روايات كاملة

ضحية إهتمام للكاتبة خلود شلابي

جميع الحقوق محفوظة للكاتبة

ضحية إهتمام للكاتبة خلود شلابي

سلسلة #ليتني_أعود 😔


قصّة الأولى بعنوان (ضحّية اهتمام ) 💔✌🏻 حلقة 1

في أحد المدارس بطرابلس ،، كنا نراجو في أبلة الرياضيات اللي متغيبش بككل 😤😥
قلبنا الفصل لعرس ،، ونضنا نغنو ونصفرو ونصفقو ،، واللي ترقص واللي مدايرة روحها العروسة ،، طبعا أني اللي ندربك 😁😂 ونتبادلو ف الأدوار كل مرة وحدة توقف فالممر تعس علينا بش كان جي حد تنبهنا ونسكتو
خشت مسرة تعيّط / أووووما أوووووما 😱
ف ثواني رجع الفصل لوضعه الطبيعي ..
الإخصائية/ من منو الدوشة اااه 😑🤨
ملاك/ هذا مش احني الفصل اللي ورانا،،
نضنا كلنا ننكرو 😁
الإخصائية/ أبلتكم معطلة شوي صايرلها ظرف وجايتكم.. مش حتغيب 👌🏻
أني/ إييياح علينا 😤 قلنا حتى احني يصير ميصير أبلة رياضيات متغيبش 😒
الأخصائية/ أوقفي عالحيط يلاّ ،، ع طولت اللسان 😑
أني/ شن قلت أني توا والله 🤨
رحاب توشوشلي/ مصحها الإخصائية شن بتوقفك😒🤨
تشجعت بكلام رحاب وركبني العناد
أني/ وعلاش بنوقف ي ابلة 😑
المديرة/ وتناقشي زيادة 😑؟
وقفت وقعدت نتأفف وملاك ومسرة ورحاب يضحكولي
وسعاد تهدّي فيا وتقولي اسكتي راهي الإخصائية عيب
،،
،،
قعدت واقفة لين جت أبلة الرياضيات وخدت حصة الرياضة 😭😭

_______♡■☆Kd°•ShaLa`Bi☆■♡_______
🏵💎 روايــــات دمــــعتــي تـــــروي مــــــأســـاتــي 💎🏵

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

أني اسمي اميرة نقرا تاني ثانوي،، المعروف عليّا إني منغيبش من المدرسة بكككل😁 بش نتلاقى مع صحباتي الطايشات رحاب ومسرة وملاك ونقعدو نديرو فالعمايل من الكبيرة وأختها..✌🏻😂🤚
وكانت عندي صاحبتي سعاد من كنا صغار ،، ديما تنصح فيّا وتقولي أبعدي ع القروب راهو هبعو بيك وجرّوك معاهم للضلال بس كنت نقوللها خيره جوك قديم 😒😷🤮 .. أني من حقي نحب وننحب ونعيش حياتي ونطلع ندير مواعيد ويجيبلي هدايا..
سعاد/ إيه حبّي لكن مش أي حد 😑،، أحني قعدين صغار مزال قدامنا الجامعة والحياة تراجي فينا،، اهو الإمتحانات ع الأبواب لازم نشدو هالسنة 🔥🔥
قاطعنا صوت رحاب جاية فرحانة بكيسة شكاليط جايبهالها صديقها 😍🤤 ماغير دستة الولاد اللي تكلّم فيهم🙃
اني/ شووووفي الدلع كيف😏
سعاد/ استغفر الله العظيم🤦‍♀️
ملاك/ اشششيه اششسيه 😍
مسرة/ فاتكم نص عمركم … كان تشوفو شن صارلنا قريب طبنا المدير قدام المدرسة 😂😂
اني/ احكووولي يلاّ😁😁
رحاب/ خن نحكيلكم أني 😂 جاني سراج ف سيارته الأوبتيما الأخيرة 🤤🤤 وقعد يراجي فيا لين نوصل اني ومسرّة للمدرسة وكيف فتحلي الباب بش يمدلي الهدية يطلع المدير ويقوللنا تعالو جاي 😨
احني منسجمين/ وباااه كملي 😳😳
رحاب/ وقفنا المدير وقعد يسأل فيا شنووو هذا اللي ف يدك ومنو صاحب الأوبتيما 😒.. قتله بكل برودة دم هذا خوي من بيكون يعني ،، ولا ضروري كان عطاني كيسة شكلاتة وفطوري معناته حد غريب 😏 مع تفنيصات وقيمات حواجب 🤨😂
طبعا مسرة الحمارة قريب فضحتني متعرفش ترزرز ،، 😠 طول يبان على وجهها التوتر
مسرة/ سعدودك يا وخيتي عندك شجاعة ،، كان أني راه قعدت متلكمسة وخاشة بعضي .. 😂😂
،،
،،
،،
سعاد / خوي قاللي معش توقفي عليهم مسرة ورحاب وملاك راهو ميصلحوش ،،
أني/ وباه شن بنديرلك،،😑😒
سعاد/ خيرك تغيّرتي عليا يا أميرة 😥 راهو هادو بيودرونا ،، متاعات طلوع وسيارة معروفين فالمنطقة💔
أني/ منسمحلكش تتكلمي عليهم هكي ،، 😠
سعاد/ تتفكري كيف ولّو على صاحبتهم سلمى قبل،، لما لقت رحاب تكلم ف صاحبها وتخون فاها ،، وجو كلهم ضدها !! راهو زي ما سلمى ملقتش فيهم الخير حتى انتي حيولّو عليك 😥
أني/ منيش عيلة بش يضحك عليّا حد👌🏻😑 وبعتالي فوقت ملقيتكش إنتي لقيتهم هما !! تتفكري ف امتحان الإنقليزي مبيتيش تسميلي ورحاب حدفتلي الحجيّب وقعدت انّقّل بش جاوبت؟؟ !! ولا نفكرك
سعاد/ والله ماقدرت نسميلك تي الأبلة واقفة بحداي مقدرتش نتلفتلك بكككل،، شوق من مواقف معاك توا طلعتيني مننفعش ع خاطر امتحان الإنقليزي اللي أني بروحي درجتي ضعيفة فيه ☹😑
أني/ أما درجة ضعيفة فيه وانتي طلعتي اول وحدة 😏
سعاد/ طلعت لان زي قعمزت زي مقعمزتش مش حنخترع اجابة 😥 لكن صحيتي ع كلامك يا أميرة 😔✌🏻
أني/ ضربني وبكا سبقني وشكا.. بالطقاق 🤨 وقعدت نعيط لين جوني رحاب وملاك ومسرة
ملاك/ خيرك تعيطي يا حبي 😎
أني/ قدّاش ما تكسرلي ف رقبتي الزحح
مسرة/ مني ع سعاد تقصدي ؟ 😁
أني/ إيييه
مسرة/ مبرد فيتها 😑 نحس فاها مش طبيعية مرات ، تحب تقرا وجوها اخخي
رحاب/ هادي مش زي طينتنا تحب القرايا .. احني اللي مش طبيعيات يابنتي 😁😂😂
أني قعدت نتكلم بغيظ وحكيتلهم عاللي صار / أهو تعاركت معاها معش نبي انتبعها،، قتلي إنكم متنفعوش ودروحه معش تبيني نتبعكم 😡
رحاب/ شنووو 🤨 تو نوري ###🤬
فقت لروحي وقعدت نهدي فيهم ،، بس هما مشو عطوها طريحة
سعاد/ هكّي تحرشي فيهم عليا يا أميرة 😥😫
رحاب/ تو نوريك من هما الفاسدات يا خويمرة ،، 🤬 وانتي شناباتك زي بوشهاب ينظفرو ظفر
ملاك ومسرة / ههههه هههههه 😂😂
مشو وخلّوها حالة،، وشاحها طايح والدمعة ف عيونها،،
كيف قربت منها ،، دفتني وقتلي/ حيجيك كف ياأميرة وبيناتنا الوقت 👌🏻💔
أني/ والنبي فوتيني حق فيا اللي قاعدة واقفة معاك،، 😷🤢
سعاد/ أني نصحتك وهكي تمشي تقوليلهم
أني/ مدخلكش فيا 😑
سعاد/ تمام ،، معرفة طيبة وسامحيني كان قصرت ف حقك فيوم ،، العشرة اللي بينا انتي انهيتاها ،،سلامات😭
أني فخاطري / تو ترجعلي زي كل مررة ،، مدرتش قيمة لدموعها ،، ولا لكل يوم كنا فيه مع بعض من كنا صغار ،، رغم إن مشت وقعدت تتلفت تبيني نجيها لكن أني قلت باب وتسكر ،، معش نبي نتبع بنات مملات 🤮😷 نبي بنات راقيات وجوهم مليح❤
_______♡■☆Kd°•Sha▪La`Bi☆■♡_______
جت الإستراحة ❤❤
قعمزنا ف تركينتنا اني ورحاب ومسرة وملاك .. نفطرو وناكلو ف شكاليط سراج 🤤😂
ترررن تررررررن📲📞
قعدت رحاب تهدرز بالتاليفون كل مرة مع واحد ،، وأحني نعلقو علاها ونضحكو 😂 وكل مرة وحدة يتصل باها حد لين قعدت مقعمزة ناكل بروحي 😤😭
منتصر/ وينك نخش عليك انتظارات من أمبكري
رحاب/ هادي ملاك معندهاش رصيد تتكلم بفوني 😏
منتصر/ أها شن صار ف موضوعنا دهشتيني معاك 😠 ،، قلتيلها أميرة ؟
قعدت رحاب تشوف يمين يسار وبعدت ع الأنظار ..
رحاب/ قالت منبيش 😏
منتصر/ تمام ،، وسكرو الخط
،،،،
طلعت اني والبنات روحنا فالطريق نهدرزو ونضحكو ،، وبعتالي سيبتهم مشيت ف طريقي لين قربت جيهتي سيارة لصقت فيا لصصق ..
طلع منتصر راسه وكلمني..
منتصر/ شني يا حلووو 😉 هكي تتجكتر علينا 😉
أني ححي منتصر😳
منتصر/ هكي تقولي لرحاب متبيش تكلميني ؟ علاش باه
اني/ أمتى صار محكتليش رحاب 🤔
منتصر/ مقتلكش إن أني قلتلها نبي نتعرف عليك؟
اني/ لالا
منتصر/ امالا هاكي خودي رقمي وتو نتفاهمو .. ومتقوليلهاش إن أني جبتلك السيرة أووك ❤؟
أني / أوك ✌🏻
خديت رقمه وروّحت فرحانة بنطيرررر .. زعما علاش رحاب مبتش تقوللي ،، 🤔😑 اكيدة بتقول توا بتاخده ومعش بيبدا صديقها ومعش يجيبلها هدايا.. باهي معقولة مسدهاش اللي تكلم فيهم !!🤔 طلعت عيلة الخامرة،، تو نعرف كيف نقهرها المسسخة ،، طلع كلامك حق يا سعاد 😔💔

خلود شلابي/ برأيكم توااااا أميرة حتعود للطريق اللي خشتلها أو لا ؟؟ جاوبوني فالتعليقات ايه أو لا ،، مع ذكر السبب ،، 🔥🔥

وصلت للحوش ،،
وطبعا منحكيلكمش باختصار بوي وامي 24 ساعة يتعاركو 😔💔 عندي زوز خوات متزوجات .. واني ووحدة أصغر مني ،، وزوز خوت اكبر مني ،،
مكنتش مرتاحة نهائي ف حوشنا 🔥💔 بوي يعامل فيا ف معاملة كلاب حشاكم ،، لما يجو خواتي المتزوجات يقيم فاها بيهم هما ورجالاتهم ونقعد اني وخوتي نتفرجو على خيرنا اللي يمشي للنسابات ..
لقيت خواتي الزوز متغديين عندنا .. وهما ما صدقو جايات مقعمزات بمفرخهم
بوي/ نوضي ضمي المطبخ
اني/ اني مروحة تاعبة بنرقد اهم ينوضو يضمو😑
بوي/ ضمي انتي يا كلبة ،، خواتك ضيفات
اني/ 😤😤
لقيت روحي مسد مش فاضلي غداء وفوق منها ضميت ورقدت على عياط صغار خواتي ،، وتكشيخ بوي على اختي الصغيرة ..
جي الليل قعدت نشوف لرقم منتصر وقررت نتصل بيه 📞📲 مدامه شاد فيا ع قولته ورحاب مبتش تحكيلي ف أكيد لقاته يبزي مليح تبي تخليه لنفسها 💰💴 و مرات يطلعلي كويس ويعوّضني على اهتمام عيلتي المحرومة منه،، ويجيبلي اللي خاطري فيه 😍🔥

يتبع … 💔

تقييم المستخدمون: 5 ( 1 أصوات)

1 2 3الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock