روايات كاملة
أخر الأخبار

قاتل اخي بقلم Hano Salem

جميع الحقوق محفوظة للكاتبة Hano Salem

#قاتل_اخي?
#الحلقة_الاولىنتعرفو ع الشخصيات من الرواية ..
اميرة م 97 متخرجه من كلية التربية كيمياء بوها محمد متوفي من هيا صغيرة وعندها اخ واحد اسمه وليد م 92 شخصيته قويه ومعروف ف منطقته ان كويس وصاحب كلمه امهم مبروكه كبرتهم وقعد وليد هوا متحمل المسؤولية خاطب بنت جيرانهم اميمة يحبها هلبا

اميرة حطت لغدي ويتغدو
وليد : قلتلك غدوا عيد ميلاد اميمة وماعرفتش شن ناخدلها هديه
اميرة : طلعني معاك تو ناخدلها اني
وليد : باهي لعشيه نطلعو
مبروكه : وليد شن رايك نحددو معاهم لعرس غدوا
وليد : باهي عادي ماعنديش مشكله
اميرة فرحت : واخيرا بنفرحو بيك
وليد : ان شاء الله وربي يفرحني بيك
اميمة عندها 2 خوات نعيم ونادر ونعيم صاحب وليد هلبا وامهم سعاد وبوهم فرج
رن وليد تليفونه لقاها اميمه خش لداره رد علها
اميمة : اهلين
وليد : اهلين بيك حبيبتي كيف حالك
اميمة : بخير الحمد الله وانت
وليد : الحمد الله
اميمة : في حاجه مميزة قريب ولا
وليد : لا شن في
اميمة زعلت : مافي شي
وليد : عادي فكريني بالك اني ناسي
اميمة : خلاص وليد مافي شي
وسكرت وهوا قعد يضحك علها

لعشيه
وليد : تطلعي معانا يام
مبروكه : لا فكني تعرفني مانحبش الطلوع
وليد : باهي براحتك
ع جية اميرة
اميرة: هي نمشو
وليد شافلها : شن يلي ع فمك هذا
اميرة : خيره فمي مافيه شي
وليد : امسحيه ترا ولا خلي نفوتها لمشيه
اميرة مسحاته : افف ديما اطلع فيا ووجهي زي اليمة
وليد : ماشاء الله عليك مش ناقصك شي بش تمكيجي
اميرة: باهي غر هيا
وطلعو
وليد شاف لحوش اميمة لقاها ف الروشن ابتسملها واشرلها بمعنى خشي
ومشو
وليد : اشريلها كل شي تحبه
اميرة : هيا تحب جو الورد والشكلاتات
وليد : تمام نديرلها بوكس فيه ورد وشكلاتات وانتي خوديلها لبسه كامله ع ذوقك
اميرة: شن فلوسك زايدات
وليد : خودي حتى انتي يلي يعجبك
نزلت اميرة هيا ووليد وخدت لبست كاملة لأميمه وهيا خدت شويه حاجات وخدي وليد البوكس وادهور باميره وروحو ولما وصلو لقو عركه ف الشارع
اميرة : حي كأن يضربو ف امجد
وامجد صاحب وليد راس
وليد : انزلي خشي للحوش
اميرة: ماتمشيلهمش بالله عليك
وليد باعصاب: نزلي لحاجات وخشي
نزلت اميرة لحاجات وخشت للحوش
اميرة : ماما في عركه ف الشارع يضربو ف امجد ومشالهم وليد
مبروكه : حي ع وليدي ربي يستر

وليد : خيركم شن في
امجد : وليد خليك بعيد والله لما نربيهم
الدولة شد امجد من رقبته
الدولة : شكله مايمشيش معاك لاسلوب
وشاف لشاب يلي معاه
الدوله : قيموه
بيرفعوه ووليد بدي يضرب فيه بقوته
الدوله دفه بالقوة : مش اني يلي يجي حد يمد ايده علياا
ورفعوه حتى هوا واميمة كانت تشوف من الروشن قعدت تعيط ونزلت تجري

رفعو وليد وامجد وسبب لعركه امجد ناش سيارتهم والدوله هذا معروف ف لمنطقه هوا وعصابته وماحد يعرف شكله ديما مغطي وجها ومايعرفوش حتى اسمه
ف السيارة من لتالي
امجد : علاش ادخلت انت بس
وليد : نشوفهم يضربو فيك ونسكت

اميمة اطق ع حوش مبروكه بالقوة فتحتلها اميرة
اميمة تبكي: رفعو وليد راه رفعوه
طلعت اميرة مالقت حد ف الشارع
اميرة تعيط : حي علياا ع وخيي حي
ع جية نعيم ونادر طول جي نعيم
نعيم : شن في
اميمة تبكي: في وحدين رفعو وليد وامجد
نعيم اول مره يشوف اميرة هكي
نعيم : خلاص خشو لداخل تو نديرو حل
خشت اميرة واميمه وشويه وجت سعاد
مبروكه تبكي : حليلي ع وليدي كان يديروله حاجه من ليا غيره
سعاد : استهدي بالله وان شاء الله خير
واميمة تتصل بوليد يطلع مقفل

نعيم ونادر اتصلو بصحابهم وماحد عرف وين رفعوهم

وصلوهم للمقر متعهم وحطوهم ف لحجرة وخدو منهم نقالاتهم
امجد : كله ع خاطر سياره ياراجل
وليد : انت عارفهم مجرمين علاش تتكلم معاهم
امجد : اني مش خايف ع روحي عادي ماعندي حد ننشغل عليه لكن انت يلي سند لامك واختك علاش جيت وادخلت بس
وليد دار ايده ع كتف امجد
وليد : يلي بيا بيك انت صاحبي من اني صغير وحنقعد معاك للموت

سعاد : نوضي نروحو بنيتي
اميمة تبكي : لا نبي نقعد مع اميرة
سعاد : باهي اقعدي اني خلي نشوف لعيله وغدوا نرجعلك وخيتي مبروكه
مبروكه : صحيتي وخيتي
وطلعت سعاد روحت لحوشها
اميره خشت لدارها تبكي بعبرتها وخشتلها اميمة
اميمة شافت البوكس فيه ورد وشكلاتات وحرفها
اميرة : هاذي هدية وليد لعيد ميلادك وجابلك لبسه وعلى اساس بنحددو لعرس
اميمة تبكي وشدت لبوكس
اميمة : وليد ياحبيبي نحسابك نسيت عيد ميلادي ياغالي وانت جايبلي هدية
اميرة تبكي: زعما شن صاير فيه توا وشن يدير
اميمة : ربي يرجعهولنا بسلامه يارب
ومبروكه قريب تموت ع ولدها

سعاد : ماسمعتو عليه شي
نعيم تنهد :لا
فرج : ربي يرجعه لامه ووخيته ع خير
نعيم : ان شاء الله

الدوله والشباب يلي معاه عذبوهم اشد لعذاب
وليد يتكلم بصعوبه : لو انك راجل راه تواجهني بروحك
الدولة : ضم فمك شكله قعد مأثرش فيك الضرب
وليد : لا تخوفني انت ولا عشره من امثالك
وضربه برجله
الدولة طلع لمسدس من جيبه وفرغه ف وليد
امجد يعيط : لاااا لاااا حررام علييك وليد ياخوي ماتموتش
وطاح ع وليد قعد يبكي
الدولة ضربه رصاصه ف راسه وطلع

الدولة : حطوهم ف السياره من لتالي
سفيان : تم
سفيان هذا ديما معاه
مع اذان الفجر
الدولة قعد يسأل ع حياشهم ونعتوه الجيران
حطو امجد ف حوشه وخلو عيلته تعيط والدنيا مقلوبه

مبروكه واميمه خداهم النوم راقدات واميره ف الصاله تصلي ف لفجر سمعت لباب يطق فتحاته
لقت شخص طويل وعريض وملتم وجها خافت قريب ماتت قعد يشوفلها عجباته
اميرة : ااا تفضل
الدولة : عندنا امانة ليكم لازم نعطوهالكم
واشر لسفيان
سفيان وواحد تاني شاديين وليد وحطوه قدام اميرة
اميرة : لااا لااا وليد وخيي
ودفت الدولة
اميرة : ياتااافه حسبي الله ونعم الوكيل فييك
شافلها ومشي
اميرة طاحت ع ركابها بدت تعيط وشاده وليد تبوس عليه
اميرة : بالله عليك ماتخلينيش بروحي ساد خلانا بابا نوض يا وليد نووض
مبروكه واميمه يعيطو
اميمه شدت وليد
اميمه : لااا حبيبي لاا انت وعدتني ماتخلينيش صح ومايخدنيش حد غيرك كييف توا تخلييني
مبروكه تعيط : ووووه علياا على وليدي ووه على كبدي يلي نحرقت ياحليلي ياربي
وتخبط ع وجها
اميرة تعيط هيا واميمه وشادين وليد
طلعو الجيران
نعيم لما شاف وليد هكي قريب مات
نعيم يجبد ف وليد
اميرة تبكي: خلييه
نعيم : خلاص يا اميرة خشو لداخل
اميرة : تي شن تقوول انت هذا خوي
سعاد شدتت مبروكه ودخلتها بسيف
والشباب جو قامو وليد
اميمه حضنت خوها نادر وتبكي بعبرتها واميره قعدت ادف فيهم ماتبيهمش يرفعوه
نعيم شدها بقوه ورفعها
اميره شافتله : قتلوووه قتلوو خوي وحرقولي قلبي يانعيم صاحبك مات
نعيم عيونه دمعو ودخلها لحوشهم
والتمو الجيران وكلهم يبكو وجعهم وليد وسمعو بأمجد قريب ماتو عليه
اميره تخبط وتعيط
سعاد : حرام يلي اديري فيه يابنيتي
اميره : خلاص معاااش قادره مش قادره نصبرر

عند الشباب ف لعيادة يبكو عليه
نعيم : ماتوقعتش يصير هكي
نادر : الله يرحمه ويغفرله
نعيم فتح محضر بش يعرفو من لقاتل
وليله صعبه مرت عليهم واميمه تتفرج ع تليفونها وتتصل برقمه
اميمه ضبح عندها الرقم
اميمه تبكي: اميره رقمه يضبح لغالي
اميره خدت منها التليفون
الدوله : من معاي خطيبه وليد
وليد مسجلها خطيبتي
اميره تعيط : اني اخته ياحيوان ربي ينتقم منك والله لما نقتلك
الدوله يضحك : هدي روحك ياحلوة ولبقيه ف حياتكم
وسكر علها قعدت تعاود طلعلها مقفل
بدت تعيط وتبكي
جي الصبح

نبي رايكم ف لحلقة ولو في تفاعل حنكمل وحتكون حلقات اطول?

#الكااتبةة
Hano salem

تقييم المستخدمون: 5 ( 1 أصوات)

1 2 3 4 5 6 7 8 9 10الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock