رواية اميرة قلبي للكاتبة زهور جمال الدين

فريق النشر
2020-04-03T14:30:55+02:00
روايات كاملة
فريق النشر17 مارس 2020آخر تحديث : منذ سنتين
رواية اميرة قلبي للكاتبة زهور جمال الدين

أميرة قلبي للكاتبة زهور جمال الدين

اميرة قلبي بقلم زهور جمال الدين

#أميرة_قلبي

بقلم زهور جمال الدين (18)

_

فى الاجتماع …

اميرة مقعمزة .. وعقلها مشتت .. كيف هكى هيا مقعمزة على كرسى المدير وولد صاحب الشركة مقعمز مع الموضفين.. فى حاجه غلط ..
خشو الموضفين ومن ضمنهم فارس وقعمزو على كراسى الطاولة متع الاجتماعات فى اول اجتماع مع اميرة بعد ماستلمت الادارة …
فارس شبحلها وغمزلها / صباح الخير استادة
اميرة ماشبحتلاش اصلا / ابدى فى بنود الاجتماع يافادية
فارس ماهتمش انها ماشبحتلاش .. وقعدو عيونه معلقات فى اميرة وخلاص.. ولا كأن معاهم ناس

فاديه فتحت ملف عطت اوراق لى سماح البنت اللى معاهم .. وسماح وقفت وبدت تحط فى ورقه منهم قدام كل موضف
-فاديه حطت اوراقها عالطاولة /اولا صباح الخير عالجميع
كلهم / صباح الخير
-فادية /ثانيا الاوراق اللى قدام حضراتكم عالطاولة استمارات تتعبى من موضفين الاقسام اللى حاضرين معانا توة .. وتتسلم اليوم قبل الساعه 12
اميرة تشبح للموضفين ويبانلها فارس لكن ماتبيش تشبحله
-فاديه/ الكلام للاستادة اميرة .. ومن بعدها للاستاد رواد
-اميرة / احم.. السلام عليكم
-الكل / وعليكم السلام
-اميرة / اليوم استلمنا الادارة… وحنبدو فى ميزانيه السنه الجديدة..بعلمكم ان احنا فرع من الشركة الام…يعنى تابعينها طول..قراراتنا لازم تتصدق من المدير العام نفسه..واعمالنا قبل مانباشرو فيها لازم ناخدو منهم الموافقه
الموضفين ساكتين وفارس يشبحلها معجب بشخصيتها وباسلوبها
-اميرة / الفرع كله 6 ادارات ..والست ادارات هادو تحتهم 86 موضف .. كل ادارة مسؤلة انها تنفد الشغل المكلفه بيه.. مفيش صداقه ولا قرابه فالعمل.. اللى شاف شغله بنجزوه واللى تهاون بنعاقبوه .. وربي يوفق الجميع
تلفتت لى فاديه / كملى
-فاديه / عندنا ادارة متعاونه اسمها السلطه التنفيديه تحت ادارة الاستاد رواد .. حيعرض هوا بنفسه قراراتها و اوراقها
-رواد / السلام عليكم .. الادارة التنفيديه متقدرش تدلى بأى راى ولا اى قرار حاليا … لان مقرر انها ترجع لى وضعها ولمديرها الاصلى واحتمال انا حنرجع النائب
-اميرة / ومنو مديرها الاصلى
-رواد / الاستاد فارس
-فارس/طبعا اكثركم علرق انى انا السنه اللى فاتت كنت ماسك التنفيديه هنايا ومنها حولت للشركة وبعدها رجعت للفرع .. وتوة طالبين منى نرجع للتنفيديه وقاعد نفكر القرار مزال مطلعش رسمى .. لكن طلبو منى انى نباشر من اليوم
-اميرة / اهاا .. بس لما كنت هنايا فى السكرتاريه قالو انهم بينقلو التنفيديه لى مكتب فى المدينه
-فارس/ لا ماصارش …. منقعدو هنايا 😁
-اميرة / اهاا… باهى
وتلفتت لى فاديه/ كملى

__________________________________________

_

فى حوش انيس

رندة وصلتها من عفاف رسالة .. نفس الرسالة اللى وصلت لى طلال … لكن غصتها وسكتت لاحبيت ادير مشاكل ولا تبلغ انيس لانها عارفاته مش حيسكت ..
ياحنه رندة ولدها فى حجرها .. وماحستش بالنار اللى طاح فيها طلال..وعلاش بتتعصب ولا بدير نقناق لى راجلها
مقعمزة بروحها فالحوش انيس طالع … قامت التليفون وفتحت الفايبر اتصلت بي عفاف وكانت ناويه تهدى معاها فالدوة وتكلمها بالعقل ومنغير عياط
عفاف مقعمزة فى جنان حوش اماليها وبنتها تلعب جنبها .. سمعت صوت تشريين الفايبر مشت لى تليفونها قاماته وشافت المكالمه تلقاها من رندة
-عفاف حمقت/ مصح وجهها ..
فتحت الخط وردت/ مصح وجهك .. وقايمه التليفون وتتصلى بيا .. شن تبى
-رندة / اهدى .. واعرفى كيف تتكلمى انا منخدمش عندك
-عفاف/ سألتك شن تبى ..قولى فيسع بنصكر انا مش فاضيه
-رندة/ عفاف ارجعى لى عقلك … انتى مش خايفه .. كيف اطاوعك نفسك تبعتيلى رسالة متخافيش نوريها لى راجلك
-عفاف / ياريتك خليتيه يشوفها .. لانى كنت نبى نطلعك مريضه نفسيه تتوهمى انى نهدد فيك .. وكنت بنديرك انتى هيا اللى سممتى ولدك
-رندة/باهى انا بطلعينى مريضه نفسيه… وحوش طلال اللى قتلتى بنتهم .. تحسابيهم بيسكتولك غير يزبطو انك انتى اللى ورا الموضوع …
عفاف ضحكت …
-رندة/ ماهو مدامك اعترفتيلى انك انتى اللى سممتى ولدى معناها بالتاكيد انتى نفسك اللى سممتى ولد طلال ….مش معقولة بالصدفه احنا وياهم صغارنا يتسممو فى نفس اللحظه .. تحسابى طلال بيسكتلك لو حس انك انتى اللى ورا الموضوع ..
-عفاف تضحك/ طلال بعتله نفس الرسالة اللل بعتهالك
-رندة خبطت على وجهها / غبارتك السودة …كيف تعترفيله
والله ماهو مسيبك لين يمشيلك ويدبحك
-عفاف/ ويجينى ياحنه ومن ماسكه .. وبعتالى تو يشوف الوجه الحقانى لى عفاف
-رندة/ ياعفاف ليه عليك دايرة هدا كله فى روحك .. الحياة نصيبات وماحد بياخد اكثر من نصيبه
-عفاف/ زى ماضلمتونى .. والله مانى مسيبتكم فى حالكم
-رندة / وانتى من ظلمك ..زواجى انا وانيس نصيب .. وزواج طلال وملاك نصيب .. يعنى لو ترقى او تنزلى كانت زواجاتنا هادى بتصير

-عفاف تعيط / هدا كله …….. وانتم ماظلمتونيش …. الراجل اللى حبيته وعطيته عمرى وروحى وحياتى يرمينى رميه الكلاب ويتزوج ويقولى انا نحب فى مرتى .. وصاحبتى اللى تاكل وتشرب عندى تخنب منى راجلى .. وهدا كله وتبونى نسكتلكم
-رندة/ نتكلم عالجزء اللى يخصنى .. راجلك اللى تقولى عليا خطفته منك انتى فالاصل ماتبيشى ..
-قصت عليها تعيط / وانتى شن دخلك نبيه ولا مانبيشى .. اهو جت الحليوة فيه توة بعد ماخداك.. غيرت رائي ونبيه
انتى بتورينى انا راجلى نبيه ولا مانبيشى يا خامرة .. لكن والله ماك متهنيه بيه .. وخلى من الخامر الثانى مزال ياما داستله
-رندة / اسمعى .. انا نعطيك الصور والفيدوات وكل شى عندى غير خلينى انا وولدى فى حالنا .. تربحى يا عفاف انا عمرى ما اديتك ..
-عفاف/ وشن مزال بعد تخطفى راجلى منى ويتمتى بنتى
الصور خليهم عندك تتهنى بيهم ..بالك مزال تحسابينى بنسيبكم وعليا وعلى اعدائي
-رندة/ امالا تحملى مايجيك من طلال وتربحى خلينى فى حالى وطلعونى من موضوعكم نبى نربي ولدى
-عفاف/ انتى وسط المعمعه …وممكن اللى درتيه انتى اكبر ماللى داره طلال .. عالاقل هوا كان واضح .. لكن انتى لفيتى عليا من ضهرى
-رندة/ لكن انا…
-قصت عليها عفاف/ بالله دورى وين تلعبي
وصكرت الخط فى وجهها

_________________________________________

_

فى مكتب اميرة …

طلعو كل الاعضاء .. وقعدو رواد وفادية وفارس مع اميرة

-اميرة / الفرع مايقدرش يتحمل مسؤليه مكتبكم معانا ..
سامحونى انا حنطلب نقل المكتب تبعكم للمدينه زى ماكنتو ناويين فالاصل
-رواد / لكن احنا يا استادة جهزنا مكتبنا هنايا .. ومن زمان لما كان الاستاد فارس هوا المدير كان موافق على وجودنا وقعنا عالمكان
فارس يدور فالكرسى يمين ويسار وماحولش عيونه من اميرة لين عقدها
-اميرة تشبح لى رواد بابتسامه بسيطه / استاد رواد .. احنا مش رافضين شخصكم لا سمح الله .. احنا رافضين المسؤليه وخاصه انهم عاطيينكم الادن فى مكتب ثانى
-رواد / سامحينى الفرع ماليشى اى علاقه بينا ولا مسؤليه علينا ولا على قراراتنا .. احنا مكتب قائم بداته
-قصت عليه اميرة / ولدلك انا من بكرى نقولك لازم يكون مكتبكم منعزل علينا وفى مكان ثانى
-رواد حس انها فحماته / ان شاء الله خير
-وقفت فاديه تلم فى اوراقها / الاجتماع انتهى وربي يعطيك صحتك استادة اميرة
-وقف رواد / عموما الموضوع عند فارس توة لان تقريبا رجع هوا المدير حاليا للتنفيديه
وتلفت لى فارس/ نمشوو
-فارس/ راجينى برة شويا بس نبى الاستادة اميرة فى موضوع خصوصى
فاديه ورواد شبحو لى بعضهم لانهم عارفين ان فارس كان خاطب اميرة 😁😁
اميرة بدت ترعش/اسفه احنا عندنا شغل توة
-فارس قاعد مقعمز عالكرسى/ خمسة دقايق مايعطلوكش
-فاديه / نستادن
اميرة تشبحلها وتفنص فيها ان ماتمشيش .. لكن فاديه تتحشم من فارس مهما يكوت كان مديرهم ..
-رواد / عن ادنكم ..
وطلع من الباب .. وفاديه طلعت وصكرت الباب وراها

__________________________________________

_

فى حوش جميلة

جميلة حاطة سفرة القهوة ومقعمزة هيا وخديجه صاحبتها

-خديجه/ انتى خيرك قلبتى عليه مرة وحدة هكى
-جميلة / لوح بنتى يوم فاتحتها وتبينى نقعد نعزه ونحبه
-خديجه / ماهو هدت هوا فارس اللى تشكرى وتحطى فيه
-جميلة / نشكر ونحط مادامه مع بنتى ويبيها .. لكن مدامه دار لى بنتى عملة سودة زى هادى لا عاد نبيه ولا نبى سيرته
-خديجة/ سبحان الله كيف بنادم رايه يتغير فى دقيقه
-جميلة / سلامة مروان والله حاساته زى وليدى فى وسط قلبي
-خديجة / ياوالله جميلة … الدنيا عندك مع الواقف
-جميلة / وعلاش لا..نسيبي اللى واخد بنتى مش اللى مسيبها
-خديجه / لكن مالاحظتيش ان بنتك مش فرحانه
-جميلة / وعلاش ياحنه مش فرحانه.. مروان الف بنت تتمناه
.. لقاته فى قرارها … وعلاش ياكبدى ماتفرحش
-خديجه / انتى تكدبي على روحك ولا عليا …تشبحى فى بنتك منكدة ومش فرحانه …وعارفتيها ماتبيشى الولد اللى خداته وعارفه روحك انتى اللى غصبتى عليها بيش وافقت عليه
-جميله شهقت / هىىىىى….انا غصبت عليها بيش تاخده
-خديجة/ غصبتى عليها امالا شنو … اليوم ليك شهور وانتى تنقرزى عليها تتخطب …وتوة تقولى انا مادرت شى
-جميلة / انا ندور فى مصلحة بنتى .. واللى بياخدها هوا اللى
بنديره ولدى… غير هكى مانعرف حد
-خديجة/ عموما ربي يهنيها اميرة …حتى مروان باهى وانشاءالله فارس مايديرلها اى تبهديلة
-جميلةة/ والله حالفه بيمين ..كان يقربها ولا يوصل جنبها ناكله بسنونى

__________________________________________

_

فى مكتب اميرة

فاديه ورواد طلعو وصكرو الباب وراهم … وخلو فارس مقعمز على طاولة الاجتماعات واميرة واقفه فى وسط المكتب
فارس وقف ولف حوالين الطاولة يبي يطلع
-اميرة ترعش/ اسمع .. احترم نفسك انا مخطوبه ونحترم فى خطيبي ومنقدرش نقعد معاك فالمكتب بروحنا
فارس يمشى بخطوات ثابته … قرب منها .. وقف جنبها ..
-شبحلها / استاحشتك
تلفتتله/ قلتلك انا ….
قص عليها / انا اسف كنت غبى ..
اميرة شبحتله وسكتت
-فارس/ وربي عاميلى عيونى بكلام مكنش موجود
-اميرة ارتخت شوى/ شن قصدك
-فارس/انا تلاقيت مع اللى اسمه فرغلى..وحكالى حكايه امك
-اميرة بهدوء/ شن حكالك

-فارس/ حكالى كيف كنت غبي ..وكيف الشيطان عمالى عيونى..وحكالى كيف انتى بنت محترمه وتستاهلى شخص احسن منى
-اميرة عيونها دمعو وعطاته بالضهر غمضت عيونها وهيا كاظمه غيضها/ فرغلى شن قالك
-فارس/ حكالى الحكايه كلها .. من لما امك مرضت لين عطيتيه الفلوس وروحتو ليبيا
-اميرة تلفتتله/ وتوة صدقتنى .. عرفت انى بريئة ..عرفت انى محترمه والعيبه ماتطلعش منى
-فارس/ لكن زى ما انا اعترفت بغلطى لازم حتى انتى تعترفى بغلطك
-اميرة / انا غلطى ماكنش كبير وماتوقعتش ردت فعلك هادى كلها بعد بتعرف الموضوع
-فارس/ ومنو اللى كان داس الموضوع عالثانى .. ياما سألتك ياما قلتلك اعترفيلى وانتى شى تغطى وادسى
اميرة عطاته بالضهر وربعت ايديها
-فارس قايم يده / لو انا درت خطأ فثلاث ارباعه كان من تحت راس كدبك .. وكانى انا ظلمتك .. فنص ضلمى ليك كان ردت فعل لى تصرفاتك ولى تضليلك ليا
-تلفتتله / ياااااه .. يعنى توة صبح الحق كله عليا انا
-فارس/ انا ماقلتش هكى .. لكن لو تراجعى قصتى معاك … ح تلقيها كلها تزييف للحقيقه من طرفك .. وخداع .. خلى المسافه والفجوة كل يوم تكبر بيناتنا
-اميرة قامت يدها / فى شنو خدعتك انا
-فارس/ قلتى مش انتى اللى كنتى فى مصر ليلتها .. وهدا كان كدب .. خداع ليا ..
-اميرة / حتى انت مشارك .. لو تدكر يومت الهديه الللى بعتهالى انيس صاحبك .. يومتها انت سألت امى وقالتلك انى بالفعل كنت معاها فى مصر وانت مادرتش تى ردت فعل
-فارس يعيط / لانى صدقتك انتى ..تعرفى ليش ..
اميرة تشبحله
-فارس/ لانى نحبك ..ومستعد نصدقك لو تشهديلى فى بوى

اميرة زى اى بنت واقفه قدام الولد اللى تحبه ومش قادرة تقوله انا مازلت نحبك …
جت للباب فتحاته/ لوسمحت اطلع وخلينى بروحى..
منقدرش نستقبلك اكثر من هكى .. مانبيش نجيب لى الشبهه
-فارس/ انا توة بديت شبهها
-اميرة / طبعا وفى عندك شك للكلام هدا
-فارس/ اسف … نستادنك

وطلع وخلاها … مشى للممر ومنه للاسانسير .. فتحه وخش فيه ونزل روحى

بعد عشرة دقايق

خش مروان لى مكتب اميرة وجهها احمر ومتغير
-مروان / صباح الخير حبيبتى
-اميرة زى متحشمه منه مش قادرة تشبحله / صباح الخير مروان
-مروان / قالولى فارس حضر معاكم الاجتماع
-اميرة مواطيه راسها تتصفح فى اوراق قدامها / ايه
-مروان / شنو ايه .. وهوا شن جابه هنايا
-اميرة/ هدا مكان شغل وهما عندهم مكتب هنايا معانا فالفرع
-مروان/ منهوا عنده مكتب هنايا فالفرع.. ماهو مسيبه ليه اكثر من عام وماشى لى مصر
-اميرة / انت ليش جاى توة مفهمتش
-مروان / جاى نبي نفهمك انى مستحيل نسمح لى فارس يتقابل معاك هنايا فالمكتب بحجة الشغل
-اميرة عيطت عليه/ شنو تسمح ولا ماتسمحش..انت تحسابها شركة بوى ولا شنو .. الولد هادى شركتهم هوا وبوه يخش وين مايبي بغض النضر انا راضيه ولا رافضه وضعه
-مروان/ يعنى انتى تبيه يقعد معاكم
-اميرة بحزم / اكيدة لا… لكن مش بالسهولة هادى نمنعه
-خبط مروان يده عالطاولة / نبدا ديوث كانا مزال خليته يتعامل معاك ولا تشتغلى معاه فمكان واحد بعد اليوم
وطلع / تو نعرف من نكلم انا

اميرة قعمزت تخمم فى اللى صار كله
_________________________________________

تمت …. ويتبع

نحبكككم

رابط مختصر

رأيك يهمنا

error: Content is protected !!