روايات كاملة

قضية انتحار دامية

جميع الحقوق محفوظة للكاتبة سارة المجيد

قضية انتحار دامية للكاتبة سارة المجيد

 

قضية انتحار دامية للكاتبة سارة المجيد

رواية قضية انتحار دامية

 

 

#قضية_انتحار_دامية

#بارت21

#بقلمي_سارة_المجيد

اسعد الله مساء احبتي بكل خير

طبعا والله البعض ضحكوني كولساع يسألون ع عثمان راح انتحر اني بهل قصة ههههههههههه يعني عافوا جوهر القصة والاحداث ومركزين ع شوكت راح يطلع عثمان ول يابه اصبروا هذا آمر فوج يعني من يطلع لازم اكو جريمة تصير لان يحقق بيها مايطلع هيج واحنه بعدنه ببداية احداث القصة اكرر واعيد عثمان بعد مو هسه يطلع دورو بس اصبروا شوي حتجلطوني وربي 🤦‍♀️🤦‍♀️🤦‍♀️

.

…………………..

سابين …اي دللي بيبي حبيبتي صااار

سابين …كملت اكل وركضت لبيبي كعدت يمها ها بيبي ادلكها الج

بيبي… اي بنيتي جيبي زيت الزيتون يمج وتعالي

سابين …رحت جبت زيت الزيتون وكعدت يم رجلها وكتلها يلا بيبي خليني ادلكها

بيبي …بنتي اريد احجي وياج بموضوع اريد تسمعيني ومترديني اذا عندي خاطر عندج

واني بيبيتج واعرف وشايفه الدنيا وعاجنتني الدنيا عجن وماره بجثيير تجارب بالحياة واريدج تسمعيني زين

سابين وهيه اتحط الزيت ع رجل ببيتها رفعت راسها باستغراب وكالت …خير بيبي كولي شكو شصاير

بيبي ….اول شي اريد اعرف انو راح تفكرين بكلامي ؟؟

سابين …شنو كلامج ؟؟ اي افكر بي بس كولي

بيبي …شوفي بنتي من جنتو صغار انتي والمرحومه اختج جنا نكول راح نزوج التوأم لاحمد وفرقد

وصار الصار واختج توفت الله يرحمها وانتي هسه كبيره مو صغيره واعيه وتفهمين الاقصدو شنو

واني تزوجت بكدج اذا مو اصغر منج والزواج استقرار للبنيه ياسابين

وفرقد ماتلكين مثلو صح عصبي اي ماكلج هادي بس هوه كلبو حنين وطيب

وهوه طالبج بالحلال واني كلت احجي وياج واجس نبضج بالاول وبعدين احجي ويه ابوج ..

بس الاهم انو تكونين موافقه لان منريد تصير الشغله بالجبر

سابين …يابيبي انتي شتكولين فرقد وييين واني وين احنا حتى مانتفق بالتفكير

هوه شكل واني شكل مستحيل اتزوجو بيبي الله يخليج لاتفتحين هالموضوع وي بابا

ما اوافق واذا انتي كلتي ما اجبرج يعني مراح تضغطون عليه واوافق

الله يخليج بيبي اتركي هل موضوع بلاه لا اني راهمتلو ولاهوه راهملي

_ لا بنتي مانضغط فرقد طالبج واجا حجه ويايه وكتلو اني اشوفلك اياها

_ بيبي من الاخير اني ما اكدر انفذ طلبج ما اكدر والله اعذريني

اكرهو والله شلون اتزوجو هو اني ضيفه يمكم هنا ويتحكم بكلشي ويعيط عليه ويتقاتل هم اذا نزوج شيسوي بيه يمكن يقتلني خلاص

_ لا يمه شنو السالفه ظلمتيه ..بنتي انتي فكري بالاول منا لباجر اكعدي ويه نفسج وفكري

وصلي استخاره اذا ارتاحيتي بعد الصلاة خير على خير واذا لا هم خير المهم لاتحسبين انو جاي افرض الموضوع عليج

_ صار بيبي ادللي بس شلون اصلي استخاره

_ هسه اعلمج شلون شوفي …

في مكان اخر

وتين …كعدت متاخره نزلت ماكو اكل ولا شي والكل دا تطبخ للغده فتحت الثلاجه مابيها شي طيب

احمد ….شفت السنفوره من نزلت تفرك بعيونها ولازمه بطنها عرفت جوعانه

فاتت للمطبخ وجيت من وراها رفعتها فوك كعدتها على كتفي وهيه تصيح

وتين …نزلني راح اوكع راح اوكع عفيه اخاف

احمد …لالا توته لاتنفرين حتى لاتكعين جعتي ها جاعت السنفوره

وتين …عفيه احمد نزلني والله راح اوكع

احمد …ما انزلج كولي شنو جاي على بالج تاكلين

وتين …هاااا امممم جبس نستله

احمد …تعالي عجل اخذج للسوك اجيبلج التردي اخذتها وهيه بالبجامه وشعرها مكفش

جبتلها التريدو حاولت شكد ما اكدر اسعدها واشوف تاليتها هل راح ينحل شي بزواج فرقد

بيبي حجت ويه عمو لا …بالي ضل يفكر بهالامور

وتين …واحنا راجعين للبيت شفت شجره رمان كبيره والرمان نازل منها منظر يجنن جان …صحت احمد احمد اريد رمان

احمد …ها من وين يا ست الحسن لازم من السوك

وتين …لالا شوف هاي شجرة مليانه رمان اريد وحدة

احمد ….ميصير حرام مال الجيران هسه يكولون باكونا

وتين …اندك الباب ونكوللهم نريد بس وحده .

احمد …ضحكت عليها شلون تفكر شفت ابنهم بالحديقه يا محمد حمودي

محمد …هاها هلا احمد ها خيي كول

احمد …الفصعونه تريد رمان راح اخذ وحده .

محمد …ولو تدلل انته وهيه كلها الكم اخذ شكد متريد

احمد …تسلم حبيبي حمودي اخذتلها وحده ورجعتها للبيت شفت بيبي نزلت وتين وركضت الها

ها بيبي بشري كلتيلو

بيبي …شكول خايب غير اشوف البنت موافقه لا اذا ابوها موافق وهيه لا شنستفاد وتعرف اني ما اجبر بنت على الزواج هذا طبعنا

احمد ….اي يابيبي والله صحيح كلامج مافكرنا بهالشي

فرقد …كاعد افكر بغرفتي شوكت تحجي بيبي ويه عمي وندك الباب .. منووووو؟

سابين … اني عادي افوت ؟

_ ركضت فتحت الباب اي سابين شصاير

_ لا مصاير شي بس اريد احجي وياك بشي

_ اي فوتي

_ لا خليني بالباب

_ ماشي براحتج خير ان شاء الله كولي

_ انت كلت لبيبي تريد تزوجني وليش تريد تزوجني انا ما اريد اتزوج لساتني صغيره ..

فرقد اترجاك بعدني ماخلصت دراستي المتوسطه بعد ما خلصت الله يخليك انزل احجي وياها كوللها بطلت ليش تريدون تغصبوني ع شي ماريدو

_ تحجي وعيونها مغوركه وخايفه مني معرف عبالك وحش جدامها سحبتها للغرفه وسديت الباب

انوب ارتعبت اكثر وكامت ترجع لورى وتدحك ع الباب وتريد تطلع واني اهدي بيها

اهدي سابين راح احجيلج الزواج مو مثل ما انتي مفكره اكعدي يمج واني ماراح اتقرب لتخافين اهدي وبس اهدي فدوة لگلبج ..

شوفي فكرنا اني واحمد وكلت زواج على ورق واعرفج بعدج صغيره واعرف متحبيني وتكرهيني

كل هذا اعرفو بس لازم تعرفين شي انو هالزواج علمودج انتي ووتين

علمود اطلعج من البيت الانتي بي وهم علمود نكدر نسحب وتين

لان راح تصيرين مرتي واني ولي امرج ومحد يكدر يتحكم بيج جاي تفهميني

هل زواج هوه الحل الوحيد حتى ننقذكم من بيت اهلكم وتجون تعيشون يمنه وتخلصون من هل عذاب

_ لا شنو يعني زواج على ورق وليش تطلعني من البيت وشنو تستفيد انت وليش تفكرون عني فرقد انت متعرف شي

_ اششششش لحظه سمعي راح اشرحلج زواج على الورق يعني ماتصيرين مرتي يعني شلون افهمج بله والله حرت خرررب

شوفي يعني تكملين دراستج وتكون عندج غرفة تنامين بيها واختج نكدر نجيبها يمنا هم تعيش ويانه وامج مراح تكدر تضربها اكثر افتهمتي

سابين بقت صافنه ع كلام فرقد بحيره كلتلو …شنو يعني زواج ؟؟!!!

_ خررب حظي هاي شحجي وياها بله ..شوفي يعني يعني شسمه معرف شكولج يعني هيج الزواج تنتقلين من بيتكم تجين تعيشين ابيتنا فهمتي بس وتكونين مرتي

_ يعني لازم اصير مثل ماما اطبخلك واغسل هدومك وانته تجي تصيح وتضربني مثل بابا

فرقد …لاحول ولاقوة الا بالله بكلبي هذا الفهمتي من الزواج امده اهلج الي وصلوا فكرة الزواج الكم بهذا الشكل ..

هسه يربي شلون اشرحو الها هاي فاهيه مامفتحه وطلعتي طفله وما اعرف اوووف يربي شسوي هسه

لا شوفي ماتغسلين هدومي ولاتحضرين الاكل ولا كلشي

بس تدرسين ومن تكملين دراسه تدخلين كليه حلوه

واكوم اوديج وارجعج واشتريلج ملابس حلوه ولوتين هم وما اخلي احد يمد ايدو عليكم

_ هاااااا هو هذا الزواج يعني مو مثل ماما وبابا

_ شلون مشكله هاي ياربي شلون راح افهمها … لا مو مثل امج وابوج والله راح اعاني وياها هل هبله هاي

_ يعني اذا وافقت هذا الراح يصير

_ انقهرت عليها شلون خايفه واني اصلا ما افكر بغير شي والله غايتي اريد انقذهم وبس

وهيه ماتعرف شنو الزواج راح امشي هالفكره عليها بس توافق وما اجبرها على شي تعيش ويايه كاختي

بس اي سابين هذا الزواج شتكولين اذا تقبلين حتى اجيبج انتي ووتين واجهزلكم هاي الغرفه هم

_ اي عجل اوافق اذا هيج

_ ضجت عبالك دا اضحك عليها زين اذا افتهمت السالفه بعدين شنو يكون رد فعلها والله تذبحني هاي مخبله ادري بيها

_ سابين حجت بطفولية ونبرة بيها برائة ماشي عجل احجي ويه بابا اذا وافق حتى ننتقل اني ووتين هنا وانداوم مدرستنه يمكم

فرقد حط ايدو ع وجهو من حركة اعصابو وكال …هلا هلا هذا كل الفهمتو من كلامي

روح طم نفسك فرقد رووووح انت الجبتها لروحك نعلعلا حظي

احمد …ها ول يابه فرقد وينك فتت وطلعت سابين فرحانه ها خير شكو الضحكه ماليه وجها

فرقد …عوفني بحالي مصيبه هاي طلعت فاهيه وماتعرف شنو زواج

احمد …شلون يعني

فرقد …السمعتو يا بيك كعدت تكلي شنو يعني الزواج

_ خرب حظي وخاف شرحتلها ؟!!

_ اي مو كالولك خبل حتى اشرحلها بابا هاي الامور امها تعلمها اياها مو اني ..اني ششرحلها اتخبلت شبيك

_ عجل ليش طلعت فرحانه شكلتلها

_ ماتسكت كتلها الزواج يعني تنقلين انتي و وتين وتعيشون يمنا

_ هلا هلا شلون شرحتو هيج امداك

_ اي سالتني اساله ما اكدر اوضحها الها البنت فاهيه ابني فااااهيه ماتعرف كلشي بس لسان عدها

عقلها فارغ ماتعرف شي بالدنيا تريدني اطلع عينها ع ايدي عوفها خلها بوكتها عود امها اتعلمها مو اني

_ طول بالك هسه شلون

_ نكمل وياها اصلا هو هذا الراح يصير زواجنا بس ع الورق حتى انجبيهم يمنا وبس مااتدنه يمها ابد

_ زين لتروح تسال احد ويجاوبها وتنقلب ضدك

_ اذا صار هالشي اني بعداد الموتى والله اخر مره عضتني عضه نبتت سنونها بيه هالمره تخنكني واتطلع روحي

_ شنوووو شنووو بله احجي شوكت عضتك وليش عضتك وين بله شوفني واحجيلي هالسالفه جديده عليه ماسامعها

_ لاتتمسخر مو واصلك والله راسي طبل خلي تنحل هالشغله

سابين …ركضت يم بيبي واني فرحانه راح اخلص وتين من سناء وطارق واخيرا لكينه من ينقذنا من جحيم اهلنه

(هنا سابين ع برائتها كانت فرحانه بالخلاص من السجن المؤبد الي جانت محبوسه بي هيه واختها لكن متعرف المستقبل المظلم والمجهول الي منتظرها )

بيبي بيبي راح اتزوج من فرقد وبعد الزواج اعيش يمج مو يعني بهذا البيت جنت طايره من الفرح

بيبي …شغير رايج بسرعه ولج توج جنتي ترفضين وماراضيه تسمعين بأسم فرقد

سابين …وافقت بعد بيبي المهم اعيش يمكم مو مهم الاهم اجي يمج اعيش يالغالية

_ ها خير ان شاء الله عجل اني ورا الغدا احجي ويه ابوج بس بنتي متاكده خلي لباجر وتاكدي زين ترا هالطريق مابي رجعه

_ اعرف اعرف
((سابين ماجانت تعرف شنو زواج ولا تعرف الجاي شنو والمنتظرها شنو

كل الشاغل بالها وكتها جان وتين وشلون تطلعها من بيت سناء وطارق ومافكرت للحظه انو ترفض

وفرقد ما وضح الها الموضوع زين لان هم هو جان رايد يخلصهم من عمو ومرت عمو

مأسات عاشوها بدينا ظلمة مالها علوم بسبب العنف والاستبداد الاسري ))

وقت الظهر والكل كااعدين ع الغدا

بيبي …طارق ابني ورى الغدا رايدتك بموضوع

طارق ..خير يمه شصاير مريضه شي

علي …شكو يمه احجيلنا

بيبي …هااا بسكم عاد كلت محتاجه ابني احجي ويا شبيكم فكيتم حلوككم

فرقد واحمد معالم وجوهم ماتتفسر من القلق والتوتر

طارق …صار يمه تامرين امر

بيبي …ماتامر عليك ظالمه

فرقد …كاعد على اعصابي يلا يهالغدا ما يخلص

احمد …شبيك متوتر رجلك ما وكفت اهدى فرقود كول يالله

فرقد …بله ماتسكت عساس انت الي هادء ..كمت من السفرة وكتلهم دايمه عليكم

الكل ..صحه وعافيه

فرقد …ماتحملت طلعت لغرفتي انتظر واشوف الراح يصير مدري شبيه

عبالك سايقيني للاعدام اوويلي عليه هل بنات قضيتهم شغلت كل تفكيري ولازم اوضع حد للي ديصيرلهم من اذيه

بس كون بيبي تكدر تقنع عمي ويتم كولشي ع خييير اوووف تعبت اعصابي من التفكير

طارق ….يلا يوم كملت اذا هاي كومي اوديج للغرفه ومنه هم نسمع موضوعج

بيبي …يلا يمه سابين جيبيلنا ستكانين جاي للغرفه

انمار يهمس بأذن يزن …صار بيها جاي اكو انه بالموضوع

يزن …وداعتك ماعوفهم اله اوكع ع العلة ..ركضت على فرقد الي لاحظتو متوتر من كعد ع الغدا ،هااااا ولك شمخطط

فرقد …بعدين تعرف هسه لاتلح

يزن …افا عليك مو اصدقاء واخوه بالدم تضم عليه الله يسامحك

فرقد …اوووف بعد ماصارت الشغله انتظر تصير واحجيلك تعرف ما اضم عليك شي

يزن …احجيلي حتى لو ماصارت تعرفني ما احجي بيها

فرقد …اهوووو شون لزكت انت اريد اخطب سابين ارتاحيت

يزن بصدمه فتح حلكو وكال …شنووو بربك لالا عيدها كول والله

فرقد …وجع من الله شبيك لتكون حاط عينك عليها

يزن …لا يابا ليش نسترجي نحطها عليها اكو قوات خاصه تفكسها النا

بس شو ليش ماكلتلي لو ما اسالك ماتحجي من شوكت تحبها ها حب سري ومانعرف عشكان الاخ

فرقد ….ياعشك انت الثاني خررب حظي ((لو تعرف الاعرفو))

يزن ….عجل زواج ايش خطبة ايش غير تحبها يلا تزوجها

فرقد …هسه اسكت انت الخ بعدين انطيك التفاصيل

يزن …فرقد خيي ترى البنت بعدها صغيره لتشوفها مدنفشه والله شكلها بس السان ترى مو واعيه وهالشي واضح عليها لاتنغر بيها

فرقد ….من صدك شلون عرفت مو واعيه

يزن …اشوفك مهتم

فرقد …ماتنجب والله مالي خلكك كوم نطلع ويه الشباب نتسلى شويه

يزن …وتترك حبيبتك والله حرام عليك

فرقد رص ايدو بغضب …لاتستلمي ادفنك والله

يزن …فديت اليهدد وماينفذ ههههههه

طارق ….خير يمه الجاي وشربنا شغلتي بالي كولي شصاير شنو موضوعج

بيبي …اول شي اسالك اني عندي خاطر عندك

طارق …الله يسامحج يا يمه شلون ماعندج خاطر عندي تراج انتي الغاليه شعندي غيرج بس كولي شنو طلبج والله شغلتي بالي

بيبي ….خير ان شاء الله اذا هذا كلامك عجل ماراح تردني وتقهرني

طارق …شلون اقهر ست الحبايب التريدي اعتبري نفسج ماخذتو انتي بس اامري وميضل خاطرج الا طيب

بيبي …من الاخير اريد تنطيني سابين لفرقد

طارق ماستوعب طلبها فتح عيونه ع وسعهن وكال ….شنوووووو

بيبي ….اشوفك انصدمت وشكلك راح تتراجع عن كلمتك

طارق ….لا يمه بس مستوعبت اول مكلتي شلون يعني تريدين تزوجيهم

بيبي ….اي وشنو يعني نزوجهم البنت خو مو صغيره وفرقد ابن عمها مو غريب يعني يكبعها وياخذها

طارق …ماكلت شي يمه ع عيني وراسي بس لاتشوفيها لسان ترا سابين لساتها طفله ماطالعه باب البيت

بس للمدرسه شيفهمها بالزواج الله يخليج ومن شوكت احنا نزوج بناتنه بهيج عمر

بيبي …شوف ابني البنت تزوج بالاخير تزوج يعني هسه بعد سنه هم راح تزوج

والفهم احنا نشرحو الها وهاي اني شوفني شصغرني تزوجت وربيتكم وكبرتكم خربت الدنيا يعني والولد طالبها واني سالتها وهيه موافقه

طارق بذهول ماصدك …شوكت طلبها وايمته سالتيها

بيبي …عوف هالاسأله طروق وكولي تنطيني لو لا

طارق …يا يمه بالعقل الله يخليج بالعقل خلي نحجي تشوفيها جاهزه للزواج

باجر لو حملت شون تشيل طفلها ماتشوفين جسمها طفولي

بيبي ….اذا على هالشي ناخر الزواج سنه سنتين المهم نخطبها لفرقد

وبعدين اني جنت انعم منها وتزوجت وجبت وماصارلي شي هاي اني جدامك

طارق …والله يايمه ما اعرف شحجي هيه وينها وشيفهما بالزواج حتى توافق

بيبي …بنات هالوكت مو مثلنا ابني واحنا ما نقصر وياها وبعدين وين تلكا مثل فرقد لبنتك ها بله

اشو فدوة طول وحسن ومال وجمال لو تريد تزوجها مثل ماتزوجت حضرتك ومحد يعرف بيك

طارق …لايمه لا زواجي جان اكبر غلط وما اريد اغلط بحق البنات

بيبي …اذا اتفقنا حتى نعلن الخبر وثم يا يوليدي اني فرقد مربيتو على ايدي

اعرفو وگلبو حنين وراح يسعدها ويعيشها بجنه انت وافق وبنتك امانه عدنا

طارق …زين يمه ودراستها شلون

بيبي …استغفر الله هسه اني كلت نجيبها ونكعدها بلبيت تخدمنا شبيك وليدي

ابني حالها من حال هاجر تكمل كل الصفوف التريدها وتتعين هم لاتشيل هم احنا نعتبر مثل اهلها

طارق ..والله يوم اذا تشوفين هالشي مناسب سوي بكيفج ضلت يمج

اني بس رايد مصلحتها ومثل مكلتي ما ازوجها هسه لان صغيره

ع الاقل خلي يصير عمرها ١٦ او ١٧سنه توعى اكثر وهم لازم احجي ويه فرقد

بيبي …على خير ان شاء الله

علي …ها ابو سابين كول بيها شي امي

طارق …لالا مابيها شي

سناء …طارق حضرتلك الغرفه تعال ناملك ساعه …اكول شرادت عمتي منك

طارق …بعدين تعرفين

سناء …على اساس متامله تحجي

طارق …بس لو تبطلين هالنق مالتج ذبحتيني

سناء ….على شنو نقيت بله هوه بس سالتك صاير متتحاجه

طارق …ردت اغفى شوي بس مكدرت ضليت ادور براسي يمين يسار صارت ساعه ٤العصر

طلعت توضيت وانتظره ياذن داصلي صحت وتين الجانت مخليه راسها ويه هالدفتر وتلون تعالي وتين

وتين …ها بابا

طارق …سابين وين بنتي

وتين …بابا يمكن فوك ويه هاجر

طارق …دطلعي صيحيها بسرعه

وتين …اي صار بابا
سابين سابين تعالي بابا يصيحج

سابين ..خير شكو

وتين ..معرف تعالي يله

سابين …ماشي نزلت واعرف ليش يصيحني ، ها بابا حبيبي

طارق …تعالي بنتي اريدج بموضوع

سابين …اي كول بابا

طارق …شوفي بنتي اكيد حجتلج بيبيتج انو فرقد طالبج صح وانتي كايلتلها موافقه ..

سابين هزت راسها بمعنى اي

طارق …بنتي انتي تعرفين انج بعدج صغيره ع الزواج واني تهمني مصلحتج قبل الكل والزواج مسؤوليه مو لعب جهال

سابين …بس بابا

طارق …خلي اكمل بنتي وسمعيني للاخير اني مكدر ارد خاطر امي وكلت اسالج تفكرين مره ثانيه ولاتستعجلين

هو صح ما الكا مثل فرقد زوج مناسب الج بس هم اريدج تفكرين

اني فكرت وشلون ما دورتها براسي اشوف بعد وكت

بس بيبيتج مصره نسوي خطبه وبعد سنه الزواج انتي واعيه شنو جاي احجي

سابين …اي بابا واعيه

طارق ..بنتي راح احجي ويه امج وانتي هم كعدي وياها واحجو شوفي شراح تكولج وفكري بي زين

هسه روحي صيحي امج حتى نحجي وياها والله يستر

سابين …اي بابا هسه …رحت حتى اصيح امي وجنت فرحانه لان راح تصير عندي حياة جديدة خالية من عذاب سناء وطارق …ماما ماما

سناء ….ها يمه حبيبتي شصاير

سابين ..بابا يصيحج

سناء ..رحت للغرفة شفت طارق كاعد وبداخله كلام يريد يكوله كتلو ها طارق شردت

طارق …تعالي اكعدي حتى احجي وياج ..سمعي ما اطولها عليج من الاخير

فرقد رايد يخطب سابين والزواج بعد سنه او سنتين بس تكبر شويه واني نطيت كلمه لامي انو انطيها

وانتي دورج تكعدين وتوعيها وتفهميها شنو الزواج شنو خطبه شنو راح يصير

بعدين كله لازم تفهمو وتفكر بي قبل لا توافق اذا رفضت طبعا ما اغصبها هذا قرارها

بس اني يكون بعلمج ممعارض زواجهم لان اعرف فرقد كدها وابن اخويه احسن من الغريب

سناء رفعت حاجبها بصدمه وضحكت باستهزاء وكالت ….تشاقه مو ،،

طارق …شبيج مخبله شوكت متشاقي بهيج موضوع اني

سناء وبعصبيه صرخت ..لاااا انتو اتخبلتوا اكيد شلون تريدون تزوجون قااااصر شنو من تفكير هذا …

اسمع داكولك ايلين بنتي اني مو بنتك انت ..اني الربيتها بيا حق تاخذوها مني

انته واعي انو هيه بعدها طفله لابعد سنه ولاعشرين سنه ازوجها لفرقد فاهمين

هاي بنتي ومحد ياخذها مني والى راح يزوجها يكون من عائله غنيه ومثقفه مو ابن اخوك المهتلف

طارق …انجبي لاطيح حظج وابن هالعائله الغنيه المثقفه راح يسعدها مثل ما انتي اسعدتيني مو هه ..

شوفي ولج اني كلمه وكلتها وبنتج ايلين ماااااتت استوعبي هالشي ماااااتت والبقت بنتي سابين

اني الاقرر مستقبلها مو انتي ترضين ماترضين طبج طوب زين واياج ثم اياج تسوين مشكله بهالبيت انعل والديج فهمتي ويلا ولي من جدامي

سناء …والله على جثتي مايتم هالزواج فاهم اني انطي ايلين لفرقد تحلمون بهالشي

طارق …نشوف منو اليحلم ست سناء نشوف طلعت وطبكت الباب

سناء …هاي من كل عقلو يحجي والله يالله اشوف عود كلامكم يمشي لو كلامي هاي بنتي ..
صحتها ايييلييين ايييليين تعالي

سابين …سمعت سناء تصيحني نزلت ركض هاها ماما

سناء …حضنتها ما اريدها تروح مني بعدين بعدتها شويه عني وردت ادحك لعيونها الملونه بس عيونها جانت مو ملونه ..

بنتي عيونج ليش مو ملونه ها وين راح لونهم بنتي ايلين عيونها نفس عيوني ليش عيونج مو نفس عيوني ها ليش

استوعبت انو هاي مو ايلين وانما سابين دفعتها

سابين برعب من حال امها وخافت من تصرفها كالتلها …ماما شبيج صاير شي

سناء بحالة هستيريا صرخت بوجه سابين وكالتلها …انتي مو ايلين اني صحت ايلين وينها جيبيها الي روحي صيحيها

سابين …ماما شبيج ايلين ماتت اني سابين استوعبي هل شي انييييي ساااااابين مو ايلين كااااااافي اصحي

سناء …عصبت من كالتلي هيج كمت قفلت الباب ونزلت بيها ضرب راشديات جريتها من شعرها مسحت بيها كاع الغرفه والكل التمت تدك بالباب على عياط سابين

واني اضربها واكوللها اختج وين وين وديتي بنتي انتي الموتيها جان لازم انتي تموتين وهيه تعيش

الباب يندك بهستيريا وسابين تصيح بكل قوتها بااابا بااابا بيبي تعالي طلعوني

واني تهسترت ما اكدر اوكف نفسي اريد بنتي وهاي مو بنتي احس افعالي تطلع مني لاارادية دميتها اتدمي

طارق …ادفع بالباب بكل قوتي والباب بي اقفال حديد من الداخل مستحيل ينكسرون

تهسترت ادك بي واصيح سنااااااء عوفي البنت لتمووووت جوه ايدج ولج بنت ال ….عوفيها

فرقد …نزلت ركض واني اسمع عمي يصيح كلبي صار بالكاع ها ها عمي شكو وبيبي تلطم وامي الحك ولك فرقد راح تموتها للبنت دحكت شفت وتين خاتله بحضن بيبي وتبجي

عرفت سابين بالداخل وامها دا تضربها وبابا وعمي واحمد يدفعون بالباب بس الباب مستحيل ينكسر ..

وللحكاية بقية …..

_أعتذر لنفسي لفشلي الكبير والدائم
على ظني بأن غداً سيكون أجمل
لقد كان الأمر مميتاً جداً لكنني قررت الصمود حتى تهشمت بالكامل 💔

يتبع …….

#سارة_المجيد

 

تقييم المستخدمون: 4.33 ( 3 أصوات)

1 2 3 4 5 6 7 8 9 10الصفحة التالية
الوسوم

تعليق واحد

  1. قصه خياليه والله افكر ٢٤ساعه شراح يصير وشنو الجريمه ومعقوله راح يتحملون اكثر البنات سابين وتين.؟؟؟

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock