روايات كاملة

رواية عشق رغم الصعاب للكاتبة koka saleh

جميع الحقوق محفوظة

رواية عشق رغم الصعاب للكاتبة koka saleh

 

#عـشـق_رغـم_الـصـعـاب
الـحـلـقـة الأولـى
أية في حنة بنت عمها وفي نفس الوقت بنت خالتها لان امها ومرات عمها خوات وسلفات
أية تغسل في عوايز العشا هي واسراء وسهى بنات عمامها خشن صبايا عمها الاثنين ويقعدن امهات اسراء وسهى عليهن في المطبخ
مريم:سمعتي ياعزيزة اللي صار مع جيران هلي😕
عزيزة;شن صار 😟
مريم:هذي بنت جيرانهم اتحب ولد عمها وعساس هو ايحبها ودايرة امعاه علاقة ومش متحشمة من حد😒
عزيزة;وباهي
مريم;بعدها ياحنة خذا اللي يبيها منها وسيبها واجوز وحدة اخرى
عزيزة:يابتي لكن تستاهل 😳
مريم:ايوا تستاهل
اية تسمع فيهن وفهمت قصدهن
ونسرين بنت عمها واخت العروس واقرب وحدة الاية تسمع فيهن وغمتلها منهن
عزيزة:ازعمك حتى اللي عندنا بيصيرلها هكي😏
مريم;اهذي اكيدة وحتشوفي اصلا امه بتاخدله بنت خاله
عزيزة:احسن تستاهل هذي اللي اترخص روحها
أية فهمت ان الكلام يقصدها غمتلها وخبطت اللي في يدها وطلعت من المطبخ😠
إسراء وسهى قعدن يضحكن هنا وامهاتهن
نسرين تعقدت وطلعت وراها
اية في الدار وتلبس في عبياتها خشت عليها نسرين
نسرين:كنك تلبسي في عبايتك
اية:بنروح معش نقدر نقعد ونسمع هالكلام اللي يقهر
نسرين:بلا اهبال هذينا مش غابية فيهن وفي كلامهن امتى عمرك عدلتي عليهن
أية;انا مليت نفس الكلام كل مرة شن بنديرلهم حتى بعد خطبني مايبينش يسكتن
نسرين:توا انتي مش متاكدة من حب فراس لكي خليهن يخرطن
أية;متأكدة من حبه لكن درهن كبدي كل مايلقني يحكن نفس الكلام
نسرين:تي بلا اهبال فوتيهن معقولة بتسيبي حنت فطومة علي خاطرهن وبعدين مش انا وانتي بنحنوها
اية:والله انتي عارفتيني وعارفه ان خاطري في الفرح لكن هالثقيلات مزطني
نسرين:غير هيا وماعليك حنطلعهن من المطبخ
أية:كيف بطلعيهن
نسرين:ماعليك غير تعالي
وطلعن من الدار ومشن للمطبخ وخشن ولقنهن مازال ايخرفن
نسرين:عمتي مريم ترا اطلعن اشوي بنسيقو
مريم;اتلزي فينا يانسرين😒
عزيزة;تو انقولوها الامك
نسرين;انا ماقلتلكن شي نبو انسيقو وانتن معطلاتنا
مريم;امعطلينكن باهي خلاص اهو طلعنا وطلعت هي وعزيزة اشوي وطلعن وراهن إسراء وسهى
نسرين:باهي اللي طلعن حتى هالصامطات زي امهاتهن أية غامتلها واتسيق وهي ساكته
نسرين:خلاص فوتي عليش مكبرة الموضوع
أية:يعني ماسمعتي كلامهن بيوصلن في الشرف هذينا
نسرين:تي انتي اشرف من بناتهن ومنهن والله كان انا مكانك وعارفة قد شنو فراس ايحبني ومستعد ايبيع الدنيا عشاني ماانعدل عليهن
مع خشت فراس عليهن
فراس:مساء الورد عالحلوين😍
نسرين:اهلا بولد العم😉
أية ساكته
فراس يهمس النسرين بالاشارة بمعنى كنها ونسرين همستله انها غامتلها
فراس قرب من اية:كنة الحلو عاقدهم😍
أية:شي
فراس:عشان حبيبك قوليلي من مزعلك نطلع توا نقتله لكي
نسرين:قتل مرة وحدة 😂
فراس:انا عشان أيوته اندير المستحيل
فراس:حبي كنك
أية;نفس الكلام اللي يحكو فيه كل مرة
نسرين:انا طالعة اشوي وانرد مااطولوش
أية;باهي
فراس; قوليلي من امي ولا صبايا عمامي
أية:صبايا عمامي
فراس:مايبنش ايبطلن هذينا والله نطلع توا انوريهن
اية وقفاته:مش هكي حبيبي هكي القصة حتكبر وايخشو فيها عمامي
فراس:شن بنديرلهن عشان ايبطلن دوة وكلام فاضي حتى بعد خطبتك من عمي مايبنش يسكتن تي انا انحبك ونبيك وواخدك واخدك غصبن عن هلي والناس كلها
أية:عارفتك حبيبي لكن انا تعبت
فراس;حبيبي تحمليني هالفترة بس والله قاعد اندير في المستحيل عشان انكمل الحوش لكن انتي شايفة وضع البلاد والمحل مايخدم اكويس وماجانيش اي تعين شهادة عالفاضي والخاص خدمة مااتجيب همها وهلي يبوش ايساعدوني لكن نوعدك كم شهر اخرى ونقرا الفاتحة وانطلع الفرح
اية:كمل الحوش وانديرو فرح بسيط اهم شي نفتكو من الكلام
فراس;والله ياحبيبي انكمل الحوش وانديرلك احلى فرح الاحلى عروس ونقهرهم كلهم
أية:ربي ايخليك ليا😍
فراس:وايخليك ليا ياعمري 😍
أية:خلاص حبي اطلع احسن ماايخش حد
فراس:تمام بنطلع لكن قوليلي سراج خش هنا
آية;لا ماخشش
فراس:تمام المهم لو ايخش او ايحاول يحكي رني عليا دغري
آية:حاظر خلاص هيا اطلع قبل ايخش حد
فراس:تم طالع بس بنقولك حاجة
آية واتشوف للباب:اووف فراس شنو
فراس;انحبك 😍
آية ابتسمت:انموت في حبك
طلع فراس وآية كملت التسييق وطلعت برا للبنات وعيلتهم الملتمة عشان حنة فطومة
(انتعرفو علي أبطالنا فراس وآية
اول شيء نحكو علي فراس شاب م 90 حلو وطويل وجسمه حلو احلى شيء فيه عيونه ولحيته 😍 عيبة الوحيد عصبي وغيور واجد 😡متخرج له كم سنة من علم الاجتمام بس بسبب ظروف بلادنا الحبيبة ماحصلش تعيين يشتغل مدرس في مدرسة خاصة في الصبح والعشية ماسك محل مواد غذائية وهكي ماشية حياته يعني الظروف معانداته شوي
اما بطلتنا آية هي بنوته م 95 سموحة بكل بعيون بلون أخضر وشعر طويل وبشرة بيضاء {هي قصيرونه واحلى شي فيهم فرق الطول بينهم 😍} آية تقرا في أخر سنة في القانون هي وبنت عمها نسرين طبعا هنا نفس العمر ومتقربات واجد من بعضهن يعني زي الخوات بزبط
طبعا ابطالنا ايحبو بعضهم من هما صغار بس ام فراس ولية خبيثة وقادرة وشايخة علي راجلها يعني ماعندش كلمه امعاها ومااتحبش آية ولا هلها ولا امها بكل وحتى مااتحبش ام نسرين لانها هي وام آية خوات وسلفات زي ماعرفنا وسبب الكره من زمان لان عمتها حن فراس كانت اتفضل ام آية وأم نسرين عن باقي كناتها وطبعا بات فراس ماشي بشور مراته واللي تبيها ايديرها وعشان مراته رافضه آية حتى هو رفض بس فراس عاندهم ومشى العمه عطى كلمة في آية غصبن عنهم وبات آية لان عارفهم ايحبو بعضهم فعاطاها له وعشان آية وفراس من هما صغار جدهم قايل انهم البعضهم
آية بنت وحيدة علي 2شباب(أكرم وخاطب وعبدلله) وبالنسبة الفراس عنده اخين(خالد وهذا الكبير ومتجوز’وناصر’وهذا مسافر يقرا برا وهذا الوسطي وبعدها فراس) واختين (هناء:وهالة متجوزات )
طبعا بات فراس هو اكبر واحد وعنده 4خوت اخرى وكلهم يسكنو جنب بعضهم في ارض بوهم وحالتهم كويسة لكن طبعا هل فراس ماساعدوش لانهم مايبوش آية وفراس قاعد من رواتبة ايكمل في حوشة اللي بناه عشان يجوز حبيبته وايتريحو من الكلام اللي يحكو فيه عليهم
وبالنسبة السراج هذا ولد عمهم لاخر وطبعا ايحب آية بس آية مااطيقش بكل كبير م88 دكتور أسنان وخطبها من باتها بس باتها رفضة لأن مطمن علي بنته اكثر مع فراس وعارف ان ايحبها ويقدر يسعدها وعارف ان بنته اتحبه يعني الشي هذا معروف من هما صغار ان آية الفراس )
قبل مايبدو ايحنو فطومة قمعزن البنات عشان ايدربكن وطبعا اللي دايرات جو هنا آية ونسرين وصاحباتهن وآية هي اللي ماسكة الدربوكة وبدن ايغنن علي فطومة وجو سمح ومن ظمن الاغاني
يامبروك عليك الحنة–درتي حوش اتجينه منه 👏
ويامبروك على العصرانه–ضمامة حوشي واركانه 👏
ومش خسارة فيك الزيطة—يافزاعة وقت العيطة 👏
وهايمات وجوهن سمح 😂😍
وقعدن كل مرة مصبيات وحدة ترقص 💃(ماغباكن عاد في عراسنا 😂)
بعدها نسرين صبت آية ترقص وبدن ايغنللها في اغاني خلن ام فراس وصبايا عمامهن بيموتن من القهر ومن ضمن الأغاني
اللي عاطي كلمة فيها–يامولاي ان شاءلله ايجيها
عزيز مايخدم غير عليك–ايوتي في روحك وايجيك
وياوخاذ بنية عمه–زيده قدر وزيده همه
وعزيز انجيبوه انجيبوه—موافق ولا رافض بوه
واخر وحدة خلت ام فراس قريب تنجلط في مكانها والبنات صاحباتهن عارفات القصة ودارنها بلعاني
بعدها صبن ووتن الحلو والناسكفيه وبعدين الموالح والجو هذا وبعدبن ردن وبدن ايحنن في فطومة والجو سمح اما ام فراس فطول الوقت اتبحت في آية وخاطرها اتصبي تقتلها لانها كانت تكرها بكل ولان انقهرت من الجو اللي دارنه البنات
كملت الحنة والناس روحو كلهم وطبعا آية اتبات مع نسرين من بداية الفرح لمن الحوسة ولمن الحوش وخشن عساس بيرقدن
وكل وحدة مسكت فونها ورنت علي حبيب قلبها
نسرين رنت علي معتز وهو متخرج من قانون اكبر منها بسنتين تعرفت عليه اول ماخشت للجامعة وتوا الها 4سنين اتحبه وتوا انتعرفو عليه بعدين
اما آية رنت علي فراس
آية;خيراتو حبي
فراس;خيراتو قصيرونتي
آية حامقة;معش اتقولي قصيرة انا مش قصيرة انت طويل
فراس:باهي شن جوك توا ياطشتي
آية;عساس غيرتها واجد المهم جوي تمام بكل
فراس;اهم شيء جوك تمام ها قوليلي شن درتي بعد طلعتي
آية:شي طلعنا وقعدنا انصفقو وبعدها صبني البنات نرقص
فراس عقد حواجبه:شنو شن قايلك انا عالرقيص مش قلنا اتبطليه
آية;والله البنات زرن عليا ماكنتش نبي
فراس غامتله;مش شوري انا انتي واعدتيني كيف تردي في كلامك
آية خافت وعارفه ان فراس عصبي:والله اسفة اخر مرة معش انعاودها
فراس غامتله واية قعدة اتحاول تحكي مواضيع وهو قالب وجه
آية:بلا صماطة حبي خلاص عليش قالب وجك قتلك اسفة ومعش انعاودها
فراس:كلام بكرا نلقاك راقصة اخرى
آية;والله والله خلاص آخر مرة
فراس:أكيدة
آية:اكيدة
فراس;ايوته انا انغار عليك ومانبيكش ترقصي الحد غيري
آية;غير نلتمو ساهل
فراس;ان شاءلله حبيبي
أية تضحك;خطرها انقولك البنات غننلي اغاني وعمتي اتبحت فيا قريب صبت قتلتني
فراس;شن غنلك
آية;قالتهن له وفراس قعد يضحك
فراس يضحك:مطرشقات انتن
فراس;خطرها بكر في الزفة للصالة ياتمشي مع عمي ياماتمشيش بكل سي سراج هذا انحقك راكبة امعاه انقصلك كرعيك
آية;حاظر وبعدين انت عارف سراج عمري مامشيت امعاه ولا اصلا انطيقه
فراس:المهم انا وصيتك
آية;وحتى انت مااتشيلش امعاك حد
فراس:انا بنلم العزايز كلهن وناخدهن تمام هكي
آية تضحك:تمام بكل 😂
كملو آية وفراس هدرزتهم بجوهم الحلو هذا 😍
اما في حوش هل فراس فكانت ام فراس بتموت من القهر من اللي صار في الحنة وتحكي الراجلها عالللي صار
بات فراس:والله البنت هذي معاش تحشم
ام فراس حامقة:البنت هذي بتجلطني لكن العتب كله علي ولدك اللي مشى خطبها من غير ارضانا
بات فراس:انتي غير اهدي وانا بكرا نحكي مع فراس وينهي هاللعب اللي ايدير فيه
ام فراس:اتقوله راه لو ايموت قدامي ماني زافتها له
بات فراس:ان شاءلله حاظر غير اهدي انتي بس
ام فراس:اصلا كله من باتك هو اللي علق الكلام هدا في عقولهم ومن هما صغار لين كبر امعاهم
بات فراس:الله يرحمه توا مااتجوز عليه الا الرحمه
ام فراس:يانا عليا راسي بينفجر نمشي اندور حبوب الضغط متاعي
بات فراس:خليك متريحة توا انجيبهن لكي وصبى
“”””
صباح ثاني يوم الكل قاعدين يجهزو في روحهم للحفلة الكبيرة في القاعة وايجهوزو في الحاجات اللي بيشيلوهن للقاعة وكان من ظمن الشباب المصبيين عشان ياخدو الحاجات فراس طبعا وآية من ظمن البنات اللي ايطلعنلهم برا
طلعت آية بالعصير وشايلته الفراس ومداته له
فراس:نجيها طشتي ان شاءلله العقبة الفرحنا
آية ابتسمت:ان شاءلله يارب حبيبي 👐
فراس:اسمعي توا بنمشي انشيل الحاجات للقاعة معش تطلعي لين انا انروح
آية:حاظر حبيبي
مع جيت عبادي(عبدلله خو آية)
عبادي متعقد:آية مش عطيتي العصير خلاص انتلفي جوا
آية خافت منه:باهي وخشت
فراس:وسع بالك عبادي مافيش داعي للكلام هذا
عبادي:اطلع منها فراس مش شورك الموضوع
(وطبعا عبادي طبعه واعر بكل ومعقد وماكنش ايحب فراس بكل ولما وافق باته عليه ياما صار فيه وكان يبي آية السراج لان هو وياه اصحاب واجد ونفس العمر)
فراس ماحب ايكبر الموضوع وعده وسيبه
“”
جت العشية وآية ونسرين مشن يلبسن في حوش هل آية لان حوش العرس زحمة بكل
لبسن وكملن ووتن اروحهن وطلعن ايهبلن لان حتى نسرين كانت حلوة بس آية طلعت اتهبل بكل
آية:نسرين اسمعي انا لازم انوري فراس لبستي توا قبل مانمشو بعدين ماعنده كيف ايشوفني
نسرين:يامجنونة وكان شافك عبادي شن اديري
آية:يااحمارة عليش انقولك انتي راقبيلي من الباب القدامي وانا انكلمه من باب المطبخ
نسرين:مش باب المطبخ ماينفتحش
آية تضحك;فراس علمني طريقة نفتحه بيها وهما كلهم عارفين ان ماينفتح يعني مش حيشكو
نسرين تضحك:انتو الاثنين هابا منكم خلاص رني عليه هيا بسرعة ومااطولوش
آية;باهي ورنت علي فراس وفراس جاها من باب المطبخ ونسرين اتراقبلهم
فراس اول ماشافها فتح فمه😍 اتهبلي يافرخة انتي شن دايرة كل يوم اتزيدي سماحة
آية نحرجت:بلا صماطة فراس مش للدرجة هذي
فراس:ناعليا وأكثر اتهبلي وحق ربي نجيلي طشتي 😍
آية:وانت طالع طرف ولحيتك اتجنن 😍
فراس قرب منها وآية خافت
آية بخوف:فراس كنك
فراس:تعرفي خاطري انبوسك
آية:ونحن شن اتفقنا
فراس ايعظ علي شفايفة;وانا عند اتفاقنا مافيش ولا بوسة نين نقرا فاتحتك
آية:خليك شاطر واقراها معناها
فراس:قريب والله ياطشتي ناخدك غصبن عنهم كلهم
آية:يارب
فراس عقد حواجبه:اسمعي مافيش طلوع من غير خمار آية:حاظر اصلا موتيته عارفتك وعارفه طبعك
فراس:ايوا شاطرة
آية:انحبك ياغيور
فراس;انموت فيك ياطشتي😍هي خلاص خشي قبل ماايشوفك حد
آية;باهي وخشت وفراس مشى للرجالة
وبعدها طلعو كلهم في زفة سمحة ومشو للقاعة وطبعا آية لبست خمار وركبت مع باتها هي ونسرين زي ماوصاها فراس (طبعا آية ماكانت اتحب اتعانده بكل لان عارفته عصبي وايغار عليها)
وصلو للقاعة وكان اجواء فرح ايهبلن وفيه فرقة وجو من الآخر والعروسة طلعت اتهبل وبعدها جو هل العريس حنو العروسة وخلوها وبعدها كملت الحفلة وجا وقت بيروحو من القاعة
طلعو وقعدو يتوزعو عالسيارات وآية لبست عبايتها وخمارها ونسرين لبست عبايتها ووشاحها وطلعن ماشيات لسيارة بات آية هنا طلعن من باب القاعة تلقاهن سراج
سراج:نسرين وين ماشيات
نسرين;ماشيين السيارة عمو مفتاح
سراج:عمي مفتاح سيارته طفت وجاب رافعة خذاها من هنا
نسرين;حي ايهاب خويا شايل فطومة وبابا سيارته مليانة مع من بنروحو
آية;خلاص نمشو مع عبادي وخلاص
سراج;عبادي خذا الدبش وروح بيه لكن انا اهي سيارتي فاضية هيا اركبن الناس اتشوف فيكن
نسرين تحكي بشوية الآية:هيا نركبو معاه وخلاص
آية:اسكتي تبي فراس يقتلني عندي نقعد في القاعة ولا انروح امعاك
سراج:تي هيا اركبن الناس ايبحتو فيكن
آية:لالا مش ماشيين معاك توا انشوف أكرم
سراج:خايفة من فراس هذا عليش ماتبيش تمشي
آية:خايفة ولا مش خايفة مش شورك
سراج:راه حتى انا ولد عمك كيفي كيف فراس وبعدين عبادي قالي روح بيها
آية:لا مش كيف فراس عموما مش راكبة معاك
سراج:والله مافيش الا سيارتي توا كلهم روحو واللي ماروح سيارته مليانه يعني ماعندكش حل
فراس:لا عندها حل آية ونسرين اركبن في سيارتي
سراج:آية ماتركبش امعاك عبادي قالي روح بيها
فراس:مش برأية عبادي آية في حكم مراتي ومش حنخليها تركب امعاك
سراج يضحك:مراتك قتلي غير اقدر كون روحك قبل عشان تاخدها
فراس غامتله وقرب منه:عارف شن نقدر انديرلك توا لكن توا مش وقتها انتواجهو يوم اخرى وعدى وسيبه
ركب البنات في سيارته وطلع بيهن وطبعا هنا الاثنين اركبن من لاورة
سراج رن علي عبادي وحكاها له وعبادي غامتله بكل وقعد يرجى فيهم وناويها الفراس
آية;حي عليا من عبادي وحق ربي يقتلني
فراس;وهو راجل يقربك والله انوريه
آية:فراس مانبيكش ادير مع عبادي مشكلة ساد القصص اللي بينكم بدل مااتفاهمو اتزيدو ازيادة
فراس:انتي عارفه خوك حاطني في راسه بروحه كله عشان الكلب سراج
نسرين:فراس انت ديما امكبر عقلك حتئ هالمرة كبره عشان آية
فراس:سي عبدلله هذا تحملته واجد معش فضت معاه
ووصلو قدام الحوش ونزلن البنات وجاهم عبادي يجري والشر في عيونه ومسك آية من شعرها
#يتبع

تقييم المستخدمون: 4.8 ( 3 أصوات)

1 2 3 4 5 6 7 8 9 10 11 12 13 14 15 16 17الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock