روايات كاملة

حب بين دفاتر المرض – أحمد عبدالله

جميع الحقوق محفوظة للكاتب أحمد عبدالله

حب بين دفاتر المرض – أحمد عبدالله

رواية #حب_بين_دفاتر_المرض
( حقيقة ممزوجة بلخيال )
للكاتبة #احمد_عبدالله
الرواية بلهجة الليبية
الحلقة 1
للعلم يلي قري الحلقة الأولي لازم يقرئ تأني لان فيه أشياء تغيرت لتتماشي كاسيناريوا فيلم ❤️❤️
.
المقدمة 🔥

انا نور دكتورة أمراض نفسية عمري 28 سنة تخرجت سنة 2008 و كنت الأولي علي الدفعة الحمد الله كنت متفوقة في شغلي و بعد4 سنين من الشغل في المجال الطبي تزوجت من دكتور قلب مشهور و ناجح لما تزوجت عام 2012 بطلت من الشغل و السبب مش راجلي الحق كان اكبر داعم ليا. لكن اني هكي اصريت اني نبطل و بدأت بعد لما سمعت اني حامل و هذا بعد 3 شهور من الزواج حملت وجبت ولدي ايسر و اول ما شفت عيونه كأني شفت الدنيا و كسبت الدنيا و ما فيها و الحمد الله عشت حياة سعيدة و مش ناقصني شي و راجلي و ولدي قدامي و للعلم مع اني زوجي مكنتش نعرفه قبل الزواج و زواجنا كان تقليدي لكن العشرة و الاحترام حببتني فيه و لكن في عام 2014 فقدت زوجي و ولدي ايسر في حادت سير و هما متجهين الي مصيف بحري اول ما سمعت الخبر كأني متت معاهم و اللهي حسيت ان الدنيا خلاص معش ليها طعمة قعدت في عزلة سنة كاملة و كل يوم الألم يزيد و كأني فقدت نفسي بديت نرقد في الصبح و الليل كله نبكي و منبيش حد يشوفني و لا يهدرز معاي و حتي الماكلة بلهون
بعد مرور سنة 🔥
في يوم من الأيام جاني بوي
أبو نور “الحاج سالم” : يا نور يا كبدي حرام عليك عمرك يمشي و انتي مكموتة و زعلانة هدي الدنيا و المؤمن ربي يبتليه و أكيد في نهاية المطاف في فرح
نور: و بنستنا لنهاية المطاف يا بوي 😭
أبو نور : استعيني بالله و متقوليش هكي
نور : اني تعبت 😢
ابو نور : يانور ارجعي لشغلك و اصنعي حياة جديدة و عيشي حياتك
نور : لألا اني ….،،
ابو نور : اسكتي اسكتي و انتي كله لا و بعدين ماترديش توا فكري و مافيش الا الطريق هذا يلي رح يغير حياتك و اللهي ما تندمي توا نوضي صلي صلاة استخارة و استعيني بالله و ارقدي و اللهي يانور رح تتغيري
نور : بس اني مستحيل ننسا
ابو نور : ومن قال انا حني بننسوا بس انتي قاعدة عايشة و بعدين يا بنتي انتي ما ليك الا اني أمك و ماتت و خوتك كل واحد فتح بيت فا شوفي يا بنتي انتي و أختك الصغيرة ما ليكم الا اني بألك انموت اني توا من بيتولاكم اصنعي حياة جديدة يا نور باش تقدري تعيشي و قعد يبكي
نور : ما تبكيش بابا ❤️😢الله لا يحرمني منك 😭
ابو نور : خلاص بنتي فكري في الموضوع وان شاء الله ربي ما يخليكش
نضت صليت صلاة استخارة و رقدت
👇🏻
نضت صليت الصبح سبحان الله حسيت روحي مرتاحة خشيت درت حمام و لبست و طلعت من داري و مشيت للطاولة و كلهم مستغربين و قعدت فطرت و اني نهدرز و نضحك و للعلم و اللهي للان قلبي يبكي بس سبحان الله عزمي زاد هذيك اللحظة و بدأت لما فكرت في كلام بوي ان مهما زعلت سنة سنتين حتي عشرة و اللهي ولدي و زوجي ما عاد راجعين 💔
المهم كملت فطوري و قعدت مع بوي نهدرز و قالي
ابو نور : كيف حالك توا بنتي
نور : احسن من قبل بهلبة
ابو نور : هذي علامة بعد صلاة الاستخارة انك لازم ترجعي لعملك و شغلك و أكيد رح ترتاحي اكتر و تشوفي ناس جدد و تتزوجي و تجيبي ايسر تاني
نور : انا الزواج بعد وسام معش نبي خلاص 💔 و بعد ايسر و اللهي ما عاد نلقاء ايسر تاني 😢
بس اني رح نرجع للشغل ورح نحضر حتي الدكتوراه
ابو نور : الله يوفقك يا بنتي و اللهي فرحتيني 😢 شكرا يا نور عيوني 😢
نور : ❤️
خشيت لداري فتحت تليفوني يلي ليه سنة مسكر و اتصلت بصديقتي يلي كانت تجيني و كنت نرفض فيها و تطلع تبكي
نو. : الو الو منال
منال : نور 😱 بلحقة و لا نحلم
نور : منال سامحيني
منال : 😭😢 انتي يلي سامحيني اني مقدرة موقفك
نور : انتي عارفة معزتك عندي منال و اللهي استحشتك و عارفاتك قلبك ابيض و ما تحقديش
منال : اني اكتر يا روحي سلمك يا روحي
نور : لازم غدوا تجيني للحوش نبيك
منال : حاضر يا قلبي من عيوني
نو. : نستنا فيك باي
منال : باي
🔥اليوم التأني 🔥
الباب طق طق
رويدة أخت نور : منو
منال : اني
رويدة : منال يعطك سخطة ليك وحشة
منال : واللهي حتي اني وين نور
رويدة : نور 😐
منال : متخافيش هيا يلي كلمتني و قتلي تعالي
رويدة : باهي تفضلي في دارها
طق باب غرفة نور
نور : منو
منال : احم احم
نور : منو عيوني جيتي
منال : فتحت الباب و اضبتت نور و قعدت تبكي يا نور استحشتك
نور : و اللهي حتي اني تعالي قعمزي
قعمزنا و جابت رويدة قهوة و حلويات و قعدنا نهدرزو
نور : منال نبي نرجع نشتغل
منال : عادي لكن ليك 3 سنين مبطلة من لما تزوجتي أكيد نسيتي هلبا ًحاجات
نور : واللهي ما نسيت حاجة كله قاعد في دماغي
منال : اوكي شن تبي اديري عيادة بروحك و لا بتشتغلي في مستشفي الأمراض العقلية العامة
نور : طول هكي دقيتي الحديد و هوا حامي غير اسمعي انتي وين تشتغلي
منال : اني الحق قاعدة موظفة في مستشفي الرازي لكن الحمد الله استعلامات بس
نور : اسمعي اني نبي نحضر الدكتوراه في نفس تخصصي
منال : مية مية حتي تزيد رتبتك و كفاءتك
نور : لكن انتي قاعدة في الاستعلامات ليش مترقيتيش
منال : يعني توا تقارني في شهادة من جامعة الفاتح بشهادة من معهد التمريض خليها ساكتة 😂 المهم المعاش
نور : يعطيهالك يا منال 😂
منال : اللطف عليا 😂
نور : خلاص غدوة نستناك الساعة 7 الصبح تمشي معاي لوزارة الصحة نقدم تاني وراقية و نقدم في طلب لتحضير الدكتوراه
منال : خلاص تم 👍🏻
نور : منال سامحيني علي تعبك
منال : عيب نونو
نور ❤️
🔥 اليوم التأني 🔥
نضت و لبست و طلعت من باب الحوش الشمس ليا سنة ما شفتهاش عيوني لين زغزغوا طلعت و جتني منال بسيارتها مشينة للوزارة و الصدفة طلعت يلي ماسكة مشاريع و تحضير الدكتوراه كانت أستاذتي في الجامعة
خشيت المكتب
نور : السلام عليكم
رئيست الشؤون الدراسية : و عليكم السلام تفضلي
نور : اني نور سالم التواتي دكتورة أمراض عقلية متخرجة دفعة 2008 و الأولي علي الدفعة و وقفت سنة 2012 اشتغلت 4 سنوات في المجال و تدربت تحت دكتور خالد الجيلاني سنتين عملي و سنة في مستشفي قرقارش
رئيسة الشؤون الدراسية : ممكن تعاوديلي اسمك
نور : 👀 حاضر اسمي نور سالم التواتي
رئيسة الشؤون الدراسية : و ليش بطلتي يا نور
نور : واللهي اني خديت اجازة بسبب العرس و عرفت اني حامل في وقت صغير فا فضلت الحياة الأسرية علي الحياة العملية
رئيسة شؤون الدراسية : اني استاذة مني علي عاشور
نور : و اني نقول الشكل هذا مش غريب عليا 😂استاذة مني 😍 و اللهي اسمك للان في دماغي
رئيسة شؤون الدراسية : اتغيرتي نور
نور : كبرنا و بعدين ضروف
رئيسة شؤون الدراسية : ممكن نعرفها إذا مافيش احراج و إذا لا عادي نور ما تنحرجيش
نور : لألا عادي مافيش احراج الحقيقة اني زوجي و ولدي توفو قبل سنة
رئيسة شؤون الدراسية : 😱😢 الله يرحمهم و كيف
نور : حادت سير 😞
نور : الحمد الله علي كل حال ما علينا
نور : خلينا نرجعوا للموضوع شن مصيري في الأوراق و الدكتوراه
رئيسة شؤون الدراسية : اطمني و ماتحطيش في دماغك اي شي الأوراق من الان مختومة و مشروعك تم و حتي توافق عليه من اللجنة و راتبك من بكرا رح ينزل و من الان اعتبري نفسك عندك واسطة كبيرة في الصحة
نور : شكرا استاذة شكرا
رئيسة شؤون الدراسية : الشكر الي الله حبيبتي ❤️

المهم تعاطفت معاي و الحمد الله قبلت اوراقي و عطتني ترخيص نمشي للحالات باش ندير مشروعي و قتلي انتي من الان بنتي و اي أوراق تلزمك اني في ظهرك و بعد 3 سنين من وقف العمل رجعتلي بطاقة التعريف و مكتوب فيها دكتورة و ماتتوقعوش لحظة أيدي مسكت الورقة شفت ولدي كيف يقولي “” يا ماما خاطري نكون دكتور زيك “”
رجعت للحوش فرحانة كأني تخرجت من جديد ما تتوقعوش ردة فعل بوي سندي و ضهري و اللهي قامني و هوا عمره 67 سنة و قعد يلود بيا و يبكي 😢🔥
منال : يا سلم صاحبتي الدكتورة
تعرف في الفاشة و الطنطورة 😂
تعاين في البهلول و خوه
واللي ما يعرف لا أمه ولا بوه 😂😂
نور : هذا شن الكلام اللمزرط 😂 باهي خلاص اسكتي يا مهبولة و شن الكيكة هادي
منال : أولا هذي طورطة 🤨 و بعدين نبي نفرح بحبي الدكتورة 🤪
نور : واللهي الباين مشروعي بنديره عليك انتي 😂
منال : اتفوهه وسخة
قعدنا سهرنا و كلينا طورطة و تعشينة من إيدين اختي رويدة و سهرنا و باتت منال عندنا و اللهي هذيك الليلة حسيت نفسي كأني نسيت شوي موضوع ولدي و زوجي لكن مهما كان ننسي ننسي و بعدين يرجع الشريط نفسه
🔥اليوم التأني 🔥
نضت لبست و وتبت روحي و لأول مرة بعد 3 سنوات رح نمسك البالطو الأبيض اول ما مسيته أيدي سخنت و عيوني ولت أدمع من غير سبب خش عليا بوي
ابو نور : حبيبتي من الان رح تنفتح ليك حياة جديدة و ان شاء الله ربي يسعدك
نور : شكرا علي كل شي 😢بابا
ابو نور : اتفوقي في عملك و شغلك و حطي بصمة ليك في كل شي و ديما خلي صوت ولدك في ودنك لما يقولك نبي نطلع زيك يا ماما ❤️
نور : 😞😢
ابو نور : ما تبكيش و هيا البنت تستنا فيك
طلعت جتني منال و مشينة خذينا الأوراق من الوزارة و اتجهنا لمستشفي الرازي دخلت للإدارة
نور : السلام عليكم
مدير مستشفي الرازي : و عليكم تفضلي
نور : انا دكتورة نور سالم التواتي دكتورة أمراض عقلية
مدير المستشفي : أهلا و سهلا دكتورة تفضلي تفضلي كلمتني رئيسة قسم المشاريع و حكتلي عليك و عرفت عليك معلومات
نور : ان شاء الله تكون مشرفة
مدير المستشفي : مشرفة أكيد مليئة بلنجاح و العطاء و الاجتهاد و سامع انك كنتي الأولي علي الدفعة
نور : شكرا دكتور بس اني جاية بنحضر الدكتوراه في مرض انفصام الشخصية او الشيزوفرينيا و نبي حالة من الحالات المستعصية يلي عندهم انفصام
مدير مستشفي الرازي : و عندك اوراق الموافقة
نور : ايه تفضل كله موجود و موافقين عليه
مدير مستشفي الرازي : خلاص قدميلي أوراقك و ان شاء الله من غدوا تبدي تداومي
نور : شكرا دكتور
مدير مستشفي الرازي : العفوا
نور : طلعت منه و اني طالعة جتني رسالة بفتح حساب ليا في مصرف الانتماء 🤩🔥❤️
لحظة للتاريخ 😭😭❤️❤️
و اني كيف طالعة من المستشفي من كتر الفرحة معش نشوف قدامي انصدمت في شخص و اني طالعة و هو شاد قهوة و للاسف لبسته كلها راحت فيها و علي ما أظن كان دكتور بس جماله واو
🔥روحت و جيت اليوم التأني 🔥
و وصلت لمستشفي الرازي و خشيت لمدير المستشفي
نور : السلام عليكم
مدير المستشفي : تفضلي نور خلاص المكان مكانك انعرفك يا نور دكتور عماد
نور : لا خلاص احني تعرفنا امس
مدير المستشفي : و الله و كيف
دكتور عماد : موقف صار امس
مدير المستشفي : احكولي
نور : 😂 امس و اني طالعة انصدمت فيه و للاسف كان شاذ قهوة و مشت في ملابسه
مدير المستشفي : اوكي دكتور عماد هوا مساعدك في هذا المكان
نور : يشرفني
مدير المستشفي : يا دكتور عماد برا ارفع دكتورة نور وريها المكان
طلعنا من الإدارة
دكتور عماد : تشرفت فيك دكتورة اني دكتور عماد ماسك عنبر الانفصام العقلي تفضلي
نور : يزيد فضلك
نور : المستشفي كأنها حبس و كلها عبارة علي حديد فحديد ليش
دكتور عماد : دكتورة نور هادم ممرين ممر يضم الحالات المتقبلة العلاج و الممر التأني الحالات المستعصية
نور : لا اني نبي نختار من الحالات المستعصية
دكتور عماد : شن موضوع مشروعك
نور : موضوعي علي مرض الشيزوفرينيا او بس مش انفصام عقلي
دكتور عماد: خلاص هذا مكانك المناسب تفضلي
.
خشينا لممر الحالات المستعصية و كان عبارة علي غرفة طويلة طول و من الجهتين سراير و مقعمزين الحالات و كل حالة مربوط أيدها في السرير
دكتور عماد : احني الحمد الله العدد عندنا مش كبير و الأغلبية تقبلوا العلاج
نور : وكم حالة عندكم
دكتور عماد 18 حالة تعالي نعرفك علي كل حالة
نور : لا شوي 18 الحق ☹️ اوكي تفضل 😀
الحالة الأولي : علي : علي قتل اخته و مرته في ضروف غامضة و دفنهم في دار من الديار البيت لما جو يسالوا فيه قال عاشور هو يلي قتل و بعد الكشف اتضح انه مريض بمرض الشيزوفرينيا و دائما يتخيل ان عاشور بيقتله
نور : واللهي 😳
الحالة التانية : اسامة : رسام تشكيلي قتل حبيبته وشرحها و حرقها و حتي هوا بعد الكشف عليه طلع مريض بلانفصام
نور :وليش هادم بينعدموش
دكتور عماد : الإعدام او العقاب القانوني بعد العلاج و إذا ما استجابش في مدة 5 سنوات للعلاج يتم تطبيق القانون
نور : اها 😦
و قعد يحكيلي علي الحالات كلها يلي قتل بنته و يلي قطع أيد بوه و يلي حفر راس صاحبه و فيه حتي يلي يأكل في اللحم البشر و يتخيل في نفسه دئب 🤢
و لين وصل للحالة يلي في اخر سرير في الدار شاب في التلاتين و مقعمز و وجهه متجه الحيط لكن كانت معاملته خاصة يعني مروحة و عصائر و اخر دلع أكيد ولد هبي
دكتور عماد : وهذا الدكتور حسام
نور : دكتور 😦
دكتور عماد : ايه دكتور أمراض نفسية زينة و اسمه حسام التاجوري
نور : شن اسمه
دكتور عماد: حسام التاجوري
اول ما قالي الآسم انصدمت
نور : كلمت الحالة
ممكن تتلفت لو سمحت
و تعرفوا اول ما تلفت و جت عيني في عينه اني انصدمت ….يتبع
بعد قراءت الحلقة عبر لنا عن رأيك في القصة و ياريت من دون ملصقات تعبيرية ❤️

تقييم المستخدمون: 4.78 ( 2 أصوات)

1 2 3 4 5 6 7 8 9 10 11 12 13 14 15الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock