روايات كاملة

زواج بالإجبار للكاتبة زهور جمال الدين

جميع الحقوق محفوظة للكاتبة

زواج بالإجبار للكاتبة زهور جمال الدين

#زواج_بالإجبار

🌿الحلقة الاولى 🌿

للكاتبة زهور جمال الدين 🌺🌺

فى سنه 95 …

لما كانت ليبيا مازالت بخير …

والناس احباب واصحاب ..مش زى توة كل حد
خشمه مقيوم على الثانى

هدا يا ستى صارت فى هداكه الزمان قصه
بدايتها وسببها البليد فتحى ولد عمتى الخامسه ….

فتحى متخرج من البحرية ..ويخدم فالميناء .. فى سفينه كبييييرة ..24 ساعه وهيا ماشيه جاية على مالطا

ومنحكيلكمش على مالطا ايام التسعينات.. الليبيين شافو البضايع الاجنبية منها …

وعمك فتحى عاد ضاق السفر والحياة الحلوة …
وياخد ويجيب ويلمد لاهله فى هاديكا البضايع وهاديكا الشكاليط …
وحتى من عصير تانج يجيبلهم فيه بالصناديق …

وفتحى هدا يحب نعيمه بنت جيرانهم وكان ياخد ويكرلها فى هاديكا الهداية من مالطا وهيا عاد وين تلقيها ..عايشة سلطانه زمانها بين خواتها وصاحباتها وبنات عمها …

قولو يا حنه فتحى تكم اموره وساوى فليساته وبنى فى جنان حوش بوه دار وحمام يفتحو عالحوش

هوا فتحى ترتيبه الثالث فالعيلة ..
اكبر منه عامر م 73..وكاميلة م 71

كميلة اتزوجت عمر ولد خالتها وعنده منه ثلاث صغار ..وعامر كيف تخرج من الجامعه ومقدم عالدراسات العليا فى جامعه الفاتح (سابقا طبعا😁)
وبعدهم السي فتحى م 74 وبعدهم ليلى م 76 وايناس م 80 ومحمد 81..والاخيرة مرام م 83

نكملكم ..

مشى فتحى خطب نعيمه …مالاول بوها تغلى وماباش يوافق ..وفالاخير مع زن فتحى عطوهاله بس بشرط العرس طول ..ولما بوها ماقبلش عمتك الخامسه قريب ماتت …على واعارتها لكن تحب نعيمه تموووت فيها

لما شرطو العرس فيسع …قاللهم فتحى يا سلام وانا شن نبى ثانى ..اهو الدهب واتى والسبيزة تجيكم لعندكم ..وقيمو الافراح …

وعلى قد ماشدو فى عامر قالوله تزوج مع خوك ..قاللهم شى لين نكمل قرايتى وبعتالى ساهل

خلوه على راحته …وكسكست عمتك الخامسه وزغرطت على عرس ولدها فتحى …وبدو خواته فالسهريات

وصلو يوم القفه ….

المغرب بيحطو العلاقه عالعروس وفالليل بيقرو الفاتحه

ركبّو القفه فالسيارات وباقى الناس بدت تمشى عالرجلين ..العروس جارتهم عاد ومفيش مسافه

وصلو بالقفه …وحطوها وغنو نساوين عمام العروس كدس يازين وبارك على نعيمه

ولبسوها الحصيرة ودارو بيها

وروحو جماعه القفه ….

كميله اخت فتحى فى الدار اللى حاطين فيها الحاجات المهمه ماهو مفتاحها عندها عاد هيا الكبيرة …
واذ بالتليفون الارضى يشرين ..

ردت جميله : من معاى

قالتلها انا عمتك فاطمه ام نعيمه ..ترا ناديلى امك

وجت عمتك الخامسه ..وردت

تاريته القصه ان فاطمه ماعجبتهاش قفة بنتها منغير خناق دهب

-الخامسه : انتى ماشرطيش خناق دهب يا فاطمه

-فاطمه : عاد نحسابوه ولد السفر والعز بيجيبه كامل مكمل منغير ما نشرطو

-الخامسه : يا فاطمه اقصرى الشر ..انتى تعرفى خليفه راجلى عنايدى وماوافقنا يخطبها لولده الا بالسيف لانها برانية علينا ..نزيد نقوله توة شارطين والله يقربعها على راسى

-فاطمه : شنوووو يا للا خطبها بالسيف هادى.. يبوس ايده اللى سعيدبوها وافق يعطيها للبرانى وخلى صغار عمها اللى بيموتو عليها …

-الخامسة: غير خليها توة توصل على خير …وراس كنينتى مانخليها بلا خناق كان نعطيها خناقى

-فاطمه : اسمعى يا خامسه .. سعيد حلف يمين كانا ماتجيبو الخناق توة ماهناك فاتحه

-الخامسه : انا عليا نوصل الكلام واللى فيه الخير يجيبه ربي

ونادت الخامسه عمك خليفه وقالتله عالمفيد

-خليفه : وانا شن مازالى عاد غير نساباتى يشرطو عليا …اسمعى كلميها توة وقوليلها خليفه حلف ماهناك خناق توة ولا غيره واللى وصلهم ساد …
بيجو يقرو الفاتحه مرحبتين ماهمش جايين على كيفهم بنتهم عندهم

-الخامسه تخبط وتجولح : وقفة ولدى اللى بعتتها

-خليفه : ايردوهالنا توة

واتصلت الخامسه وعاودت كلام خليفه لفاطمه ..

-فاطمه : نعاود الكلام لسعيد واللى بيدره باهى

-الخامسة : هوا سعيد يعرف يشرط خناق دهب يا

فاطمه ..هدا كلام نساوين مش كلام تريس

..انا عارفاته الكلام كلامك انتى وردى بالك تغلطى

وسكرو الخط …

ومدت الخامسة العشى للناس والشيخ فالخيمه بيقرا الفاتحه ويراجو فى عمك سعيد بيجى هوا وخوته وصغار عمه …

وفتحى عريس عاد ومتحشم من بوه ..مقعمز مع صحابه فى راس الشارع عالكراسى

اهل نعيمه ماجوش …بعت فتحى خوه محمد لحوش سعيد جارهم ينشد خيرهم ماجوش لتوة

ويرجع محمد يصدمه : قالولى قول لبوك يا اما الشرط اللى شرطناه يا اما ماهناك شى

-فتحى: وشنهواالشرط

-محمد : وين ندرى عليهم انا

مشى فتحى يجرى لامه يستفسر منها …قالتله راهم يبو خناق …وبوك حلف ماهو جايبه توة

تكنطى فتحى ومشى لحوش سعيد ناداه برة

-فتحى: ياعمى سعيد غير مشى الامور توة وانا نجيبهولها قبل مايتم العام

-سعيد: لا يابابا ..انا شرطت خناق وحلفت ..وحلفتى قدام خوتى والله ماهى نازله الوطا

-فتحى : وعلاش تظلم فى بنتك

-سعيد : بنتى رايها من رأئي

-فتحى: نبى نسمعه بودانى رايها

وخش سعيد للجنان الخلفى ونادى بنته نعيمه لابسه البودرى

-فتحى : حاق انتى شرطتى خناق يا نعيمه

-نعيمه مطرمه شواربها : اللى تبيه امى انا نبيه

-فتحى : يا نعيمه توة انا والله مانكسابها ..وعدت بوك قبل مايتم العام نجيبهولك غير فوتيها توة الحكايه هادى وخلى العرس يمشى على خير

تلفتت نعيمه لامها لقت امها مش موافقه

-نعيمه : يا اما توة ..يا اما لا

وطلع فتحى متكنطى من حوش سعيد معش فهم شن الحل

فتحى يا نارى يبيها ومستعد ايدير اى حاجه على خاطرها .. وهيا واهلها عارفين الكلام هدا ..هدا علاش يضغطو عليه هكى

فتحى قريب يطير ..معش فى حشم نادى بوه برة وخلاص

-فتحى : يا بوى خلى نتسلف ونجيبه الخناق توة وبعتالى نقدرانرد السلف انا

-خليفه : يا دقن يلعبو بيك نساباتك ويردوك انت وكسوتك على رزق الدنيا

-فتحى : يا بوى العرس انقام والناس ادربك كيف ندير انا توة

-خليفه : كان عاندو احنا عرسنا والله مانا موقفينه ..

تقرا فاتحتك على وحدة من بناويت عمامك

-فتحى انخلع : مستحيلة.. انت شن تقول

-خليفه : اللى سمعته …هدا رائي الاخير انا العرس والله مانى موقفه ..والشيخ والله ماهو مروح الا وهوا قارى فاتحه الليله

-فتحى : اسمع يابوى انا والله منغير نعيمه مانى واخد لو شن ادير

-خليفه : والشيخ اللى ايراجى والتريس اللى تعشت عشى الفاتحه ايروحو هكى ..وتواطيلى راسى

جى عامر خو فتحى الاكبر …

-عامر: خيركم يابوى شن فى قالى محمد زى فى مشكلة

-خليفه وجهه اسود : انشد خوك الدقن وتو يقولك

-فتحى : يبينى نقرا فاتحه على وحدة ثانية …

ويقيم فى ايديه : مش عيب عليا هكى والبنية اللى عشمتها نرخى بيها

-عامر: باهى برة اشرى الخناق وتعالى اقرا الفاتحه

-خليفه : هدا انت الكبير العاقل يا عامر..تشجعه انه يلعبو بيه نساباته المضحكة هدا …

وتلفت لفتحى : والله يافتحى كانا الشيخ روح منغير مايقرا فاتحه الليله …يمين عظيم من الليلة ماك ولدى ولا نعرفك من اليوم

خشو البشير وعبدالسلام خوت خليفه عالحلفه

-البشير: خيرك يا حاج تحلف على ولدك شن فى

-عبدالسلام : الناس بتروح الليل فات ..والناس تنشد على انسابك يا فتحى وينهم ماجوش

-فتحى راقيله الدم ومايسمعش فى عمامه : اسمع يابوى ..مادامك حلفت عالشيخ مايروح الا بفاتحه اهو ولدك عامر قدامك زوجه واقراله فاتحته …اما انا والله ماعاد شايف وجهى من اليوم

-عامر انخلع : فاتحة شنو يا راجل … انا لا واتى ولا عندى وين نسكن ولا متكلم على بنت ..طلعونى منه الموضوع

-خليفه بدى يلقى فى ايديه : عقاب عمرى هكى يصيرلى …انا سعيد جارى يواطيلى راسى بين التريس ونقوللهم روحو بلا فاتحه

فتحى: قلتلك يا بوى انا فوتنى والله ماواخد غير البنت اللى عشمتها

وطلع يجرى ركب سيارته ومشى …

-خليفه : وربي اللى خلقنى ماهو مروح الشيخ الليله منغير مايقرا فاتحه …كان ناخد على امكم ونقرا فاتحة اى وحدة خاطمه فالشارع توة

عبدالسلام والبشير خوت خليفه زبطو الموضوع اللى صاير من نقاش خليفه مع ولاده

وخليفه حكى لخوته اللى صار وحطهم فالصورة …

ولما لقو فتحى ليخ …

تلفتو لعامر …

-بشير: يا ولد خوى مافيها شى اختار وحدة من بنات

عمامك توة وكلهم يعطوك انا والله كان بناتى كبار مانضيعك من يدى

-عامر: مستحيل اللى تقولو فيه ..انا انسان مثقف

وجامعى كيف نتزوج بالطريقه هادى

-خليفه وجهه اسود : ياوخيينى الساعه عشرة

والشيخ بيروح ديرولى حل رانى بنموت

-عبدالسلام : دير لبوك حل يا عامر..انت الكبير وبتتحمل .. الراجل بيموت بيناتنا

-البشير: فالخوت لازم ايجى الكيد على واحد .. زانت الكبير الله غالب جى الكيد عليك ديرلها حل

وبعد نقاش واقناع لعامر وافق فالاخير

طبعا عامر وافق لانه بينه وبين نفسه قال مستحيل يلقو عروسة الليله ..هى نوافق وناخد الحجه والسلامه ..منها بوى يرضى عليا …ومنها انا مانتزوجش لان منطقيا مستحيل يلقو عروس فى ساعه

-عامر يكلم فى بشير : انا موافق اقروها الفاتحه..كان حصلتو على من تقروها الليلة

-عبدالسلام : وانت من فى بالك من صغار عمامك تبى تناسبه

عامر هازى عليهم فى خاطره لانه مقتنع انهم مستحيل يحصلو توة

-عامر : غير كان حصلتو اقروها عاللى تعجبكم

وطلع خليفه للخيمه وفايت كلام عامر المهم هوا يستر روحه …

لما خش خليفه للخيمه بدى يدور بعيونه

-عبدالسلام : فى منو ادور يا حاج

-خليفه : نبى سالم ولد عمى وينه

-عبدالسلام : والله جبتها يا حاج ..سالم عنده 11 بنت وكلهم قاعدات ..يعطيك توة 100%

تلفت خليفه يلقى سالم ولد عمه كيف خاش من باب الخيمه

مشاله يجرى : سالم ولد عمى طلبتك ومتردنيش

-سالم : اللى طلبته هوا ليك ..شنو تبى

-خليفه : نبى وحدة من بناويتك لولدى عامر توة نقرو فاتحتها

-سالم نصدم : شن تقول انت يا خليفه ..هدا عرس فتحى ولا

-عبدالسلام : صارتلنا مشكلة وغيرنا العرس على

عامر..وطالبين بنتك بتعطينا ولا نشوفو حد ثانى

طبعا سالم عنده 11 بنت لا مخطوبات ولا متزوجات .. فالموضوع بالنسبه ليه فرصه ..عنده

من مواليد 71 الى مواليد 84..وكلهم قاعدات ماعندهمش فالدنيا غير وخى واحد م 85

-سالم فكر : ولدك موافق وعاطيك الادن يا خليفه

-خليفه : ايه طبعا امالا كيف

-سالم : نبى شاهد

-خليفه : يا بشير تعالة

وجى بشير وسأله خليفه كانا يشهد ان عامر موافق وشهد بشير بأن عامر نفسه هوا اللى قال اقرو فاتحتى الليله على وحدة من بنات العيلة

-سالم : امالا البنيات وامهم اهو كيف نزلتهم توة فالخيمه نروح بيهم ونشاورهم ونرد عليكم

-عبدالسلام : توة انت على حسب الشيرة من بتعطينا
-سالم : بناويتى والله مايتخيرو على بعض.. وماعندى فرق بينهم .. هوا قداش مواليده …نعطيكم اللى من قداه

-خليفه : هوا من 73

-سالم : امالا بنعطيكم نجوى .. مواليدها 78 عمرها 17 عام ..تقرا فى ثانى ثانوى

-خليفه : خلاص عالخير انشالله..وكانا عالقراية هداكة بعتالى بينه وبينها … اهو نراجو فيك عندك نص ساعه

ومشى سالم نادى مرته وبناته من الخيمه روح بيهم للحوش …

وحكى لمرته : جانا الخير يا غزالة ..عامر خيار شباب العيلة جاينا يخطب

-غزالة : فى منو ياسالم

-سالم : قالولى فاللى تبوها ..وانا قتلهم على نجوى هيا اللى مقاديتهم

حكت غزالة لبناتها وانصدمو بموضوع الفاتحه اللى بعد نص ساعه

ونجوى لما قالولها خافت وبدت تبكى ..صارلها زى بنت ابو حاتم لما خطبها ابو شهاب 😁😁..ياباطل

المهم بدت البنية تتعدر ان خواتها اكبر منها والدور ليهم هما …

لكن البنات عاقلات قالولها لااااا عندك الادن تزوجى بالك تفتحى علينا الطريق وبعتالى الولد اصغر مننا ومقاديك انتى فالعمر

مع فرحة بوها وامها ومع اصرار خواتها قولو نجوى وافقت على قراية الفاتحة

وقالت لبوها اللى بديره انت يا بوى ماشى عليا

سالم بيطير من الفرحه خبر بشير انهم موافقين ..و بيتوكلو

وبالفعل وصل سالم للخيمه لقى خوته مقعمزين ماهو عاد خليفه محسوب ولد عمهم .. فخبرهم سالم باللى صار وان الفاتحه تغيرت لعامر على بنته نجوى …طبعا خوت سالم فرحو وايدو الموضوع

عامر لما قاله عمه بشير انصدم فالموضوع انهم حصلو بنت على طول

ومع هدا خلاص انحط فالامر الواقع..سكت وقاللهم كل شى بالبركه

-الخامسة امه لما سمعت قريب ماتت : يا خليفه مالقيت غير بنت سالم تاخدها لولدى عامر خيار ولاد عمه …لاااه قلتلى رانى بعتت للى خير منها

-خليفه : ضمى فمك مزال تبينى ناخد رايك بعد ماخدت ولدك فتحى اللى زى وجهك

وتمت قراية الفاتحه .. والتغى عرس فتحى ونعيمه

.طبعا نعيمه قريب ماتت😁😁..ورفعوها للمستشفى

ورقدت فيه ايام وتغدية وقصة بيش تنحى شوى من

حشمتها قدام بنات عمامها

وتأجل عرس عامر اسبوع بيش يشرو للعروس كسوتها

وبالفعل فيسع فيسع كل شى داروه وتموه ورفعو القفه ودارت العروس الحفله …

ومشى عبدالسلام عم العريس ومرته روحو بالعروس

طبعا الخامسة سكنتها فى دار معاها …لان عامر

ماكانش مجهز نفسه للزواج ولا عنده وين يسكن

وصلت العروس لابسه فيلو ..

وخشت دارها …

واقفه قدام سريرها ترعش…

وعامر يدرجو فيه بالبندير وهيا تزيد ترعش مع كل طقه

وخش عليها

-عامر: السلام عليكم

-نجوى : وعليكم السلام

-عامر: انتى شن اسمك

-نجوى مواطيه راسها : اسمى نجوى

-عامر: اسمعى اهلك يراجو برة ..وانا الحق نبى نمشو امورنا توة وبعتالى ساهل ….فاهمتنى طبعا

-نجوى واطت راسها 😔 : فاهماتك شوى بس ….

-عامر: توة خلى نجرح رجلى .. وقوليلهم تهنيت.. واحنا الايامات مازالو قدامنا

-نجوى 😳: دير اللى تعرفه صح

وجرح عامر رجله وتكملها هاديكا القطعه البيضة اللى بتوريها لحمواتها وعماتها ..وبدلت نجوى فيلوها ومافاهمه شى

وقعد عشرة دقايق وطلع …

وبدو عاد صحابه وصغار عمه يصرخو فالكلاشن برة

ماهو هكى العادات لما تتهنى العروس

وخشو النساوين يباركو وشافو دليل العدرية …

وروحو نساوين عمامها وخالاتها لامها بشروها

وبعد ساعتين رجع عامر للغرفة …

والحوش كله فاضى

-عامر: خودى راحتك واعتبرينى كأنى مش موجود ….

ونزل فراش من فوق الدولاب ..رقد هوا عالوطا وهيا اتكت على سريرها وبردو مافاهمه شى ..

بينه وبينها خطوتين ..وكل حد فى حاله

وتم العرس ..وفات اسبوع وهما على هالحالة …وهيا مافاهمة شى ولا سالاته خيرك …

وجى يوم الاسبوع … ولبسوها لبست الاسبوع … وحركت العشى بالمغرف

وهيا ساكته وتفكيرهاكله فيه .. خيره هكى لا يبي يمسها ولا يقرب منها …اسبوع كامل وهوا يرقد عالوطا وهيا عالسرير….

صوتها مايسمعش فيه ..حتى تلوم على تصرفاته ..تلوم فى خاطرها بس ماتلومش عليه فى وجهه

يطلع من الساعه 8 الصبح ..ويخش داره 12 فالليل…متحشم من بوه

واليوم الثامن …خش لداره

لقاها راقدة فى سريرها ومغطيه راسها

وقف جنبها وحركها شوى : نجوى ترا نوضى دقيقه نبيك

وناضت نجوى وقعمزت على حاشيه السرير ترعش مع بعضها …تحسابه آن الاوان عاد

-عامر: يابنت الناس انا عارف انك مظلومه ..ولكن راهو حتى انا انظلمت

-قامت نجوى راسها: فيش مظلومه انا ..مفهمتكش

-عامر: مظلومه انه زوجوك بالطريقه هادى ..وخلونى نقرا فاتحتك فى نص ساعه منغير مانعرفك

نجوى قامت راسها وشبحتله

-عامر: وانا الحق انسان مثقف وجامعى.. والزواج بالطريقه هادى مايساعدنيش

-نجوى : مفهمتكش

-عامر: انا الحق منبيش نظلمك اكثر من هكى

..ولقيت ان الطلاق حيكون افضل حل بيناتنا

وقف نجوى مخلوعه وهيا تبكى: طلاق من اول

اسبوع الناس شن بتقول عليا .. والله امى تموت فيها

-عامر: نقصى صوتك .. انا ماقلتش توة ..نعطيك شهرين وبعدها تسامحينى فاللى بنديره

-نجوى تبكى : خليهم اربع شهور عالاقل امى تستوعب الموصوع لما يصير مش هكى نمشى ونروحلها طول

-عامر: حاضر.. هما شهرين هما اربعه …مش حيتغير شى

-نجوى: عالاقل ندور اى حجه

-عامر: حتى عدريتك مش من حقى .. عدريتك من حق زوجك الحقانى ..انا فاتحتى عليك كلها غلط

نجوى يا نارى حست ان كبريائها انجرح …

وقفت بكل عزت نفس : تمام متفاهمين

-وقف عامر: مش تواخدينى ولا تقولى عامر باعنى

..انا مانعرفكش بيش نبيعك

-نجوى : تمام..قلتلك متفاهمين

-عامر: شكرا ليك على رحابة صدرك

-نجوى : بس لو سمحت نستمرو فالحمام كل يوم

..منبيش حد يلاحظنا

_عامر: تمام .. ونعاود شكرى ليك

رجعت نجوى لسريرها .. مغصوصة تبى تبكى لكن عزت نفسها منعتها
واتكت فسريرها … وللصبح ماجاهاش نوم تخمم على امها كيف بيصير فيها بعد بتروحلها مطلقه وهيا عمرها 17 سنه

ثانى يوم فاقت بكرى خشت للحمام دوشت وطلعت

وخش بعدها عامر للحمام

جتها الخامسة طقت عليها الدار … فتحت نجوى

-نجوى: عمتى اهلين بيك

-الخامسة : سبعتى ولا …هيا خشى الدور .. اليوم عليك الكوجينه

-نجوى : حاضر يا عمتى

لبست نجوى حجابها وخشت للمطبخ ادير فالفطور

…دارت طبيخه دحى حطت فيها اربع دحيات

وتجيها الخامسة يا كبدى: وين يا ماما اربع دحيات على منو .. ثلاثه سادين

وبدت تاخد وتحدف عليها فالدوة ونجوى ساكته

-خش محمد للكوجينه : صباحات ورباحات يااام خيركم شن فى

نجوى متلفه للغاز وساكته

-محمد : صباح الخير

-الخامسة : سلفك يكلم فيك ولا بالك طرشة وزلبحونا اهلك

-محمد : تى خيرك يااام عالبنية ..صباحات

وطلع من المطبخ …لقى ليلى وعامر فالصالة

طبعا عامر مستحيل يتكلم ..قعد ساكت وخلاص مش فاهم ..

وطلعت الخامسة من المطبخ تشبح لمحمد ولدها : البنية مانزليتليش من زور لا انا ولا خوك

وسمعتها نجوى

وطلعت للصاله : صباح الخير عامر وليدى

-عامر مش راضى لكن سكت : صباح النور ياام

خشت ليلى لنجوى فالمطبخ ..لقت نجوى وجهها متغير لكن ساكته

-ليلى: نجوى سلم وخيتى بتحطى فدماغك من توة ان امى صعبه شوى ..حتى علينا احنا بناتها

-نجوى: هادى عمتى وعلى راسى من فوق

وفات النهار كله ونجوى فالمطبخ شادة الدور …كملت غسل اماعين العشى وخشت دارها …

وقعمزت على سريرها ..

الساعه 12 روح عامر خش لداره ..لقى نجوى فايقه ..

-عامر: السلام عليكم

-نجوى: وعليكم السلام

-عامر: خيرك وجهك متغير

-نجوى : لاشى والله مافي حاجه

-عامر: قصدك على تصرف امى اليوم ..عادى راهو امى ديما تتعصب وتولى فيسع

-نجوى: لا لا عادى انا والله ماندور

وفى خاطرها : ماعتقدش معاى انا تولى فيسع ماهو مانزلتلهاش من زور لا هيا ولا ولدها

-عامر: هكى نبيك مدوريش اللى يقول اى كلمه ..اللى تبى تغلبيه ديما اغلبيه بسكاتك

-نجوى بهدوء: ايه معاك حق

وفى خاطرها 😁: ماشالله شكلك حكاية الطلاق طابخينها انت وامك ومتافهمين على كل شى

-عامر لقاها سرحانه : خيرك قعدتى واقفه

-نجوى : تصبح على خير ..وخشت لسريرها

عامر حط فراشه وطفى الضى ورقد عليه وتغطى وخلاها هيا تخمم فى سريرها وتاكل فى روحها من كلمه عزوزتها وهوا يحسابها رقدت ومافيها شى

_____________________________

تمت … ويتبع 🌺🌺

غدوة انشالله اندخلو نجوى على اماليها
ونشوفو شن بيصير مع فتحى

احداث القصه مازالت مشوقه فالحلقات القادمه انتضرونى …وقولولى عجبتكم والا لا حنقرا تعليقاتكم

الحلقة اطول من طريق مصر وانتى طالعه من طرابلس 😁😁😁

نحبكم

تقييم المستخدمون: 4.82 ( 3 أصوات)

1 2 3 4 5 6 7 8 9 10 11الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock