حب تحت الطلب للشاعر ربيع مجدي خليفه

فريق النشر
2020-03-02T00:16:54+02:00
أشعار وخواطر
فريق النشر20 فبراير 2020آخر تحديث : منذ سنتين
حب تحت الطلب للشاعر ربيع مجدي خليفه

[box type=”success” align=”” class=”” width=””]حب تحت الطلب للشاعر ربيع مجدي خليفه[/box]

حب تحت الطلب..
قالتلي مش عايزاك..
اخرج بره حياتي..
بجد مش حباك..
مش حساك..
ومن هنا ورايح مش راح اتمني لؤاك
انتهاك حرمة القلوب
ناس بتجرح عشان تتحب
وناس بتعشق عشان تدوب
قالت هتوب
عن حبك الزايف
كان وقتها واقف خايف
باين عليه الجرح
كضحيه وقت الدبح
مسح دموعه وهي مالت
فجاه قالت
مش ريداك
ومش راح اريدك
امحيني من وريدك
امسح اسمي من بريدك
صدقني مش راح يزيدك شئ
ولا راح انقصلك
ولا هنقص جواك في شئ
الدنيا طريق
بنمشي فيه وندوب
ونحب ونتوب
ونجرح قلوب تانيين
وادينا اهو عايشيت وسط الوجع بالسب
وكنتي ذنب
مش مسموح بغفرانه
قولتلها كيف
عايزاني اكون لطيف بضحك في وش الناس
لا مش كل الناس
ازاي اوافق اكون منافق
انا اصلي واد فلاح
عايزاني اكون مرتاح
مشغلش بالي بالصحبه
عايزه تكون ساحبه
انا اصلي مش ماشيه
ازاي اكون مبغيرش
عايزه تصاحبي فلان
وانا ابتسم واقول معلش
ازاي اكون مش راجل
عايزاني اكون قواد
عايزاني اعيش بسكات
انسان بدون طاقه
راجل بس في بطاقه
كارهاني عشان فلاح
يا بنت الكرم
كله من اصلك
ده طبعي ومش هغيره
ولا هقدر انقصلك
قالت
انسي اني كنت ف يوم حبيب او صديق
مش رايح يضيق سبيلك
والدنيا هتجيلك من تاني
سيباني ووجعاني بكلامها
واقف مبتسم من بره قدامها
بس جوايا جروح
ولمين ابوح
لمين ابوح يابا
كان ذنب مين اكون راجل
كان ذنب مين اكون غيور
ده الجخ باعك في جميع قصايده
وقال بغير
ايوه بغير
انا مش نقصان في شي
روحي تلمع وباين في عيوني الضي
عايزاني اوافق اكون منافق
ازاي اكون كداب
عايزاني البسلك سلسله
فينك يا جخ
الحب بوخ
والموضه بحب فلان ومصاحبه علان
وشات وقلوب في الاوضه
قالتلي كلام كله معاني
ومع الوقت هتنساني
طب هي ليه سيباني
ليه بايعاني بالساهل
مش قولتي استاهل
مش قولتي مش جاهل في مشاعره وحبيتيه
مش ده اللي اختارتيه يكون سندك
اهو كان في يوم ليكي ومش راح تزيد فيكي حته من جوفه
ازاي تنسي حروفه
مش ده اللي كنتي معاه
وقولتي يا ناس حباه
كان عاجبك وقتها
ومع الغيره عشان انه راجل
معجبكيش
ازاي بمنتهي القسوه سيبتيه كده
اكيد هيعيش
هيكمل من تاني
مع انه وحداني
خدتي وقته خلاص
وقولتي خان وملوش امان
وقولتي كلام مش فيه ووصفتيه بانه جبان
اشهدلك اليوم
اني خالي من الهموم وراح انساكي
هشهد بكل ذنوبي
وياريت عن حبي تقدري تتوبي
مش قولتي محبوبي وكنتي عبله
وصفتي قلبي بسيد الرجال
مش قولتي عنتر
مش كنت بتمختر عشان لؤاكي
وقالو الناس ده اللي انتي هتحبيه
مجنونه جدا بيه
وكنتي هتموتي عليه
دلوقتي بالساهل هتسيبيه
هيكون طويل البال
هيتجمل ويتحمل عشان يكون اقوي
هيستقوي قدامك
ويقبل كلامك وسخافتك
مبقيتيش حلوه في عيونه
وبقا كاره رخامتك
هيتجمل قصاد عنيكي ومش راح يبكي
هيكون واقف كيف الرجال وقت المحن
اهو كاس داير علي البشر
والكل هيجيله يوم ويمتحن
داين تدان
يارب نفس الوجع يسكن قلبها
يارب نفس العياط
كفاية كسرت قلبي
والله مش ذنبي
ياربي
يارب قويني
ساعدني ونسيني وشيلها من بالي
يارب كان مالي حبيتها ليه
كانت اميره في قصايدها
غزلت بنات الدنيا عقود علي جيدها
وانا
مش راح انتحر بفراقها

مش راح يزيد وجعي بعد نص الليل
عشان حبها
ولا كأني بحبها
لو كلب كان عندي
كان زادني وفاء عنها
مبقتش محتاج لها
هرهن قلوب الناس
واهديهم دفا واحساس
واقفل علي قلبي مليون ترباس
يا جخ يا ابو الرجال
عايزاني اكون طبال
ومش راح اكون ليها
راحت يا معاليها
هتكون ليا ذكري
وانا هنسي وهتكون فاكره
مش راح تنسي
ولو قدرت في يوم تقسي
هيجيلها يوم وتحس بكسر قلبي في هذا الوقت
يا اغرب وش رافض يقول معلش مع انه جبان
خاين وملوش امان
رافض يداوي الجرح
ومش هكتب خلاص عنك
متزعليش ولا يتزعل منك
عشان انتي مش شئ
صدق عمرو حسن
يا شجره حسبتها ضله وطلعت نار
وبيني وبينك طار
وكنتي سبب في الدم
يا كل الهم في حياتي
تحياتي اكون مجروح علي ايديكي
وفارقي خلاص ومن دلوقتي انا ناسيكي
وانا اللي مش هكون ليكي

[author title=”الشاعر ربيع مجدي” image=”https://i1.wp.com/www.setel7osn.com/wp-content/uploads/2020/02/%D8%A7%D9%84%D8%B4%D8%A7%D8%B9%D8%B1-%D8%B1%D8%A8%D9%8A%D8%B9-%D9%85%D8%AC%D8%AF%D9%8A-%D8%AE%D9%84%D9%8A%D9%81%D9%87.jpg?resize=130%2C147&ssl=1″]الشاعر ربيع مجدي

ديوان بعد نص الليل
شعر بالعاميه المصريه
للشاعر ربيع مجدي خليفه
من مواليد 1/1/1996 بقرية الشوبك الشرقي مركز الصف محافظة الجيزه
درس بكلية الحقوق جامعة حلوان
يتميز الديوان بالعمق اللغوي والفكري ويظهر الكثير من المعاني والمشاعر الحزينه
نال العديد من الجوائز في بعض الحفلات ومسابقات الشعر المحليه

[/author]

رابط مختصر

رأيك يهمنا

error: Content is protected !!