حكايتين في حكاية

فريق النشر
روايات كاملة
فريق النشر15 مارس 2020آخر تحديث : منذ سنتين
حكايتين في حكاية

للكاتب : حسن الجامعي . تدور الاحدات حول مراهق يحكي عن ما عاشه في حياته و المواقف التي وقع فيها و ما مدى تاتيرها علي حياته و شخصيته فهل يستسلم لها ام يتحداها ؟

رواية #حكايتين_في_حكاية
( حقيقة ممزوجة بلواقع )
للكاتب : #حسن_الجامعي
الرواية بلهجة الليبية
حلقة 1🔥
.
المقدمة و الحلقة الأولى ___ :

اسمي محمد مواليد 1990 عندي زوز خوت اصغر مني . مالك الوسطاني مواليد 1994 .
مراد الأصغر مواليد 1998 … امي نهيلة … ناصر يكون بوي … حناي اسمها نعيمة عماتي الزوز نورا الكبيرة و نور اصغر منها بعشر سنين … فاطمة بنت عمتي نورا … زي مواليدي فرق 7 ايام بس … مصعب ولد عمتي اصغر مننا بسنه … بوي اكبر واحد في اعمامي … مروان الاكبر بعد بوي منير المتوسط ميلاد الاصغر … باقي الشخصيات نتعرفوا عليها في كل حلقة 🥺🔥

______ حكايتي واقعية وحقيقية وحنحكيها بتفصيلها _______

ساعات ساعات

احب عمري …واعشق الحاجات

احب كل الناس .. واد ايه احساس

واحس جوايا بميت نغم .. ميت نغم يملي السكات

ساعات .. ساعات

وساعات ساعات .. احب عمري واعشق الحاجات

وساعات ساعات

احس اد ايه وحيده .. واد ايه الكلمه فى لساني مهيش جديده

واد ايه منيش سعيده .. وان النجوم .. النجوم بعيييييييده

وتقيييييله خطوه الزمن .. تقيله دقة الساعات

ساعات .. ساعات

ساعات ساعات .. ساعات ساعات

صباح 🔥

____ في عام 1987 ____

( بنغازي )

( حوش عيلة قديم بس كبير عيلة السلماني كانت من اشهر العائلات ف مدينة بنغازي … حوش عيلة مزين بضوايا والزينة ومعبي معازيم )

نعيمة فرحانه وتزعرت : مشاء الله ع بناتي مشاء الله
نورا : خيرها قالبة وجها هديكا
نعيمة : مني اللي قالبة وجها
نورا : كنتك قالبة خليقتها مندري خيرها
مرعية تكون حناي من امي : خيركم تهدرزوا هيا نرقصوا هيا شن اتراجي انتي وياها هههه
نعيمة : خليني مستريحه هكي

____

ناصر : نهيلة خيرك متنكدة شن في اهو تزوجنا
نهيلة بوجه متعصب : بالله فوتني …
ناصر : معنديش فلوس حق صالة حبيبتي خيرك
نهيلة : مكنتش اتزوجتني بطريقه لمغبرة هادي
ناصر : متنسيش امي تبيني نتزوج ع طريقه هادي في حوش ولمة وخيمة شباب وخيمة نساوين
نعيمة قطعت عليهم : هياااا نوضوا هيا وقت بش تصوروا وتلحقوا
مرعية بصوت عالي : هيا يا صبايا زغرتن
نورا : اجعل ليلتها ضاويه كيف طريق الزاويه اجعل ليلتها مرتاحه كيف طريق الفلاحه
نعيمة : يا نووور جيبي الكميرا
نسرين اخت نهيلة : استغفر الله ياربي
مرعية : كنك تستغفري شن في
نسرين : ونبي تسكتي انتي تعرفي كني
مرعية : صكري فصختك توا يجيك عريس غيره مش ضروري ناصر
نسرين بحقد : متختبريش صبري ولا نخرب امه العريس هضا
مرعية : جربي وشوفي شن نقول لي باتك
نسرين مشت وسيبتها : ونبي حلي عني
نعيمة : هيا هيا صورن يا صبايا
سارة : شفتي العريس تقول طالع من التشاد
مروة : شن دخلنا بيهم نحنا فكيني منها فتكينا منها
سارة : وووك كان نعرف ان العريس منضره هكي را قلت لي نهيلة تفوته
مروة: فتكينا منها ومن دره كبدها
مرعية : لولولولولي هيا جت السيارة العرسان

_حطو اغنية العرسان الرومانسيه والعريس والعروس ركبوا السيارة وصبايا يغنن وشباب يطربقوا في الخط ولوح …

_بعد ساعه روحن نور ونورا ونعيمة واهل العروس والمعازيم وفي حوش العرسان 👇

نهيلة : كنه هكي الشقه صغيرة
ناصر : من قالك صغيرة شوفيها من جوا
نهيلة بوجه عابس : اااه كويسه
ناصر : اهلين بيك في حوشنا الجديد …

_ بعد يوم

نورا دق ع الباب الشقه لأن هما يسكنوا فوق منهم في عمارة وحده : هيا افتحولي الباب
نورا : قعدت تعيط وباعلى صوتها
نهيلة : كنك انتي تخبطي عند روسنا
نورا : صباحية يا حنا هاكي الحلويات يا حنا
نهيلة : خشي خشي
نورا : مشاء الله سمحه الشقه
نهيلة بوجه عابس : اها صح سمحه
نورا : كنها مش عجباتك الشقه
نهيلة : لالا عجبتني
نورا : به راجلك شكلة مزال راقد
نهيلة : اهاا راقد
نورا : شويه وجاية انا معادا ما ناض 🙄
نهيلة : تمام …

_ بعد مرور 3 سنوات … 1990

نعيمة : فرحانه وتقول مشاء الله مشاء الله
مرعية : حفيدنا الاول جا مشاء الله
نعيمة : هاتي يا بنتي من ايدك حفيدي
مرعية : سمي
نعيمة : بسم الله الرحمن الرحيم
ناصر : عطيني … مشاء الله طالع زي باتك
نسرين : شن بتسموه 😒
نعيمة : ع اسم جده اكيد
مرعية : اكيد ع اسم جده علي
نعيمة : لا جده محمد
مرعية : اااه هههه محمد
نهيلة : محمد
ناصر : اها اسم سمح … محمد

_ بعد مرور شهر

نهيلة بعصبية : قتلك لازم تجيب حفاظات للعيل وحليب متفهمش
ناصر بعصبية : قتلك معنديش فلوس حلي عني
نهيلة :وين الخدمه اللي كنت تخدم بيها وينها
ناصر : معاش في طلعوني درت عركة مع واحد في المحل وطلعني شن تبيني نديرلك
نهيلة : لا حول ولا قوة الا بالله
ناصر : مشي حالك وخلاص معنديش ما نديرلك
نسرين دقت الباب : هيا افتحولي الباب
نهيلة : اهلين كنك جيتي
نسرين : لقيت روحي قريبه عليكم جيتكم وجبتلك حجات للبيبي
نهيلة : عليش متاعبة روحك
نسرين : خشي قيسيهن عليه البيبي سمح
نهيلة : هيا هي توا نخش نقيسهن سلمك جيابه
ناصر : واقف ويتفرج عليهن كيف يهدرزوا
نهيلة : خشت للدار
نسرين : خدت ناصر من يده وبدت تمس في سوريته
ناصر : شن ديري انتي
نسرين : مفروض اتكون ليا انت مش ليها
ناصر : حولي يدك را تجي تشوفك
نسرين : عليش تجوزتها هي مش انا
ناصر بتوتر : لأن امي قالت تبي نهيلة
نسرين فتحت سوريته : به انت تحبني
ناصر : اها مزلت نحبك وانا متحملها بسيف
نسرين : تعال في ليل عند حوشنا امي وخواتي ماشيات للعرس وانا قاعده بروحي في الحوش
ناصر : مش حنجي لان بندور خدمه
نسرين دارت السورية : كان تحبني تعال
ناصر : حولي ايدك قبل ما تجيك
نسرين : مشت وخشت للدار متع نهيلة
ناصر : واقف وحاير شن يدير

… مررر الوقت

ناصر : يلبس في حوايجة وقال لنهيلة بنمشي عند واحد صاحبي
نهيلة : باهي متنساش تجيب معاك حفاظات
ناصر : معنديش فلوس فوتيني
نهيلة : به اني خوي عبد الله بيجي ياخدني بعدين
ناصر : وين بياخدك
نهيلة : بنمشي لعرس عيت ولد سيدي خلي معاك محمد ودير بالك ساعتين بس
ناصر : به تمام

_
ناصر : دق ع الباب
نسرين : لابسة لبسة ومدايرة عطر ريحته قويه … خش خش
ناصر بعصبية : شن تبي نسرين
نسرين : حبيبي استحشتك
ناصر استسلم : حتى انا يا روحي …👀 18+

___ بداية الخيانة من اهني تبدا وخراب البيوت يبدا من اهني وللاسف مرات يكون من اقرب الناس ليك 💔🤷‍♂️

( ___ بعد مرور 6 سنين … انتقلنا طرابلس )
هلبا سنين مرت وهو يخون في مرته مع اختها ومرت 6 سنين مزلت صغير مزلت حتى صف الاول مخشيتش … وكان خوي مالك عمره سنتين 🤷‍♂️👀

#تسريع الاحداث 🔥

نهيلة لابسة وبتطلع : ماما حبيبي نبي نمشي للعيادة خليك انت في الحوش ومديرش ولا حاجه ودير بالك ع خوك الصغير تمام
اني : ماما خليكي معاي متمشيش
نهيلة : ماشيه عيادة وراجعه
اني : بالله عليك خليني نمشي معاك
نهيلة : ضرباته كف وعيطت عليه وقالتله مفيش مشي يعني مفيش
اني نبكي : توا نحرش فيك حنينه نعيمة
نهيلة : استغفر الله العظيم
اني : بري خلاص بري
نهيلة تأفئف : البس سبيدروك واطلع هي
اني : هيييي
نهيلة : بسرعه اطلع هيا
.
.
.
_
ووصلنا للعيادة وكانت الصدمه ان الدكتور شد خصرها ودخلها ف غرفته بدون ما حد ينتبه بس اني شفت وكان في ايدي مالك شاد ايدي خديت ايدي وغطيت عيونه باش ميشوفش اللي شفته اني 🤷‍♂️💔 … طلعت من الغرفه الدكتور بعد نص ساعه هكي …
نهيلة : ماما متقولش لي بابا ان كنت في العيادة باهي
اني : وعلاش منقولاش
نهيلة : متقولاش ان كنت وخلاص تمام
اني : تمام
نهيلة : توعدني …
اني : ماما بطني توجع فيا
نهيلة : به اجري هي نوصلوا للحوش نعطيك دواك تحمل

_ مكانتش بطني توجع فيا … كان قلبي يوجع فيا كرهت المرا اللي جابتني وكرهت روحي اصلا … من كان عمري 6 سنين شفت حجات يشوفهم العمرهم 18 سنه وفوق 🤷‍♂️🤷‍♂️💔👀💔

____ سنتين مررو… 2
في حوش جدي محمد

ناصر : لميه لسانك هدا لمييه خير ما نجي نقطعهولك
نعيمة : مش هكي تحلوا الامور بيناتكم مش هكي
ناصر : بنطلقها اهيا معاش نبيها
نعيمة : شن اطلقها شن تقول انت مش لعب الطلاق والزواج رااه مش لعب
نهيلة تعيط : اصلا معاش نبيك نبي نطلق منك نبي نعيش حياتي
نعيمة : اسكتي انتي وياه ياسر عياط يسمعوا فينا الجيران
محمد جدي : اهدااااا اهدااا انت وياها وحلوا الامور بشويه قعمزوا خلونا نتكلموا ونتفقوا ونحلوا المشكلة بيناتكم …

____ في القصه اللي نبي نحكيها … حتكون ليها وجهين حكايتين … حكايتي الحقيقية … وحكايتي وحياتي اللي مفروض … ومع الوقت تتغير من حكاية خيالية وواقعية الى حكايتين واقعيات في حكاية وحده … اما الخيالية اللي كنت نحلم بيها 👇

ناصر : نهيلة هيا نطلعوا ندهوروا هيا ولدي
نهيلة : هيااا هي توا انضم الحوش ونطلعوا
ناصر : نحبك
نهيلة : حتى اني يا حبيبي نجك ليا
اني : نلعب بلالعاب وفرحان !!!! وسعيد وعايش الحياة اللي نحبها العاب فرح طفوله امل اخخخخخخ وخلاص …

… ونرجعوا للواقع 💔🤷‍♂️

ناصر : اني عارف ان الزواج مش لعب بس غلطه كل يوم نق ع راسي زن زن زن تنقي 24 ساعه مليت منك ومليت من عيشتي معاك
نهيلة : اهما الزوز فروخك يبوا ماكلة ويبوا ويبوا شني هدا مزال توا محمد بيخش روضه كيف بدبر مصاريفها الروضه
ناصر : شفتي يا امي شفتوا ولى شفتوا
نعيمة : لا حول ولا قوة الا بالله
محمد جدي : قلنا حلوا مشاكلكم بهدوووء …
.
.
.
ميلاد : خيرهم شن في عياطهم واصل للشارع
نور : اسكت وخش للمربوعه وانت ساكت فكني
مروان : نور خيرهم هادو شن في
نور : يتعاركوا مشاكل زوجيه يعني عاديه خلاص انسى
ميلاد : حطيلي غداي
نور : هيا هي توا نحط

مروان بصوت عالي : صوتها عالي هادي خليها توطي صوتها النم
محمد جدي : احترم نفسك يا ولد
ناصر : دف نعيمة بالقوة من قدامه وقال من هي اللي توطي صوتها يا وجه ال!!!

وبدو ضرب في بعضهم ونور تحز وميلاد يحز ونهيلة تعيط ومالك يبكي واني نتفرج 👀💔

نعيمة : نحي ايدك نحي ايدك ع خوك نحي
ناصر : برا يا مسخ يا كلب برا
مروان : تي برا لم مرتك صوتها طالع للشارع
نور : خلاص خلاص اهدووو مش هكي
محمد جدي : لا حول ولاقوة الا بالله … ارتقع ضغطه وطاح داخ 😳
اني : جدييي ؟؟؟
نهيلة في لحظة هديكا جاها اتصال : الووو
مرعية امها : نهيلة نهيلة دووونك خوك دوونك خوك دووونك جمال خوووك لكبير خوووك
نهيلة : كنك شن في كنه جمال شن فيه
مرعية تبكي وتعيط : ووووووك عليااا
نهيلة خافت هلبا عيطت وقالت :….#يتبع

( القصه حقيقية ومحد يقول كدب لأنها صارت بجديات والقصه طوويله مزال وفي منها عبرة لكل بني أدم سوى راجل مرا طفل مراهق ومزالنا في البداية الحكاية والباقي نار 🔥 )

إن شاء الله تنال اعجابكم يا غوالي 🔥
تحياتي الكاتب : HASSAN AG ☆
حسن الجامعي ☆

كلمات دليلية
رابط مختصر

رأيك يهمنا

error: Content is protected !!