عشقت المستحيل للكاتبة صفاء

فريق النشر
2020-08-03T05:09:45+02:00
روايات كاملة
فريق النشر13 أبريل 2020آخر تحديث : منذ 12 شهر
عشقت المستحيل للكاتبة صفاء

#عشقت_المستحيل1

ميس :::::🥱
شهد :::::: العروس بترقد
رهف :::::: معنها ننوضوا نروحوا
أميرة :::::: توا شن معنها ؟ بنديروا حفلة توديع عزوبية غدوا ؟
شهد ::::::: اي احسن من تبدا الناس تجي معادش نقدروا
أميرة ::::::: نديروا بيتزا في السفرة عالحطب 🤤
رهب ::::::: بالله فكونا من بيتزا الحطب وعصبان بورديم وكيكة مش عارفه من ، تقول خاشة قروب منى معتوق
ميس ::::::: هههههه اي ناخدوا واتي ونديروا جو احلا
شهد :::::: تمام هيا سلام انى معنها 😘 بتمشي للجامعة غدوا
رهف :::::: عالجو الصبح ونضت معها
ميس :::::: اقعدي باتي انتى 🥺
رهف ::::::: لالا شفت لاميرة من طلع من داره قل مقداره 🌚
أميرة ::::::: هههههه انى حوش عمتي 😎
رهب ::::::: يامحاسن الصدف تصدقي وانى حوش عمي 😏
شهد ::::::: وااااك فكونا من النشاف توا هيا نوضي
ميس ::::::: طلعت معاهم باي شهوده 😘
شهد :::::: سلام ومشت
رهف:::::: هيا درقي وجهك خشي
ميس :::::: اقعدي باتي مروة قاعده وتوا تتلصق على ماجد
رهف :::::: فكينى منها هي وبردتها واصلا انى وخوك الخرا متعاركين ماعندي جو ليه
ميس :::::: هههههه تمام حتى انى بنخش نرقد ونفوتها مع امي
رهب ::::::: احسن 😘 هيا باي حبي
ميس ::::::: ليلتك سعيدة وخشيت أميرة ماتزعليش منى انت توا بتقعدي معانه فترة مافيش مجاملات نعسانه بنرقد
أميرة :::::: عادي حبيبتى ارقدي الساعه قاعده 10 انى ندير دوه عالكوجينة ونهدرز على عمتى
ميس ::::::: تمام خشيت لداري شفت لدبلتي 💔 حولتها حطيتها عالمرآية شفت تلفوني يضوى 💔موسى يتصل 🤦🏻‍♀️ قلبته على وجهه وخشيت في سريري حطيت رأسي عالمخده وقعدت نفكر عرسي خلاص بعد 10 ايام مافيش اي شعور فرحة في داخلي غير الخوف مش حاسه بشي 💔 اكيد توا تقولوا باهي ليش بتتزوجي خل نحكيلكم قصتي

انى ميس عمري 23 سنة نقرا هندسة اخر سنة بوي اسمه ناجي امي فوزية خوي الكبير ماجد أستاد في الجامعة خوي يلي بعده محمد 💔 في ايطاليا من 4 سنين رهف بنت عمي واختى يلى ماجيتهاش امي من 4 سنوات تعرفت على نزار 💔 يبيع في واحد من المحلات عطاني رقمه قلت يلا نجرب زينى زي اي بنت ومن تفويت الوقت نقلبت الحكاية جديات 💔 كل يوم نحبه أكثر نتعلق بيه اكثر ، خطابي هلبا زي ماتشوفوا نعتبر حلوه شعر ناعم اسود عيون متوسطة لونهم ازرق بشرا صافي جسم حلو ، لكن لا وابدا مانسلم في نزار نرفض حتى بدون مانقوله عليهم من 4 شهور جي موسى للجامعة شافني عجبته سأل عليا قالوله خوها أستاد تواصل مع ماجد طول وطلب يجي للحوش قرارت نجرب نزار طبعا بعد تحريض من شهد بنت جيرانه صديقتى ورهف وكانت المكالمة كالاتي
نزار :::::: باهي علاش تقوليلي على امه توا ؟😡
ميس :::::: ياعمرى ماتعصبش روحك لكن انى نسأل فيك ؟
نزار :::::: شن تسألي مافهمتش ، عارفه عندي إمكانية توا ناخدك ؟؟؟؟
ميس ::::::: عارفه توا لا لكن بصفة عامة القدام نبي منك كلمة وعد نهائي مش يوم حبيبي ويوم صديق وعشرة غريب تعبت أنى نزار كل فترة تنشغل عليا وتبعد ونعرف انك تعرفت على غيري نفوت ونتعاركوا ونرجعوا لكن توا نبي منك كلمة قولي حتى بعد الف سنة يوم تكون عندي إمكانيات ونقرر نتزوج انتى يلي بنتزوجها ، عندي الحق في وعد زي هذا اضني ؟
نزار ::::::😶ساكت
ميس :::::: نزار
نزار :::::::: مزال ماتخرجتيش على شن مستعجله ؟
ميس :::::: نزار 😤 أنى شن نحكي وأنت شن تحكي فوت التخرج توا نبي منك وعد
نزار ::::::: مانقدرش
ميس ::::::😳 كيف !!!
نزار ::::::: مانندريش عالدنيا مانعرفش وكان جهزت روحي بعد سنة والا اثنين اوكي تمام ح نتزوجك بس وكان عطلت بعد 7 او 10 سنين عمرك فوق 30 توا معقولة بنتزوج وحده …. بعدين هكي حتى امي ماترضاش وزيدها بنديروا صغار بعدين واحنى الزوز كبار والا بنتفرجوا على بعض
ميس ::::::😳 تي شن تقول انت نزار توا هي يلي عمرها 30 معادش تجيب يعنى ! من قالك الدوه الفارغه هذه ؟؟؟ هذا عذر تقولهولي بالله
نزار :::::: بترفضيه ماتحطهاش في رأسي وبعدين تبدي انى رفضت على خاطرك وانت قلت وانت قلت
ميس :::::: لا ياعمري 😡 مش رافضاته وحياتك ما واخده غيره باهي ، وانت انسى انك عرفت وحده اسمها ميس ،،،، طبعا وبالغيض هذا درت المقابلة مع موسى وعجبته هلبا واضح عليه هو واهله حدادوا العرس طول مع هذا اصر يجيبلي دبلة 💔 ومايحرمنى من شي فاتوا الاربعة شهور بسرعه وتوا مازال بس 10 ايام عالعرس الغريبه انه نزار ماحاولش يرجع او يبرار بكل كأنه ماصدق 💔 لكن شن بديروا للقلب الحقير هذا يلي يحب الذل قاعد يحبه ويموت فيه مش قادره نفكر في شي غيره
تقلبت في السرير نسمع في باب الحوش يدق وامي فتحت سمعت صوت 😳😳

~~~~~~~~~~~~~~~~~~~~~~~~~~~~

رهف :::::: روحت لقيت أمي وخالتي مقعمزات في الصالة
كريمة::::: (أمي ) روحتى بكري ؟
رهف :::::: ايه نعست بنرقد
غزالة ::::::( خالتي ) شوره مش في الحوش 😉
رهف :::::: مش في الحوش 😒 وخشيت لداري خديت بيجامة لبستها سروالها اسود ثلاثة ارباع جاينى مزبوط وتوبها رصاصي وكمامها وردية شفت تلفوني لقيت رسايل من ماجد واتصالات 😏. رقدات ومابيتش نعبره حطيت رأسي عالمخده وقعدات نفكر مبدئيا خل نعرفكم على روحي انى رهف نشبة شوووووية بنت عمي ميس في لون العيون والشعر بس انى عيوني كبار ووسعات وشعري كيرلي 💔نقرا رياضيات سنة ثالثه انى اصغر من ميس بسنتين تقريبا طبعا بوي متزوج قبل امي خالتي سالمة وجاب منها 4 بنات وطبعا لانه يبى ولد زي اغلب الرجاله قرار يتزوج صلح حوش بوه القديم يلي هو جدي وتزوج امي حملت طول وجابتنى انى 😂🤭 تعصب بوي انى جيت بنت ويلي زاد الطين بله امي تعبت في الولادة 💔 وبخطأ طبي صارلها نزيف في الرحم اطروا يحولهولها 💔 يعنى معادش تقدر تجيب تاني وبوي حصل فيها معادش قدر يطلقها المهم بعد مانولدت بسنه حملت خالتي سالمة ، ويالا سخرية القدر جابت الولد يلي يحلم بيه بوي ههههه كان صبر شويه بس راهو ماحصلش فيه المهم وبعدها بسنتين جابت ولد تاني يعنى توا عندي اخين ولاد من بوي اصغر مني بعدها بابا اهملنا جدا بعد تحقق حلمه وطبعا هو كان يسكن بعيد شويه اما حنى كنا نسكنوا في حوازه كبرها 1000 متر فيها حوش عمي ناجي وحوشنا يلي هو حوش جدي الحياش لاصقيت في بعض روشن داري مقابل فرندت دار محمد 💔 طول طبعا حتى حوش عمي كان كله ارضي يعنى مش دورين لكن على اساس حركات وديكور بلكونات في الحوش الارضي 🤦🏻‍♀️ المهم كنت لاقيتها ننقز من روشن داري تعرفوا الحياش القدم الروشن لوطه وكبيييييير وبلا حماية ونمشي نخش لحوش عيلة عمى من بلكونة دار محمد ،،
و لانه بابا كان قليل وين يجينى وين كنت صغيره نقول لعمي ناجي بابا بصراحه هو اساسا يعامل فيا تقول بنته وعمتي فوزية وامي متفاهمات تقول خوات ولقينه جنبه يهتم بكل شي يخصنا يرفع ويجيب ويشري كل شي عليه عندي خالتي غزالة من 7 سنين توفت جداي وانتقلت سكنت معانه بحكم بابا مايجيش هلبا وهي ماتفهمتش مع نسوين خوالي ،،، ايي وانى مرتبطة بماجد ولد عمي 💚 من ثلاثه سنوات وتوا متعاركين 💔 طبعا جربته للمره الالف وخانني للمرة الالف برضو 🙂 وفيه هلبا حاجات تانيه توا تعرفوها مع الوقت المهم شن الصوت والدوشة هذه فتحت الروشن !!! دوشة في حوش عمي طلعت من الدار شن فيه تسمعوا في الصوت
كريمة ::::::: فتحت الباب وطلعت برا
فوزية :::::::😭😍😍😍 تعالي ياكريمة محمد روح محمد جي 😭😭 وليدي روح
رهف ::::::😨 حسيت جسمى كله سخن وقلبي وقف
غزالة ::::::: روووووررووووي رهف رهف 😍 محمد ولد عمك روح سمعتي !
رهف ::::::: 😍 وليت لوعي ايه طلعت نجري مشيت لحوش عمي

~~~~~~~~~~~~~~~~~~~~~~~~~~~

نرجعوا للخلف شوية
محمد :::::: دفعت للتاكسي ونزلت نمشي في خطوات بطيئة كاني خايف نوصل 💔 تعبان كأني مروح على رجليا ناخد في نفس عميق وكأني نجمع في أكبر طاقة ممكنا نرسم بيها ابتسامه كذابه على وجهي شفت لحوش عمي قاعد زي ماهو ماتغير شئ شفت حوشنا 💔 الزيتونه يلي قدام الباب طول هنى بالزبط كأنه كيف صار الموقف الاربعة سنين ماغيرات شئ في المكان زي ما ماغيرت شئ في قلبي دقيت الباب
فوزية :::::: هذا اكيد ماجد فتحت الباب 😳😳 م م محمد 😭😭😭😭 وليدي محمد
أميرة ::::::😍 محمد
ميس ::::::: طلعت من الدار نجري ، وحق ربي سمعت الصوت ماصدقت 😭😭 واخيراً حضنته حمودي استحشتك وقعتدت معلقه في رقبته
محمد :::::: ههههه خنقتوني
ماجد :::::: خش من الباب 😳 محمد
محمد ::::::تلفتله اهوووو ماتغير فيك شي وحضنته
فوزية ::::::: طلعت تجري تنادي على كريمة وتزغرت برا مش عارفه كيف تعبر على فرحتها
محمد :::::: مد يده
اميرة ::::: انى اميرة بنت خالك
محمد ::::: ههههه سامحينى من قبل مانتلاقوا هلبا ومع الوقت الواحد يتغير
ميس ::::::: رجعت حضنته تاني الله قداش متغير انت
محمد :::::: ههههه مازاد فيا شي غير الطول
كريمة :::::: خشت تجري وليدي محمد 😢
محمد :::::: قلبي ضاق، مرت عمي وحضنتها
كريمة :::::: الحمدلله على سلامتك وليدي
محمد :::::: خل نغسل يديه ووجهي توا نجي ومشيت للحمام غسلت وجهي مره واثنين وثلاثه على شخصيتى وقوتي الا انى حاسس برجفه في جسمي كله كانى نستنى في حاجه
خل نحكيلكم على روحي انى مش متع قراية من امتحانات الشهادة الثانوية مانجحتش سيبت القراية خشيت معهد صناعي 9 شهور تعلمت عدة حاجات كنت عكس ماجد هو متع قرايه بديت في الخدمة بكري خدمت في ورشة في مطاعم في النجاره وهذا خلاني نحتك بالناس ونبدا متع مشاكل شويه كانت حياة ماشية خدمتي كويسة وبادي نكون في روحي بالشويه بالشوية لكن في لحظه تغير كل شي كرهة البلاد ويلي فيها 💔 وطلعت من البلاد بطريقة غير شرعية في يوم وليلة بدون مانقول لحد وصلت مالطا ومن مالطا لايطاليا توا بعد 4 سنوات قرار نروح وان شاءالله مانندمش عالقرار هذا ، طلعت من الحمام في نفس الممر في نهايته فيه الكوجينة مشيت بنشرب اميه
ميس ::::: اهو حسه طلع ومشيتله
رهف ::::: مشيت وراها بعد ماباركت ليها ولي مرت عمي وحمتلهم على سلامته
محمد :::::: فتحت الفريز طلعت شيشة امية وخديت طاسة وبديت نصب
ميس ::::: ماشاءالله عرفت مكان كل شي
محمد :::::: ماهو….. تلفتت لقيت رهف قعدات ساكت
رهف :::::: مش عارفه علاش كنت حاسه انى مفروض نحظنه هذا محمد خوي وصديقي وكل شي كانت علاقتي بيه قويه هلباااااا قبل مايسافر
محمد ::::::: حطيت الطاسة ومديت يدي
رهف ::::::: 😏 ضحكت بهزوه على مدة اليد وفي خاطري نقول زعما كبر وبدي يتحشم مديت يدي ، الحمدلله على السلامة ليك وحشة 😍
محمد ::::::: الله يسلمك وسحبت يدي وتلفتت قعدات نشرب
رهف :::::: قربت وقفت جنبه عالدولاب وقعت نتفرج عليه 🤤 كان لابس سروال اسود كندرا طويلة من قدام سوده تلمع جاكه جلد سوده قصيرة موقف رقبتها تشرت ابيض تحتها شعره اهااا على منظر شعره ❤️ اسود مرتب بالكريمة كل شعره بروحها شفت لشفشوفتي كيف طالعه في ظلي يلي على الحيط 😭 شن جاب لاجاب
ميس :::::: متغير وله ؟
محمد ::::: هههههه شن تغير فيه
رهب ::::::: مديت يدي بنمس شعره
محمد ::::: حركت رأسي بعدته
رهف :::::: ههههه خيرك مخلوع ارفع عينك فيا خل نشوفك خيرك
محمد ::::::: شفتلها فوق وياريتنى ماشفت نفس العيون ونفس النظرة 💔
رهف ::::: مولي طرف تهبل 🤤😂
محمد :::::: وانتى قاعده شينة زي قبل
ميس :::::: ههههه ، حيييي صوت بابا جي
محمد :::::: طلعت
ناجي :::::::😳 محمد 💔 حظنه وقعمزوا العيلة كلها مع بعض يهدرزو علي محمد طبعا الاسئلة المعروفه كيف جيت علاش ماقلتش انك جاي ووو
لكن محدش تجرى وسأله علاش مشيت بالطريقة هذه 💔
ناجي :::::: غدوا ندير زرده وننادي
محمد ::::::: علاش مروح من الحج انى ، فوت مصاريف عالفاضي توا يجوا للعرس ويشفوني
فوزية ::::::: مصاريف شن 😢 انى ست شهور لا عارفاتك حي لا ميت ماوحد قصر معاي الناس خاشه طالعه من وقتها ندرت ندبح 5 خرفان غر تروح سالم
ميس ::::::: تلفتت لرهف معانه غدوا نهير 💔
رهف ::::::: والحفلة تكنسلت 💔
ناجي ::::::: خلاص نطلع الصبح انى وماجد لسوق نجيبوا كل شي ناقص ونتصل ننادي عالعشي
محمد :::::: ديروا رأيكم ، عارف اللقطه بايخه لكن عادي نستأدن منكم نخش ندوش ونرقد ؟
فوزية ::…:: لا هو اصلا خلاص مافيش وقت الساعه قريب 3 كلنا بنرقدوا وننوضوا بكري غدوا
كريمة ::::::: هيا رهف هيا غزالة
ناجي ::::::: ماجد سقد عيلة عمك
ماجد ::::::: حاضر هي وناض ورهم
رهف :::::::: حسستنى بنمشوا لمزده ياعمي هههه من بُعده ، تلفتت لماجد بالشوية وانت هنى روحك الحركات هذه مش راح تفيدك
ماجد :::::: ماشي وراها تي حلفتلك بالله الا زبطتك انتى
رهف :::::::😒 تصبح على خير ماجد ومشيت

~~~~~~~~~~~~~~~~~~~~~~~~~~~~~

محمد ::::::: خديت شنطي وخشيت للدار داري زي ماهي قاعده 💔
فوزية ::::::: هذه فوطه والصابون والشامبو كله في الرف في الحمام
محمد :::::: شديت يدين امي بوستهم مش براني انى توري فيا
فوزية ::::::: ماخليت حد يمس دارك ولا يحول منها شي خليتها زي ماسيبتها 😢 نقول وليدي يروح يلقا فراشه في مكانه
محمد ::::::: بوسة رأسها وحضنتها سامحينى يامى
فوزية :::::: المهم روحت وليدي مسامحاتك المهم صحيح ، هي خش دوش وارقد

~~~~~~~~~~~~~~~~~~~~~~~~~~~~~

رهف :::::::: خشيت للدار
غزالة :::::::: لحظتي حاجه غريبه
رهف ::::::::: شن
غزالة :::::::::: محمد مش قادر يرفع عينة في حد يهرب بعيونه طول الوقت ، واضح متحشم من الكل بعد اللقطه يلي صارت والرعشه يلي رعشالهم
رهف :::::::: نستنى فيه امتى يحكي ويقول علاش خطرله في يوم وليلة دار هكي
غزالة ::::::: مفرخ يغرار ببعضه ، هيا تصبحي على خير
رهف :::::: خشيت لسريري تذكرت محمد قداش تغير مشت بيا الذاكره لخمسه سنين اللتالي

رهف ::::::: نلعب في بلستيشن نلف في اليد وجسمي كله مع البطمة 😂
محمد :::::: شافلي وضحك ، رجع شاف للتلفزيون 😳 لحظه لحظه شن صار
رهف ::::::: هههههه فتتك ماقالك حد تفرج عليا واضحك على لعبي
محمد :::::::: اوكي 💣
رهف :::::::: شن صار توا 😳
محمد ::::::😂😂😂 ميت بالضحك 🤣 فجرتك رجعتي من البداية
رهف :::::::: لوحت اليد غشاش لانى كنت بنفوز معادش بنلعب معاك 😤
محمد ::::::: تعالي بلا جو فروغ ماتفسديش اللعبة ياعيل هيا
رهف ::::::: العب بروحك ونضت بنطلع من داره
محمد :::::: بنحطه في المربوعه وننادي الولاد نلعبوا مع بعض وخليك انتى وميس تترجوا فيا بعدين
رهف ::::::: من يلعب معاك اصلا واحد غشاش
محمد :::::: هههه تي كيف غشاش كان هم عاطينى قمبلة شن بندير بيها 😂😂 طبعا بنضربك تعالي غر تعالي نكلم عبدو لكن قايلة توا مايجيش تعالي نكملوا هيا يادراه
رهف ::::::: تخلينى نوصل وين ماكنت ونفوت وماتضربنيش من الخلف
محمد ::::::: وحق ربي الا لعب فروخ تعالي باهي

رهف ::::::: ضحكت 😂 بجد قداش كنت عيل وقتها طفيت الضي ورقدت

~~~~~~~~~~~~~~~~~~~~~~~~~~~~~~

#ثاني_يوم

أميرة ::::::: فتحت عيونها شافت ميس تضم في سريرها وتتصل
موسى :::::: صباح الخير
ميس :::::::😒 صباح النور ، لقيتك متصل بيا هلبا مرات البارح
موسى ::::::: الواحد لما يتصل اكثر من مره وماتدرديش ينشغل عليك
ميس ::::::: اها البارح روح خوي محمد
موسى :::::: الله ! هذا يلي قال بوك في ايطاليا ؟ الف الحمدلله على سلامتكم نوركم
ميس :::::: الله يسلمك ايه روح فجاء لهيت معاه وهكي
موسى ::::::: عندك الحق طبعا
ميس ::::::: المهم قلت نشوفك انى لاهيه توا بابا مداير عزومة الليلة على خاطره
موسى :::::: تمام ربي يعاونك اتصلي لما يكون عندك وقت لليوم ماهدرزناش هدرزه طويلة
ميس ::::::: ان شاءالله وصكرت
أميرة ::::::: يابنتى اعطي وجه للولد شويه، بعد 10 ايام تولي مرته بتقعدي بالجفاف هذا
ميس :::::: خلاص وانتى قلتها يصبر 10 ايام ماعندي خلوق توا للمجاملات
فوزية ::::::: فتحت الباب جايه بنوضكم هيا هيا بوك جاب البصل وطلع للجزار بيدبح غادي قال خير من الحوسة هنى
ميس ::::::: باهي نضنا هي جت عمتي كريمة ؟
فوزية ::::::: ايه هي وغزالة بدوا في البصل وتي فطور انتى وشدوا حاجه هيا وقت
ميس :::::: حاضر هي وتلفتت لاميرة خاطر عليا نمشي نرقد مع رهف😴
اميرة ::::::: ههههههه وله

~~~~~~~~~~~~~~~~~~~~~~~~~~

رهف :::::: فتحت عيوني لقيت الساعه 9:30 نضت
صليت الصبح وفتحت الدولاب بعدين تذكرت توا بندوش ونغير وهم بيبهدلونا في البصل والكوجينة 💔 🙂 صكرته ووقفت قدام المرآية جيت بنمشط شعري بعدين قلت ياااا هو اساسا. كيرلي ماينعرف ممشط والا لا طلعت لحوش عمي طول
ميس ::::::: صباح الخير غريبة نضتي
رهف ::::::: شوره وقت الجامعة خديت عالنوضه
أميرة :::::: هيا تعالي حطينا الفطور
رهف ::::::: متقولوش هذه بضاعة شن
فوزية :::::: بضاعة الطاجين ياسمحة توا تفطروا وتبدوا فيه
رهف :::::: تبصري 😒 خيره ماتاخدوش واتي
ميس :::::: قد ماكلمت مافيش حد بيديره في نفس اليوم لا ونبشرك بيديروا حتى عصبان
رهف ::::::😳 وهذا بيلحق لليل ؟
اميرة :::::: نلحقوا ان شاءالله
رهف ::::::: خشيت وراء ميس وكان تبطل تزمزيك هذه
ميس ::::::: ههههههه خلها توري في مواهبها
رهف ::::::: ناض ؟
ميس ::::::: اي طلع مع بوي يجيبوا باقي البضاعه
رهف ::::::: الله !
ميس :::::: ماهو من البارح قال
رهف :::::: تي لا قصدي محمد ؟
ميس :::::: اها نحسابك ماجد ، لالا محمد قاعد راقد ، كلمت شهد تجي تعاونه
رهف :::::: باهي كويس انى خل نبدا بالبطاطه

~~~~~~~~~~~~~~~~~~~~~~~~~~~~

محمد::::: فتحت عيوني الله محله الانسان لما يكون في حوشه وبين اهله وفي بلاده 💚 نسمع في الدوش وريحة الاكل اشكال الوان جايه شفت الساعه لقيتها 11 نضت صليت ومشيت للمطبخ
شهد :::::: مقابله الباب تقرض في الخضره 😳شافت محمد لابس تشرت نص كم ابيض وسروال توته رصاصي وشعره نازل على وجهه❤️
محمد :::::: خش ووخر سامحوني مانحساب معاكم حد
ميس ::::::: تعاله محمد ماحد براني هذه شهد بنت جيرانه
شهد :::::: حطت وشاحه حطان على راسها من غير لف وناضت مدت يدها
محمد :::::: اهلين من جيرانه ؟
رهف ::::::: سكنوا جديد من 3 سنين ونص في حوش عمي مصطفى
محمد ::::::: اها انستونا قبل بندير قهوة لكن شكلها الدنيا حايسه مافيها كيف
رهف :::::: واقفه نقلي توا نديرلك
محمد :::::: تلفت وجي طالع لالا عادي ماتعبيش روحك ورجعت لداري
شهد ::::::: ووووه عليا ووووه بنموت يقتل يهبل
ميس :::::: ههههههه
أميرة :::::: تحشمي شويه
شهد :::::: انى خل ننوض نديرله القهوة ونرفعله 🤤
رهف :::::: وديريله بالمره طرف بسبوسه معها
شهد :::::: ههههه لا نسحر ولاندير كتيبة سلم عينى السوده تجيبه
رهف ::::::: صبيت القهوة في مق وحطيت معها سندوتش وطلعت ، دقيت عالباب وخشيت
محمد :::::: نلعب بتلفوني وندخن دق الباب ، اها رهف طفيت الدخان وعدلت تقعميزتي
رهف :::::: القهوة ، درتلك سندوتش لانه الكوجينة حايسه
محمد ::::::: علاش متعبه روحك وخديت منها السفرا
رهف :::::: جيت بنطلع
محمد :::::: رهف وحياتك جيبيلي تلفون امي بنكلم عبدو شفره ماعنديش والنت معرفتش نعلقه
رهف ::::: النت الباسورد عند ماجد عالقهولي انى وميس لكن مانعرفاش طلعت تلفوني خود كلمه منى عندي رصيد
محمد ::::: قمت عيوني شفتلها عبدو شن يلي بنكلمه منك
رهف ::::::: جيت قعمزت جنبه عالسرير عنده رقمي وبديت ندور في الاسم
محمد ::::: اطورتوا بعدي
رهف :::::: ههههههه ولد جيرانه عادي مرات نستحقوا بيه واتصلت وعطيته
محمد ::::::🤨
عبدو ::::::: السلام عليكم رهف ؟
محمد ::::: دارت صوت بنت وعليكم السلام ياعبدو
رهف :::::: هههههه
عبدو ::::: 😳 انت انت ياكلب محمد
محمد :::::: وينك
عبدو ::::::: انت يلي وينك كيف صار هذا رقم رهف
محمد :::::: روحت البارح وين انت تعاله
عبدو ::::::: في المدينة هيا نص ساعه نكون عندك
محمد :::::: تمام انى في الحوش وجيت بنصكر
عبدو :::::: محمد والله ليك وحشه ياراجل
محمد ::::: ههههه صكرت التلفون طلعت شاشة القفل صورتها وبلا حجاب عطيتها التلفون
رهف ::::: استغرب وله
محمد ::::::: نضت وقفت في باب البلاكونه ايه
رهف :::::: نضت بنطلع
محمد :::::: وانى نشوف للبلاكونه يريح تلفونك ولا تحطيه في مكان الصوره يلي حاطها مش مكانها
رهف ::::::🙂 خل نمشي نبشر ميس روحلنا محمد وراحت ايام العز وطلعت
محمد :::::: خديت القهوة وطلعت للبلاكونه

~~~~~~~~~~~~~~~~~~~~~~~~~~~~

ماجد::::: وين كنتى ؟
رهف :::::: درت قهوة لمحمد
ماجد :::::: اها ، تعالي هنى
رهف :::::: ماجد اطلقني
ماجد :::::: حلفتلك مليون مره انى كنت عارفك انتى
رهف ::::::: وكيف عرفت ، لا وشن يقول حبيبتى خانتنى 😒 نفس الكذبه كلكم سحيقة
ماجد :::::: ههههه من يختبر فيا غيرك دايرتها الف مره بديت زابط
رهف ::::::: والف مره ماشيه عليك
ماجد ::::::: خلاص باهي المره الجايه طول نقولك عرفتك رهف باهي
رهف :::::: باهي 😊 حول
ماجد :::::: ترضينا خلاص ؟
رهف ::::::: ترضينا ، ومشيت كملت معاه جي بابا وخالتي سالمة وخواتي طبعا الاربعة متزوجات ومع الساعة 6 كملنا وبدوا الاقارب يوصلوا روحت دوشت لبست سروال جينز ازرق وبدي نص كم اسود جايني مزبوط دخلته في السروال ودرت شعري بالفير مع ميك اب خفيف ووليت تاني لحوش عمي
ميس ::::::: خشيت مع المغرب دوشت ولبست بدي ابيض وسروال ابيض طبعا حتى موسى واهله جايين ماحطيتش ميك اب لانه عرسي قريب وطلعت للحوسه حطينا العشي زحما وحوسه ودوشة وطلعنا لجنان الكوجينة نغسلوا في المعاين

~~~~~~~~~~~~~~~~~~~~~~~~~~~~

محمد ::::::: جي عبدو وولاد الشارع يلي نعرفهم وعمي وولاده وكل مره يخش حد وخوالي انسجمنا هدرزه وضحك نحكيلهم عالمواقف يلي صارت معاي شويه وكل مره يطلع حد يروح بعدها طلعت انى وعبدو ندخنوا

ميس ::::::: رن تلفوني رقم 🤨 من زعما الو
المتصل :::::…..///////////
ميس :::::::😳 بعد محادثه دامت نص ساعه 💔😨 وانى مصدومة صكرت الخط وبديت نبكي 😭😭😭😭
رهف :::::: جيت بننشر البخشات 😳 ميس خيرك
ميس :::::: معادش نبي العرس بطلت معادش نبي يارهف خلاص معادش نبي نتزوج 😭
رهف :::::😳

عبدو ::::::: شن صار بعد هالاربعة سنين شن تغير
محمد :::::: كل شي زي ماخليته 💔
عبدو ::::::: قلتلك انى لا 4 ولا عشرة
محمد :::::: قلبي زي ماهو صوت دقاته عالي يدي زي ماهي ترجف وتعرق ، وهي قاعده زي ماهي نفس العيون نفس النظره
عبدو ::::: لا بصراحة هي ولت احلا 😂🤭
محمد :::::::😒
عبدو :::::::: وتوا ؟ ماتقولش بتسافر تاني
محمد :::::: طالما انها هنى واشرت على قلبي ❤️ وين مانمشي بنرفعها معاي مافيش فايدة 💔 لكن يمكن مش قادر نمنع هذا اشرت على قلبي 💚 انه يدقلها 💔 ، ومش قادر نمنع هذا اشرت على رأسي 🧠انه يفكر فيها 💔 ، لكن قادر نمنع هضم واشرت على عيوني 👀انه يشفولها بطريقة غلط ، وقادر نمنع هضم وقامت يديه فوق 🙌🏻 انه يقربوا علها ، ومش ناسي ومش ح ننسى هضاكه اليوم واشرت على الزيتونه يلي قدام حوشنا في المكان هذا بالزبط
عبدو :::::: ي…😳
محمد :::::: تلفتت وراي شن شافت 😳 شن تدير هنى ؟

#يتبع

طبعا لانها الحلقة الاولى مافهاش هلبا احداث تعرفوا عالشخصيات وعلاقاتهم ببعض الرواية حلو فيها عدة قصص توا شن توقعكم السبب يلي خلا ميس تتراجع عالزواج ومن هي يلي يقصدها محمد
#رأيكم_يهمنى ماتبخلوش عليا بيه 😘

كلمات دليلية
رابط مختصر

عذراً التعليقات مغلقة

error: Content is protected !!