روايات كاملة

حطيتك فعيوني بقلم زهور جمال الدين

جميع الحقوق محفوظة للكاتبة

 

#حطيتك_فعيوني

🌷🌹للكاتبه زهور جمال الدين 🌹🌷

🌿🌲🌲الحلقه الثامنة عشرة 🌲🌲 🌿

من بكرى وانا نزل فيها وهيا تلف وخلاص مابتش تنزل النت عندى زفت اليوم حاشاكم

وشكر للى بعتو رسايل تى راكم منورات مع انى مرديتش على ولا وحدة فيكم حتى حنونه الادمن لان الرسايل هلبل مفرزتش …

وعموما لما تاخرت زدت طولت فالحلقه

كتبتلكم حلقة اطول من طريق بنغازى 😁😁

هيا نخشو الخلقه 😁👇

خشو يجرو بيها للاسعاف ..

دخلتها الدكتورة …

قعدت قريب ربع ساعه ..

طلعت الممرضه مشتلها سلمى تجرى..

-سلمى: خيرها يا دكتورة

-الممرضه: حالة اجهاض يا ماما

ووصل سراج للعيادة ..

يرعش مع بعضه خايف على مباهر

سلمى ومراد انصدمو فيه مايحسابوش خوتها يرعشو عليها هكى

سراج شاف مراد فالممر سلم عليه … وسلمى مقعمزة عالكراسى متقيه ماشافهاش

-سراج: خيرها مباهر

-مراد: تقريبا الممرضه قالت حالة اجهاض

-سراج: اووووف ربي يعوضها خير انشالله …صوتها بكرى يرعش خفت تكون حاجه اكبر

اجهاض باهى الحمدلله حاجه مش كبيرة…

هلبا يجهضو فى اول حمل

وقام التليفون يضرب فى رقم منصور لقاه مسكر

هوا منصور وين ماشى…

الباين معنداش تغطية

-مراد: والله مش عارف وين مكانه بالزبط

حتى انا كلمته طلع خارج التغطيه

جت الممرضه جايبه ورقه روشيته فيها علاج وايبر

طبعا الممرضه شافت مراد بكرى هوا اللى جاب مباهر

جاته هوا طول

-الممرضه: خوى نبو الدواء هدا

-ناض سراج بياخد الورقه: هاتى تو نجيبها انا

-مراد خدى الورقه : لا والله ماصارت اهو تو نجيبها انا

-ووقف مراد جنب الحيط: سلمى اهو بنطلع بنجيب الدوا وتو نجى

-سلمى: باهى اهو تلقانى مقعمزة هنايا

سراج سمع اسمها جمد فمكانه ….

يبسو عروقه …

سلمى هنايا.. انا وياها فى نفس المكان

لازم نكلمها …مش وقت رزن لانى مستاحشها .. معش قادر نتحمل اكثر

بعد شاف مراد طلع من الممر

وقف …

مشى جهة باب الغرفه للمكان اللى مقعمزة فيه سلمى

وقف لقاها مقعمزة ولابسه عبايه ووشاح

-سراج: سلمى

قامت سلمى راسها لقت سراج واقف قدامها

____________________________

منصور بعد ماطلع من حوش بوه اول شى داره سكر تليفوناته الزوز

وقعد يدوربالسيارة من مكان لمكان

وهوا مغتاظ من تدخل اهله فى حياته

ومغتاظ اكثر من مباهر ومن عملتها الاولى

ومن عملتها الثانية كيف خشت لحوش بوه ومعش طلعت

بعد مامل من الدوران بالسيارة

روح لحوشه…

خش لقاه هدوء

خش دار النوم لقاها مقلوبة الوفى لوطى

قعد يدكر كيف كسر التحفه ….

وكيف قعد يحدفلها فى ملابسها

وكيف هيا تبكى …

رقد عالسرير …

وغمض عيونه …

___________________

سراج: سلمى ..

سلمى قامت راسها : اهلين سراج

جى سراج مد يده وسلم عليها …

-سراج مبتسم : كيف حالك يا سلمى

عيونهم فى بعضهم ولا كأنهم حاسين ان جنبهم حد فالممر

سراج عنده اشتياق وحنين ليها يخليه يحضنها عام كامل

لكن هادى مدام متزوجه ماليها الا الاحترام لانها محترمه

-سلمى: الحمدلله كيف حالك انت وحال خالتى وردة

-سراج: الحمدلله كويسه

ولقى الكراسى الثلاثه اللى فى جنبها فاضيات

فخلى الكرسيين اللى جنبها فاضيات وقعمز عالكرسى اللى فالطرف

-سراج: امى الحمدلله كويسة لكن مقلتلهاش الحق محبيتش نخلعها

انتى كيف حالك وشنو اخبار العويلة وعمى صالح

-سلمى مبتسمه : الحمدلله كويسين

-سراج: انتى شنو كنتى بايتة مع مباهر قصدك

-سلمى: لا والله هيا كيف خشت بتبات معاى ..تعبت طول جبناها

-سراج: باهى الحمد لله انك موجودة غادى كنهدا راهو قعدت الحاجه تعانى فيها

“لتوة مزال يحسابها جاية زايرة اهلها وتلاقت مع مباهر بالصدفه”

-سلمى: لا لا امى معش تقدر تمشى حتى عشر خطوات مع بعض ..وين بتقدها بالله

-سراج: وصغارك كيف درتيلهم ..خليتيهم مع امك

” المحتال يبي يزبط عندها صغار ولا لا 😁😁

-سلمى واطت راسها : لا انا معنديش صغار

-سراج: ربي يرزقك انشالله بصغار يونسوك

-سلمى : ااامين

-سراج: اكيدة حوشكم كساد منغير صغار

-سلمى: لا والله صغار خوتى ينزلو كل يوم وماليين الحوش دوشة وحركه وين الكساد بلاهى

-سراج: لا قصدى حوشك انتى اللى ساكناته مش قصدى على حوش بوك

-سلمى: ايه ماهوحوش بوى هوا الحوش اللى انا ساكنة فيه

-سراج: حتى انتى ساكنه فى حوش بوك 😁😁..شنو موضه قصدكم

-سلمى: مفهمتش عليك الحق

-سراج : وزوجك ساكن معاك ولا كيف

-سلمى😳: منو زوجى

-سراج متفاجئ : زوجك ..

-سلمى: انا معنديش زوج

-سراج وقف مصدوم: يعنى انتى مش متزوجه

-سلمى : لا

-سراج : باهى ليش خدعتينى

_______________________

_______________

مراد جايب الادوية اليبارى اللى طالبتهم الممرضه

وصل قدام غرفه مباهر لقى سراج واقف ..

وسلمى مقعمزة ..

-مراد: سلمى ترا طقى علي الممرضه فالغرفه وقولليها اهو جبنا الحاجات اللى طالبينها

وقفت سلمى طقت على الحجرة اللى فيها مباهر

طلعت الممرضه خدتهم الحاجات

وجت سلمى قعمزت

سراج مش طايق نفسه ولا قادر يحكى مع حد

حس انها خدعاته …

وانها وهماته انها متزوجه

وحس ان مراد جى فى وقت مش وقته

طلعت الدكتورة من الغرفه

لحقتها سلمى …

وقعدو سراج ومراد بعتبارهم تحشمو منها لان مرض نساوين

-سلمى: شن صار مع مرت خوى يا دكتورة

-الدكتورة: هوا النزيف كيف بادى فيها.. وضربتلها توة يبرة تثبيت

لو الجنين بخير حيثبت ..لو الجنين خاسر حينزل

لكن ح يبان بعد ثلاث ساعات مش توة

-سلمى: باهى صحيتى يا دكتورة

قعمزت سلمى وبشرتهم ان حمل مباهر مش اكيدة نزل

_______________________

مباهر فالغرفه معلقيلها يبرة وتبكى ..

جنبها الممرضه شوى قعدت تسال فيها

-مباهر: خيرنى انا شن عندى

-الممرضه : عندك اجهاض يا ماما

“الممرضات من كثر ماتعبانات مع المرضى..

بدو يدجو الكلمه دج تساوت عندهم 😁😁

مباهر طول دموعها نزلو ..شنو اجهاض قصدك انا حامل

-الممرضه: ايه انتى حامل حبيبه

-مباهر:تى كيف ..درت تحليل فالحوش مطلعش فى حمل

-الممرضه: لا درنالك تحليل دم وطلعتى حامل وانشالله يثبتلك حبيبه ..

مباهى عيونها دمعو من الفرحه

-الممرضه: الدكتورة عطاتك يبارى تثبيت ومن هنايا لثلاث ساعات يبان معاها

-مباهر غمضت عيونها : يااااربي خليلى عيلى اللى فى بطنى سواء كان بنية ولا وليد

وحطت يدها على بطنها ..وتفكر فى منصور..

حبيبي منسور وينك تعالة شوف انا حامل

“ونست هاديكه الدعكه والمنكدة اللى كان دايرهالها 😁😁

______________________

نورى : الو

-سراج: اهلين بالخال

-نورى: انت وين يا ولد …امك تسال عليك

– سراج: انا فالعيادة

-نورى: انشالله خير..فى اما عيادة و شن ادير فيها

-سراج: مع اختك مباهر

-نورى انخلع: خيرها مباهر

-سراج يضحك: خيرك انخلعت يا راجل..

تى ماهو بنولو خوال انا وياك ..قلت نجى نشوفها

-نورى: لالا .. قصدك مباهر حامل 😍

-سراج: مبروك عليك ولد اختك يا خالى

-نورى يضحك : الله يبارك فيك يا خالو..

-سراج: باهى عقبال مانبدا عمو

-نورى يضحك: امالا نسيبك منصور فرحان عاد

-سراج: نسيبي منصور مزرد ومايندريش عليها مريضه بكل رقمه خارج التغطيه

-نورى : امالا من جابها للعيادة

-سراج: مراد خو منصور ..واخته

-نورى: بارك الله فيهم

-سراج: اسمع متقولش لامى ..لان تعرفها تقولك تووووة ارفعنى لبنتى

-نورى : باهى تم ..لما تروحو بيها بلغنى تو نجوها لحوشها

______________

سراج مقعمز مع مراد وسلمى فالانتظار …

وجاياته اصفار من العزول مراد😁😁

عنده نيه يحكى مع سلمى بروحهم ..

بعد ربع ساعه ..

شافو نورى جاى فالممر

ناضو مراد وسراج …

وبعدو عن سلمى وقفو فالكورنر متع الممر .. بدى مكان سلمى مع يبانلهم

نورى سلم على مراد وسأل على بوه

-سراج: خيرك جيت يا نورى

-نورى: والله ماتحملت تكون مباهر فالعيادة وما نجيش

-سراج : تو امى تنشغل يا راجل انا وياك برة فى ساعه زى هادى

-نورى: متخافش قلتلها ان نبيل صاحبك فالعيادة

وانك معاه والجماعه كلها معاكم …

فقلتلها حتى انا بنلحقهم ..ندير دورة ونروح

وانى مش حنعطل

-مراد: كيف حالها الحاجه

-نورى: الحمدلله بخير

وقعدو يهدرزو على نورى وحكوله شن قالت الممرضه بالزبط …

وسراج باله عند سلمى

-نورى: باهى قداش فاتو منهم الثلاث ساعات

-مراد : ساعه ونص

-نورى: ربي يفووت الساعه ونص الجايات على خير

سراج: انا رجلى توجع فيا انصبت اليوم فالكورة ..

نستادنكم بنمشى نقعمز

-مراد: ادنك معاك

“فرصه انه يقعد مع سلمى بروحه مدامه مراد لاهى مع نورى ”

_____________________

-الممرضه: يا ماما الرقم مقفل كلمته قريب ثلاث مرات

-مباهر: سامحينى وخيتى غير انا يديا فيهم يبارى مش قادرة نشد التليفون ونتصل

-اتصلت الممرضه وفتحت المايك: الرقم المطلوب مقفل

-الممرضه تكشخ: سمعتى بودنك توة ..

رقم زوجك مقفل حبيبتى .. الهى فى روحك وفى مرضك

-مباهر : باهى صحيتى حبيبتى

وغمضت عيونها قعدت تفكر فى منصور .. وفى دلاله ليها …

وقلبها متسامح معاه على الموقف الاخير اللى صار

وانها عاطياته عدره ..

_________________________

سراج جى قعمز فالكراسى اللى جهة سلمى

بيش مايبانش حتى هوا لنورى ومراد

ويبي يفتح حديث معاها معرفش كيف ..

-سراج: عطلت الدكتورة فالنتيجه

-سلمى بصوت واطى: انشالله خير

سراج معش تحمل ان يمثل عليها دور الرزن

وناض من كرسيه وقعمز فى كرسى اقرب ليها

-سراج: فالعرس ليش كدبتى عليا و قلتيلى انك متزوجه

-سلمى: لا انا مكدبتش عليك ولا قلت هكى

-سراج اشر بايديه عليها: لا قلتى هكى

حتى بالامارة قلتك انا عقبالك تلبسى الفيلو ..

قلتى انا مجربته

-سلمى: بالفعل انا مجربة الفيلو

-سراج : هادى فزورة ولا شنو

-سلمى صوتها انخنق : لانى انا ارملة يا سراج..مش انسة

سراج انصدم وقعد يشبحلها ….

-سراج: كنتى متزوجه

-سلمى : ايه كنت متزوجه فى 2011 .. وزوجى توفى

-سراج مصدوم: وقداش قعدتى متزوجه

-سلمى: ممكن سته او سبعه شهور

-سراج نزل راسه : ربي يعوظك خير انشالله …نصيبات

طلعت الممرضه : نبو يبرة تجيبوها من برة

خدى منها سراج الروشيته وطلع

كلم نورى ومراد قاللهم انه طالع للصيدلية

ومشى لسيارته

ولع السيارة وتوجهه للصيدليه ويفكر ويخمم

ويكلم فى نفسه

ارملة .. يعنى مش بنت …

ايه وشن المشكلة .. لا كيف شن المشكلة وعلاش ناخد ارملة

عادية العازب ياخد ارملة او مطلقه مش عيب

مقلتش عيب لكن متركبش

انت تبيها ولا متبيهاش .. نبيها ايه

خلاص امالا .. شن دخل تركب ولا متركبش المهم هاك حصلت عليها فاضية ومعندهاش راجل…

افكاره تودى فيه وتجيب ..معش زبط نفسه شن يبي

وصل للصيدلية خدى الدوا ورجع للعيادة

وهوا راجع قرر انه مش حيسيبها ولا يخسرها المرة هادى

🌺🌺🌺🌺🌺🌺🌺🌺

سلمى مقعمزة تفكر…

شنو معناه الحوار اللى صار بينى وبينه كله

يعنى هوا حطنى فى باله زى ماحطيته انا فى بالى

لا مستحيل ..

وليش يقولى خدعتينى …

وصل سراج ..

سمعت سلمى صوته يكلم فى خوها مراد

خش للممر …قعد يشبحلها

وجى للغرفه وطقطق وعطى للممرضه اليبرة

ورجع وقف جنب نورى ومراد .. وخدى زاوية يقدر يشوف بيها سلمى

مرة يشبح عند الشباب .. ومرة يشبح لسلمى

وسلمى ماقدرتش تشبحله بكل ..لكن تشوف فيه منحاش عيونه من عليها

“ديما الشباب اجرأ من البنات😍😍👌

________________________

________________

بعد ساعه ونص …

-الدكتورة تكلم فى مباهر: حبيبتى .. النزيف وقف ..

ونقدرو نقولو انشالله الحمل ثبت

حنكتبلك حبوب تثبيت تاخديهم .. وانشالله ربي معاك

طبعا حاليا ممنوع الحركه .. ممنوع رفع الرزين ..ممنوع الزعل

-مباهر فرحانه : اكيد حنحافظ على نفسى يا دكتورة

-الدكتورة : توة لازم تقعدى هنايا فالملاحظه ..لعند الساعه 8 ..

وبعد يتأكدو من ضغطتك تو يديرولك خروج ..

لانها توكه الدكتور اللى بعدى

-مباهر: مشكورة جدا يا دكتورة

وطلعت الدكتورة ….

الممرضه بلغتهم انهم يقدرو يخشولها

نورى قال لمراد قول لاختك تخش هيا الاولى

وتو نخشو احنا بعدها

خشت سلمى عند مباهر

-سلمى: الف مبروك عليك الحمل حبيبتى

-مباهر عيونها مدمعات : الله يبارك فيك يا سوسو

-سلمى: مش قلتلك من مدة انك حامل …. شكى كان فى محله .. لانه كان واضح عليك …

وقعدو يهدرزو شوية …

وستادنت منها بتطلع …

-مباهر: خيرك طالعه

-سلمى: فى ناس ثانيه يبو يشبحوك

-مباهر: قلتى لمنصور

-سلمى: تليفونه قاعد مسكر ..بعتله رسالة ..

وطلعت سلمى وخشو نورى وسراج

فرحت بيهم مباهر

ان خوتها فزعولها وجوها …

___________________

اتصلت سلمى بامها

-سلمى: الف مبروك يااام مباهر طلعت حامل

-مريم : باهى الحمدلله يا بنيتى ..ربي يوصلها بالسالم انشالله .. قلتى لخوك ..

-سلمى: منصور تليفونه مسكر ماحصلتاش

-مريم : تو كانا جانا غدوة نقوله ونبعتهولكم

-سلمى: باهى اسمعى يمى تو نبعتلك اسم العيادة فى رساله على رقمك

اعطيهوله غدوة نخاف نسميهالك تنساها

-مريم: ايه احسن تخافى ننسى اسمها

صالح جنب مريم ايأشرلها انه يبي يكلم سلمى

-مريم: اهو بوك يبيك

وعطت التليفون لصالح

-صالح: شن حالها اهل خوك توة

-سلمى: الحمد لله كويسة يابوى

-صالح: اسمعى روحى بيها هنايا راهو

-سلمى: خوتها معانا هنايا يا بوى ..

وغدوة بيجيبو امهم لاختهم تشبحها

شن بنقولو قدامهم

-صالح: دبري راسك قولى اى شى …

المهم انها حتروح هنايا مش لحوشها

وسكر الخط

-مريم: ياراجل لاه تعقد فالحكايه هكى .. المراءة امها بتجيها غدوة ..وشن بنقول قدامها

-صالح: ايه تو نخلاها تروح غادى بيش يضربها ولدك بعض الضربات نقعدو فى قصه ثانيه

-مريم: ياودى اول مايسمع بيها حامل ح يرتخى على طول

-صالح: ولدك عصبى ومانضمناش .. ولازم نخليها عندى لين يهدا ..

لازم تغيب على عيونه ويحس انه بيخسرها بيش يعرف قيمتها

-مريم: الصغار صغارك ..ودير اللى يريحك

__________________

الساعه 8 ونص

مباهر عطوها خروج وتلبس فى عبايتها …

وفالغرفه معاها سراج وسلمى …ومراد ونورى برة

-سراج : الضهر تو نجيبلك امى

-سلمى تلفتت لمباهر: يجيبها عندنا ولا

-مباهر قعدت ساكته .. وانغصت ..

-سراج: قصدك منرفعهاش لحوش مباهر

-سلمى: حوشهم يقطرنو قدامه فالطريق مسكر..

وهما قاعدين عندنا من امس

مباهر استريحت عدر مليح ومقنع

متبيش تفضح روحها وتفضح راجلها قدام خوتها وامها

سلمى نادت مراد وفهماته انه يقول نفس كلامها لنورى

وطلعو من القسم …

-مراد : هيا نوصلكم بسرعه ونرجع للعمل نسلم توكتى

-نورى: قصدك انت عمل امبارح .. مفروض قلت راهو وصلناك

-مراد: لا الشباب يسدو .. لكن لازم نمشى نوقع تسليم العهدة توة

-نورى : انت برة لحق شغلك وتو يوصلهم سراج

سراج اتفاجأ وفرح 😳😳👌

-مراد : لا علاش نتعب فيه توة اهو تو نوصلهم انا بسرعه ونلحق عالعمل

-سراج مبتسم : تى وين التعب يا راجل. خلاص برة انت لخدمتك وانا نوصلهم

“فرح عمك سراج عاد 😁😁😍”

ونزلو مباهر وسلمى مع سراج

ركبت مباهر من قدام …وسلمى فالكرسى الخلفى

وركب سراج …

حول نضاراته الشمسيه من على عيونه قصدا

وحرك المرايه اللى فالوسط وجهها على وجه سلمى

وولع السيارة وناوى ايطول الطريق

_______________________

منصور ناض من الثمانيه

دوش ولبس

ولع سيارته ومشى لحوش بوه

“مزال قلبه مبردش 😁😁”

وصل ممكن 9 الا ربع

طقطق عالباب ..

-صالح: كانا ولدك فكريه ..قوليله بوك حالف متفوتش السقيفه

-مريم واجعها قلبها على وليدها: مايصيرش منه اللى ادير فيه هدا يا صالح

صالح يكشخ: قلتلك ديري اللى قلتلك عليه

ناضت مريم فتحت الباب لقاته منصور

-منصور: صباح الخير يمى

-مريم: صباح النور وليدى

-منصور: شنو حتى اليوم مش مخليينى نخش

-مريم: سلم وليدي بوك حالف ومتحنتاش

-منصور: باهى خشى ناديلى مباهر تجينى هيا

-مريم : مباهر مش هنا

-منصور انخلع: وينها امالا

-مريم: مبروك عليك يا وليدى مباهر طلعت حامل ..

منصور ضحك غصبا عنه .. فرحه الحمل مايقدرش يدرقها مهما حاول يدير روحه زعلان

-منصور: انتى كيف عرفتى يمى ..وهيا وين مشت توة

-مريم : امس بعد ماروحت انت مرضت وجاها نزيف ..ورفعوها سلمى ومراد للعيادة

منصور اعصابه رقو: تى كيف صار يمى وخيره ماحد بلغنى

-مريم: متخافش ياوليدى ضربتلها الدكتورة يبرة تثبيت

وتوة حالتها باهيه ..

وانت كلموك خوتك مسكر تليفونك

-باهى انتى تعرفى فى اما عيادة ..

-مريم : اهو تو نجيبلك التليفون اقراها

قالتلى سلمى تو نبعتهالك فرساله نعطيهالك

-منصور : باهى سقدى يمى

_____________

منصور عطاته امه اسم العيادة وطار مشالها …

وفى خاطره فرحان ..ونسى هاديكة الليله الحرفه اللى دارهالها 😁😁

ويفكر.. هدا علاش متبيش ترقد معاى

وترجع لما نقربها … لانها حامل …وفرحان 😍ويفكر زعما بنية ولا ولد

وصل للعيادة قالوله المريضه روحت …

دور طول ورجع لحوش بوه

🌺🌺🌺🌺🌺🌺🌺🌺

مباهر مع سراج فالسيارة

وساكته وتفكر..زعما شن بيكون ردت فعل منصور …

بيفرح ولا بيقعد زعلان منها …

الافكار فى راسها ترفع وتجيب

اما سراج وسلمى …

يوم مكانش على بالهم انه يصير

ولا عمرهم يحلمو ان صدفه تجمعهم فى نفس السيارة

سراج مانزلش عينه من على سلمى فالمرايه

وسلمى ثلاث مرات تجى عينها فى عينه …

يطق قلبها وتنزل عيونها …

وفتح الدسكه …

بالصدفه تطلعله اغنية “شو حلو حبيبي شو حلو ”

مباهرفى عالم وتفكر فى منصور والقصه اللى صارت بيناتهم

وسراج وسلمى فى عالم ثانى..

اللى قاله سراج لسلمى بعيونه يعادل هدرزة متع عشر مكالمات تليفون ….

وصلو فم باب حوش اهل منصور

نزلت سلمى فتحت لمباهر الباب

ونزل سراج جى جهت باب مباهر

ونزلت مباهر من مكانها

-مباهر: صحيت سلم وخى

-سراج: راك انتى مباهر الغالية

وخشو للحوش وسراج يشبح لسلمى.. وحتى هيا شبحتله بنضرة

خشت مباهر للصاله سلمت على عمها وعمتها وقعمزت جنبهم

ولقت تليفونها مش معاها

-مباهر: سلمى بالله تليفونى نسيته فى سيارة سراج

شوفيهولى انشالله قاعد فم الباب

طلعت سلمى من الباب

وسراج كيف ولع سيارته ..قام راسه لقى سلمى رجعت

طفى السيارة ونزل

-سلمى: غير مباهر نست تليفونها فالسيارة

-سراج: اهو تو نجيبهولك

وفتح باب السيارة لقاه عالفودرة ..خداه وسكر الباب

ومده ليها

-سلمى: صحيت

وتلفتت بتخش ..

حس انه كل شى بينتهى فى هاللحظه.. كيف مزال بيحصلها .. حس انه لازم يدير خطوة

-سراج: سلمى

-سلمى تلفتتله: نعم

-سراج مدلها تليفونه : ممكن تكتبيلى رقمك

سلمى تفاجئت من جرأته ..وفرحت فى نفس الوقت

قعدت واقفه شوى كأنها تفكر …وبعتالى قالتله باهى

فرح سراج وعطاها هاتفه : كتبتله رقمها

ومدتله تليفونه …

وقفت سيارة منصور …

انخلع لما شاف سراج يحساب مباهر بلغت خوتها بالموقف اللى صار بيناتهم

درس منصور ونزل من سيارته..

-سراج: اوووو منصور شنو روحت من الزردة

طبعا هوا دكى فهم طول انهم قايليين انه فى زردة

-منصور : ايه روحت

-سراج: الف مبروك منك المال ومنها العيال

-منصور ضحك : الله يبارك فيك يا سراج عقبالك

شبح سراج لسلمى : انشالله

-سلمى: كلمناك لقيناك خارج التغطيه

-سراج: نستادنكم انا توة .. والضهر نجيب امى انشالله

وركب سيارته ومشى

خشو سلمى ومنصور للكنشيلو

-منصور: ناديلى مباهر نروحو للحوش ..سمعتى سراج توة قال بيجيب امه الضهر

-سلمى: بيجيبها هنايا يا منصور

-منصور: وانتى كيف عرفتى

سلمى: ماهو احنا قلنالهم بكرى ان قدام حوشك يقطرنو

وانكم قاعدين عندنا الايامات هادو

-منصور: ومن قالك تقولى هكى

-سلمى: تفاهم مع بوك هوا اللى قال روحو بيها هنايا ..

__________________

-صالح: فهمتى توة بنيتى ليش انا بندير هكى

-مباهر: باهى زى ماتبى يا عمى

-صالح: انا نقدر نقولك نوضى توة روحى معاه .. لكن انا هدا ولدى ونعرفه مايهداش بسرعه

وانا نخاف عليك وانتى بالوضعيه هادى

-مباهر: باهى تمام يا عمى

-صالح: اللى قلتلك عليه ديريه

-مباهر: باهى

خشت سلمى جايبه لمباهر تليفونها …

وبدى تليفون مباهر يشرين …

شافت لقاته منصور …

سكرت تليفونها …

عاود منصور يلقى الرقم مقفل ..ركبت فيه نار

ينادى من السقيفه : يمى .. يمى

-مريم : نعم يا وليدى

-منصور: قولى لمباهر هيا قالى سراج بتجيها امها الضهر

وقف صالح ومشى يكلم فيه

-صالح: قوللها تتفضل هنى ..مباهر تعبانه ومنقدروش نخلوها بروحها

-منصور: مدامها تعبانه اهو تمشى معاها سلمى

-صالح: سلمى تمشى معاكم .. واحنا منو بينا ..انا وامك

-منصور: علاش ادير هكى يا بوى

-صالح: هيا كلمه وحدة..مباهر مش مروحه معاك

-منصور بصوت عالى : مباهر وينك هيا اطلعى

-صالح: مش حترد عليك راهو.. قلتلك ماهيش طالعه ..

وانت رد بالك تفوت السقيفه

ضرب منصور باب السقيفه برجله: تى عيب هدا يا بوى

وطلع …

_________________

والضهر جت ام مباهر …

ونزلو سلفاتها يشوفو فيها ويباركو بالحمل

والكل كدبو عليهم نفس الكدبه انهم يقطرنو فى شارعهم وقاعدين هنايا

ومنصور عاد وين تلقيه . .

يجى كل يوم ..ومايفوتش باب السقيفه .. ويقعد يتاوق بالك يلمح مباهر حتى من بعيد

وهيا متقطعه عليه ومستاحشته

وتبى تشوفه لكن مش قادرة تكسر كلمت عمها لانها وعداته

وكل مايتصل بيها منصور تسكر تلفونها طول وقلبها يتقطع

وبدى منصور يبعت فالرسايل يحنن فى قلبها

مايحسابش حتى هيا قلبها بيتقطع

الشيبانى الفالح .. قلب كل الموازيين …

بدل ماكان منصور متكبر عليها ويبي يطلعها مالحوش ..

توة بالعكس بدى يحنحن ويا سويدى غير ارضو وردولى مرتى

كان عنده فيها حكمه ..

توةبالله يابنات وحدة غضبانه وعند اهلها سواء كانت ظالمه او مظلومه وشادتها جغ مغ فى جرت راجلها تليفونات ومسجات وكل مايتصل ترد عليه

امالا يا ماما كيف بيحس بغيابك.. كيف بيحس بقيمتك فى حياته .. لاااازم تختفى عنه تماما…بيش يحس انه فقد شى ويحاول يرجعه ..ارزني يابنت

زى ماصار مع منصور .. يبعتلها فمسجات تقطع القلب ..

ولياليه غبر فالحوش بروحه يتخيل فيها كيف راقدة فى جنبه ..

وكيف يغطى فيها ..وكيف وجهها زى الملايكه وهيا راقدة

تحسيه زى اللى ندم عالموقف اللى داره

🌺🌺🌺🌺🌺🌺🔥🔥🔥

وهيا عاد لا ليلها ليل ولا نهارها نهار ..

وماشى جاى معش متحشم حتى من امه واخته

يلقى بوه فالجامع يوقف ينادى ..يا مباهر تعالى …

“فكرنى فى اغنية حنظل مر فراق الخالة ما جربته غير الدالة 😁😁😁😁”

سابع يوم واقف فالسقيفه ويسمع فيه بوه

توة عاجبك هكى يمى حتى حمل مرتى مفرحتش بيه

ومريم عاد قلبها بيتقطع على وليدها

وصالح حس ان صوت منصور تغير ..معش يعيط ..

معناها هدى ويقدر يعطيهاله يروح بيها بامان

منصور يتكلم معش سكت

صالح: يا مريم تعالى

ومنصور يسمع فيهم

-مريم : نعم

-صالح: ترا اسالى مباهر تبى تروح لحوشها ولا مزال

منصور واقف يسمع ويراجى فالجواب

مريم واقفه : مباهر بنيتى قالك عمك بتروحى لحوشك ولا مازلتى

-مباهر: ايه يااااام بنروح

منصور فرح اللى سمع صوتها ..وفرح انها تبى تروح

-صالح: باهى على كيفك…

فرحت مباهر وبدت تلبس فى عبايتها …وعمك منصور واقف يراجى فيها بيش يروحو

____________^___^

يتبع 😍😍🌺🌺🌺🔥🔥

نحبكم ❤

تقييم المستخدمون: 3.79 ( 7 أصوات)

1 2 3 4 5 6 7 8 9 10 11 12 13 14 15 16 17 18الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock