روايات كاملة

قضية انتحار دامية للكاتبة سارة المجيد

جميع الحقوق محفوظة للكاتبة

قضية انتحار دامية للكاتبة سارة المجيد

#قضية_انتحار_دامية

#بارت1

#بقلمي_سارة_المجيد

اسعد الله مساءكم بكل خير احبتي

نحن نعيش في دنيا تملؤها القصص والحكايات .. بعضها فرح والكثير منها محزن ..لكل منا قصة يخبئها بين اضلعه ..يرددها بينه وبين خافقيه ..والقليل منا من يستطيع البوح بها ..قصتنا اليوم ..تدور حول عالم مخفي عن الكثير منا ..عالم يملؤه الخبث والسوء ..عالم تباح فيه المحرمات ….قصتنه هذه المره تتكلم عن قساوة الاهل وظلم الاستبداد والتسلط قصة توأمتان واخت ثالثه تولد منبوذه … يولدن بين أم قاسية القلب وأب ميت القلب انجمعوا في بيت يسوده العنف الاسري تحدث معهم احداث داميه وامور لايستوعبها العقل البشري

ف خَلف كُل باباً قصَة ..
وَ خلفَ كل قصه قلوبا مُختلفَة ..منها من تنبضُ بِالحُب ..بِـالحنينْ ..بالألمْ بالوجع .. بِـالفقدْ ..
ومنها من تنبض بما لا يُحكَى ..وِبين هِذه وتِلك ..تبقى القصة أيام نِعيشها ..

……………………….

دكتورة رنيم …كعدت ساعة ٨ الصبح جنت تعبانه كلش من بعد جلسة البارحة رجعت من العيادة من اخر جلسه لمريض نفسي كمت حضرت الحمام رحت للصالة

شغلت ميوزك وخليت الجاي ع النار طبيت سبحت وطلعت وصبيت الجاي بفنجان ووكفت يم الشباك مال شقتي

جان شباك الشقه يطل على احلى منظر بالندن الجو هادء واوراق الاشجار الخريفيه متساقطه ع ارصفة الشارع تحس انك امام لوحة فنية رسمتها الطبيعة الخلابة ..

استنشقت الهوه وغمضت عيني واني اتسنط ع اصوات هديل الحمام وزقزقة العصافير مثل انغام سنفونية لموسيقار عالمي …الله شكد حلووو .. ربنه شخالق من جمال الطبيعة

اخذت اول رشفة جاي رن الهاتف غلست كلت انطي صامت شلته شفت آمر الفوج يتصل تعجبت هاي شذكره بينا مرت سنين وهوه ولا يتصل ولايكول اسال ..

مارديت كلت خلي احرك اعصابه بعدين فكرت وكلت اذا مانطيته رفض راح يفكر انو ماسمعته فماراح يحترك

شو خل ارفضه رفضته رجع اتصل ورفضته وضل يتصل واني ارفض الا ان كملت الجاي

كمت جبت روايتي وتمددت ع جربايتي وكعدت اقرا اجاني مسج (( رنيم اترجاج ردي مسألة حياة او موت ابوس ايدج ردي ))

استغربت آمر الفوج يتوسل امممممم الله يستر الضاهر الشغله كبيره والله خابرته

نعم حضرة الآمر شلونك وين هالغيبه عاش من سمع صوتك بس بالازمات تذكرني

عثمان …صاح بنبره رعب هزت كيان رنيم صرخ بصوت عالي …رنيم اسكتي رحمة لربج شياطيني تطافر من عندي ولج ما اعرف شسوي والله راح تموت من بين ايدي والله احس نفسي لاول مره بحياتي عاجز

تعالي فدوه والله ماضل دكتور لو دكتوره ما وديتها علي والله عجزت ماريدها تموت اريد شويه تتمسك بالحياة

تعالي الله يخليج تكتج وسفرتج وتكاليفها واقامتج كلها عليه بس تعالي واي ضرر مادي اني اعوضج بس تعالي

رنيم بأستغراب ….هوووب هوووووب دقيقه فهمني غير تكولي شكو شصاير والله رعبتني دحجي ياعيني منو هاي الي راح تموت مو خوفتني اهدء اول شي واحجيلي

عثمان …ماتنحجي ع التلفون تعالي امانة الله تعالي ماريدها تموت اموت وراها وربي

حاولت اخليها تتعلق بالحياة البنت صايره جثه ماتحجي ماعدها اي نشاط ولج والله راح اتخبل الي صار مينحجه لازم اشوفج

رنيم بقلق ورعب من نبرة كلام عثمان كالت …اوك عثمان باجر اول طياره اني يمك انتظرني بالمطار

عثمان … ما اتحمل لباجر هسه احجزي اذا اكو طياره الله يخليج اخاف ماتلحكين وتجين تلكيها ميته

رنيم انتفضت من مكانها وخلت الرواية ع الطاوله وهيه تتمشى للغرفة حتى اتحظر جنطتها كلتله …عثمان اهدء يجرالك الي تريده هسه اخابر صديقتي شانا واشوف اذا اكو طيارات تطلع وارجع اخابرك تمام

((طبعا شانا صديقتي عراقيه مسيحيه ))

عثمان …اي يلا بسرعه انتظرج باي

رنيم …الله وياك
طلعت رقم صديقتي وخابرت هلو شانا شلونج

شانا ….هلا رورو والله زمان مشتاقين يابذاته لاحس لاخبر

رنيم …شانا الوضع مو مال عتاب حبي اقرب طياره للعراق سجلي اسمي بيها واريد حجز عليها

شانا ….اوووف اوكفي شصاير شهالتغير مو على اساس ماترجعين لو يسجلون العراق باسمج

رنيم …شانا الله يخليج داكولج الامر مستعجل مو وقت الشرح اكو لو لا

شانا ..لحظة اشوفلج

رنيم …انتظرج لاتسدين بسرعه

شانا ….حاضر
الوو حضرة الكابتن …امممم ماشي ..الوو رنيم بعدج ع الخط

رنيم ..اي اي كولي

شانا …شوفي للعراق من لندن ماكو بس اكو من لندن لتركيا ومن تركيا بعد ساعتين من هبوط لندن اكو طياره للعراق تريدين ابهذلج واحجزلج بهاي الرحلة ؟

رنيم ..اي احجزي فورا

شانا …درجه اولى ثانيه ماكو بس بالثالثه اكو

رنيم ..حتى لو بالامتعه احجزي

شانا ….بس كولي شصاير حتى هيج داكه ع الروحه ترا صرعتيني

رنيم …بعدين شانا بعدين ..هسه كوليلي ساعه شكد طيارتي لتركيا

شانا ….بعد ٣ساعات

رنيم …يادوب الحك الم ملابسي واوصل المطار الازدحمات راح تجلطني عن قريب باي

فتحت الكنتور ع السريع طلعت جنطتي اخذت جنطه صغيره كلت حتى لا اتبهذل بالشيل والحط والتفتيش ومن اوصل اذا اكو نقص اشتري مناك

بدلت واخذت جنطتي قفلت الشقه واخذت مفتاحها لان الشقه باسمي ونزلت ركبت سيارتي وطلعت بوجهي للمطار طبكت السيارة بالكراج مال المطار وركض ركض كملت التفتيش وصلت للتكت

شانا محضره كلشي ودعتها وطلعت بالطياره اول مره احجز بالدرجه الثالثه انا اله درجه اولى او اذا ماكو درجه ثانيه

بس مو وقت هالحجي اريد اعرف عثمان شبي ومنو هالبنت الي جننته شكو

لكيت مقعدي كعدت ربطت الحزام وكل هالافكار تدور براسي عثمان مو من عادته يتوسل وصوته من حجا ويايه يرجف وخايف شبي يربي عفته ذاك السبع القاسي شغيره ..

ومنو الي راح تموت وليش شبيها حتى واصله لهل مرحلة من اليأس وشنو تقربله لعثمان حتى هيج مستقتل عليها …

زين اعرف العراق بي دكاتره نفسيين زينين ليش الا اني

اكو شي صاير وخطير جدا ولازم اعرفه شنو

بقت هل افكار تتلاطم براسي …اووووف شوكت اوصل اريد اعرف السالفه شنو والله مكدرت انام طولت الرحله خمس ساعات واني كلبي محترك ومتوتره شنو راح يصير معرف

وصلت لتركيا بعد خمس ساعات طيران وصلت المطار لكيت شخص اسمه بوراك ينتظرني رافع لافته باسمي سلمت علي بالانكلش طبعا مايعرف عربي واني ما اعرف تركي

بوراك ..اهلا دكتورة شانا حجزت تكت الج وتفضلي ويايا ادليج ع طيارتج ..

رنيم ..والله مشيت ورا الى ان وصلت بوابه الي راح تقلع منها طيارتي

بوراك ..بعد ساعتين راح تطير انتبهي ع النداء

رنيم ..تشكرت منه كثير تعبتك ويايا

بوراك ..لا دكتوره ادللي اني بالخدمه

رنيم ..خادم ربك استاذ بوراك شكد فرحت عندي هيج صديقه تسهل اموري اذا وصلت للعراق اخذلها هديه مرتبه البنت تعبت ويايا

والله بعد ساعتين صار موعد الطياره وذاعو على المسافرين الرحله رقم( ….)يتوجهون الى …..وطلعت بالطياره ..

طولت الرحله ساعتين تعبت متت اريد انام بس موضوع عثمان شاغل كل فكري ..

وصلت لمطار بغداد كملت اجراءات التفتيش وكل هاي الامور ..

طلعت ادور على عثمان خابرته كالي اني بالمكان الفلاني خارج المطار اطلعي سياره همر لونها اسود واضحه رقمها كذا ……

طلعت شفت السياره رفعت ايدي اشرتله هوه طلع وجا ركض لابس بدلته العسكريه وجسمه المعضل وطوله الهيبه وشكله تعبان مامعتني بنفسه …

هاي شكو شصاااير هذا الكيكه شصاير بي شكله كلش تعبان نزل جا اخذ جنطتي وسلم عليه هلوو رنيم شلونج

بخير عثمان شصاير بحالك احجي كول

عثمان …امشي نصعد بالسيارة حتى احجيلج كوولشي .)))

(هذا كان مشهد راح اتشوفوا بمرور احداث القصة )

هسه خلونه نرجع بالزمن سنة السبعينات والثمانينات تحديدا

وتين … مرحباً اكتُب هذا الكلام وانا أتألم وقلبي يتألم وروحي تحترق بالكاد استطيع التنفس لا اعلم الى أي مدى يمكنني التحمل لكنني أدرك أني أغرق في تعب لا نجاة منه تعب يرهقني جداً يأست من ارتجاء الشفاء لا استطيع العبور فقط استطيع الحزن وأضاعت الايام لقد نفذت دموع عيني فــ بدأت الاوجاع تتأكلني شيئاً فشيئ اصبحت بائسه ووحيده لا اعلم ماذا افعل

اول شي اعرفكم عن نفسي اني اسمي وتين مواليد ١٩٩٦ من حديثه بس ساكنه بغداد ف تشوفون لهجتي مايله لبغدادية اكثر

اخواتي التوأم اسمائهن سابين وايلين مواليد ٩٤

هسه خلي ارجع بيكم شويه لورا لزمن جدي واحجيلكم ع بابا وماما وبيت جدي اهل بابا وماما حتى يتضح كلشي كدامكم عن حياتنه الماضية
خلي نبدي باهل بابا اول شي اعرفك ع جدي ابو بابا اسمه ناظم وعنده ٣ اخوه عماد وعناد وجهاد

وعنده اخت وحده تأذت بالولاده وصار ضهرها محدوب بسبب الخلع الي تعرضت اله لان ولدت بالمقلوب

يعني جيبوها اول شي طلعت رجلها بعدين راسها واثناء السحب تاذت ودورها كلش شريف المره الله يرحمها تصير عمة بابا اسمها نواره ..

المهم جدي جان كلش ذكي وحذق والله يستر من عقلو قااااااسي بكل ما للكلمه من معنى

اخوانه عماد حنون حنية الدنيا كلها بي اصغر من جدي ب سنتين وعناد دخيلو ما اله بالدنيا شي ياكل مايحجي واذا تاخذون اكله هم يكوللكم بالعافيه

وجهاد دخيل الله خبل علني مجنون اعصاب قاسي موصاحي الله وكيلكم ..

جدو جان غني كلش والسبب بهذا الغنى عقله الاسرائيلي وجدي من عشيره معروفه كلش بس شلون جمع ثروته هسه احجيلكم

جدي جان يشتغل بالنفط والتجاره والادويه والمصانع مال التعليب وعنده املاك واراضي اااووووووه ماتاكلها النيران جان كل مايدخل بمشروع ويسوي يسجله باسم احد من اخوته او اخته او ولد عمه ..

بس تبقى الاملاك مالته وقبل لايسجله باسمهم يخليهم يبصمون ويوقعون على تنازل عن هاي الاملاك

حتى اذا فكروا يلعبون على جدي ويكولوله هذا مالنا يطلعلم تنازلهم مو اكوللكم مصيبه جدي ..
فجانت كلها تعود اله بالاخير

المهم جمع وجمع وصار غني كلش وبيوم جان يمشي وشاف بيبيتي جانت تمشي ويه امها رايحه لبيت عمتها وبيبيتي مواصفاتها

بيضه قصيره مو كلش طويله وعيونها خضر وشعرها اسود ليل وعيونها كلش كبار والرموش ثخان عبالك مسكرتهم والشفه صغيره ومنفوخه

اهل قبل ميخلون مكياج بس شلون خدود ورديه عدها تجنن اغار منها جثير ههههه ..

شافها جدي تخبل عليها وراح دك بابهم ولان جدي من عشيره معروفه بالانبار مردوا ويعرفونه نطوا الموافقه …

بيبيتي جانت خايفه لان معروفه القسوه الي موجوده بجدي وهذا الشي مو سر كل العالم تعرفه وهيه مجانت موافقه

بس لان حالت اهلها مو كلش ميسوره زوجوها عسا ولعل تتحسن حالتهم لان جدو عرض على ابوها قطع اراضي يكون مسؤول عنها اذا زوجه بنته مثل الصفقه يعني ..

وافقوا اهل بيبيتي
جدي رجع للبيت طبعا هو خطب لنفسه لان جان يتيم ام واب ودز اخته ونسوان اخوانه وراحو حجو ويه اهل بيبي
الكل جان موافق وبيبي شافتها اخت جدو جانت خايفه وترجف صاحتلها وكالتلها تعالي يمي

بيبي عنود جت كعدت يمها اخت جدي نواره كلتلها ليش خايفه اذا مغصوبه كولي احنا مانريد غصب

بيبي خايفه بنفس الوقت تريد تساعد ابوها كالتلها …لا مو مغصوبه بس سمعت بي عصبي وقاسي

نواره ..العصبي والقاسي برا بس بالبيت يصير طفل يم مرته انتي فاهمه و واعيه وتعرفين تجيبين رجلج يمج وتخلي طفل تلعبين علي ولا كلشي تسمعي تصدكي ترا حقا الرجال برا البيت شكل وجوا البيت شكل وهذا الي الكل تعرفه يعني هسه ابوج يعامل امج برا وجوا البيت نفس الشي !؟

ردت عليها بيبي ..لا طبعا

نواره ..شفتي مو كل اصابعج سوى بهل اثناء وصل جدي

(انطيكم مواصفاته جدو ضخم معروفين عشيرتنه بضخامه رجالها لان ناس تاخذ من ناس وهلشي توارث عدهم واسمر وعيونه سود وطويل وضخم هول يخوف شعره تمري هيبه تخوف محد يسترجي ينعجب بي لان قاسي والي تنعجب بي يبوووو حكمت على نفسها اعدام )

جدي ناظم ….صار المغرب محد رجع منهم صدك جذب وين صاروا والله دنعل ابوكم لابو الدزكم اني كتلكم روحوا فاتحوا نسوانهم ماكلت فلسوهم ع التمن قابل شنو وليش تاخروا مايدرون ميصير يتاخرون هالكد والدنيا غربت ..

شو خل اروح اهججهم برزاله اغسلهم غسل رحت وصلت لبيت الجماعه ابوها واخوانها كاعدين برا شافوني رحبوا بيه ..

وتعال شيخ ناظم واني موشيخ ليش يسموني شيخ ماعرف تفضل اكعد اشرب جاي كعدت شربت جاي كتله حريمنا جو يمكم وتاخروا جيت اشوفهم وارجعهم ..

كال اي تدلل همه جوا هسه اناديلهم صيح طلعت بنته الصغيره كاللها صيحي الجماعه كوليلهم شيخ ناظم جا يرجعكم ..والله الجماعه على كد حالهم لهذا مستحي يعزمني ع العشا واني عاذرهم ..

طلعوا رجعتهم وشفتها البنت قبل لا اطلع جانت اختي ساحبتها تريد تودعها واعرف بيها تريدني اشوفها عبالها غبي مشايفها والله رفعت راسها شافتني شو هاي كبل ختلت ورا امها شنو شافت جني ..

المهم طلعو ودك رزايل بالطريق وماخليت عليهم من المسبه ليش تاخرتم شعدكم تخطبوها لا جاي تزفوها ها ردت مرت عماد اخويه بشقاوه والله ياشيخ البنت خايفه وتكول قاسي وعصبي ماريده انته غير تشوفها الوجه الزين وتاخذها بعدين شوفها وجهك القاسي ..

عكدت حاجبي وكتلها شوفي يامرت اخوي لوما انتي مرت عماد الا ادفنج بكاعج من شوكت تشاقين وياي ها منو كالج اني اقبل وماخذتها ضحكه شطولها بالشارع عييييب صمي حلكج لا اكسر فكج (حجيتها بصياح)

والله سكتتها وسالت اختي نواره ها ينويره صح الكالته مرت اخوج

نواره …لا ناظم مو لهل درجه (طبعا نواره متكوله شيخ)
البنت سامعه انك قاسي وعصبي واني كتلها الرجال برا البيت شكل وداخل البيت شكل هيه اطمنت وسألتها اذا مجبوره ع الزواج هذا عمر لايوم ولايومين ..

جدي ناظم …اني فتحت عيوني وقربت وجهي على نواره اي وشكالت مجبوره احجي شبيج

نواره …اباوع علي هذا شصارله يبوووووو ولهان ومايدري كتله كالت لا مامجبوره وخجلانه البنت

جدي ناظم …لعد ليش من شافتني جنها شافت جني وختلت ورا امها

نواره …غير انته ماشفت وجهك يناظم جنت تكول كاتلين اهلك العصبيه تطافر منك لان تاخرنه شويه

طبعا خافت منك اي اني خفت وكلت لنسوان اخوتي كتلنا راح يصير جماعي

جدي ناظم ضحك بقوة وكال .. والله كتلكم جان راح يصير جماعي لو ماجانت موافقه بس بما انو هيه موافقه هاي بيها حلوان

نواره ..رجعنا للبيت وبدينا بالتجهيز اووووووف البيت قصر مو بيت يهلك

وتين …احجيلكم شوي عن بيت جدي الي بنا بتعبه طابوكه طابوكه

جدي بنا بيت من اربع طوابق يعني فيلا تخوف من كبرها وفصالها ملكي اول طابق جان يستقبل بي العالم والكل تكعد بي وينزل هوه وخوانه ياكلون يجتمعون وقت النوم كلمن يطلع لغرفته موجود باول طابق مطبخ كبييييير

ضخم مأثث من كلشي حديث بوقتهم يعني الاكل بالمطبخ ياكلون واكو ديوان كبييييير اثاثه ملكي يجنن هذا للزلم التجي …

واكو استقبال للنسوان هم يخبل فد شي واربع غرف نوم اثنين منهم وحده لنواره وحد لجهاد ممزوجين ..

واثنين منهم للخطار اليجون مفروشه جرابي وكنتور وداخل الغرف سويتات حمام وتواليت تكرمون وهول كبير هم بي تخم بسيط بس حلو

والطابق الثاني نفس خريطه الاول عايش بي عماد ومرته بغرفه الي هيه نفس مساحه الديوان الجوا و وابنه الكبير بالغرفه الي نفس الاستقبال الجوا وبنته بغرفه وحدها …

وباقي الغرف فارغه ومقفله والطابق الثالث لعناد وزوجته واولاده والرابع لجدو ناظم لان جان وهواس نظافه ميحب احد يطلع ويفوت ع طابقه اختار اخر طابق حتى محد يطلع علي ..

غرفة نومه كانت كلش حلوه فماقبل يشتري غرفه نوم وملابس عنده راد الزواج يصير ع السريع

بس راحوا اشتروا ذهب واغراض لبيبي ودز بيد نواره مبلغ لبيبي لانو هاي عاداتنا هيه تجهز نفسها وشنو تحتاج وهم مبلغ لاهلها علمود الاكل والمعازيم ..)

نواره …كملنا البيت كله اني ونسوان اخوتي تنظيف ومسح تلميع الا نكسر ظهري نعلبو الزواجات واني ممحصله شي محدوبه ومحد مكلبني ..

المهم كمنا بدلنا ولبسنا رحنا مشيه لبيت العروس مجان اكو كبل سيارات وزفه بالك بالك جنا نفس باب الحاره بس ماكو سيوف بالموضوع ههههه

فتنا شفناها جانت كاعده وترجف من الخوف والله يابه حقها ادري ابوها خبل ينطيها لناظم والله ماينجرع وياخوفي تنظلم ويا

بيبي عنود …انخبص البيت بالتجهيز وهذا نقص وجيب هذا و ودي هذا ويبوووو كل ميقرب موعد الجنازه اقصد الزواج ارتعب اكثر

ضل بس اليوم ابيت اهلي لازم اودعهم واشبع منهم محد يعرف شكاتبلي ربي جنت ضايجه ومقهوره مو هذا الزواج الجنت احلم بي بس الحمدلله اهلي المهم تتحسن حالتهم …

تعشيت وياهم وبوستهم وكالتلي امي يما عنود يلا صعدي نامي باجر خطرتج (يعني زفتج) طلعت تمددت اريد انام يربي شو مااكدر ضليت كاعده الا ان اذن الفجر مانمت ساعتين كعدوني كومي غسل وتبخير وحف ولبخ

وتين ..جان مكياج قبل بسيط كله بودره وكحل وحمره وبس جذلو شعرها ولفو الجذيله ((يعني كعكه بالجذيله سوولها جان موديله وقتها ))
الزفه جانت ب ١٠الصبح ماعرف ليش مستعجل جدي هالكد شيريد

عنود ..سمعت صوت هوستهم بعيد وكل شويه يصير قريب جمد الدم بعروكي وخلص كله انتهى راح اتزوج واني حسبه توديني وحسبه تجيبني فصلت عن العالم كله ما احس غير ايدين كبيره ضخمه رفعت حنجي لفوك وشفته بلعت ريكي من الرعبه الي صابتني

ياريت مشفت هالشوفه جانت ملامح وجهه ماعليها ملامح زواج كلها رعب يبوووو يربي شسويت بحياتي اني والله اصوم واصلي ليش هيج ربي ليش وهسه وقت تضحيات رحت بيها

جدو ناظم ….فتنا للصاله مالتهم صغيره كلش النسوان لبسو الشيلات مالتهم غطو وجوههم شو هاي واكفه متبسمره بمكانها وعيونها بالكاع شكلها مو يمنه عرفتها صافنه وما حاسه على وجودي ..

تقربت الها ورفعت باصبع ايدي حنجها وخليتها تشوفني شو نكلبت ملامح وجها للاسوء عرفتها خايفه وهسه تكول بكلبه يبوووو تورطت على عمري ضحكت بداخلي ع ملامحها حقها اذا اني خازرها وشرار يطفر وجهي ردتها تخاف مني اول ماتشوفني ماعرف ليش ..

لفيت العبايه على جتفها اشو هالبنت كامت ترجف والدني تموز شجاها لزمت ايدها وطلعنا واهلها واهلي يهوسون ويهلهلون ..

وصلنا للبيت عاداتنا ماكو دك ركص قبل بس نجيب العروس من بيت اهلها تطلع لغرفتها وبس خلص مو مثل اعراس هسه هوسه وناس تكتل ناس بالركص
والله باركولها نسوان اخوتي واختي هم لبستها الذهب الي جابته الها هديه ..

عدنا ام العريس تجيب ذهب لكنتها والعريس هم يجيب ذهب لمرته بما انو ماعندي ام اختي اخذت هالدور وهالشي يمكن بس بعشيرتنا ..

وجا الشيخ عقد وكمل واختها جانت وياها وقبل بعاداتنا يعقد للبنت ببيت الزوج ويجون من اهلها يشوفون اذا صار العقد او لا ..

اختها شافت العقد باركت الها وراحت لبستها الذهب وكل ما اريد البسها شغله البنت تجفل كتلها يابا ترا مو وحش كدامج شبيج كل ماالمسج تجفلين واني اتعمد المسها لمسات جريئه ..

عنود ..من فتت للبيت يبووووو شكد جبير هذا قصر مو بيت والاثاث شنو من عز عدهم ماخذ مالية العراق كله هالشيخ فتت لصاله كلش كبيييره كعدت وجت كعدت اختي يمي فات الشيخ عقد واني صفريت دم ماضل بيه ..

شو هاي ترخصت منهم دتطلع متت غير اموتج تروحين همست الي كالت لعد يالعنود تريدين انام يمج يلا تشجعي زوجج مو وحش هذا اني ما سمعت كلمه مو بس سمعت كلمه وحش خرب حتى انتي مخوفتني منه ..

راحت واني احس انقبض على كلبي اجا يلبسني الذهب ويتعمد يتلمس المكان بيده قبل لايلبسني اني اجفل من لمساته خايفه منه

ناظم …شبيج تجفلين مو وحش كدامج

عنود … اني دمعت عيوني كمت ابجي واشهك بالبجي شو هذا مسك ايدي وطلعني فوك وطول مااني اصعد ابجي وصلت لطابق ورفع راسي كال

ناظم ..كافي بجي يامره شسمج

عنود ..هلا هلا متزوجني ومايعرف اسمي
كتله عنود واني دموعي تصب

ناظم ..اي عنود ..ليش تبجين شنو شكلت زعلج هسه اني دزيتهم وكتلهم سالوها اذا مجبوره اني جبرتج على شي كولي

عنود ..مسحت دموعي وجاوبته ب لا

ناظم ..لعد يابويه ليش تبجين

عنود ..سكتت رجع عاد كلامه اني مجاوبت وهذا يعتبر قله احترام هو صيح بوجهي كمزت

ناظم .. مو دا احجي ويااااج لو ويه نفسي دجاوبي

عنود وهيه ترجف ….هسه احجيلك وتضربني شو هذا جرها بضحكه طووووويله

ناظم ..ههههههههههه ما اضربج اني ما امد ايدي على بنت جاوبي

عنود ..خايفه منك هذا عكد حواجبه وخنزر بكلبي لامبين متضرب بنت اني شكلي اول بنت راح تضربها راح فات للحمام غسل وجها وجا انا بعدني واكفه بمكاني تقرب مني اني ارجع لورا زاد سرعته لزم ايدي جرني اله وشالني ع التخت(( رفضت بيبي تحجي التفاصيل لان استحت ههههههه )) وصرت مرته حلاله

وتين ..وهسه نجي نشوف بيبي شنو صار عدها من جدي ناظم

عمار الكبير الي اتزوج زواج تقليدي يعني جدي وجديتي موافقين علي …زوجته اسمها زبيدة ..وصار عنده حامد وغسق وتوأم عهود و ورود

ماجد الثاني اصغر من عمار بسنتين زواجه تقليدي زوجته اسمها دلال وهم صار عندهم اربع بنات ولدين

وطارق الي هوه بابا طبعا عصا امر جدي وبيبي وتزوج عن حب ولحكه غضب بيبي وجدو ونفوا من العائله واتبروا منه صار عنده ٣ بنات التوائم سابين وايلين وبعد سنتين اجيت اني وتين

بعدين اخر العنقود عمي علي والي تزوج برضا امه وابو وصار عنده احمد الجبير وفرقد وهاجر واسم زوجته هناء

هسه راح اوصف كل شخص ساهم وكان اله دور بالقصه المهمين راح اركز عليهم والسطحيين بس ذكر اسماء يضهر دورهم بالمصيبه الي تصيبنه

عمار الجبير الي مسوي نفسه شيخ ومرته شيخه محد نصبهم طبعا وهاي مرته حيه شعلت المشكله كلها شعل نجيها بعدين
عنده ابنه حامد الي دخل بهاي المشكله

مواصفات حامد سمين وطويل ماعنده اي مضاهر جماليه شعره اسود محلقه مثل الي مسوي مصيبه بالجيش ومعاقبي مواليد ٩٤ نفس عمر التوائم

وغسق البنت المطعوجه بالدلال من مواليد ٩٦ نفس عمري اني …جانت قصيره سمينه وشعرها ثخين و طويل ولونه تمري غيوره انانيه

عمو ماجد ماشارك بالمشكله الصارت لا هوه ولامرته ولا اولاده سحب نفسه وكال ماعليه

علي ومرته الحيه هم ماقصرت العقل المدبر هيه واولادها الي همه
احمد ..الجبير طويل كلش وضخم شعره اسود هادئ عمره ٣٠ميقبل يزوج الا عن حب وما لكا الحب عنس يعني واخيرا فرفح كلبي وشفت ولد معنس

فرقد …ااااااخ ومادراك ما فرقد
مواليد ١٩٩٠ ابيض وطويل وضخم كذلك العائله عدها صفه الضخامه برجالها لان ناس تاخذ من ناس وعيونه جوزيه وشعره ثخين كفشه وطويل ورافعه لورا

هاجر مواليد ١٩٩٣ بنت طويله نادرا ماتلكون بنت طويله بعائله علي كلها اقزام بيضه وشعرها اسود طويل موصفات جمالها عاديه عيونها كبار وشفتها صغيره ورشيقه نوعا ما

عمتي انغام الي زوجها توفه بطلقه طايشه جان عدها منو اراده ويزن وانمار

انمار ..الكبير هول غول ما اعرف شوصف بي كلش ضخم عمره ٣٠سنه هم عنس وماتزوج وسمين وكله على بعضه مصارع سومو وبعدين تعرفون ليش هيج وصفته ابيض وطويل وكفه بكد حجمه

يزن ..ضعيف وقصير القزم الوحيد بالعائله ومسالم وهادئ مواليد ٩٦ ابيض ومدلل العائله

اراده …موليد ٩٤ وبنت نحيييييييفه كلش شكد ماكول نحيفه قليل بحقها اصلا عود مال ماسحه راح تنقسم نصين من الضعف وجها كله بس عيون وخشمها نقطه وشفتها بوتوكس طبيعي ورموشها مكناسه طبعا شلون طالعه من هالعائله ماعرف اشك بيها بنتهم هههههه لا
اشاقه طالعه ع امها هيج هذول لازم تحفظوهم لان الاحداث كلها عنهم وعن مصايبهم الي دمروا حياتنه اني وخواتي

هسه نجي لبابا راح يروي قصته ويه ماما وشلون تعرف عليها وحبها واخذها وتزوجها

طارق ابو وتين ….اني مواصفاتي طويل ومو ضخم ابيض وشعري اسود عمري جان ٢١سنه جنت ثالث كليه بيوم جنت دا امشي وشفت هالشوفه خرب شنو هالجمال يربي كمر يمشي ع الكاع ..

ضليت افتر واراقبها الا ان عرفت انو هيه اقسام داخليه لا واليزيدك قهر كليه محاماة اوووف ربي هالنزاكه يرهملها المحامات هيه انتبهت انو اني دا اراقبها بس مادارت بال ..

سألت وسألت عنها كل الي يعرفوها بس ماحصلت معلومات كثيره محد جان يعرف عنها شي بس اسمها واسم ابوها يعني حتى جدها محد يعرفه اكو شي غريب بالموضوع ليش هالكد غامضه هالبنت ..

ضليت اتحرى بس ليش الجذب ماحصلت شي بس ضيعت محاضراتي واني جنت شاطر بس تراجع مستوايا وكمت انجح بالكوه كلت خلي انجح السنه واكمل بحث عنها والله اذا اضطريت الحكها لبيتها حتى اعرف منو هيه اعرف وعاندت ضليت اراقبها ..

الا ان جت فد يوم جان عندي امتحان وجان اكو ٣ زلم وراها كل واحد بيهم جنه غول من الضخامه ومسلحين وعرفت انو هذول حمايتها اوف اوف لهل درجه خافت مني

لهل درجه اخوف اني ونظرتلي نظره شفت بوجها قساوه نوعا ما اعرف شلون اوصفها تصنع لو حقيقه هالقسوه العدها او لان جانت مامنه بالحمايه الي وراها حتى باوعتلي هيج …

ما اعرف خليت براسي شغله اذا هيه قاسيه اني الينها الي والله طلعت من الامتحان وركض ع كليتها اريد اشوفها واعترفلها

شو ادور عيوني تدور كلبي يريد يحس بوجودها ماكو جو عليه هذول ال ٣ زلم كالوا انته طارق ناظم شكو داتراقب الانسه ..

رديت عليهم وانتو شنو حراسها مثلا باستهزاء وبهاي اللحظه اسمع صوت الكعب يرن باذني

انداريت شفتها واكفه ومجتفه ايديها وعيونها تجدح ثقه وابتسامه خفيفه على شفتها عرفت انو اني انسحلت بس لا ماعاش الراح يسحلني ..

ابتسمت الها و انداريت عليهم كتلهم لتدخلون هيه عدها لسان وتحجي ومحاميه ومحد يندك بيها وما اشوف غير البوكس بنص خدي وكعت بالكاع واحد من حمايتها جان غول كلش هو الضربني ..

اني وكعت رفعت راسي للسما رجعته ليورا شفتها بالمكلوب جانت مبتسمه اني ضحكت بقوة وكمت

نفضت التراب عن ملابسي ومديت ايدي اصافح الضربني اعرف مراح يصافحني

لهذا فولت اعصابه وكتله انته رجال وصافحني هذا ما مد ايده طلع جف لبسه يلا مدها لان على اساس ميستنظف يسلم عليه بايده ..

الرجل ..ترى مو من ثوبك ابن ناظم روح على ابوك خلي يزوجك من عموميتك ..
احنا بناتنا بنات عز مو متعلمين على عيشتك ..

طارق ..وشبيها عيشتي شو اغنى اغنياء العراق ابويه …منو انته حتى تقيمني ..

بهاي الاثناء ايده وايدي متصافحه واني مو بضخامته ولا بقوته بس عندي اعصابي اقوه منه واعتذرت منه

كتله اسف تجاوزت حدودي اتمنى هالمصافحه تكون اخر شي بيناتنه ما احب اشوف عدوي مرتين

الرجل .. واني ماعتبرتك شي حتى اعتبرك عدو

طارق ..انا اعصابي فورت ورصيت اصابع ايده قوي هو ضل يباوع عليه ويحاول يرص ايدي

بس ولا عبالك راصها اني متعلم ع رص الايد واعصابي حجر من تنطبك ورا شويه كام يرعص حسيت بعظام اصابعه تداخلت ببعضها ..

كام يصيح هديت ايده بعد ماسمعت طكطكت العظم وهو يرعص

كتله ها السلام ماتحملته وتريد تندك بيه هه والي ويا لزمتهم دك كتل وين يوجعك وين ياذيك

نهيتهم ورحت امشي صوبها اباوعلها ولاتاثرت حجر كلبها كبل لا احجي

سناء ..توقعت هالشي الهمج المثلك هذا اسلوبهم

طارق ..خزرتها وكتلها راح تصيرين ابيت هالهمج وتكونين منهم بيهم احجي واني راص على سنوني وهيه تضحك هه ..

سناء بنظرة ثاقبة واستهزاء ..حلم ابليس بلجنه

طارق … دارت ظهرها ومشت اني طكيت غيض امد ايدي عليها لا شلون عيب بحقي ..

عفتها وضليت اباوعلها من بعيد واستفسر عنها الا ان عرفت انو هيه بنت وزير من وزراء الحكومه في زمن النظام السابق

سناء …بيوم جنت طالعه من محاضرتي دا ارجع للقسم جان اشوف ولد لاحكني كلت لا يجوز نفس طريقي

وصلت وفتت للقسم ثاني اليوم الصبح دا اطلع هم اشوفه كبال الاقسام ضل يمشي ورايه

الا ان وصلت الكليه صراحه خفت يكون شك بيه بنت وزير محد بالكليه يعرف انو بنت (……) بس الاساتذه ..

والطلاب ميعرفون اسمي الثلاثي بابا حذر الاساتذه انو يكتبوا يعرفوني سناء وبس …

المهم خفت انو يكون عرف وبابا عنده اعداء كثييييييير ضل يلحكني هالولد يوم يومين ٣ايام بالرابع خابرت بابا كتله دزلي حمايه

ابو سناء ..ليش شكو بنتي

سناء ..اكو ولد دا يراقبني خايفه منه

ابو سناء ..اجي اخذج واسويلج نقل

سناء ..مو اكيد عرف يجوز بس شك دزلي حمايه هسه واذا تطورت الامور ارجع لبغداد

والله من الصبح كعدت بدلت ترتبت واخذت كتبي وطلعت شفت ٣ واكفين بزي مدني يم باب القسم

تقدمو وكلولي احنا السيد (…)دزنا وامرنا نتبعج مثل ضلج

كتلهم خوش ادري اني طلبتكم وصلتوا سريع هسه وصلوني لكليتي وتنتظروني اطلع توصلوني للقسم يلاترحون ترتاحون ..

الكل كالو تامرين ست سناء طلعت اتمشى وكلي ثقه انو راح الاكي

شفته جا التفتت ع اساس احجي ويه صديقتي كتلهم امشو بطيء ولاتبينون نفسكم داتمشون ورايا ورجعت لفت راسي وكملت مشي ..

هو تبعني وضل يمشي ورايه الا ان فتت الكليه والله كملت دوامي وطلعت شو ماكو يجوز الحمايه كتلو واني دا امشي طالعه من الكافي شفته ..

كلت للحمايه روحوا هذاك الولد شوفوا شبي شيريد واذا اضطريتم ربوليا

وراحوا اني بالكافي اشوفهم يحجون ويا كمت دفعت الحساب وطلعت صرت ورا

هوه ناطيني ضهره التفت عبالك حس عليه وبتسم ورجع اندار عليهم حجا شويه وياهم …

شو هذا حمايتي نطا بوكس بنص وجهه وكع بالكاع ورجع راسه لورى وباوع عليه وكام يضحك بقوى هذا شبي مخبل ..

كام تعدل نفض التراب عن ملابسه ومد ايده يريد يصافح الي ضربه اكيد هو موكد حمايتي

وخاف وراد يطلع منها الضاهر نطيتك فوك حجمك الطبيعي نضرتله نضره انتصار وتعجرف ..

الحمايه مالتي لبس جف وصافحه شو هذا بعد دقيقه كام يرعص ويصيح عوفها كلب عوفها حقير اني مستغربه حمايتي ضخم وهذا وسط شدايصير ..

سمعت صوت ايد الحمايه مالتي تطكطكت عرفت نكسرت عظامه هد ايده وكله اشو سلام ماتحملت تريد تندك بيه وضحك هه ضحكته استهتار

واندار ع الحمايه الباقين دك كتل كسرهم تكسير جا تقرب مني وهنته بالحجي ومشيت ..

اعرف غضته جنت خايفه شويه حمايتي تسكطوا لازم ابين نفسي قويه مبحاله ولاخايفه منه بس والله الصدك جنت ارجف ولازم انتقل لبغداد باسرع وقت ..

رحت امشي بهدوء بس رجليه جانت ترجف خفت تبين رجفتها اباوع بمرايه الكافتريا ماكو ورايه الحمدلله مالحكني

فتت للاقسام بسرعه البرق لميت ملابسي وكتبي وملازمي وركض خبرت الحمايه اجو ركبت وطلعت لبغداد

بابا حجا ويا رئيس الجامعه ونقلني بعد اسبوع لبغداد

طارق …كملت دوامي واني كلبي يطافر من مكانه من العصبيه اريد الزمها من شعرها واشبعها كتل اني هيج تسوين بي

ولج بسيطه مو اني الي تهددي وتهيني وتتركي وتطلعين بسييييييطه يسناء والسماج سناء الا اكسره لراسج ..

طلعت رحت لشقق الطلبه جكاره تعلك وجكاره تنطفي متت من التفكير

هاي بنت وزير اني شعلكني بيها هيج وهذا ابوها الافندي شلون يامن يدزها تدرس هنا

والله اذا عرفو بيها يغتالوها اووووف ربي شلون شسوي ومكدر احجي لاحد عنها ما اامن والله نمت من تعب التفكير ..

كعدت الصبح رجعت على بالي كلت الله يحلها تسترت عليها ورحت ع قسمها

بس من بعيد اشتاقيت اشوفها اتانيها تطلع هسه وشويه الخ ومرت ساعه البنت ماطلعت كلت معقوله طالعه من وقت

واني هم فوتت محاضراتي شو خلي ارجع لكليتي ومن تخلص محاضرتي اروح لكليتها ..

سجلت حضور يم الدكتور وستاذنت وطلعت كتله اهلي جايين عليه واني من غير محافظه

قبل طلعت ركض لكليتها وصلت كوه اجر النفس ادورلها ماكو يربي وين صارت ليش مختفيه ..

اكيد عدها محاضره انتظر وانتظر ماكو شفت صديقتها طالعه متوجهه للكافي ركضت عليها بلا سلام بلا تعريف عن نفسي
اختي بلا زحمه صديقتج سناء وينها شو مامداومه اليوم

كوثر ..العفو ومنو انته حتى تسال عنها

طارق ..مجرد صديق

كوثر ..اعتذر خصوصيات البنت وما اكدر اجاوبك وهيه ماحجتلي عنك واصلا هيه متصادق اولاد ..

طارق ..فورت دمي واني كوه جارعها كتلها عندي شغله ضروريه

كوثر ..اذا داومت عود كوللها يله عن اذنك

طارق ..خلتني ومشت واني تخبلت شنو اذا داومت يعني بطلت وضليت احوص
رجعت لكليتي واني عندي امل اعرف شي عنها

رحت لزميلتي من نفس محافظتي هيه اقسام هم كتلها اريد تسأليلي عن هالبنت ونطيتها اسمها كالت ادلل ..

وشيخلص الليل واني انتظر باجر تجي اول ما طلع الصبح بدلت وركض انتظرها تطلع من القسم

اول ماشفتها ركضت عليها ها كوليلي وينها استغربت من وجودي يم قسمها كالت ليش ملهوف عليها هالكد البنت سوت براءة ذمه ونزلت لبيت اهلها …

كتلها وترجع كالت ماعرف والله فتت للغرفه الي هيه بيها سالتهم وكالولي هيج سالت شوكت ترجع ميعرفون

اني ضجت يربي شلون اريد اشوفها مرت باقي الايام عادي ادورلها ماكو وكل يوم نفس الروتين

الا ان امتحنت وكملت وجت العطله لازم ارجع لاهلي كلت مره اخيره اروح

سناء ..‏من رجعت لاهلي بابا كمل النقل وكل هاي الامور القانونيه واني باشرت بالكليه اداوم وارجع للبيت

اكل اسبح ابدل واطلع لمكتب عمو مال محاماة اتعلم شويه اصول الشغل

وماجنت مخليه هالولد براسي ابد ولافكرت بي حياتي جانت روتين اعتيادي بس بلحظه انقلبت اشياء كثيره بيها ..

بيوم رجعت من الكليه كالعاده سبحت وطلعت لمكتب عمو وضليت ويا للمغرب رجعني هو للبيت

وجان اسمع الصياحات بين ماما وبابا فتت عليهم يبو البيت مكسري وماما تكله هذا كله من خير اهلي ماتاخذ شي منه اكسره احركه وماتاخذه

فتت اني بطبعي هادئه كلت استفسر ونحل كلشي بهدوء سالتها ها شكو ماما شبيج بابا شصاير يمعودين شبيكم كسرتو البيت

ماما ..ابوج ياسناء ابوج العون لوص وخرب كلشي راهن البيت علمود صفقه وخسرها والبيت راااااااح ولج رااااااح وماعدنا غيره واصلا فلوس ماضل عدنه

سناء ..خيرج اصبري كله يرجع بالقانون خو ما بغابه احنا نرجعه بس اهدي كعدتهم وحجالي بابا عن قطعه ارض كلش كبيره ويريد يستثمرها

بس جان اكو جماعه خالين عينهم عليها ويردوها الجماعه معروفين كثير واغنياء وناجحين ومشاريعهم كلها ناجحه

ف صاحب الارض استثمرها يم الطرف الثاني وبابا جان راهن البيت لصديقه بهذاك الزمن ماتكدر تثق باخوك وبابا ناطي عقد الطابو ومسجل باسم صديقو مقابل مبلغ معين حتى يشتري بيها الارض ..

وحسب تخطيط بابا انو بعد سنتين يكدر يرجع البيت بس من راحت الارض لغير ناس بابا راد يرجع البيت وصاحبه كله ما ارجعه الطابو باسمي ودفعتلك فلوسها

همه ثنيناتهم بالوزاره جن ابويه وراح هدده وصارت ناس تهدد ناس ومنحلت وتحولت للقضاء وعمي استلم القضيه ومنحلت ..

كلت لبابا خلي نحجي ويه الجماعه وندخل شراكه وشويه شويه نشتري بيت اخر وافق كدرنا نوصللهم حجينا ويا جان رجال كبيييير بالعمر بس بوجه اكو ملامح حكمه خباثه شيطنه ما اعرف بس مو فقير شكله ..

رحنا اني وبابا زرناهم منطقتهم بعيده عنا وصلنا وماجنا نندل بيتهم وكفنا يم نقطه معينه احنا اتفقنا عليها

وهمه اجو اخذونا اول ما اجو ماجان يستخدمون السيارات اجو مشي ٤ زلم بيهم الكبير وبيهم الصغير بس كلهم بنيتهم ضخمه طول وعرض …

وبهل لحظة لمحت شخص اخر واحد جنت اتوقع اشوفه هنا لا يالله معقولة ماصدك عيوني …صدمه جمدتني بمكاني وشلت حركتي … خلتني فاتحه عيني ع وسعهن بدون حركة

وللحكاية بقية …

شتتوقعون المن شافت ؟؟؟

حبايب كانت هذه نبذه عن حياة ابطالي الماضية واتذكروا الشخصيات زين حتى عكب باجر ان شاءالله ننطلق باحداث القصة ركزوا بجميع الشخصيات واحفظوا كل الاسماء حتى لاتيه عليكم

والنشر لتنسون بين يوم ويوم ساعة ب2 الظهر واذا شفت تفاعل قوي اليوم انزل البارت الثاني بالليل ساعة بل١٠ ان شاءالله تعويض لصبركم ع انتظار القصة وهم بمناسبة تكريمي من مجلة زمردة المصرية ك افضل كاتبة بالمجلة لعام ٢٠١٩

يتبع …..

سارة المجيد

 

تقييم المستخدمون: 4.47 ( 3 أصوات)

1 2 3 4 5 6 7 8 9 10 11الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock