روايات كاملة

رواية ابتزاز بقلم زهور جمال الدين

جميع الحقوق محفوظة للكاتبة

رواية ابتزاز بقلم زهور جمال الدين

 

الحلقات الاولي من هنا

ابتزاز للكاتبة زهور جمال الدين

#ابتزاز

بقلم زهور جمال الدين🌷
🌺الحلقه 11🌺
“حقيقيه ممزوجه بالخيال”

فى حوش فوزى

فدوى وفوزى فتحو الباب وخشو
-حياة / بسم الله وين مشيتو الزوز نضت من النوم مالقيتكمش الزوز
-حط فوزى مفتاح فى العلاق/ كنا فى حوش حمزة صاحبي
-حياة / فى الشقه اللى قدامنا
-فدوى تحول فى حجابها/ ايه
-حياة / وكيف خشيتولها
-فدوى / هوينا المفتاح علقه فوزى .. هوا عطاهولنا
-حياة 🙄/ باهى خليتى راهو مشيت معاك انا وعاونتك
-فدوى/ لاااا مانقدروش .. كانا الراجل يروح لى حوشه .. ويفتح علينا بااب الشقه .. يلقانا لداخل .. بايخة ولا .. هدا علاش رفعت معاى فوزى لما مشيت
-فوزى يمسح فى ايديه / هيا السلام عليكم .. منمشى للعمل انا …بعد نكمل شغلى تو نجيك للمستشفى

وطلع وصكر الباب وراه …

-حياة / انتى بتمشى لى هند فالمستشفى قصدك
-فدوى / ايه
-حياة / راجلها غادى
-فدوى / اكيدة غادى .. ماتبيش سؤال
-حياة / وخيرك ماقلتيليش امشى معاى
-فدوى / لانى عارفاتك ماطيقيش فى هند .. عموما اهو تو نقولهالك توة .. بري معاى
-حياة / لا عادى نمشى .. نحسبها حتى تدهويرة
-فدوى / ربي يهديك …
وخشت لى غرفتها / هيا سقدى معش وقت
حياة مشت جهه علاقةالمفاتيح .. خدت مفتاح حوش حمزة .. شداته بايديها
-حياة / نمشى وعلاش مانمشيش .. العين بالعين والسن بالسن .. تو نعرف انا كيف نحرقلك قلبك .. زى ماحرقتيلى قلبي على طارق لما خطفتيه

__________________________________________

_

فى حوش منعم

ناديه / احنا الثلاثه وخيين ومافيناش حد برانى ولا
-مختار / ادوى طيحتى قلبي شن فى
-ناديه / سحر بنت مفيدة كانت حامل واجهضت امس
-خوتها الزوز فى صوت واحد / اااه
-مختار وقف / انتى شن تقولى .. ومنهوا الكلب اللى دار العملة هادى
-غمضت ناديه عيونها / ولدك خالد…
مختار صوته هرب يشبح وخلاص
-منعم ماتستوعبش الجملة / مفهمتش خالد شن دخله
-ناديه / خالد هوا اب الجنين اللى نزل
منعم سكت مصدوم
-مختار / لا حول ولا قوة الا بالله .. اللهم انى لا اسألك رد القضاء ولكنى اسألك اللطف فيه
-منعم / معقولة .. سحر ادير هكى … مستحيل يا نادية شن تخرفى .. بالك انتى سمعتى غلط
-نادية / البنت عندى فالحوش .. لو تحبو نوضو توة نمشولها واسئلوها بنفسكم
تليفون ناديه شرين … ماعدلتش عليه
-منعم / لكن كيف .. معقولة خالد وسحر ..عمرنا ما لاحظنا بينهم شى .. ولا عمرى يخطرلى انهم يكلمو فى بعض
-نادية / هدا اللى مفاجئنى حتى انا .. عمرى مالاحظت حاجه
-منعم / وشنو اللى مخليك تكونى متاكدة ان كلامها صح ..
بالك راميه عليه
-ناديه / امالا انا ليش جيت قلتلكم .. ماهو بيش تعاونونى..
ونشوفو الولد شن بيقول
-مختار متأثر / مفيدة سمعت
-ناديه / مفيدةسمعت بموضوع الاجهاض بس .. لكن منو صاحب العملة لتوة مزال ماقلتلهاش..
-منعم / وبوها
-نادية / بوها ماسمعش بي شى لعند توة
-مختار / نادي على خالد يا منعم
-منعم / هوا وين
-مختار / فالحوش اتصل بيه
-منعم / هدا موضوع محرج .. تقدر تسأل ولدك فالحوش وترد علينا
-مختار/ قلتلك ناديه توة هنايا
-منعم / حاضر
شرين تليفون ناديه .. شافت لقتهم جماعه العمل دارت تليفونها صامت وحطاته فى شنطتها
ضرب التليفون كلم خالد وقاله تعالة توة توة .. نبيك ضرورى …
-خالد / انشاءالله خير.. اعطنى 5 دقايق نغير حوايجى ونجيك

____________________________________________

_

فى المستشفى ..

حمزة مقعمز فى الممر بروحه .. يقرا فى القران.. وقف عند الايه … بسم الله الرحمن الرحيم ( ومن اياته ان خلق لكم من انفسكم ازواجا لتسكنو اليها وجعل بينكم مودة ورحمه ان فى دلك ايات لقوم يتفكرون ) …
صكر كتاب القران / صدق الله العظيم
غمض عيونه وتكى راسه عالحيط …قعد يتخايل فى تفسير الايه .. خلق لكم من انفسكم ازواجا .. يعنى هند مخلوقه منى .. وزى مايقولو طالعه من ضلعى ..يعنى بالتاكيد بيكون تكوينها من نفس مكونات جسمى .. يعنى لو تألمت هيا نتألم انا .. لانها منى .. سبحان الله القرآن قداش مافيه من حكم لو تدبر فيها الانسان حيفهما….
منغير مايحس .. خداه النوم ورقد … حلم انه فى نفس المكان مقعمز على كرسى الممر … غير جدران الغرف شفافه
..ويبان منها كل الموجودين فالغرف وشن يديرو..يشبح فى دكاترة متجمعين على هند ..وهيا متلفته جهه اليمين تشبحله عينها فى عينه وهيا حزينه …فجأة بدت الاجهزة كلها زى اللى تعطى فى اندارات وتعلى الصوت ..مشالها يجرى .. زى اللى اخترق الحيوط واجسامهم وفات خشلها …لقاها عيونها مغمضات والاجهزة اكثر مايتعلى صوتها بالاندار …قام يده ومسك يدها بدى دم ينزل من يده ويخش لى يدها فالوريد ..شوى وفتحت عيونها ابتسمتله … وكأنها تقوله انا رجعت للحياة
فاق على صوت ينادى فيه / خوى حمزة .. خوى حمزة
فتح عيونه زبط نفسه انه كان يحلم .. ولقى فدوى واقفه قدامه ومعاها حياة
-حمزة / اهلين اختى فدوى
-فدوى / اهلين بيك اوخى .. هند دخلوها
-حمزة / ايه دخلوها من الصبح بكرى
-فدوى / ياااربي تطلع لا سو لا سوية.. ويحفظها ويطول فى عمرها يااارب
-حياة تشبحله وعيونها يلمعو / الف الف سلامه عليها
-حمزة منغير مايشبحلها / الله يسلمك
وتلفت لى فدوى / تفضلو قعمزو
-قعمزت فدوى / صحيت ..زاد فضلك
وقعمزت حياة جنبها
-حمزة يشبح لى باب غرفه العمليات / تبى الحق .. مفيش داعى لى جيتكم توة .. لو جيتو العشيه او المغرب يكون افضل .. غير تعب عليكم التقعميز وهيا مازالت تبيلها العمليه بيش تكمل
-فدوى / مانكدبش عليك قبل منجى العشيه..لكن ماعطانيش
خاطرى ..وفز قلبي تقول جتنى حاجه ونخصتنى
-حمزة / ربي يحفظك فزاعه وصاحبة واجب
جت الممرضه تمشى بسرعه ومعاها المترجم
-المترجم / الدكتور بدو دم … مابيقدر يكمل العمليه ادا ما حضر …لانو العمليه لسه باولها
-حمزة / المستشفى كلم بنك الدم وبعتولهم اكياس الصبح
-المترجم/ صار خطأ وانبعتت فصيلة دم غير فصيلتها
-فدوى / انا نعطيها دم ..
-حمزة / شنو تحسابيها بالوهيه .. لازم تكونو نفس الفصيلة
-فدوى / ايه .. انا وياها نفس الفصيلة
-حياة / لكن انتى حامل
-فدوى تلفتت للمترجم / قصدك مانقدرش نتبرعلها .. انا صحتى كويسه راهو .. وفاطرة كويس
كلم المترجم الممرضه وردت عليه …
-المترجم/ قالت مناخد منك شوى بس.. لين توصل اكياس الدم اللى رجعنا طلبناها
-فدوى / باهى هى
-حمزة / الله يبارك فيك وخيتى فدوة ..جميل مستحيل ننساهولك ..
-فدوى / انهارى شنو بجميلى .. هند اختى
-حمزة / الحمدلله اللى نخصك قلبك وجيتى
-فدوى/ شفت
-المترجم / تفضلى
-قدم حمزة خطوة / نمشى معاكم
-المترجم / لا خليك
مشت فدوى مع الممرضه … وقعد حمزة واقف عالباب الفاصل … وحياة واقفه وراه وتشبحله
رجع حمزة قعمز عالكرسى .. وحياة نفس الشى قعمزت على كرسى
تلفتت لى حمزة / كيف حالك
-حمزة / 😏
_________________________________________

_

فى حوش منعم …

شرين الباب

نادية مقعمزة جنب مختار .. ومنعم مشى يفتح فالباب .. لقى خالد قدام الباب
-خالد/ صباح الخير يا عمى
-منعم/ صباح النور تفضل
خش من السقيفه للصاله / خيره بوى نادانى
وتفاجأ ان ناديه مقعمزة معاهم
-خالد شاف الوجوه متغيرة/ صباح الخير يابوى .. صباح الخير عمتى نادية
-نادية ومختار/ صباح الخيرر
-منعم / خش يا خالد
-خالد صوته هارب / خيركم انشاءالله خير
-منعم / نتكلم انا يا ناديه ولا تتكلمى انتى
-مختار / لا انت لا هيا ..
-خالد متخزرت/ خيركم تتعازمو ..شن المحكمه اللى فاتحينها هادى
تلفت لى منعم / شن فى يا عمى
-منعم / غير قعمز بس
-خالد قعمز/ اهو قعمزنا
-مختار/ انت عندك علاقه بي سحر بنت عمتك مفيدة
-خالد وقف / علاقه شنو اللى تحكو عليها!؟؟ … انا علاقتى بيها بنت عمتى بس
-ناديه / لكن هيا قالت ان فى بينكم علاقه
-خالد / علاقه شنو يا عمتى .. تلقطى فى الكدب وتجيبي
.. علاقه بيها زى علاقتى بي سلمى ولامودة…سحر زى اختى
-ناديه بهدوء/ سحر كانت فى المستشفى امس
-خالد / وانا شن دخلى بيها
-ناديه / سحر خشت للمستشفى حالة اجهاض
خالد انخلع وسكت .. المفاجأة كانت اقوا منه .. والمواجهة قوية معاهم الثلاثه
-نادية وقفت/ يا خالد نقولك البنت حالة اجهاض يعنى الموضوع مش ساهل وفيه قطع ارقاب..لو سمع صهيب خوها مستحيلة يسكت
-خالد / شنو المرداح اللى دايرتهولى هدا قدام بوى وعمى
.. وتهددى فيا بي صهيب ..تى ماهو تحشمى حتى قدام خوتك .. جايبتلى موضوع ايحشم وفاتحتهولى قدامهم
-ناديه/ والله لولا انى نبي نحل الموقف ..رانى حميت يدى وشرينتك كف …
-خالد / شن تقولى انتى .. شكلها غايبه عليك ولا عقلك طار
-منعم/ صكر فمك وكلم عمك كويي
-خالد / ماتسمعش فيها شن تقول
-ناديه / لو انت اللى داير العملة ..ننصحك سقد روحك و اتزوج البنت خير ما خوها يسمع ويدبحك منغير قبلة
-خالد / انتى تهددى فيا ولا شنو
-ناديه / ايه نهدد فيك .. لانى متاكدة ان البنت صادقه ومش متبليه عليك
-مختار / كملتو
-خالد يعيط /متتسمعش فيهم يا بوى …بيلبسوهالى ..
تلفت لى منعم / قلتلكم ماعنديش علاقه بالموضوع
-مختار/ اسمع يا ولد ..امك طالق منى بالثلاثه .. فى حال سألتك وكدبت
ناديه ومنعم شهقو وفتحو عيونهم

__________________________________________

_

فى المستشفى

حياة وحمزة مقعمزين على الكراسى يراجو فى هند وهيا فى غرفه العمليات
-حياة تخمم / هدا شنو .. حيه عالرزانه ..حيه كيف ملهوف عليها .. مولاى كان تحبنا خود امانتك وموتها تحت العمليه ..
وقعدت تدكر فى طارق ولد عمها زمان لما قال لى امه اخطبيلى هند بنت عمى صالح جارنا
-حياة / شن فيها احسن منى يا طارق .. ليش هيا وانا لا .. شن شفت منى الا كل خير
-طارق /يا حياة انا عمرى ماوعدتك بي حاجه .. ولا عمرى خدعتك وقلتلك انى نبيك
-حياة/ اخدعنى .. اخدعنى وانا راضيه … لكن هيا دايرلى ولا كأنك شايفنى فالدنيا .. شنو الل شايفه فيها احسن منى بيش توصل تبعت مرت عمى تخطبها
-طارق / ياحياة هوينها البنت رفضت وماصارش .. خلاص فوتينى منه هالموضوع
-حياة / يا طارق انا نحبك .. ومش حتلقى وحدة تحبك وتصونك كيفى
-طارق / انا بنصكر الخط .. والله نسوق فالسيارة ووترتينى
-حياة / لاااا .. رد بالك تصكر .. خلينى نفهمك .. خلينى نقنعك
-طارق/ شن بتقنعينى .. شن بتقوليلى .. يا حياة انا نحب هند ومانقدرش نتقبل وحدة غيرها
-حياة/ هند اللى رفضاتك .. هند اللى ردت امك .. انت اعمى ولا شنو ..
-طارق / يابنت الناس راك وترتينى .. معش قادر نسوق ..
-حياة/ اخر كلام نقولهولك .. البنت ماتحبكش .. ولا عمرها شافتلك.. وانتى تجرى وراها ومادارى بي عمرك
-طارق/ وانا مانحبكش .. ونبيها هيا باهى .. ومستحيل نحب وحدة غيرها
طااااااااق … حياة تسمع فى صوت طارق دار حادث .. قريب هبلت .. تعيط جتها امها واختها .. قالتلهم طارق دار حادث… ولما جاهم خبر موته .. قالولها كتمى عالخبر وماتقوليش انك اخر وحدة كلمتيه ..باعتبار انهم مالقوش تليفونه

فاقت حياة من سرحانها … لقت حمزة واقف جنب الباب الرئيسى متع غرفه العمليات … مشتله وقفت جنبه
-حياة / مزال ماكملتش العمليه
-حمزة / يبيلها ساعات
-حياة / احكيلى كيف تزوجتو
-حمزة يشبح للممر / نصيب
-حياة / حكتلك على طارق
-شبحلها / منو طارق
وادكر يوم اللى جت فدوى جارتهم وسلمت على هند دكرت اسم طارق وقالتلها المفروض بتكونى مرت خوى…ودكرتها لما منعم خو هند ضرب طارق
-حياة / مدامها ماحكتلكش عليه .. معناها سامحنى مانقدرش نحكيلك
” لكن الليبي مايقدرش يقاوم انه بيعرف حاجه عن الحياة السابقه لى مرته ..يحب يعرف كل المواضيع ويسيطر”
-حمزة / مدامك دكرتى الموضوع احكيلى عليه
-حياة/ طارق يكون ولد عمى … وكان خطيبي .. قبل ماتسرقه منى هند
-حمزة / تسرقه منك !!
-حياة/ كان عرسنا بعد خمسه شهور .. مابين كمل الحوش اللى يبنى فيه فوق اهله .. فجأة تغير كل شى .. ولعبتله بدماغه وقالته سيبها .. وسيبنى ومشى خطبها
-حمزة / امالا منعم ليش ضرب طارق
-حياة / وانت من قالك 😱
-حمزة / جاوبينى قبل
-حياة / لانه لقى هند فى مربوعه حوش عمى مقعمزة مع طارفق بروحها …ضربهم الزوز هند وطارق …

جت فدوى شادينها زوز ممرضات … قعمزوها عالكرسى .. ومشتلها حياة تجرى .. وخلت حمزة حاير فى الكلام اللى سمعه
__________________________________________

_

فى حوش منعم

ناديه ومنعم شهقو وفتحو عيونهم
-نادية/ عيب عليك يا مختار .. شن دخل هالقصه بالطلاق
….ليش تحلف بيه على مرتك … فيش جت هيا عيب عليك
-خالد / ارتحتو توة .. اهو حلف على امى بالطلاق … انشاءالله غير فرحانين بعد ما خربتو حوشنا
-منعم / امك تعتبر طالق من بوك فى حال انت كدبت
-خالد / كدبت فى شنو
-مختار / عندك علاقه بى سحر بنت عمتك ولا لا ..
-ناديه / ورد بالك تكدب وتودر امك وبوك
-منعم / لو داير روحك بتكدب وبدس بوك بيصدقك .. لكن الطلاق نافد
-مختار/ لعلمك .. انا بنصدق جوابك اللى بتقوله توة …اعتقد مستحيل تخلينى نطلقو انا وامك بسبب موقف
خالد حس انهم حاصروه بوه وعمه وعمته من جميع الجهات
.. انهار قعمز عالكرسى وهوا مواطى راسه مش قادر يشبح لى بوه
-قعمزت جنبه ناديه / الاخطاء تختلف بين شخص والثانى .. كلنا نغلطو .. لكن المهم ان نصلحو اخطاءنا ..وانت ماعندكش حل الا انك تتزوجها
-خالد وقف / لاااا ماناخدهاش..العيل وطاح .. ماعندى علاش نربط فى روحى بيها..مستحيل نديرها مراة و تخش حوشى
-منعم / ياكلب يا مسخ ياخاين.. يعنى البنت ماكدبتش .. وانا من بكرى نبعد فيها من دماغى ونقول خالد مايديرهاش
ناديه تحز فيهم شاده منعم من كتافه/ بالشوى يا منعم امك تسمع تصيرلها حاجه
-منعم يعيط / بنت عمتك هادى شرفك وعرضك يا حيوان.. كيف تاخد منها شرفها وتقول العيل وطاح ……ياعيل
-خالد / انا ماسيفتش عليها .. كل شى صار بارادتها ..
-نادية / صكر فمك خلاص .. البنت تاخدها .. ولا والله الدم اللى بصير بينك وبين صغار عمتك مايتم الا بقطع رقبك و رقبتها ..
-خالد / تى اقسم بالله تقولو ماتقولو ماهى خاشتلى حوش
-مختار/ امالا يمين على يمينك …يا بتاخد بنت عمتك .. يا امك محرمه عليا طول عمرى … شن مازالى انا
” مختار عارف ان نقطه ضعف خالد هيا امه ”
– منعم / ليه عليك يا راجل من بكرى تحلف عالمراة وهيا غافلة .. عندك علم ان التحريم اصعب من الطلاق .. التحريم يعنى حرمتها عليك طول عمرك
-مختار / حارمه عليا كان مايمشى خالد ياخد بنت عمته .. ناكلو البنت لحم ونرموها عظم هدا عار علينا
-خالد ينقز/ يابوى قلتلك مارفعتهاش بالغصب

-مختار/ مش موضوعى .. مدخليش مشت بي ارادتها ولا غصب…اللى يهمنى انك تستر على غلطك .. لو كانت بنت عمتك ولا بنت مانعرفوهاش الحالتين سوا..واللى ماترضاشى
لخواتك .. ماترضاشى لبنات الناس
-منعم / صحة ليك يامختار .. جبت الفايدة ..
-مختار / من توة قولى نكلم راجل عمتك على بنته .. ولا تركب لى امك تاخد شناطيها وتوصلها لى حوشهم
-خالد/ يا عمتى ساعدينى .. مانبيش ناخدها
-ناديه / كيف بنساعدك …و بوك حرم امك علي نفسه .. سلم ولد خوى .. ماتكبرش المشكله اكثر ما هيا كبيرة
-منعم / ولو ماعجباتكش طلقها
-خالد قعمز / خودوها .. لكن مانبيش نشوف خليقتها بكل
-مختار / مدلى تليفونى يا منعم
خدى منعم تليفون مختار من الطاولة ومدهوله …
خدى مختار التليفون وضرب الرقم..فتح المايك..الرقم يضبح
-مختار / شن حالك يا طاهر
-الطاهر نسيبه / اهلين مختار شن حالك وحال العيلة والصغار والحاجه
-مختار / الحمدلله يا ربي.. شن حال مفيدة والبنات
-الطاهر / الحمدلله فخيار الخير
منعم وخالد وناديه يتفرجو يراجو فاللى بيصير
-مختار/ والله شن منقولك .. انا الحق مريض وفكرت قلت العيلة مش دايملهم .. فشاورت وداد وقررنا نزوجو خالد .. عالاقل يبدا عنده مسؤليه
-الطاهر/ ربي يطول فى عمرك يا حاج .. وبالنسبه لى خالد خير مادرتله المراة والصغار يعقلوه..وياسيدى كل شى بالبركه
-مختار/ قالتلى العيلة .. مافيش خير من حوش الطاهر نقصدوهم .. عيلة واصل ومفصل
-الطاهر / وعلى منو حاطين العين .. على ندى ولا على نادرة
-مختار يمسح فالعرق / منهما هادوما
-الطاهر/ خواتى .. مش انت تقصد على خواتى ولا
-مختار/ كيف عاد .. نمشى خواتك وانت عندك بنات
-الطاهر/ عندى بناااات !؟ .. بناتى ماك عارفهم ..الكبيرة فيهم صغيرة
-مختار/الصغيرة سيورها تكبر وتعقل .. ياسيدى زى ماعطيتك اختى نبيك تعطينى بنتك
-الطاهر/يامختار سحر قاعدة تقرا..متقدرش تتحمل مسؤليه بيت توة
-مختار/ واحنا راضيين بيها .. خالتها وداد مش مسكرة عليها فم
-الطاهر/ ياحاج مانبيش نردك ..انت عمرك مارديتنى ..لكن مانكدبش عليك .. سحر حتى امها ماتعطيهاش توة
-مختار/ وتى روحك .. العشيه بنجوك انا ومنعم خوى نخطبو
-الطاهر/ ياحاج
-مختار/ هيا بالسلامه

ياودى عمك الطاهر حط تليفونها وقعد حاير .. شنو هالشدة الكبيرة اللى شادها نسيبه فى بنته .. وهكى عرس فى يوم وليله ..غريبه … قرر انه يمشى يروح بي سحر للحوش ويخبرها هيا وامها بموضوع خالد ولد مختار .. بالرغم هوا متاكد ان سحر بترفض …

بعد ماصكرو الخط
-مختار يكلم فى خالد / اركب قدامى يا مسخ .. حسابك معاى بعدين
-منعم / انا بنمشى لى مفيدة .. نشوفها ونفهمها اللى صاير
-ناديه / وانا بنمشى معاك هى

نزلو تحت لى امهم .. لقوها جايتها اصفار ..تبى تعرف شنو السر اللى بينهم خلاهم يبعتو عفاف لوطا .. ضحكو ووسعولها خاطرها بيش ترضى ويقدرو يطلعو

_________________________________________

_

فى حوش مفيدة

شرين تليفونها .. اتفاجئت انه مفتوح .. لانها مصكراته من امس
-ردت / الو
-الطاهر / بنتك وين
-مفيدة بدت ترعش / ماهو قلتلك باتت فى حوش خالتها ناديه امبارح ..مشت تقرا مع نرمين عندهم امتحان
-الطاهر / كلميها توتى روحها اهو ماشى منجيبها .. فى موضوع بنكلمكم فيه الزوز
-مفيدة صوتها حالة / اعلاش بتجيبها .. وشنهوا الموضوع .. تربح خليها تقرا قلتلك عندها امتحان
-الطاهر مُصّر انه يروح بيها/ اهو قريب نوصلهم كلميها فيسع

مفيدة ترعش باللى فيها .. اتصلت بي ناديه نادى وما ردتش
اتصلت بي سحر لقت التليفون مقفل .. اتصلت بي مودة . ينادى ماتردش … قريب هبلت.. حطت التليفون عالزيانه وطلعت من الدار …لقت ولدها صهيب يدير فى نسكافيه
-مفيدة/ انت فتحت تليفونى
-صهيب/ صباح الخير يااام .. ايه انا فتحت بعتت منه جنيه
-مفيدة / وين ماشى
-صهيب/ ماشى لى زليتن عندى عمل
-مفيدة فرحت انه بيطلع / باهى وليدى ربي يجيبهالك زينه
-صهيب/ سحر وغادة وين
-مفيدة/ سحر مشت لى جامعتها وغادة لى مدرستها
-صهيب/ لكن اليوم عطلة .
-مفيدة / اهااا .. معناها اكيدة فى دارهم
انفتح باب دار البنات طلعت غادة/ صباح الخير
-مفيدة وصهيب/ صباح النور
-غادة/ تحطنى فى الكورس قبل تمشى
-صهيب/ هيا اطلعى فيسع… وين اختك
-غادة / سحر مازالت راقدة
“طبعا امها موصيتها متقولش لى صهيب ان سحر بايته فى حوش خالتها ”
بدلت غادة فيسع وطلعت مع خوها
-صهيب/ هى السلام عليكم ياام
وطلع صهيب .. واستريحت مفيدة

__________________________________________

_

فى حوش ناديه

الباب يشرين .. طلعت مودة فتحت .. لقت عمها الطاهر قدامها
-مودة / اهلين عمى
-الطاهر/ شن حالك يا مودة
-مودة / الحمدلله عمى
-الطاهر/ ناديلى سحر قوليلها قالك بابا هيا
-مودة / خليها عندنا حتى الليله يا عمى .. سحر مازالت مريضه راهو .. والله ماقادرة تتحرك
-الطاهر/ قصدك ماقريتوش

-مودة / شن منقرو.. من لما جابتها ماما من المستشفى امس
وهيا فى حالة .. مش قادرة حتى تقيم راسها
ياودى عمك الطاهر لعب الفار فى عبه ..
-الطاهر/ هيا فايقه ولا راقدة
-مودة / فاقت قبل شوى .. وكلتها زبادى شووويا .. عطيتهولها بالسيف .. غير خليها عندنا نهتم بيها انا
-الطاهر تحشم من مودة / ناديها .. امها قالتلى جيبها
-مودة / خالتى قالت خلى تقعد عندكم …
الطاهر لما سمع ان مفيدة عندها علم بي بنتها مريضه… وماقلتلاش .. معش بدت عنده مسألة فار ولعب فى عبه ..
لااا..عرف ان فى موضوع مدرق عليها .. والكل عارف الا هوا

-الطاهر/ ناديهالى قوليلها قالتلى ماما روح بيها ..
-مودة / باهى
خشت مودة لى سحر .. قالتها ان بوها يراجى فيها برة
-سحر ترعش/ اتصلى بي امك تجى تربحى
-مودة / باهى .. اهو تو نتصل بيها خيرك ترعشى
كلمو ناديه قريب عشرين مرة وهيا متردش .. تليفونها نساته صامت ..
باب الحوش شرين
-مودة/ بوك يشرين يا سحر
-سحر/ باهى كلمى ماما
-مودة / اهو تو نكلمها ..غير نوضى غيري حوايجك
-سحر ترعش/ باهى ..
مودة تتصل بي مفيدة .. التليفون ايضبح ومتردش ..
غيرت سحر ملابسها وطلعت لى بوها
-سحر/ صباح الخير بابا
طاهر شافها تفاجأ .. البنت تحت عيونها اسود وفمها ابيض .. وايديها يرعشو ومن كف يدها من فوق رايح كله ازرق واضح انها كانت مركبيلها تغديه او حاجه زى هكى
-الطاهر/ صباح النور.. اركبى ..
ركبت سحر وهيا ترعش
-الطاهر يبي يختلها / امك حكتلى كل شى
-سحر بدت تبكى/ ااه..شن عرفت .. رد عليا بابا .. شن عرفت
.. وشن قالتلك ماما
-الطاهر اتأكد ان امها تعرف البنت خيرها وهوا زى الاطرش فالزفه / تو نوصلو للحوش ونحكو
-سحر/ والله يابابا انا مظلومه
-الطاهر يشبح لى يدها / خيرها يدك زرقا.. هادى من التغديه
-سحر/ والله يابابا انا مظلومه .. سامحنى تربح
-الطاهر ظلمت عنده/ تو نوصلو لى حوشنا ونحكو
سحر ترعش تنتفض وتخض مع بعضها .. تأكد طاهر ان الموضوع خطير هلبا … وصلو قدام للحوش .. نزلو من السيارة.. وخشو …

___________________________________________

_

سحر ومفيدة مقعمزين عالصالون .. والطاهر شاد السبته فى يده ويهدد فيهم
-الطاهر / هما كلمتين .. بنتك خيرها .. ليش رفعتيها للمستشفى .. وليش مدرقتيها عليا فى حوش اختك .. احكى ولا اقسم بالله الليله ليلتك حرفه انتى وبنتك
-مفيدة ضعيفه شخصيتها انهارت طول / بنتك كانت فى المستشفى حالة اجهاض
-سحر تخض وترعش مع بعضها / ماما …. لا يا ماما
-الطاهر انصدم / حالة اجهاض .. بنتى سحر الطيبه عندها اجهاض…
ومشى يجرى جيهتها حط يديه على رقبتها يخنق فيها/ نقتلك قبل ما تفضحينى .. نقتلك يا مسخه .. موووتى .. موتى ..
مفيدة تضرب فيه على ضهرة وتعيط وادف فيه وهوا محكم قبضه ايديه على رقبه بنته ويخنق فيها .. وسحر تفرفش فيها ورجليها يخضو بطلع الروح
طق طق الباب … مشتله مفيدة تجرى فتحاته … خشو ناديه ومنعم يجرو لانهم سمعو الاصوات لما شرينو
منعم مشى يجرى لى طاهر يفك فى ايديه من رقبه سحر

___________________________________________

تمت … ويتبع

زعما حمزة بيصدق حياة ..خاصه انه سمع حديث هند وفدوى بودانه على طارق
زعما الطاهر قتل بنته 💔.. ولا انقدها خالها ..

نحبكككم

تقييم المستخدمون: 2.45 ( 1 أصوات)

1 2 3 4 5الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock