روايات كاملة

رواية زواج بالإجبار

جميع الحقوق محفوظة للكاتبة زهور جمال الدين

الحلقات الاولي منه هنا

زواج بالإجبار للكاتبة زهور جمال الدين

 

#زواج_بالإجبار

🌷للكاتبه زهور جمال الدين🌷

🌿الحلقه الحادية عشر🌿

نجوى سرحانه ..
-خيريه:والله انتى تستاهلى كل خير يا دكتورة
-نجوى فاقت من سرحانها: سلمها خويرة ديما قايمتها بالجميع
-خيريه: لا والله بجد نحكى انا حايرة فيك كيف لتوة قاعدة بلا زواج وانتى الف من يتمناك
-نجوى تضحك: ومن قالك انى مش متزوجة
-خيريه استغربت ووجهت صبعها على نجوى ومبتسمه: قصدك انتى متزوجه يا دكتورة
-نجوى: ايه متزوجه
-خيريه قعمزت عالكرسى اللى قدام المكتب: وانا نقول علاش كل من تبعك ولا دورك وانتى دايرة روحك مش فاهمه ومش مدورة
-نجوى: ارتحتى توة
-خيريه : ربي يهنيك انشالله وعندك صغار
-نجوى: لا معنديش يا خويرة ..
وبتنهيدة: انا قصتى طويلة..وعموما انا فى حوش بوى توة وطالبه الطلاق
-خيريه شهقت: بعيد السو عليك
-نجوى مدت يدها عالمكتب: واللى قولتهولك هدا كله يموت هنايا ..فهمتى
-خيريه تضحك بانت سنها الدهب : هههه تى عاد يا دكتورة منغير ماتوصى خيرك
-نجوى: انا منحكيش على حكاية انتى متزوجه.. اصلا اللى يعرفونى كلهم عارفين انى مدام
-خيريه : فاهمه عليك يا دكتورة
-نجوى: باهى شوفى شغلك متعطليش روحك
-وقفت خيريه : والله خسارته هالغزال اللى كان واقف هنايا قريب ياكلك بعيونه
-نجوى ضحكت: باهى كانا نقولك هوا هدا زوجى شن تقولى
-شهقت خيريه : نهار احرش ..وعلاش بتطلقى منه . الراجل واضح يبيك
-نجوى: شوفى شغلك يا خيريه
-خيريه : تى انا الليله مناوبتى فالقسم هنايا ..غير اصبرى نفهم
-نجوى: شوفى شغلك ..وانا بننزل تحت للبنات فى قسم الاطفال .. لما تبى حاجه فالقسم هنايا شوى الدكتور صالح حتى هوا مناوب الليله
-خيريه طلعت وهيا اتمتم : غبابير السود ..الغزال هدا تطلقى منه
وطلعت وخلت نجوى تدكر فى ايامات بنغازى وكيف تبلى عليها
______________________________

خش عامر للغرفه اللى راقد فيها بوه لقاه ماشى فالنوم
قعمز عالكرسى اللى جنب السرير…قام ايديه وتكى راسه عليهم وقعد يخمم ..الحكاية بجديات وصلت نهايتها .. وصار لازملها من حل
قعد يدكر قبل اربع سنوات لما بوها شد الصحيح فالقضيه متع الطلاق .. دار هوا شنطه ومشى لمصر قعد اربع شهور ..ولما روح لقى الموضوع هدى ..ونفس الشى قبلها بعام ..هما يديرو جلسه وهوا مايمشيش …
لكن من مدة ثلاث سنوات هيا مهدية وساكته ومعش رفعت اى قضيه ..بالرغم اصبحت تقدر تطلق منه حتى منغير علمه.. لكن هيا قعدت عالوضع الصامت .. وهوا سكت غير بيت يا سويدى الحكاية لين تتخرج وبعتالى ساهل
وهوا فى عز تفكيره فاق بوه من النوم ..
-خليفه : يا عامر
-عامر: نعم يا بوى
-خليفه حاط يده على صدره : وجيعه هنا كان تناديهملى يعطونى مسكن
وقف عامر فى باب الغرفه : يتسستر
-خيريه : نعم
-عامر: كانا تناديلى الدكتورة غير الوالد متوجع شوى
-خيريه : الدكتورة روحت تو اناديلك الدكتور صالح
-عامر اتفاجأ: ليش روحت
وفى نهايه الممر انفتح باب طلعت منه نجوى قايمه البالطو متاعها على يدها وتوجهت جهة الاسانسير
-عامر ناداها: نجوى
-تلفتت نجوى : نعم لقت عامر قدامها ..
مشالها عامر لنهاية الممر ..وخيريه تتفرج ومعجبه بيهم ومبتسمه وبردو سن الدهب باينه منها 😁
-عامر: وين ماشيه
-نجوى: مش شغلك
-عامر مسكها من كتفها: امالا شغل من .. الساعه 3 فالليل توة من بيروح بيك
-نجوى فكت يدها : قلتلك حول وجعتنى ..مكنتش بنروح ..بننزل للبنات تحت
-عامر: بوى عنده الم تعالى شوفيه
-نجوى : حول من قدامى
ومشت للمر وتلفتت لخيريه : تعالى
وخشت لدار خليفه وسكرت الباب وخلت عامر برة
-نجوى: متخليشى يخش
-خيريه : حاضر ..
وقعدت واقفه عالباب😁
-نجوى: الف سلامه عليك عمى خليفه خيرك شن يوجع فيك
-خليفه حاط يده على صدره: هنايا عندى وجيعه هلبا
-نجوى: حاسها زى حاجه تحرق فيك
-خليفه : ايه
لبست نجوى سماعاتها وحطتهم على صدره وبطنه وقعدت تسمع ..
وتلفتت لخيريه : جيبي ابرة زنتاك واضربيهاله فالوريد
-خيريه : يعنى نفتح الباب
-نجوى: افتحى ايه وجيبي اليبرة
-خيريه : ماهو بيخش
-نجوى : خيرية متنسجميش هلبا ..بري جيبي اللى قلتلك عليه واضربيهوله
-خيريه : حاضر
وفتحت الباب لقت عامر متكى عالحيط ويراجى فيهم
-عامر : كملتو
-خيريه : خليك واقف هنايا ماتخشش لين نضربوله يبرة وتطلع الدكتورة
-عامر يضحك : حاضر
ومشت خيريه جابت اليبرة وضربتها لخليفه استريح عليها
وطلعت نجوى ماتبيش حتى تشبح لعامر ..مشت طول للاسانسير
لحقها عامر مسكها من يدها : تعالى
-نجوى : حول يدك ..
وانفتح الاسانسير وطلعو منه زوز ممرضين فلبين وخشت فيه نجوى بسرعه وسكرت الباب
ورجع عامر للمر بيخش دار بوه ..لقى خيريه
-عامر : نجوى وين مشت
-خيريه : نزلت تحت لصاحباتها عندهم مناوبة فى قسم الاطفال…
وغمزتله : لكن متخافش حتى غدوة عندها مناوبه فالقسم هنايا
-عامر: كيف ليلتين ورا بعض
-خيريه : لا الليله ماسكه بدل سعاد صاحبتها
..وغدوة يومها هيا العادى
-عامر: باهى
-خيريه : يبهى ايامك
“كانا فى من بيردهم لبعض فالمستشفى فاكيدة حتكون خيريه ام سن دهب 😁😁😁
_______________________________

فى حوش سالم …
غزالة وسالم متكيين فى سريرهم ويهدرزو
-غزالة : توة انت عاجبك الوضع هدا
-سالم : نشهد بالله ماعاد عاجبنى ..قلنا خليها تقرا ومانبوش نفسدو عليها لكن توة خلاص
-غزالة : انا الناس كلولى وجهى
-سالم : خدمه وبيات برة الحوش انا مايساعدنيش
..لازم ننهوها الحكاية هادى يا هكى يا هكى
-غزالة: حتى هوا راخيلها هلبا ..الباقى راجل مرته عند اهلها سنين وهوا ساكت
-سالم : مايبيش يطلقها يا غزالة ..تى هيا كل مايتحرك الموضوع تشد فالطلاق عيي مسكين
-غزالة: ياودى ماعيي حد الا احنا الكبار …الباقى هيا كانها خدت كلمتها راهى بصغارها توة
-سالم : كانها خدت كلمتها راهى قعدتلك مطلقه سبعه سنين تقرا ..عالاقل حال ابرك من حال ..وهكى اسمها متزوجه خير
-غزالة : باهى وتوة ..اهو تخرجت ..عالاقل ادير حوش وصغار قبل لايفوتها الوقت
-سالم : شنو بتلقى خير من ولد عمها
-غزالة : انا ماقلتلكش طلقها منه ..كان رجعتله هوا خير وخير… والله مالاقيه زى عامر ووسعت باله..لكن كانها ماتبيش ..خلاص عاد بسلت وخترت
-سالم: غير خلى تروح غدوة وبعتالى ساهل

____________________________

الصبح الساعه 9 سلمت نجوى توكتها اللى هيا فالاصل توكه سعاد صاحبتها وروحت للحوش ..
جى بوها روح بيها
فالطريق
-سالم : خيره وجهك رايح هكى ..تعبانه ولا شنو
-نجوى تلفتتله : عمى خليفه راقد فالمستشفى كان تبى اتزوره
-سالم : خيره شن جاه
-نجوى: المرارة عنده ملتهبة هلبا
-سالم : ومن راقد معاه
-تلفتت نجوى القدام : منعرفش
سكت سالم زبط ان اللى معاه عامر
-سالم : انا اصلا كنت نبيك فى موضوع اليوم
-نجوى: بوى بالله عليك تعبانه ..امبارح توكه فالمستشفى بدل سعاد ..وتوة يادوبك بنستريح وبنرجع ثانى..اجلها يوم ثانى
-سالم : باهى.. نوصلك بعتالى ونزوره خليفه
-نجوى: انا بنمشى المغرب مفيش زيارة ..كان بتزوره برة بعتالى الساعه 4
سالم استغرب فيها لهجتها تغيرت وتقول لبوها زوره زمان حتى دكرت اسمهم على لسانها ماتجيبهاش
وصلو للحوش ..
لقت نجوى امها فالصالة صبحت عليها
وخشت نجوى دارها وغيرت حوايجها …وقعمزت على سريرها وبدت تبكى …بكى حاار ليش هيا بروحها مش عارفه ..تبكى وتمسح فدموعها وخلاص …لحد مانعست ورقدت بالنوم

___________________________

فالمستشفى
-عامر: شنو تحس فى روحك احسن يابوى
-خليفه : الحمدلله
-عامر: امالا خلى نروح انا نستريح شوى …وبعدها نمشى للجامعه ونجيك هنايا على طول
-خليفه : باهى زينه وليدى
-عامر: تو نبعتلك محمد يقعد معاك
وروح عامر لحوشهم استريح والساعه واحد ونص مشى للجامعه عنده زوز محاضرات بيعطيهم
وصل محمد قعد مع بوه
وجى عمك سالم يزور هوا وولده عبدالوهاب
-سالم : شنحالك يا خليفه
-خليفه : الحمدلله يا سالم.. شن حال العويلة
-سالم : والله باهى والحمدلله
-خليفه : قالتلك نجوى
-سالم : ايه والله روحت بيها الصبح وهيا اللى قالتلى عمى خليفه راقد عندنا
-خليفه : بارك الله فيها جتنى فالليل وعطتنى مسكن
-سالم شبح لمحمد : خود ولد عمك عبدالوهاب واطلعو هدرزو برة شوى وخونا ترا
طلعو محمد وعبدالوهاب من الغرفه
-سالم : خليفه ولد عمى زمان قصدتنى فى خدمه من سنوات..وضربتلك على صدرى وقلتلك ولد عمى ومانسيبكش
-خليفه : اى والله .. ورانى قاعد شايفلك بيها كبيرة
-سالم : امالا حتى انا قاصدك توة فى خدمه
– خليفه ضرب على صدره : حتى انت ولد عمى ومانسيبكش
-سالم : نبى ورقه بنتى
-خليفه : انا طلبتك فالخير والحلال يا سالم
-سالم: وحتى انا طالبك فالحلال يا خليفه .. راحت بنتى فيها …وانا اللى حطيتها فالوضع هدا وانا اللى لازم انطلعها منه
-خليفه : انشالله خير
-سالم : لا عطينى كلمه
-خليفه : بادن الله انروح ومايكون الا خاطرك طيب

______________________________

العشيه رجع عامر لبوه …
لقى كاميلة زايرة هيا وراجلها ونعيمه وفتحى والخامسه ..
قعد يهدرز معاهم مشوار .. والغريبه ان خليفه ماقال لحد ان نجوى هيا اللى اشرفت على علاجه امبارح …زى اللى مايبيش يحرج ولده عامر
-فتحى: خلاص انتو روحو بنعيمه وامى معاكم وانا تو نقعد مع بوى
-عامر انخلع : لااا اهو تو نقعد معاه انا
-فتحى: لا روح استريح انت .. تو نقعد انا الليله
-عامر: لا لا مستريح ماتشغلش بالك ..روح انت ارتاح كيف روحت امس من بنغازى اكيدة قاعد تعبان
-فتحى: باهى على راحتك ..
وكملو الزيارة وروحو كلهم
نجوى كيف وصلت للمستشفى جايبها خوها عبدالوهاب خشت من جهة باب الطوارئ تلاقت
مع ليلى اخت عامر هيا وراجلها ..ماهو تزوجت😍
جاية بتزور بوها فقالولها ان الزيارة تمت
شافو بعضهم خلاص معش فيها كيف نجوى تهرب منها
-نجوى: اهلين ليلى وسلمت عليها
-ليلى : اهلا بيك يا نجوى شن حالك
-نجوى: الحمدلله
-ليلى : جايه بنزور بوى شوى ماخلونيش نخش قالولى الزيارة تمت
-نجوى : مش من هنايا باب الزيارة
-ليلى : مشينا من غادى قالونا سكرنا خلاص بر من جهة الاسعاف بالك يدخلوكم
تلفتت نجوى للولد اللى لابس عسكرى واقف عالباب
-نجوى: هادو معاى معليش ممكن تخليهم يخشو
-الشاب: تكرمى يا دكتورة ..لكن خمسه دقايق وينزلو
-نجوى : انشالله مشكور
وخشت نجوى هيا وليلى وزوجها من الممر اللى يمشى للاسانسير بيش تركب لبوها
ركبو كع بعض وشاورتلها نجوى على الغرفه : هنايا راقد عمى خليفه
-ليلى : صحيتى يا نجوى بارك الله فيك
وخشت ليلى لقت بوها وعامر ..سلمت عليهم ..وحمدت لبوها
-خليفه : غريبه كيف دخلوكم والزيارة تمت
-ليلى: دخلتنا نجوى توة كيف جاية لقيناها
عامر قلبه انتفض عرفها جت
وخشو الدكتور ناصر ومعاه قريب عشرة طلبة متع الكلية ..وخشت معاه نجوى وزوز دكاترة ثانيين
طلع عامر واخته ليلى وراجلها برة
ولما طالع عامر يشبح لنجوى ..وهيا ماتلفتتش جيهته بكل… بالرغم ملاحظه انه يشبحلها
فالباب سقد عامر اخته ليلى روحت …
ونادى عليه الدكتوى ناصر : الحقنا لغرفه الدكاترة ياشاب
____________________________

عامر اطمن على بوه ولحق الدكتور فى غرفته …
وكانت نجوى مقعمزة على كرسى على نفس المكتب
جى عامر قعمز عالكرسى ويشبح لنجوى ونار الغيرة بتقتله كيف مقعمزة مع الدكتور فى نفس المكان بروحهم
-الدكتور ناصر يكلم فى عامر : الوالد الالتهاب اللى عنده كان شبه متحول الى قرحه لانكم تأخرتو
..مفروض جبتوه من شهر فات
-عامر: والله قداش ليا يا دكتور نقوله خلى نرفعك انعاينك ولا نطلعك برة ليبيا
-ناصر: توة هدا اللة صار..وهكى تحاليله تقول
..لكن توة الحمدلله تعالج الالتهاب بالمضاد وبعد غدوة ح نديرو العمليه
-عامر: عادى يا دكتور لو مفيش الامكانيات نقدرو نطلعوه برة ونديروله اللازم
-الدكتور: لا الامكانيات كلها موجودة .. بس انا الحقيقه مسافر عندى مؤتمر برة فمنقدرش نديرهاله انا …. ….وبادن الله حالة الوالد حتكون تحت اشراف الدكتور محمود والدكتورة نجوى .. انا حولت الملفات كلها لمحمود حيديرلهم العمليات ..ونجوى حتكون معاه .. ولا معندكمش ثقه فبناتكم ..
وتلفت لنجوى: مش كأنى فهمت ان المريض قريبك ولا يا دكتورة
-نجوى: ايه قريبي ..ولد عم بوى
-ناصر: يلا امالا يا شاطرة ورينا همتك مدامك رفضتى تمشى معانا للمؤتمر برة ..عالاقل هنينا هنايا فالمستشفى
عامر يشبحلها قريب ياكلها متكنطى وهيا خافت منه..حست زى الدكتور يتغزل فيها ومش معدل
-نجوى حاولت تهدى الوضع : انشالله خوى ناصر ..حتلاقى التقارير كويسة عن حالته وباقى الحالات اللى سلمتهملى
-ناصر: انشالله
وتلفت لعامر: مشكور خوى تفضل للمريض لو تحب
وقف عامر وبيطلع ..تلفت لنجوى: ترا شويا دكتورة لو سمحتى
وطلع للممر وطلعت نجوى وراه
عامر قعد ساكت ..لان داخله غضب كبير .. ونجوى فاهمه
تكلمت هيا …
-نجوى: انا حننزل تحت للبنات ..مابين ماكمل الدكتور تقاريره
-عامر عيونه حمر: يكون افضل
ومشت نجوى للاسانسير ..فتحته وخشت فيه وتلفتت لقت عامر يشبحلها وتسكر الاسانسير
نزلت نجوى لصاحباتها فى قسم الاطفال
نجوى: السلام عليكم
-مفيدة: وعليكم السلام ..يانارى سخفتينى يومين فى جرت بعض …
-نجوى : بس عالله يثمر فيها سعاد
-منى : اهلا دكتورة نجوى
-نجوى: اهلا دكتورة منى
-مفيدة خدت نجوى من يدها : تعالى
مشت معاها نجوى
-مفيدة: حتى الليله قاعد
-نجوى 😔: ايه حتى الليله
-مفيدة: وانتى خيرك خايفه
-نجوى : منعرفش لما يجى جيهتى نبدا نرعش …مش عارفه خيرنى
-مفيدة : هادى حالة نفسية عندك ولازم تتغلبى عليها
-نجوى: مش عارفه كيف بنرجع فوق ..اكيدة حيجينى لغرفتى ..
-مفيدة : خليك هنايا وفى زوز دكاترة مناوبين فوق
-نجوى: لا لازم نركب
-مفيدة: يانجوى انتى تبى تركبى لانك تبى تشوفيه مش لانك عندك شغل
-نجوى: ليش تقولى هكى ..هدا وانتى صاحبتى وعندك علم بالقصه كلها
-مفيدة : لانى صاحبتك لازم نتكلم معام بصدق وبصراحه ..يانجوى انتى تغيرتى طول المدة والبعد خلوك تهدى وتسامحى…راهو سبعه سنين عقاب مش ساهلات عليه ..انتى ضربتيه فى كرامته ..خلاص انهيها القصه
-نجوى وقفت : انتى شن تقصدى نرجعله
-مفيدة: يابنتى انتى تحبيه ..وهوا يحبك … وعاقبتيه وبشهادة الناس كلها اللى لتوة ماتعرفش عقابك ليه على شنو …شن تبى ثانى
-نجوى: انا….
قصت عليها الدكتورة منى : نجوى يضبح عليك الدكتور ناصر فالممر
-مفيدة: لاحقك لهنايا وتقوليلى دكتور وطالبة بس …بري شوفي قيس شن يبي يا لبنى 😁
-نجوى: مفضى بالك
وطلعت للممر لقت الدكتور ناصر واقف يراجى فيها وشاد شنطة دبلوماسيه فيها اوراق
-ناصر: نزلتى وماقلتيليش حتى فى امان الله وانتى عارفتنى مسافر غدوة
-نجوى: اهاا.. سامحنى دكتور نزلت بسرعه …فى امان الله وتمشى وتجى بالسلامه
-ناصر: نجوى انا مسافر ..وعندى كلام نبى نقولهولك قبل مانمشى ومانبيش جوابك توة ..نبى جوابك بعد مانروح
-نجوى متفاجئة : كيف يعنى
-ناصر: انا عارف قصتك كلها .. وعاجبتنى ليك فترة ونبى نطلب ايدك من اهلك …فلو وافقتى انا نوقف معاك فى موضوع الطلاق ..وبعدها نرتبطو
-نجوى: انت شن تقول يا دكتور.. انا متزوجه راهو لو معندكش علم
-ناصر: وهدا اللى قلتهولك انا ….قلتلك قصتك كلها نعرفها ونعرف انك دايرة قضايا طلاق وهوا معند ومايبيش يطلق ..انا نقدر نساعدك منغير معرفه اى حد عندى صحابى محاميين …خودى طلاقك وبعدها نرتبطو
-نجوى: سامحنى يا دكتور بس انا …
-قص عليها ناصر: انا قلتلك مانبيش جواب منك توة ..نمشى للمؤتمر ونروح وردى عليا …وطول ما انا برة حندعى انك تردى عليا بالجواب اللى فى بالى انشالله
-نجوى واطت وجهها : تمشى وتجى بالسلامه يادكتور
وخشت لغرفه الطبيبات لصاحبتها مفيدة ومشى ناصر
-مفيدة: مش قلتلك الراجل يحبك
-نجوى: ردى بالك تقولى الكلام هدا قدام سعاد…لانه تحبه
-مفيدة: احنا توة فى سعاد .احنا فالفرصه الدهبية اللى جاتك ..دكتور متسمى وصاحب عيادة ..وولد ناس وعنده فلوس وقنين ..وشن تبى ثانى
-نجوى تعصبت : نبى سكاتك وتفوتى الموضوع تنسيه ويموت هنايا
-مفيدة: شفتى كيف استفزيتك ..انتى تحبيه ومش قادرة تبعدى عنه
-نجوى: منهوا
-مفيدة : عامر
-نجوى: بالله انا فاضيه نزلت عندك هيا باى
-مفيدة : باى
ومشت ركبت للاسانسير فوق للقسم

_____________________________

خشت نجوى لغرفه الدكاترة لقت خيريه
-نجوى: حتى اليوم يا خيريه
-خيريه : ماهو توكتى ثلاثه ايام واخدتهم انا فى جرت بعضهم مش يوم بعد يوم
-نجوى: ربي يعاونك حبيبتى
-خيريه : قتلك انا خشيت بنضرب لعمك يبرة ..لقيته يدوى مع ولده
-نجوى دايرة روحها مش مهتمه : باهى وكانا يدوو
-خيريه : غير اصبري نقولك شن قاله
-نجوى ساكته وتشبحلها
-خيريه : قاله جانى اليوم عمك سالم ويبي ورقة طلاق بنته وانا وعدته وقلتله اعتبر الموضوع تم
-نجوى تنرفزت : بوى قال هكى
-خيريه : ايه بوك
-نجوى بتكبر: وهوا شن قاله
-خيريه : هوا ماتكلمش لما لقانى انا واقفه قعد ساكت وخلاص
-نجوى: باهى ..ومعش تتصنتى عالمرضى ومرافقينهم
-خيريه تضحك وسنها الدهب طالعه كالعادة: لكن انتى شكلك تبيه يادكتورة
-نجوى: وكيف عرفتى يا شاطرة
-خيريه : لانك تنرفزتى لما قلتلك الكلام
-نجوى: خيريه بري لخدمتك وفوتينى
طلعت خيريه وتلفتت نجوى للباب متع المخزن فتحاته تبى اطلع ايبر
انفتح الباب مرة ثانية …
-نجوى : خيريه بري لخدمتك
-عامر: انا عامر يا نجوى
-سكرت نجوى باب المخزن الصغير وايداها يرعشو: تفضل شن تبى
-عامر: نبى نحكى معاك
-نجوى : انا ماعنديش معاك دوة
وجت بنطلع للباب ..مشى عامر بسرعه للباب وسكره ووقف قدامه
-نجوى: حول وتحشم
-عامر سكر الباب بالمفتاح ومشى للمكتب: اهو حولت
-نجوى: تكلم بسرعه شن تبى
-عامر: انتى باعته بوك لبوى
-نجوى: ايه انا باعتاته باهى
-عامر وقف مشى جيهتها وقف قدامها: تبى تطلقى
-نجوى بدت ترعش : ايه نبى نطلق باهى
-عامر: حاضر ..بس عندى شرط
-نجوى عيونها دمعو : خلاص متفقين وانا موافقه عليه شرطك
-عامر : انتى ليش تبكى توة بس
-نجوى : بالك تحسابنى ماعنديش مشاعر ..ولا موضوع الطلاق هين ..حتى لو بارداتى وبطلبى
-عامر: اووكى متفقين ..تنفدى شرطى ..وورقتك تكون عندك فى نفس الاسبوع
وعطاها بالضهر وجى طالع
-نجوى: وشنهوا شرطك
-عامر: شرطى اننا نطلقو زى اى اثنين متزوجين … ترجعى لحوشك معاى …نقعدو عالاقل شهر…
وبعدها نطلقو بالتراضى …هاا شن قلتى
-نجوى: مفهمتش انت شن تقول
-عامر: يعنى توة نرجعو مع بعض …تقعدى معاى عالاقل شهر شهرين ..قداش ماتبى ..وبعدها نطلقو تراضى…زى ما انتى عندك كرامه حتى انا عندى كرامه
-نجوى : كيف يعنى زواج بالإجبار
-عامر: سميه زى ماتسميه
-نجوى : انت مجنون ولا تتهيبل عليا ..تى ماهو طلقنى وكل حد يمشى فى حاله وخلاص
-عامر:كرامتى ماتسمحليش انى نطلقك بقضيه منك
-نجوى: نلغيها القضيه
-عامر: حتى لو لغيتيها ..هدا لا يعنى اننا بنطلقو تراضى…بس بعد ماتجى لحوشى وتروحى غضبانه ونعطيك انا طلاقك زى الناس الطبيعيه
-نجوى: هدا هبال
-عامر: هدا شرطى ….ومفيش داعى اى حد يسمع بيه ..احنا كبار ونعرفو مايطلح بينا …فكرى وخممى وكل واحد يحط شروطه ونوصلو لاتفاق انشالله
وجى طالع : نبى الرد غدوة الصبح قبل ماتروحى…عندك ليله كامله هنايا خممى بعيد عن اى ضغوطات
وطلع …وخلاها فى دوامه ….تخمم وتقيس فيها وتنقب …
وهوا غير كان يبي يدير اخر محاولة فى اخر جولة …بالك لعل وعسى يصير منهم وتقتنع بيه
وجى الصبح … وسلمت نجوى توكتها ….
بتروح لقت رجليها رافعينها لغرفه عمها خليفه …
فتحت الباب لقت عامر مقعمز ويخمم ..شافها مشاله بسرعه..وطلعو من الغرفه وقفو فالممر
-عامر: صباح الخير
-نجوى : انا موافقه
-عامر فرح : خلاص وانا اليوم حنجى لبوك
-نجوى : لكن عندى شروط
-عامر: موافق عليها منغير مانسمعها
-نجوى : لا اسمعها .. اولا انا مش حنرجع للغرفه اللى كنا فيها زمان ..نبى سكن بروحى
-عامر: منغير ماتقولى .. انا شريت شقه ونصين فيها توة
-نجوى واطت وجهها : وممنوع اللمس
-عامر: احنا بنكونو فى حوش زاحد كيف ت…
-قصت عليه نجوى : ممنوع اللمس …موافق والا لا
-عامر غايته يوصلها معاه فى نفس الحوش : موافق
-نجوى: خدمتى مش حنسيبها ..والمدة مش حتكون اكثر من شهر
-عامر: موافق
-نجوى: تمام .
-عامر : خلاص اليوم نجى لبوك
-نجوى: لا خليها بعد مايروح بوك
-عامر: مانضمنكش ..معليش بوى حتى وهوا فالمستشفى يفرحلنا..وبعتالى بعد غدوة عمليته يومين ويروح ..كانا لقاك معانا حيفرح اكثر
-نجوى: دير رايك
وعطاته بالضهر ومشت للاسانسير …….
وهوا واقف حاط يديه فى نصه ويشبحلها

__________________________

تمت …ويتبع 💋💋💋💋

اعضاء رابطه الحلقة قصيرة اين انتم 😁😁
اول مرة نغلبكم فى رواية ويطلعو الحلقات طوال

نحبكم

تقييم المستخدمون: 5 ( 2 أصوات)

1 2 3 4 5 6 7 8 9 10الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock