

(تعالو اشوي نعرفو شنو صار من 7 شهور فاتو
منير مصبي في الجامعة وايشوف البنت لعند لما اختفت من جنبهم
صفيان;تي خلاص ياشبح فوتها
منير:قاهرتني ازح والله كنت نبيها بالحلال مابتش تعطيني وجه بكل
عمران:تي غير انت ماتعرفش اتلسن البنات كويس
منير;والله جميع الوسائل درتهن مابحتنش فيا بكل
عمران:غير ماعندكش المهارات اللي عندي ?
صفيان:وورينا مهاراتك يادنجوان الحب
عمران:لا ياصقع مهاراتي مايطلعنش بالبلاش
منير:اسمع كان قدرت عالبنت هذي وجبتها وخليتها اتحبك اللي تبيه تطلبه وتاخذه
عمران:كم تعطيوني
صفيان:الفين يادنجوان
عمران:لالا يابابا البنت صعبة وبنتعب امعاها وهذينا ملاليم ماايديرن شيئ ماللي بنحطه عليها
منير:اسمع خوذ الكلام مني لو جبتها للطريق سفرة التركيا المدة شهر اقامة وهياجة كلها علي حسابي
عمران:اذا فيها سفرة والتركيا معناها تستحق نتعب عشانها
منير:بس بشرط مش اتجي واتقولي هذا رقمها وقاعد نحكي امعاها مايمشيش الجو هذا امعايا نبي ياشاطر صورتها والمحادثات اللي بينكم عشان انتأكد من كلامك
عمران:وتم ياشبح عطوني وقت بس واللي تبيه ايكون عندك
منير:خوذ الوقت اللي تبيه اهم حاجة وريني شطارتك وجيبها للطريق
عمران:تم )

::::::::::::::::::::::::::::::::::::::::::::

#في_الليل وتحديدا في حوش عيت جمعة البيان كمل ولمو الحوسة واسيل خشت الدارها ومن لما خشت وهي اترن علي عمران مقفل وقعدت مشغولة عليه ومش عارفة شنو اللي صار امعاه لعند لما خذاها النوم ورقدت

#يتبع

قولكن شن حيصير والصور اللي بيعطيهن عمران هل حيعطيهن جديات ولا لا وكان عطاهن شن بيصير بعدها?

كله حنعرفوه في الحلقة الجاية
عارفة الحلقة قصيرة بس هي عبارة عن تعريف عن الابطال وحياتهم?
أسفة لو فيه لخبطة في الأسماء وأكيد رأيكن ايهمني?
گـتـابـتـي Koka Saleh

تقييم المستخدمون: 4.79 ( 8 أصوات)

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock