روايات كاملة
أخر الأخبار

سرقت قلبي

جميع الحقوق محفوظة للكاتبة زهور جمال الدين

 
#سرقت_قلبي
الحلقه الاوليبقلم زهور جمال الدين

سنة 90 …
عمك الفيتورى واقف فى الممر متع مستشفى الخضراء …
وفى جنبه ولده محمد ونسيبه عمران خال الصغار-طلعت الممرضه من الغرفه : وين زوجها-الفيتورى قام راسه: نعم يا اختى

-الممرضه حزينه ومواطيه راسها: المريضه طالبة تشوفك .. والدكتور قالك خشلها

وقف ولده محمد معاه

-الممرضه: لو سمحت متحرجنيش خوى .. المريضه حالتها حرجه والدكتور مانع الدخول

خش الفيتورى .. زوجته خديجه راقدة عالسرير .. وبطنها منفوخه قدامها

هيا يا نارى حاشاكم عندها الورم اللهم احفظنا..

لكن زمان فى سنه 90 مش مدكور هلبا المرض هدا

ومش منتشر زى توة ..ومش كل الناس تعرفه

خديجه متلفته لسقف الغرفه ..مش قادرة تحرك راسها وتتلفت للفيتورى

-ماسكة يده وتتكلم بصعوبة: البنيات يا فيتورى

-الفيتورى : الصغار فعيونى يا خديجه غير نوضى انتى بس

ويبكى يا نارى مامخلى جهد

-خديجه بصعوبة : غير اسمعنى بس

-الفيتورى : قولى

-خديجه : صغارى يقعدو فالحوش ..ماتعطيهم لحد .. لا جداهم ولا خالاتهم ولا خوالهم

-الفيتورى : كيف شن مهبول انا نعطى صغارى

-خديجه : جيب مراءة اليوم قبل غدوة ..ماتخليش بناويتى هكى ..

-الفيتورى : اسكتى يا خديجه عيب عليك ..

اهو الدكتور طمنى وانشالله تنوضى لا سو لا سوية

وتربي بناويتك وولادك كيف ماتبى

-خديجة: متزلبحش روحك يافيتورى .. انا خلاص ساعتى قربت ..

ماشاغلنى شى غير الباويت ..الباقى الاولاد يقدرو روحهم منغير منوصى

-الفيتورى يبكى : كونى هانية عليهم يا خديجه ..

مايطلعو الا احسن بناويت فالدنيا ماك امهم

ويبكى يبكى مسكين

-خديجه: لازم تخليهم يتعلمو ويتخرجو..وانا ندعى

ربي يجيبلهم اللى ترعاهم وتحن عليهم

وتنهدت : محمد وين

-الفيتورى : واقف برة فالممر

-خديجة : ناديهولى ..نبيه بروحه

ناض الفيتورى فتح الباب وطلع ..

-الفيتورى: محمد تعالة تبيك امك ..

جى محمد يجرى خش للغرفه وسكر وراه الباب

-محمد يبكى : يمى .. كيف حالك يمى …

ويبوس فى رجليها واقدامها ويبكى

وركب ليديها وراسها يبوس فيهم

-خديجه : وليدى معش نبيك تبكى ..نبيك تضحك وتستانس ..

الدنيا مازالت قدامك

-محمد :غير نوضى انتى بالسلامة وكل شى ساهل يمى

-خديجه : وليدى بوك قلتله خود مراءة ..ووصياته على خواتك

-محمد يبكى : اسكتى يمى خيرك تقولى هكى

-خديجه : سلم وليدى خلينى نتكلم .. خوتك خالد

ووسام رد بالك عليهم سلم وليدى

اقرو وتخرجو ماتقعدوش ادورو ..

وخواتك لازم يبو مراءة معاهم ..

سلم وليدى مديرش لبوك مشكلة عارفاتك ماتقدرش

تتحمل مراءة غيري فالحوش ..لكن هدا حكم الله

__________________

ثانى يوم

فالممر مقعمزين الفيتورى ووسام وخالد وخالهم

عمران وجيرانهم سالم ومختار ..

وسام مواليد 76 يقرا صف ثالث اعدادى …

وخالد مواليد 87 عمره ثلاث سنين غير جابه وسام معاه بيش تشوفه امه

خديجة والفيتورى عندهم عويلة ماشالله بكرهم

محمد مواليد 72 .. عمره 18 سنه ويقرا فى

ثالث ثانوى ..متفوق وينجح هوا الاول عالمدرسة ديما

خواته سناء م 82 عمرها 8 سنوات ..

وسحر م 84 عمرها 6 سنوات .. وسماح م 86 عمرها 4 سنوات

وعلى راس سماح طول جابت خالد 87 عمره 3 سنين ..

وسنه 88 جاها المرض يا روووحى عليها مروجها تمرويج ..

ماخلى راجلها الفيتورى وين سافر بيها

تونس والمانيا ومصر .. لكن مفيش فايدة المرض انتشر فيها

وزى محكيتلكم سنه 90 مش منتشرة دكرت المرض هدا بين الناس …

خديجه فالغرفه ومعاها عمران والفيتورى وولدها محمد يقطرولها

وهيا العيون مسكرات ونفيسة بس تطلع وتخش

-الفيتورى : محمد وصلت خواتك

-محمد يبكى: وصلتهم للحوش و جيت ..

خالاتى يبو يجو معاى ..طلعت طول مابيتش نراجيهم

-عمران : احسن مادرت

ومستمرين يقطرولها ويشهدو

بعد ثلاث ساعات

خوها عمران عرفها انفاسها الاخيرة ..يقولو الكبار يعرفو غرغارة الموت

قعد يشهد ويوحد فالله .. والفيتورى يشهدلها معاه

ولدها محمد يبكى لكن قوى قلبه .. وجى جنب راس امه ..

وتكى جبهته على جبتها …وقاللها يمى

وقام وجهه وقابله لوجهها ..

نفخت هوا من فمها جى فعيونه ووجهه ..

يداها بدو يسقعو خلاص ..

عرفها خوها عمران انها توفت..

ونفخت روحها فى وجه ولدها محمد …

-عمران: لا الله الا الله ولا دايم الا وجه الله..ادعو للمرحومه بالرحمه

-محمد يبكى: غير زيد شوف يا خالى من قالك امى ماتت

-عمران : ربي يرحمها يا وليدى ..

حتى الخط فالجهاز بدى مستقيم خلاص

محمد اضبط بوه وبدو يبكو

وطلعو يلقو هاداكه الممر معبى .. اقاربهم كلهم واقفين

خدى عمران وسام وخالد من ايديهم ودخلهم لامهم

باسو على راسها وهما يبكو

خالد مافاهم شى لقى الناس تبكى بدى يبكى حتى هوا وخلاص

والرجالة فالممر كلهم يبكو….

” لما كانت الموت حارة زمان ..مش زى توة ”

_______________________

ثانى يوم بعد الضهر

حوش خديجه مليان بالناس جنازتها الضهر

بناويتها صغار يا روحى الكبيرة فيهم عمرها 8 سنين ..ماعارفين شى

يلعبو مع الصغار وخلاص

وخواتها يبكو والناس تعزى ..

وحناهم عمتك حدهم تعيط على بنيتها وحايرة من بناويتها صغيرات من بيعانيهم

تمو ايامات العزى …

ومحمد طلعت نتيجته من الشهادة الثانوية جايب ممتاز 94 %

داروه خالاته وبوه عزى من اول وجديد تفكرو المرحومه …

وفاتو ايامات العزى ..وروحو الخالات والعمات

وقعدت معاهم حناهم حدهم ..

اطيب وتمد وهيا مافيها حيل

وسام ومحمد يغسلو فالماعين ويضمو ..ويعاونو فى حناهم

_____________________

-امينه : يا وخى خلينى ندير الحلويات للناس..راهى خدمة حلال ومش عيب

-سعيد: وتبدا النساوين خاشين طالعين علينا ..زى الوكالة بلا بواب

-امينه : باهى كيف ندير ..تشبح فيه بوها مايبعتنا فى حتى قرش …

وانا خلاص تحشمت من مدان الايد ..والبنية كل يوم تكبر وماعندى باش نوكلها

-سعيد : اهو نجيبلها زى منجيب لصغارى .. والله ماعندى فرق بينهم …

اهو الحليب والشمالات افتكيتى منهم .. .والماكلة طايبة بيكم ولا بلاكم

-امينه : ياوخى تشبح فيها عيالك كل يومين غضبانة مضايقه منى ومن بنتى

-سعيد : تغضب براحتها الباب يفوت جمل …

وبعتالى قلتلك انا بنتك اعطاها لبوها هوا اولى بيها وبالصرف عليها

-امينة : بوها بعد ماتزوج معش شبح قداها بكل

-سعيد: هدا اخر كلام عندى..باش يقولو سعيد مخدم

اخته وتصرف عليه والله مايكتبها عليا الزمان

وطلع سعيد وخلاها حايسة فى تفكيرها ..

-امينه : ابرار ..ابرار ..وينك يا ماما ….

جت ابرار بنوته حلوة قنوشة خدودها مليانات.. وشعرها اشقر وناعم …

عمرها ثلاثه سنين .. بوها طلق امها لما عمرها عام ونص

بو ابرار اسمه مصطفى راجل معنداش مسؤلية ..لا

خدمه لا قدمه شادها دخان وخلاص

البنية تبى حليب وشمالات وامينه فى كلمة هات

لبنتك يا راجل

ولانه مش متع مسؤلية طلقها وعطاها بنتها ..

اول ماروحت لاهلها خوها ناصر يعاون فيها مرة مرة ..
ومصطفى بو ابرار يعطى فيها فى 30 دينار فالشهر دايريلها شوية حل …

بعد عام من طلاق امينه تزوج مصطفى ..

ووقف عليها المنحه متع 30 دينار اللى يعطى فيها لبنته ..

والحال دار بى امينه وماعاد عرفت كيف تتصرف

وهدا سبب انها تبى تخدم .. ولكن خوها سعيد رافض

___________________________

بعد سته شهور من وفاة خديجه ..

الفيتورى مقعمز فى المحل متاعه …

فاتح محل مواد صحية شيشمات وطبوات ومواد صحية

-امينه : السلام عليكم خوى

-الفيتورى : وعليكم السلام

وتلفت للعامل اللى عنده : وحيد برة للمحل جيبلى باكو دخان

-امينه : خوى وين الشيشمه اللى وصيتك عليها

-الفيتورى: شن درتى فالموضوع اللى كلمتك فيه

-امينة مواطية راسها : وين الشيشمه خوى

-الفيتورى : انا يابنت الناس طالب الحلال ..

انا محتاج من يرعى صغارى ..

وانتى محتاجه من يرعى بنتك ويصرف عليها

-امينه: لو سمحت خوى …

-قص عليها الفيتورى : واحد من جيرانكم صاحبى

وقالى عالمعاناة اللى تعانى فيها كلها

عزى نفسك وعزى بنتك ..

-امينه : ناخدك وانلوح بنتى ..شن تقول انت

-الفيتورى : جيبيها معاك بنتك .. تتربى مع بناويتى

-امينه: مستحيلة يعطيهالى بوها

سكت الفيتورى .. وسكتت امينه

خدت الشيشمه وطلعت

______________________

خشت امينه للحوش …

لقت ابرار تبكى …

-امينه : خيرك يا ماما

-ابرار : ضربتنى مرت خالى

-امينه: وعلاش ضرباتك

وابرار تبكى

خشت امينه لوسط الحوش

-امينه: خيرك على ابرار اللطف يا ربيعه

-ربيعه: اسمعى قريب عامين كاملات وانا متحملاتك انتى وبنتك ..ياسر

-امينه : انا فى حوش بوى يا ربيعه

-ربيعه: لا حوش بوك لا سو ..

رزقى ورزق صغارى نقسم فيه على بنتك مش ملزومه انا

-امينه نزلو دموعها : يا وخيتى ماهو قلت لسعيد

خلى نخدم ماخلانيش

-ربيعه: اسمعى الكلام اللى صار بيناتنا هدا تقوليه لسعيد والله تعرفى شن يصيرلك …

_________________

منطولش عليكم خلاصة الحديث .. ان امينة ماعرفت كيف تتصرف

ولا عرفت كيف تصرف على بنتها

والفيتورى شادها فى جرتها ويقنع فيها ..

وربيعه مرت خوها عالمكشوف معش تبى امينه تفتح

حتى الثلاجه وتاخد من رزق صغارها

ليلة على ليله تبات ابرار جعانه وبلا ماكلة

وقد ماشدت فى خوها سعيد ..شى ولا خلاها تخدم وتصرف على بنتها

تخوخمت ..ماعاد عرفت كيف تتصرف

بنتها جاعت ..وهيا اضايقت منها مرت خوها

بعتت لمصطفى راجلها مع خوها ناصر

قالتله جايينى ناس وبنتزوج ونرفع بنتى معاى

قاللها مصطفى مزال غير نعطى بنتى لراجل ثانى ونضحك عليا الناس

“يعنى لما مايصرفش عليها عادى .. شاف الناس غير توة الواطى ?

امينه ماعاد عرفت السمى من الوطا …وخاصه ان

ربيعه مرت خوها سمعت بالفيتورى يخطب فيها ..

ولقت وسيله كيف تتخلص منها

زنت على سعيد راجلها يعطى امينه

امينه رافضه وسعيد يلح عليها توافق .. وتعطى بنتها لبوها

____________________

ناصر خو امينه …علاقته بيها قوية

عزرى مش متزوج م 65 عمره 25 سنه ويخدم فالبحريه ديما فالبحر

-ناصر: بنية امى ..بنتك ماعندك بيش توكليها …

والفيتورى احواله المادية ممتازة

-امينه تبكى : كيف تبينى ندير انلوح بنتى

-ناصر: اييييياه ياما جايك يا بنية امى ..البنت بتكبر وبتخش المدرسة

ومدامك مع خوك سعيد مفيش خدمه ..وكيف بديري

اهو نبعتلك انا فى فلوس مرة مرة …ولامتى ..

البنت تكبر ومصروفها يكبر

وبعتالى نقولهالك من توة …سيوره بوها يمل منها ومرجوعها ليك

داخت امينه وماعرفت كيف ادير

-ناصر : خوديه واصرفى على بنتك من ماله .. لانه بيبدا مالك حتى انتى

وحلال تصرفى عليها مش حرام …

قعدت امينه تخمم وتفكر

لقت مصلحة بنتها انها تخدم عليها …

وبزواجها من الفيتورى كأنها تخدم على بنتها بالحلال

شرطت عالفيتورى تاخده لكن ادير معاش لبنتها

وعلى طول وافق الفيتورى

وشرطت على مصطفى راجلها انها خميس وجمعه

تقعد معاها وترجعله هوا السبت العشيه

يعنى تفارقها 4 ايام وتقعد معاها ثلاثه ايام

وافق مصطفى طول مدامها هيا اللى بتصرف على
بنتها ..

وبالمرة يخنب شوى من الفليسات متع المعاش

اتفقت مع الفيتورى ايدير معاش لبنتها 200 دينار فالشهر

“فالتسعين 200 كأنهم 2000 توة ..هداكة الوقت

كان المدرس وعنده اسرة يقبض 180 دينار”

____________________________

__________________

الفيتورى خبر صغاره انه بيتزوج

محمد قريب طار رافض الموضوع

-محمد : وهيا امى امتى توفت يابوى..اللى طاير عالزواج

الفيتورى ساكت وعيونه دموع

حناه حدهم : ياوليدى امك مايجى فمكانه حد ..

انا تشبح فيا تعبت وقلقت طالعه من حوشى وقاعدة معاكم

خواتك صغيرات والحوش يبي مراءة

-محمد: اسمعى يا حناى يجيبها المراءة عادى …

لكن ردو بالكم نسمع ببنتها فالحوش ..اهو قلتلكم من توة

وضرب الطاولة كسرها .. وطلع

______________________

بعد شهر …

قرو فاتحه امينه …وعطوها فلوس شرطها

شرت بيه كله حوايج لبنتها ومستلزمات ليها …

ودارتلها شنطتها وعطتها لبوها ..

وهيا تبكى واياماتها سود

ولبسوها وحنوها وتكموها وبعتوها عروس لعمك الفيتورى

محمد طبعا قريب مات وناض حى ..

مايحسابش يوم من الايام مراءة تاخد مكان امه فالحوش

طلع مشى لحوش صلاح صاحبه

صلاح ولد ناس وبوه شخص قوى فالدولة

وبو صلاح يحب محمد هلبا …

صلاح يجريله بوه عالقراية برة ..

ومتوصى حتى فى محمد كان حصله كيف بيخليه

حتى هوا يطلع مع ولده صلاح ويقرا برة

لانه مطمن على ولده صلاح مع محمد

???????

شهر ونص محمد ماروحش للحوش من لما امينه جت لبوه عروس

بعد شهر …

يوم الخميس روح محمد لحوشهم …

خش فالليل من باب الحوش …طووول لدار خواته يبي يشوفهم

لقى اربع بنات راقدات ..

استغرب .. هادى منو

ناضت اخته سحر .. حضنها وباسها وسألها عالبنت منهيا

قالتله سحر هادى ابرار بنت عمتى امينه جت الصبح وبايته معاهم

رقى الدم لودانه وقريب مات …صار بدت حتى تجيب فى بنتها عندهم

??????

الصبح سلم على بوه وحكاله على موضوع سفرته برة

وان بو صلاح صاحبه ممكن يحصله ويقرا برة

وغاب محمد شهرثانى …

مشى قعد مع حناه حدهم…

وطلعتله السفرة ..

سلم على خواته وخوته وبوه وسافر

قري فالجامعه.. ادارة اعمال ..فى سبع سنوات

لانه قري اللغه هيا الاولى .. وبعتالى بكالوريوس ادارة اعمال …

وبعدها قري ماجستير فى عامين

وكمل دكتوراه فى عامين

درجاته ممتازة وعاجب دكاترته …

تخرج سنه 2001 حصل على درجة الدكتوراه …

وقعد فالبلاد اللى هوا فيها معيد فالجامعه

وفالفترة هاديكه كلها قعد يبعت لبوه فالدولار …

وكبر بوه خدمته ..والمحل بدى محلات

وكان يبعت فى مبالغ لخواته وخوته بروحهم

وفى نفس السنوات البنات يقرو فالمدارس ووسام خش للجامعه قري محاسبه

ابرار تقرا مع خالد فى نفس الفصل لانهم نداد ..

وامها كل يوم تبعتلها فى فطورها معاه

خدو عالوضع خلاص ..وبدت ابرار يوم الخميس تروح مع خالد لامها من المدرسة

بنات الفيتورى حبوها ومتقبلينها هيا وامها ..

ووسام جكتور فى حالها

خالد علاقته بيها قوية ..لانهم نداد بعض ..وديما

ادس عليه فعمايله اللى يدير فيها فالمدرسه

سماح اكثر وحدة صاحبات هيا وابرار لان عمرهم قراب من بعض

وابرارلين كبرت وامها تفهم فيها انها تزوجت على

خاطرها لانها مالقت بيش توكلها ولا بيش تلبسها

________________________

سنه 2006

ابرار معش تجى لامها كل خميس زى ماكانت زمان لما صغيرة

توة كبرت وخشت للجامعه وبدت تتحشم من خالد ووسام بالرغم هما يعاملو فيها زى وخيتهم

ابرار تقرا فى سنه اولى اقتصاد …حلمها من لما صغيرة انها تخدم فى مصرف

محمد روح ليبيا من برة

وجوه الخالات والعمات يسلمو عليه

متغير هلبا ومحلو

وابرار فى هاديكا الفترة كلها مامشتش لامها فى

حوش الفيتورى

تتلاقى معاها فى حوش خالها سعيد وخلاص لان الحوش متع الفيتورى زحمه

طبعا محمد جايب معاه شهادة الدكتورا ..وبدى طول يقري فى جامع الفاتح

“زمان اسمها جامعه الفاتح مش زى توة طرابلس ?

____________________

بعد شهر…

ابرار مقعمزة فى الجردينه متع الكلية

وتراجع عندها امتحان

فى نفس الكرسى اللى هيا مقعمزة فيه ..تشبح جنبها

فى شنطه … وماعرفتهاش لمن ..

سألت البنات قالولها منندروش لمن

قررت انها تفتشها بالك تلاقى اسم ولا حاجه تزبط بيها الشنطه لمن

وهيا حاشيه راسها وتفتش فى هاديكه الشنطه …

يوقف قدامها واحد داير لحية خفيفه ولابس بدلة وقرواطه

الشاب : شن اديري

قامت ابرار راسها مخلوعه : نعم

-الشاب: هادى شنطتى كيف تفتحيها..قلت ادب ..

وخدى الشنطه ومشى …

وهيا تتفرج عليه …ماردتش حتى كلمه

ركب سيارته …

خدت هيا اوراقها ومشت من المكان

فتش هوا شنطته مالقاش موبايله فالشنطه ..

نزل يجرى دور عليها سأل البنات اللى مقعمزات …

شى شى البنات مايعرفوهاش وهوا معرفلهاش مكان

-الدكتور وليد يشبح فيه يحوص : محمد خيرك

-محمد : يا راجل بنت هنايا فتشت شنطتى وخنبت الموبايل

اتارى الشاب اللى كلم ابرار هوا محمد ولد راجل امها

اللى كيف مروح من السفر وهيا ماتعرفاش

__________________

ثانى يوم ابرار قالت لبوها انها بتمشى لحوش امها

ليها قريب شهر مامشتش لحوش امها

والبنات شادين فيها للجيان عندهم

لبست حوايجها وجى خالها ناصر رفعها

حطها فالباب ومشى

فتحت سماح ل ابرار الباب وخشو

ابرار خاشه ..وتسمع فى واحد عاطى بالضهر ويعيط

-محمد : حوايجى من مسهم

-امينه : انا طلعتهم غسلتهم

-محمد يعيط : انا قلتلكم بنرفعهم للمغسله ولا …من قاللكم تمسوهم

ابرار تكنطت وما طاقتش فى امها الكلام

-ابرار : انت خيرك تعيط على امى

-محمد تلفتلها زبطها : انتى

-ابرار: انت ?

_قرب منها محمد وكلمها بالشوى : وين الموبايل يا خنابه

-ابرار: موبايل شنو ?

-محمد بالشوى يتكلم : موبايلى اللى خنبتيه من الشنطه

___________________________

انتهى و يتبع ???

مدامها حلقه وحدة فاليوم ح نطول فيها هلبا ..

وح انزلها بكرى ..غير اليوم عندى ظرف كتبتها متأخر

غدوة الحلقة الثانية ونشوفو التطورات اللى بتصير فالقصه

نحبكم

__________________

 

تقييم المستخدمون: 4.81 ( 12 أصوات)

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29الصفحة التالية
الوسوم

تعليق واحد

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock