أشعار وخواطر

قصيدة على فكرة بقلم أمل منشاوى

قصيدة على فكرة بقلم أمل منشاوى

على فكرة
**************
على فكرة ..
أنا اللي كنت باكتب بالحنين دايما
حروف اسمك … ومش ناكرة
أنا الحلم اللي كنت بتحلمه معايا
ولما نفوق تقولي احكيلي عن حلمك
أخبي كسوفي في عيوني وأقولك أصلي مش فاكرة
أنا اللي كنت باستنى يعدي اليوم عشان اشوفك
ولو ما اتكحلت عيني بطلة وجهك البسام
أصبر قلبي وأقوله ….هشوفه أكيد …أكيد بكره
أنا اللي رسمت بالألوان نهار باسم
وحلم جميل بترقص خطوته بخفة
وما اهتمتش لو مرفوضة م العالم
مانا أصلي بحب بجد ولا مكسوفة ولا خايفة
أنا البدر اللي نور لك ظلام ليلك وعمره ما خان
انا الوردة اللي دبلانة من الفرقة على السيقان
أنا الغنوة اللي غنيتها في ليلة عيد بلا ألحان
أنا اللي قريتلك الفنجان
في يوم شمسه كانت زعلانة مجروحة ..وحالفه انها ما تبان
ووشوشت الودع ع البحر وكان بحري بلا شطآن
أنا اللي سألت يوم عنك نجوم الليل
وغنيتك في اشعاري وفي المواويل
وخبيت عن عيون الكل أحزاني
وكنت أضحك على الفاضي وقلبي عليل
أنا اللي قلبي كان ساحة لحرب ما بانلهاش قائد
ورغم سهامك الجارجة لكني صابرة وبعاند
وتنهيدتي تزلزل قلبي في ضلوعي ولا بيهدا ولا يهاود
ولما الومه او اعاتبه يقولي خلاص انا هقسى
وبكرة انسى … وييجي بكرة ويعاود
انا السُنّة اللي ما بتزعلش لو فاتتك
انا الضحكة اللي راسمة رغم هم الكون حدود قلبك
انا جنونك … أنا ظنونك …أنا مرايتك
انا الماضي وانا الحااضر .. وبيا بتبتدي حكايتك
أنا القِبلة اللي بتوجه لها قلبك في طول ليلك
أنا خضوعك .. أنا خشوعك وترتيلك
أنا التوهة ما بين الأهل والأصحاب ..
أنا دليلك
أنا الدمعة اللي هجرت حضن أجفاني
وتاهت وسط أحزاني …
وسكنت قلب منديلك
********
بقلمي/أمل منشاوي

تقييم المستخدمون: 5 ( 1 أصوات)

الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock