رواية الدرج العالي بقلم زهور جمال الدين

فريق النشر
2020-02-25T16:40:58+02:00
روايات كاملة
فريق النشر25 فبراير 2020آخر تحديث : منذ سنتين
رواية الدرج العالي بقلم زهور جمال الدين

الدرج العالي بقلم زهور جمال الدين

#الدرج_العالي
🌷🌹للكاتبه زهور جمال الدين 🌹🌷

الحلقة السابعه
.
.
فى العيادة الساعه 8 الصبح
محمود والطيب وسهام مارقدوش من امبارح …
ليله حرفه فاتت عليهم والعزوز بين الحياة والموت …
صدمها الخبر اللى وصلها على حنين ..زعما حق البنيه كويسه واهلها غلطو .. ولا هيا عرفت تتصرف وزلبحاته .. ولا هوا طلع ولد اصل وستر على بنت عمه حتى منغير مايعرف الحقيقه …
هادى كلها اسئلة جت فى دماغ ربيعه مرة وحدة لما سمعت الخبر خلت دماغها يستاكا والعقل الباطن يغلب ومشت فى غيبوبه …
-طلعت الممرضه : المريضه فاقت … ولو سمحتو شخص واحد بس ايخشلها
-محمود : خش انت يابوي
الطيب تحرك وخش بسرعه لغرفه ربيعه
-الطيب يمسح فى دموعه : شغليتنا عليك يا ربيعه خيرك شن جاك
-ربيعه تتكلم بالشوى تعبانه: ماتخافش يا حاج شكلى مازال عندى خبيزة فى الدنيا
-الطيب: ربي يطول فى عمرك يا ربيعه ..والله لو تصيرلك حاجه هالبر كله ماعاد نخشه
-ربيعه: ربي يحفظك يا حاج …وين محمود وسهام !؟
-الطيب: واقفين برة ..الممرضه قالت شخص واحد بس اللى يخش .. ستر ربي اللى شد فيك محمود عالعيادة والمعاينه ..كنهدا رانا توة فى سو ثانى الله لا تقدر
-ربيعه : الحمدلله
-الطيب: شكلك استبردتى من الصالة وماتحملتيش
-ربيعه: الباين هكى .. نادى الدكتور قوله بنطلع
-الطيب : لا تطلعى لاشى ..خليك اليوم فى العيادة نطمنو عليك
-ربيعه : لا لا بنطلع نبى نمشى نشوف بنتى ..اليوم صباحها لازم حد مننا يمشيلها
-الطيب: لا لا فوتيه الموضوع هدا ..انتى ماعندكش صحة اليوم .. والمشوار لحوشها بعيد
-ربيعه : امالا كيف نخلو بنتنا بروحها يا طيب ..واحنا سبرنا الاهل يمشولها يوم الصبحه
-الطيب: اهو تو نقول لسهام تمشيلها هيا ومحمود
-ربيعه : لا سهام لا محمود .. الناس صغارهم بروحهم مانيش شادتهم ..خلى يسافرو بعتالى المغرب ..حتى هما عندهم شن شاغلهم ..بارك الله فيهم سيبو صغارهم واعمالهم وجو حضرو العرس
-الطيب: ايصير خير غير الهى بروحك بس
-ربيعه : نبى نطلع ..نادى الدكتور قوله يكتبلى خروج
-الطيب : انشالله خير
وبالفعل نادو الدكتوروشافها وعطاها خروج …وطلعت
___________________________________.
فى حوش حنين …
بدلت حنين بسرعه ولبست قفطان اصفر ربع كم قصير .. وفتحت شعرها ومشت تجرى للباب
فتحت لقت سرور جايبتلهم سفرة الفطور
-حنين مبتسمه : صباح الخير سرور ..اتفضلى خشى
-سرور : لا والله مانقدر نتحشم من شريف
-حنين : تى خشى شريف فى الحمام
-سرور : لا والله سامحينى .. خودى منى السفرة ودخليها
-حنين خدت السفرة : مشكورة علاش امتعبة روحك
-سرور: تعبكم راحة حبيبتى
وخشت حنين حطت السفرة عالطاولة متع الصالون اللى فى الصالة …وقعدت تتفرج على حوشها …انيق هلبا ..ومصروف عليه ..
اولماتخش من باب الحوش تلاقى على يمينك مدخل .. واتخش تلاقى صالة كبيرة فيها صالون لون فستكى وقدامه طاولة كبيرة .. وعالمين فى ريسبشن وراه مطبخ 3×4
وقدام الريسبشن طاولة اكل متع ست كراسى لونها ابيض وكراسيها قماشهم لونه موف .. ومقابلها عالحيط بوفيه تابع الطاوله نفس اللوح …
وعاليسار من الصالون الفستكى فى دار نساء فيها جلسه لوح عالوردى .. وجنبها دار النوم فيها موبيليا صينيه ومقابل غرفه النوم حمام وبيناتهم روشن كبير مضوى عالصالة كلها ..
انفتح باب الحمام
-شريف: اسمعى .. اسمعى
-حنين : نعم
-شريف : ترا مديلى فوطه خشيت بسرعه منغير ماناخدها
-حنين : باهى لحظه هى
وخشت دار النوم خدت الفوطه وطلعت مدتهاله ..لقاته مطلع راسه بس من الباب وكله اميه ..
-حنين : هاك الفوطه
-شريف: هاتى ..
ورجعت للصالة قعمزت اتراجى فيه …
_________________________________
فى جنان حوش خليفه
عبدالتواب مقعمز على كرسى ومتكى على سياج الجردينه
..ويسمع فى صوت حد نازل من الدروج ..تلفت يلقى سرور نازلة مبتسمه
سرور نازلة من الدرج من حوش خوها لقاته مقعمز فى الجنان وماسك جلابيه فى يده..بدى قلبها يطق ….
-سرور : احم ..م .. صباح الخير
-عبدالتواب تلفتلها : اهلا سرور صباح النور ..شنو العريس مزال منزلش
-سرور: لا قاعد فوق ..العقبالك انشالله
-عبدالتواب: لااا انا نهنى عليكم انتو الزوز صغار عمتى .. اتخشو بيت عدلكم وانا بعدكم طول
-سرور قريب يركبها الضغط : انشالله ربي ايطيحك فى بنت حلال تستاهلك
-عبدالتواب : وانتى كدالك انشالله ربي يجيبلك ولد حلال يهنيكى ويريح قلب خوك شريف عليك
-سرور مش عاجبها الكلام 🙄: انشاء الله
-عبدالتواب : نتعبك ناديلى امى بايته هنا من امس …غير نبيها تحددلى سورية الصلاة
-سرور فرحت : علاش اتعب فى مرت خالى ..هات انا انحددهالك
-عبدالتواب: لا والله مانبى نتعبك .. نادى الحاجة وخلاص
-سرور: لا والله مافيها تعب…حتى احنا تعبناك العرس كله وخدمتنا ..خلينا نخدموك
-عبدالتواب : قلتلك معش تقولى هكى..هدا عرس خويا وحتى فى فرحك انتى بنخدمكم هكى..راك وخيتى الصغيرة ياسرور
-سرور تكنطت 😏: باهى غير هات هات …
وخدت منه الجلابيه بعصبيه شوى ..وخشت للحوش
مشت لدارها طول ..وجبدت طاولة الحداد ..وحطت الحداد فى الكهرباء .. وفردت الجلابيه عالطاولة …
تراجى فى المكوى البخارية تسخن ..وتشبح للجلابيه
حطت عليها ايديها …قامتها …وحضنتها…كأنها حاضنه ولد خالها وتشم فى ريحته …
قعدت دقايق بالحال هدا ..وبعتالى فاقت لنفسها ..ةردت الجلابيه للطاولة ..وخدت المكوى تحدد فيها
واتمتم : قال بنخدم فى فرحك قال.. انشالله ربي مايديريكش عريس لعروسة غيري يا عبدو يا ولد خالى ..قول امين
😁😁😁😁😁😁😁
____________________________________
________________________________
طلع شريف من الحمام لاف الفوطه ..خش طول لدار النوم ..
وهيا تراجى …
طلع من دار النوم لابس حوايجه .. ومتلفت ليده ايسكر فى الساعه ومتوجه للباب …
وصل للباب وصل لبس كندرته …
-حنين😔: وين ماشى
-شريف: قلتلك ماتدخليش فيا ماليكش علاقه
-حنين بهدوء😔: هما جابولك فطورك هنايا
-شريف: لا لا عادى تو نفطر مع الجماعه برة ..اهو نسمع فى صوت عبدالوهاب ولد خالى لوطا
-حنين : كيف عريس طالع من اول يوم من حوشه
-شريف: بالك تبينى نرقد تحتك امالا
-حنين مادا يدها تترجى: لا مش هكى لكن لو يشوفوك توة نازل شن بيقولو علينا
-شريف: منها هادو اللى شن بيقولو
-حنين : اهلك .. لما بيلقوك نازل توة من الثمانيه شن بيقولو
.. نعرف العرسان ينزلو ادان الجمعه
ودمعو عيونها .. وقعمزت عالصالون وسكتت
حول شريف كندرته وخش ….جى عالصالون واتكى وقام تليفونه وفتح لعبة ..صوت ضرب وسلاح فى اللعبه …
وهيا مقعمزة وساكته …
بعدعشرة دقايق
-شريف: افطرى خيرك
-حنين صوتها بتبكى: لا الحمدلله شبعانه ..
سخفاته …ناض قعمز … قرب السفرة ..
-هوا : تعالى افطرى بلا جو
-بدت تبكى وتمسح فى دموعها: لا والله الحمدلله
-هوا يبي يغير الموضوع : كلماتك حناك اليوم
-حنين تمسح فدموعها: لا والله ماكلمتنى ..كلمتها مرتين تليفونها مقفل …بالك مازالت راقدة
-شريف: انتو تعطلو فى النوم
-حنين: لا الحق اميمه اتفيق بكرى .. تو كانا ماكلمتنيش شوى ثانية ..تو نكلمها انا
-شريف: باهى تعالى افطرى
-حنين : باهى تو ناخد ….
هما طبعا جايبييلهم قلاية لحم وكبدة ” زى فطور العرسان الليبيين المعتاد😁😁 ” …وجايبيين طن وجبنه
خدت هيا الجبنه ومسحتها فى طرف صغير خبزة ..وبدت تاكل فيها
-شريف: كولى القلاية خيرك
-حنين : لا منقدرش عالصبح
-شريف: باهى
وطاح ياكل فيها بروحه …
عنده طريقه كيف يشد الخبزة بيده االيسار بين صوابعه .. وياخد منها قطع بيده اليمين …
لاحظ انها تشبح لى يده …
-شريف: عندى اعاقه ..بلكى ماعندكش بيها علم
-حنين : الحق ماعنديش بيها علم ماحد قالى
-شريف: معناها حتى احنا نعتبرو خدعناك
-حنين : لا ولو ..الاعاقه اعاقه العقل مش الجسم
-شريف: اهاا
-حنين : خيرك مستغرب ..قلتلك الف وحدة تتمناك ولد عمى
سكت وقعد يشبح للسفرة مايبيش يشبحلها ..
وفى خاطره: امالا خيرك انتى ماتمنيتينيش يابنت عمى
كمل الفطور …
-شريف: ممكن اديريلى فنجان قهوة
-حنين قامت السفرة : حاضر
-شريف: بس قبلها تخشى تغيري القفطان هدا ..انا مش وصيتك
-حنين مصدومه: هدا استر قفطان عندى
شريف ولع دخانه : باهى غير جيبي القهوة
-خشت حنين للمطبخ : نديرهالك حلوة ولا مرة
-شريف مسمعهاش: نعم ..
-حنين طلعت من المطبخ وقابلاته مبتسمه : قلتلك نديرهالك حلوة زى انا 😍.. ولا مرة
-شريف: تخففى فى دمك ..ديريها مرة زى ايامى
وجبد جبدة من دخانه ….
-حنين تحشمت : ربي يحلى ايامك ..حاضر ح نديرها مرة زى ايام عدوينك
-شريف ضحك: ديريها زى مابديريها ..غير سقدى بس الضهر بيأدن …
خشت للمطبخ حطت السزوا عالنار ..
-حنين: راهو بتلبس نفس الزبون اللى جايبتهولك انا ..اميمه قالتلى كان مايلبساش فى الجمعه متع الصباح يهزو عليا الناس
-شريف: حسيتهم هامينك هلبا الناس ولا
-جابت القهوة : مندرى .. لكن اميمه هكى قالت
قعمز شريف كويس وخدى فنجان القهوة وشرب منه
-حنين واقفه: شنو كويس
-شريف قام راسه شبحلها : شنهوا
-حنين : فنجان القهوة
-شريف: ايه كويس
-حنين : باهى
_____________________________________
فى خيمه الرجاله ..
جايبيلهم الفطور …
-حكيم ولد خالهم : تعال ياخليفه انت وعمران افطرو
خليفه وعمران مقعمزين فى نهايه الخيمه كل واحد على كرسى ويوشوشو …
-خليفه : ياراجل فكنا من تنقريزك ..البنيه تهنت والموضوع انتهى .. ليش اتحير على بنتك
-عمران : انا مش خاشه دماغى ..نحس فيه ولدك دارها كدبة
-خليفه : وشن جابره يكدب وهوا ماعنداش علم بالموضوع الاصلى
-عمران : انا رائي نقول
-خليفه كشخ : ايييهيه علينا عاد .. اما قصه غريبه ربي ستر واحنا نفضحو
-عمران : انت شن قصدك انديرو
-خليفه : انا قصدى ننسوه الموضوع من حياتنا وندفنوه .. بالك الدكتور زمان غالط ..بالك البنت جسمها تغير وتساوى حالها
-عمران : ماهو هدا موضوع خطير.ومافيشى لعب ..ومش كل مرة تسلم الجرة .. انا رائي نقولو لشريف على القصه القديمه حتى كانا البنت بدت سليمه
-خليفه : والله الراى الاول والاخير ليك انت بوها..بس انا ننصحك ماتحيرشعلى بنتك .. وادفن الموضوع مدامه مات
-عمران شرد … وبعتالى تكلم : مدامه هدا رايك ..خلاص تامه الدوة وربي يستر
-خليفه : يعنى بتقوله ولا لا
-عمران : لا خلاص مدام الاولاد مشت امورهم مع بعض والموضوع مات .. خلاص دفينته فى نفس الليله مفروض اتم
-خليفه : هدا الراى الصح
-حكيم : تى كنكم…تعالو افطرو يا جماعه الفطار بيتم
-وقف خليفه : هيا ..جيتكم …
وتلفت : تعال افطر وتوكل على الله سلم اوخى
-خليفه : والنعم بالله
_______________________________________
مصمصت حنين اماعين الفطور فى الحوض
وخشت حنين لدارها فتحت شنطتها وتساوى فى حوايجها .. وخلاته هوا فى الصالة ..
هوا يانارى خاطره يخش معاها للدار ويشبح حوايجها ويعلق عليهم ويبصر ويضحك زى كل عريس..لكن عزت نفسه منعاته
اتكى عالصالون ومشى فى النوم …
الساعه 12 ونص …
جاته هيا اتنوض فيه : شريف نوض ..الضهر بيأدن
فتح عيونه ..معرفهاش ..دايرة مكياج اوفر …طالعه زى الغزالة ومسشورة شعرها
اتقاعد وقعمز عالصالون : بسم الله خيرك دايرة فى روحك هكى
-حنين : قصدك مش حلو
-شريف: لا مش حلو …
-حنين : 😔
وخش للحمام غسل وجهه وتوضا ..وطلع …
خش للدار لقاها ماسحه هداكة المكياج كله
-شريف: شنو ماصارش 😏
-حنين تمسح : مش قلتلى مش حلو
-شريف: ايه مش حلو .. زى عمتى برنية جارتنا اول ماسمعت بالمكياج زمان
-حنين : توة الزين هدا كله تشبه فيه بجارتكم العزوزة
-شريف يمشط فى شعره :مش زى كأنى حسيتك مغرورة
-حنين تلفتتله: وعلاش متقولش واثقه
-شريف: الفرق بين الثقه والغرور شعرة .. ردى بالك تكسريها وتخلطى الامور ببعضها
-حنين : هادى اسمها الثقه بالنفس..عشت طول عمرى زى الدرج العالى واثقه من نفسى .. ماحد قدر يوصلنى
-حط شريف المشط : ماوصلك حد غير الراجل اللى زلبحك ووهمك ان حتى هوا ايراجى فيك ترجعيله برة
-حنين استغربت : منو الراجل هدا ..انا اقسم بالله ماعمره حد زلبحنى ولا قدر يوصلنى
-شريف شبحلها 🙄: مش كأنى فهمت منك انك مرتبطه بواحد ولا
-حنين تلخبطت : اااه.. ايه ..ايه مرتبطه …
وقامت تليفونها زعميتا تعاود لرقم حناها ..وتلاقى فيه مقفل
طلع شريف من الدار وما اهتمش للى صار …
-طلعت حنين من الباب: حتى انا بننزل باهى
-شريف: بتنزلى امالا بتقطنى هنايا
ونزل للدور الاول سلم على مرت بوه وحناه واخته وطلع …
وهيا دارت مكياج خفيف ..ولبست جلابيه هندية …
ياحنه هدا كله مقريتهولها حناها ربيعه ..هكى ديري وهكى ديري
واتصلت بسرور …
-حنين : هاا سرور .. شنو ننزل
-سرور : انزلى ايه اهو نطيبو فى الغدا ..
-حنين : باهى تعاليلى ننزل انا وياك
-سرور: باهى هى
وركبتلها سرور وعييت ماتسكر فى زين مرت خوها وجمالها …
ونزلو مع بعض..وقعدو هادوكا النساوين ايزغرطو ..وقعمزوها بيناتهم …
وفتحو المنظومه …وكل مرة وحدة منهم اتنوض
وبعتالى خدو الدربوكه وبدو العزايز والبنات يغنو ..
الغالى وين قالوله سمى قال حنين عسل فى فمى
“وهوا ماعمره شافها ولا يعرف شكلها كيف عسل فى فمه 😁
الغالي درنالا دولاب معاش يعلق فوق الباب
😁😁😁😁😁
سبحان الله عكس السورين حتي في أغانيهم في الاعراس كلها دلع
تؤبر البي شو مهضوم بتشبه حبات الحلقوم
________________________________
فى حوش خليفه
النساوين ايغنو …وحنين تحاول تتصل ثانى بحناها ربيعه …
شد الخط وضبح …وردت ربيعه
-حنين : الوو
-ربيعه صوتها مرخى : اهلين بنيتى
-حنين انخلعت: خيره صوتك يا اميمه ..خيرك تتكلمى هكى
-ربيعه: شورة جتنى بردة قوية من مكيفات الصالة ..والله ماقادرة نتحرك
-حنين: حتى تليفونك مقفل شغليتينى ..
-ربيعه بصوت واطى: كيف صار امبارح
-حنين : مشيتهاهكى وخلاص الامور .تو لما تجينا هنايا نحكيلك
-ربيعه : باهى
-حنين : باهى امتى بتجى انتى ..نحسابك بتجى اليوم
-ربيعه : لا اليوم منقدرش ..بوك حتى هوا مستبرد
-حنين : باهى تجينى غدوة
-ربيعه : لا الجيان بقدوه يابنيتى ..مدامه ماصارش من اليوم ..تو نجى يوم السبوع
-حنين : منقعد اسبوع كامل منشوفكمش
-ربيعه : ربي كريم يابنيتى ..دورة تلقى الاسبوع تم ….
وبالفعل دورة الاسبوع …هداكه اليوم تغدت حنين معاهم لوطا وركبت العشيه استريحت ونزلت ثانى فى المغرب وهوا الوقت كله برة مع جماعته …
روح الساعه 12 فالليل …هيا فايقه فى سريرها بس دارت روحها راقدة …
وخدى مخدته وغطاه ورقد فى الصالة …
وهكدا ساير ايام الاسبوع … يفطر فى الحوش ويادوبك ياخد قهوة وينزلو يتغدو تحت فى حوش بوه وتركب هيا العشيه …وهوا ايروح الساعه 12 فى الليل يرقد طول …
يانارى لا حس بفرحه عرس ..ولا حس انه عريس …مصدوم من المقلب اللى صارله ومش قادر يتكلم لان البنت بنت عمه ..شرفه من شرفها …
وهيا حوايجها اكل الله الله ماعندهاش لبسه مستورة ..لفقت اللبس كله لبعضه ..كانا لبست بريتيلى سيور تلبس تحته تيشرت 😁😁..والشورتات كلهم دستهم …والقفاطين نفس الشى لانهم كلهم قصار ..تلبس فيهم فى الليل بس وقت بترقد فى دار نومها ….
وحاط عليها شروط..مانعها من الطلوع من دارها فى الليل الا للحمام بس…. لانه خايف لو يشبحها يضعف ومايتحكمش فى نفسه والبنت ماتبيش
_______________________________
ووصل يوم السبوع ..ولبسوها اللبسه متع الصدرة الفجرة .. سبرهم يلبسو هكى ..ولازم اتخش اتحرك العشا….
وهيا فى المطبخ معاها سرور بنت عمها .. حنين لابسه الفجرة …وسرور لابسه قفطان اسود طويل استريت على جسمها …وفاتحه شعرها ودايرة مكياج خفيف
وفجأة ينفتح الباب متع المطبخ اللى يفتح عالجنان ..
حنين طول اتقت ورا الباب .. وسرور يبست قدامه …
عبدالوهاب فتح الباب .. ويبس لقى بنية قنينه واقفه قدامه …
للحظات سكتو الزوز .. يشبحو لبعض..
واطى عبدالتواب راسه : سامحينى اختى امى كلمتنى قالت العشى واتى تعالو ارفعو الصوانى
-سرور منغير ماتحس بنفسها : انا سرور
-قام عبدالتواب راسه : معقولة !!
وعطى بالضر تلفت للجنان ومشى …
سرور فرحانه قريب بطير انه شافها … وماحاسه بحد حواليها
قطعت عليها حنين : ياعينى ياعينى ..هدا شنو
-سرور تضحك فرحانه : اشششش اسكتى تو بعتالى نحكيلك
-حنين تضحك : شنو بتحكيلى كل شى واضح قدامى
-سرور واطت راسها : شنو واضح
-حنين قربت منها : ياعمرررى … خيرك خجلانه ..مش عيب راهو
-سرور : غير ياريته حاس بيا
-حنين : مدامك صادقه مهاه معاه ايحس
-سرور فرحت : هكى تقولى
-حنين تضحك : بالرغم خبرتى مش هلبا فى هالمواضيع ..بس ايه هكى نقول
-سرور قامت ايديها : انشالله ياااربي يسمع منك
-زهرة خشت للمطبخ : هيا تعالو خيركم عطلتو النساوين قاللولكم تعالو
-سرور : باهى اهو جايين هى
وزادو دربكو فى الليل …..
ووكان الاسبوع اخر ليله فى العرس …وتم العرس ….
وفالليل ركبت حنين لشقتها …وركبت معاها حناها اتشوف فى الشقه ..وركبو معاهم نساوين العيلة ايسايرو …
وحولولها الصدرة .. وهدرزو شوى ونزلو …
قعدت هيا وحناها بس فى الحوش ..
خشو دار النوم …
-ربيعه : كيف درتى ليلتها ..كيف صار وقالولى تهنيتى
– حنين تبكى: ليش درتيلى هكى يا اميمه .. ليش تخلينى نخدع ولد الناس ..الولد كويس وكان يقدر يرتبط بوحدة احسن منى وتحبه
-ربيعه: يابنيتى الحظ والقدر لعبو لعبتهم فى حكايتك ..انا نحسابه عنده علم ..
-حنين : المفروض اتاكدتى ..هدا موضوع مش ساهل كيف تحطينى فى الغريق بروحى وتقوليلى عومى
-ربيعه: باهى شن قلتيله
-حنين : قلتله انى مرتبطه بشخص ونحبه ونبى نقعد عدراء ونبيه ايطلقنى بيش نتزوجه
-ربيعه شهقت وخبط على وجهها : وليش اتقوليله هكى
..ليش هالفضيحة هادى .. ليش تكدبي وتقولى مرتبطه
وانتى مش مرتبطه بحد ..
-حنين: والله هادى الكدبة اللى جت فى راسى وقتها
..مالقيتش كدبة مقنعه اكثر منها
-ربيعه: تحسابيها ساهله عالراجل اتقوله مرته نبى راجل غيرك …تحسابيه حق ساكتلك ..غير ايراجى امتى اينيب فيك ويعظك فى مكان باهى
-حنين : اما خير الفضيحه هادى ..ولا الفضيحة الاكبر ..تبينى نقوله انا مش بنية..تبينى انقوله احنا خدعناك وخديت بنت فاقدة عدريتها
-ربيعه : يابنيتى غير كانك سكتى رانى جيت انا وفهمته
-حنين : وااااك يكفى حديث فى الموضوع هدا …انا انخنقت …بنطلع من الدار
تطلع من الدار وتلاقى شريف مقعمز فى الصالة وماسك موبايله ويشبح للدار
-حنين ترعش: شريف..انت من امتى هنايا
-شريف مصدوم : توة بس كيف فتحت الباب وخشيت
طلعت ربيعه ترعش مع بعضها : اهلا وليدى شريف
-شريف يشبح لحنين : اهلا يا حاجه …شنحالك انتى والحاج
-ربيعه : الحمدلله وليدى ….امالا نستادنكم انا …
ومشت جهت الباب فتحاته وبتطلع …
لحقتها حنين بتسقدها …
-ربيعه : هيا بهناكم عاد
-حنين ترعش : متخلينيش معاه ابروحى ..انا خايفه يا اميمه
-ربيعه : وشنو اللى خوفك
-حنين : اكيدة سمعنا
-ربيعه : لا تخافى لا سو ..انا توة نازلة لبوك وعمك ايديرولك حل معاه
-حنين : وراس اميمه كلمى بابا ايجينى توة ..انا نبى نطلق …انا خايفه
-ربيعه : نهار احرش ..شن هالهبال ..طلاق شنو فال الله ولا فالك ..وكيف يجيك بوك توة ..شن بيقولو عليه حوش عمك لوطا ..راكب لبنته عروس …
وتلفتت بتنزل : خشى سلم بنتى وبأدن الله والله ماتطرالك حاجة
-حنين😔: باهى
وسكرت الباب وخشت لقت شريف وجهه احمر ومولع دخان وايدخن …
-شريف : ترا ديريلى قهوة
-حنين : توة ليل تو تسهرك
-عض شنونه مغتاظ : مش شغلك انتى قلتلك ديريلى قهوة
وجبد دخانه ..
__________________________________
تمت …. ويتبع …

رابط مختصر

عذراً التعليقات مغلقة

error: Content is protected !!