روايات كاملة

رواية لا تسألنى من انا

جميع الحقوق محفوظة للكاتبة زهور جمال الدين

رواية لا تسألنى من انا للكاتبة زهور جمال الدين

الحلقات الاولي من هنا

لا تسألنى من انا للكاتبة زهور جمال الدين

لا تسألنى من انا للكاتبة زهور جمال الدين

#لاتسألنى_من_انا

.
🌷🌹 بقلم زهور جمال الدين 🌹🌷

🍁الحلقه السابعه عشر 🍁

-فايزة / ياوخيتى انتو منو .. ومنين طلعتونا

-مريم / سلم ولدى خلينا انروحو وكانك تبيها تلقاها عندى فى حوشى

-غادة / محمود شنو اللى قاعد ادير فيه انت ..

-محمود / قلتلكم فطومه خشت للحوش ووالله ماعاد طالعه

منه ..خلاص اهو تو ايجى بوى ويحكم ..كانا قبلها كانا بها

وكانا ماقبلهاش تو ناخدها ونطلع انا وياها

-فايزة / ياوليدى ماتقعدش اتلخبط بالدوة .. خلى ايجى بوك

وتفاهم انت وياه ماديرليش مشكله معاه تعرفه واعر فيا

-مريم تعصبت / يا اما تعطينى فطومه انروح بيها ..يا اما ح

انكلم ولدى وليد ايجى يتصرف معاك

-محمود تلفت لفطومه / تبى تقعدى معاى ولا تبى تمشى

فطومه شبحت لفايزة وتحشمت

-محمود متعصب/ فطومه تكلمى توة …تبي تقعدى معاى ولا تبى تمشى معاهم

-فطومه بصوت واطى/ نقعد معاك

___________________________________

جيهان نوعها خفيفه هلبا …

ولعت سيارتها ومشت لحوش صلاح ….

درست السيارة فى القراج وخشت للصالة …

لقت الحاجه ورواسى مقعمزين ومعاهم الصغار يلعبو فيهم

-جيهان / السلام عليكم ..كيف حالك ماما

-الحاجه / وعليكم السلام حمدالله على سلامتك يابنيتى

-جيهان متعصبه / الله يسلمك وين صلاح ليا يومين اندور فيه

قامت رواسى راسها شبحتلها

-الحاجه / هدى خلوقك خيرك يابنيتى ..والراجل عمرك ماتبعيه ..خليه هوا يجرى وراك

-جيهان / ولدك ايحب وحدة ثانيه يا ماما .. وانا والله ماحنسكت لو جرح كرامتى

-الحاجه/ حتى انا منخليشى يجرج كرامتك …غير قعمزى اللطف وانتى زى العجاجه

-جيهان شبحت لرواسى/ لا لا نخليك تقعمزى براحتك مع شغالتك …نستادنك

وتلفتت طلعت

-الحاجه / لا حول ولا قوة الا بالله

وتلفتت لرواسى/ ماتواخديهاش هبلة وخفيفه .. والله ولدى صلاح مايستاهل هكى

-رواسى/ لا لا عادى مادوريهاش

___________________________________

صلاح فى المكتب …

خش السكرتير / فى واحد اسمه معاد يبيك يا بش مهندس

-صلاح / من معاد !!..خليه يتفضل

-السكرتير / حاضر

وطلع …شووويا وطق الباب ….

-صلاح / تفضل

-خش معاد / السلام عليكم

-صلاح / اووووو معاد …يا اهلين كيف حالك تفضل

-معاد / مرحبتين بيك استاد صلاح

-صلاح / لا استاد لا وحدة ..احنا اوخيين قولى صلاح وبس

-معاد / ولانى حاسبك زى اوخى جاى بننشدك ونبيك تصارحنى

-صلاح / مفهمتكش انشاءالله خير

-معاد / بنسألك على صفاء

-صلاح / خيرها صفاء

-معاد / انا رانى ليا ايام لا ليلى ليل ولا نهارى نهار ..انفكر

فيها .ليش خدعتنى وليش زلبحتنى وقالتلى انها اختك

-صلاح / مرات حبت انها تبصر عليك فى البداية ..لكن الحكايه انقلبت جد

-معاد / بس مفروض لما الحكايه انقلبت جد صارحتنى

-صلاح / بيش بتصارحك

-معاد / تصارحنى بوضعها …وتقولى انها مش بنتكم وتعرفنى على اهلها

-صلاح / باهى بالك البنت ماتقدرش اتعرفك على اهلها

-معاد / ليش

-صلاح / نحكيلك بس اوعدنى يموت السر بينى وبينك

-معاد / نوعدك غير ريحنى

________________________________

خش عمك ابراهيم بو محمود للحوش مشغول

-ابراهيم / خيركم يا فايزة شن فى

وتلفت لمريم والبنات / وهادو منو

-فايزة / منعرفش خلى ولدك يقولك

-تلفت لمحمود / تى احكولى واحد منكم ايفهمنى

-محمود / ممكن نتكلمو فى المربوعه بروحنا يابوى

-ابراهيم / تعالة

وطلع مشى للمربوعه …

محمود وقف قدام فطومه / ردى بالك تطلعى …شووويا بس وجايك

ومشى للمربوعه مع بوه ..سكرو الباب وقعد يحكيله ان هادى

فطومه اللى قاله عليها ..وانه واعدها بالزواج ..وانه مايبيش يطلع مش راجل معاها

وخودلك من هالكلام اللى نوض الروح الحماسيه فى قلب عمك ابراهيم

-ابراهيم / انت تعرف عمامها وين

-محمود / نعرف حياشهم وين طبعا سألت عليكم من المدة اللى فاتت

-ابراهيم / توة يعنى انت تبينى نشدها تقعد فى الحوش لين نكلمو عمامها

-محمود / ادير فى البنيه معروف كان تشدها تقعد هنايا

-ابراهيم / باهى تمام …لكن انت لازم تطلع من الحوش منشوفش وجهك فيه بكل لين نشوفهم ونتكلم معاهم قبل

-محمود / نطلع يابوى ..من الليله

-ابراهيم / باهى

وطلعو للصالة …لقو مريم واقفه ..وجنبها غادة …وفطومه مقعمزة عالكرسى وفايزة عالكنبه تشبحلها وخلاص وخوات محمود ساكتات

-ابراهيم / يا فايزة ..دخلى فطومه تقعد مع خواتها فى الدار

-فايزة وقفت / خواتهاااااا…منو خواتها

-ابراهيم / بناويتك ..فهمتى توة ..ووتى لولدك محمود حوايجه بيبدا ايبات فى المحل لان شقه خوه اجرناها

-فايزة / وعلاش ولدى يطلع خيرك يا ابراهيم انت….

-قص عليها ابراهيم / بضمى فمك ولا شنو

-مريم / يا حاج خليها توة اتروح معانا وامتى ماتبوها تلقوها فى الحفظ والصون

-ابراهيم / لا معليشى انا الاسبوع الجاى بنديرلهم عرسهم ..خلى تطلع هيا وفايزة والبناويت يشرولها كسوتها

فطومه وين تلقيها عاااظ قريب بطير من الفرحه وتقولى مسمروها فى الكرسى..قعدت امقعمزة ولا قالت انوض

-ابراهيم فنص / فايزززة

-فايزة خافت منه وتلفتت لفطومه / خشى مع خواتك يابنيتى

-فطومه / شنو نقعد يا خالتى مريم

-مريم / على راحتك

وطلعت هيا وغادة وروحو

_________________________________

-معاد مصدوم / معقولة !!!…معقولة صفاء متربيه فى دار الايتام

-صلاح/ هدا هوا الحق اللى انا حكيتهولك توة

-معاد /معقولة …مش باين عليهم لا هيا ولا رواسى ..الحق البنيات متربيات هلبا

-صلاح / راهو مش عيب

-معاد / ومنو قالك عيب ..انا البنيه نبيها .. انشالله لو كانت عايشه برة الارض بكل

-صلاح / انت هكى طمنتنى ..والله انك راجل يا معاد

-معاد / لكن انا يومها سمعت بوى يتكلم قال انه شاف بنت اخته الضايعه عندكم فى الحوش

-صلاح ضحك ضحكه صفراء/ ههه هوا قصده على رواسى …لكن انا فهمته منو اهل رواسى ووين كانت

-معاد / قصدك هوا جاك واستفسر منك

-صلاح / طبعا جانى وحكى معاى ومع امى وفهم واقتنع ان بنت اخته اللى يدور عليها مش عندنا

” يبى ايريحه بكل مايفهم شى ”

وتم لقاء معاد ب صلاح …وروح معاد وهوا فرحان ويراجى امتى بيشوف صفاء ويحكى معاها

________________________________

روح معاد لشركة بوه …

درس السيارة برة وخش …

لقى بنت واقفه فم باب المكتب …

-معاد/ السلام عليكم

-غيداء/ وعليكم السلام

-معاد / تفضلى

-غيداء/ نبى الاستاد مختار ..بكرى اتصلت بتليفون المكتب ورد عليا واحد ونعتلى مكانكم

-معاد / هاداكه اكيدة خوى

-غيداء/ اهاا ..باهىى وين عمى مختارر

-معاد / انتى عندك جردينه وجايا تحجزى …

-غيداء/ لا لا لا … انا جاياته فى موضوع شخصى

-معاد / عموما هوا مش موجود ..لما يجى تو نبلغه انك جيتى ..عفوا الاسم

-غيداء/ قوله جاتك غيداء بخصوص موضوع رواسى

-معاد / رواااسى …انتى تعرفيها

-تلفتتله بتعجب/ وانت منين تعرفها

-معاد / نعرفها فى بيت الاستاد صلاح ولا ..توة كنت عنده وكنا نحكو عليها

-غيداء/ وشن خبرك …نفس اللى قالهولى والا لا..راهو صلاح مايدس عليا فى شى كل حاجه يخبرنى بيها

غيداء تبى تعرف رواسى بنت شكون بأى طريقه

تلفتتله بخبث / هوا قالك رواسى وين كانت ساكنه!!!

-معاد / خبرنى ايه ..وقالى انها تربت فى دور الرعايه هيا وصفاء

-غيداء انصدمت ولكن تمالكت نفسها / اهااا صار قالك عالحقيقه كلها

-معاد / قالى حتى انها هاربه من الملجأ..هيا وصفاء

-غيداء/ يا حرااام ..المفروض ماقالكش

-معاد / لا لا عادى

وطلعت غيداء من جنب معاد وهيا قريب ترقص من الفرح انها حصلت معلومه ثمينه زى هادى
وركبت سيارتها وروحت

_______________________________

صلاح درس السيارة وخش للحوش

-صلاح مبتسم / السلام عليكم

-الحاجه ورواسى/ وعليكم السلام

-خدى صلاح كركور من رواسى/ حبيبي …

وقامه فوق قعد ايلعب فيه

-الحاجه / جيهان كانت هنايا

نزل الولد وشبحلها / وشن جايه تبى

-الحاجه / جايه تشكى

-صلاح تعصب/ ومن شنو جايه تشكى اللالا

-الحاجه/ قالت انك معش تبيها وتبى بنت ثانيه

-صلاح شبح لرواسى ويكلم فى امه / هيا قالت هكى

-الحاجه / ايت قالت هكى اهو حتى رواسى شاهدة

-صلاح / مدامها سبقتنى وقالتلك معناها وفرت عليا هلبااااا جهد

-الحاجه / شن قصدك

-صلاح / قصدى كلامها حق ..انا بالغعل نبى بنت ثانيه وناوى الارتباط بيها

-الحاجه / والبنيه اللى عشمناها

-صلاح/ سيورها تلاقى نصيب ثانى خير منى

-الحاجه / غير شن هللكلام اللى تقول فيه

-صلاح / توة هدا اللى صار…واسمعى لا تحرقى عصابك ولا تركبى سكرك ..الللى يسألك قوليه هدا قراره ولدى صلاح

وتلفت لرواسى / بنطلع ناخد هديه لكركور تطلعى معاى

رواسى شبحت للحاجه

-الحاجه / بري يا بنيتى اهو الصغار قاعدين معاى انا وصالحه

وعلى طول طارت رواسى خشت لدارها غبرت حوايجها وطلع ت معاه بسرعه

وطلعت معاه ركبت فى السيارة وهما فى قمه السعادة

ولع السيارة وطلع ….

-صلاح / عندى ورقه بنعطيها لواحد … راجينى فى السيارة شوى ….

-رواسى / باهى

وصل لحوش وليد درس السيارة ونزل

ورواسى قاعدة مقعمزة فيها ..وتشبح فى مصنع العصائر اللى فاتحينه فى نفس شارع وليد

_________________________________

تمت ….ويتبع

نحبكم

تقييم المستخدمون: 4.83 ( 2 أصوات)

1 2 3 4 5 6 7الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock