قضية شرف للكاتبة زهور جمال الدين

فريق النشر
روايات كاملة
فريق النشر7 يونيو 2020آخر تحديث : منذ سنة واحدة
قضية شرف للكاتبة زهور جمال الدين
#قضية_شرف

🌷🌹بقلم زهور جمال الدين🌹🌷

الحلقه الاولى

تحكى عالقطيعه بين الخوت….

ايه الخوت ماتستغربوش…ياما من خوت وخوات متعاركات

ومايتكلموش مع بعض…ولو تجى تشبحى السبب تلقيه دوة

فاضيه …غير الناس اللى منا ومنا كبرو المشكلة وزادوها بهارات ..

لكن احنا ديما املنا فى الله ان الدم عمره مايولى اميه

نشوفو الحكايه ..وياريت اى خوت متخاصمين يتعضو

ابطال القصه كمال وامينه .. و كل الشخصيات فى الرواية ابطال

قصتنا تبدا من حوش عمك البهلول …

ربي يرحمه ويسامحه توة هوا فى دار الحق واحنا فى دار الباطل…

عمى البهلول عنده زوز اولاد ….مختارهوا الكبير والكبير الله
مصطفى هوا الصغير

مانطولش عليكم ..مختار تزوج نورية بنت عمته وسكن فى حوش بوه …

خوه مصطفى فى هداكه الوقت قاعد عزرى مش متزوج ..
عمتك نوريه توكل وتشرب واضم فى العزوز والشيبانى والسلف …

ولكن مسكينه ماحملتش ولا دارت صغار …
بعد عامين توفت عزوزتها …والشيبانى قال شى معش نتزوج …بنت اختى سادة عليا

قعدت نوريه تعانى في خالها وسلفها…والحمل يانارى ماحملتش

بعد ثلاثه سنين تزوج مصطفى …وخدى سالمه بنت ولد عم بوه …
بنيه تحطيها عالجرح يبرا …

مصطفى سكن بروحه من اول يوم …مستريح ومرته قريب تجيب..ومفتك من معاناة بوه

والشيبانى راسه كاسح زى الحيط …فى قولة يا مختار نبى فلوس وخلاص…نازلين عليه باعتبار ماعنداش صغار

مرة ايقوله اشريلى سيارة ..وشراله مختار سيارة بي ام ..ايام اللى يركب فى البي ام يضرب يعور

ومرة يقوله نبى نفتح دكان خير مالكساد ..جابله مختار معاشه اللى ملمده ليه شهور وعطاهوله

ومرة قاله نبى نمشى ندير عمرة مع شيابين الشارع …دبرلى فلوس مادخليش

وعمك مصطفى مالص من الكلام هدا كله ….

جابت مرته ولد وسماه كمال…وبعدا بشهرين حملت ثانى …

ونوريه غاصتها وساكته وخلاص…اتقيم فى سلفتها وترادع وتقمط وقلبها مايعلم بيه حد الا ربي

وعلى قد ماشدت فى مختار يتزوج ..شى مسكر راسه وعاطى احكامه لربي …

سالمه جابت ولدها ايمن على راس كمال طول …..

بعد شهرين توفى بوهم عمك البهلول …….

قامو العزى…والحوش يملى ويفرغ ….

فاتو ايام لين وصلو للاربعين…وسالمه ماروحتش هيا وصغارها …ايمن قاعد عمره شهرين ممكن

نورية تعلقت بى كمال هلبا ….هيا توكل هيا تلبس..وسالمه لاهيه بى ايمن وخلاص

بعد فاتو شهرين ناداهم شيخ الجامع …

-مختار/ انشاءالله مافى سو ياشيخ

-الشيخ / لاسو لا سوية انشاءالله ..غير وصيه لبوكم مخليها عندى وناديتكم بيش نعطيهالكم

-مصطفى / وصية !!!

-الشيخ طلع ورقه / هادى ورقه مختومه عطاهالى الحاج البهلول بوكم ..وطلب اول مايتوفى نعطيها ليكم

-مختار مستغرب / وليش دسها عندك انت…غريبه الحاج كل اوراقه عندى

-الشيخ / الله اعلم ..لابدة عنده فيها حكمه

-مصطفى مستعجل/ غير افتح الوصيه يا شيخ خلى نفهمو

-فتح الشيخ الوصيه / انا الموقع ادناه الحاج البهلول…
…………….. ……………..

……………..

وقد استلفت من ابنى مختار مبلغ وقدره (..) اشتريت بيه سياره
واستلفت منه مبلغ وقدره (..) واشتريت بيه كدا ….مبلغ وقدره اشتريت بيه كدا ….

وقعد يعد ويعد ويعد لحد ماوصل سلف مختار لبوه 30 الف دينار ليبي

اممممممم مصطفى ساكت وخلاص…شام خونه

-الشيخ/ ولرد دينى هدا …اهب بيتى الدى اقطنه لابنى مختار بيع شراء ..وقد تم تسجيل البيت فى الشهر العقارى باسم مختار ابنى

وارجو من زوجته نورية بنت اختى انها تسامحنى على معناتها فيا وفى مرت خالها قبل ماتتوفى

وانا لله وانا اليه راجعون ….

-وقف مصطفى /شنو شنووووو….كاتب الحوش باسم مختار

-الشيخ / هادى وصية الوالد ياولدى

-مصطفى / تى هادى نصبه ومتفاهم عليها انت ومختار…

وتلفت لمختار/ اخر حاجه نتوقعها انك تكون نصاب

-مختار يحلف/ اقسم بالله انى تفاجئت بالوصيه زينى زيك

-مصطفى / توة انت عاطى للحاج 30 الف …على منو تكدب وتألف

-الشيخ/ كل الفلوس اللى استلفها مكتوبه ياولدى

-مصطفى تلفت للشيخ / انت بالدات تسكت ..بقداش شراك مختار

وتلفت لمختار/ ولعلمك من اليوم لا عاد خوى لا نعرفك ..يانصاب

وطلع من الجامع وهوا يخلف ويتوعد بالمحاكم والجلسات

______________________________
.
.
.
طلع مصطفى ركب سيارته وطار لحوش بوه

خش بالقوة/ سالمه …ياسالمه ..اطلعى

جت نوريه تجرى/ خيرك مصطفى اوخى شن فى

-مصطفى/ لانى خوك ولا نعرفك ..وقولى لراجلك النصاب ايرد الحق خيرمانحبسه

-نوريه حايرة/ حق شنو مصطفى ياوخى

-مصطفى/ حقى فى الحوش اللى خداه راجلك وقال بوى بايعهولى

-نوريه / كيف بايعهوله عمرى ماسمعتها

-مطصفى/ تى هوا كانا بيكتب الحوش حق بيكتبه باسمى انا عويلة وصغار…يكتبهولكم انتو راس ورويس

نوريه وجعتها الكلمه وحستها فى قلبها زى الموس / تعزر فيا بالصغار يامطصفى

-مصطفى/ هدا الواقع يانورية

-سالمه جت تجرى / شن فى يامصطفى اللطف

-مطصفى يعيط / جيبى الصغار واطلعى قلتلك هيا

-سالمه خايفه / هيا هى هانى طالعه

وخشت تجرى تلم فى صغارها …لحقتها نوريه

-سالمه مخلوعه / زعما شن فى يانوريه

-نوريه / وانا وين نعلم عليهم ياوخيتى..كنت معاك غافله زينى زيك

قامت سالمه ساكوات صغارها ..وشدت ايمن فى غمرها

وقامت نوريه كمال وقعدت تبوس فيه حست نفسها معش بتشوفه ثانى

طلعت سالمه شادة ايمن ..ووراها نوريه شادة كمال

شد مصطفى كمال بالقوة / هاتى

وجعتها نوريه وخدته فى الولد منها بالقوة

وطلع مطصفى ركب السيارة وطار زى المجنون ..

مصطفى مشى ومختار درس

-نوريه / خيركم اللطف

-مختار / قصه طويلة تعالى نحكيلك

_____________________________

.
.
وصارت حوسه فيهم الخوت الزوز

مصطفى ماباش يسكت على حقه …ودار محكمه

ومختار فرح بالحوش وخداه …هوا صح من حقه …لكن مصطفى ربي يهديه

جلسات المحكمه تمو بخسارة مصطفى للقضيه ..

لان من ناحيه دينيه هيا وصيه مكتوبه وعمك البهلول امسجل الحوش فى الشهر العقارى بيع شري باسم مختار ولده يعنى مافيهاش كيف ايرده

ومن ناحيه العرف والناس والقبيله ..مختار معاه حق لانهم حقاته سلف ودين ..وبالدليل وبالحسابات والديون المكتوبه

مصطفى وجعاته ..لانه حسها خونه ..مع ان كل الناس غلطاته ووقفت مع مختار

ومع هدا عناد وشى شى دارها قطيعه مع خوه

ويشاء القدر ان نوريه تحمل..شوره ارحامها نغرو من كلام سلفها مصطفى ليها …

وفرح مختار .. وكملت التسعه شهور…وجابت ولد سموه عبدالرحيم

ومشى مختار لخوه مصطفى بيخبره وبيعزمه على عقيقه ولده بالك الامور تتساوى

-مصطفى / تعرف يامختار حتى كان اينوض العياط فى حوشك والله مانخشه

-مختار/ لاه عليك ياوليد امى..هدا كله على خاطر خديت حقى

-مصطفى / حقك بالنصب والاحتيال

وقربع الباب فى وجهه

روح مختار راكب عليه الضغط ..رفعوه جيرانه للمستشفى ..شدوه تحت الملاحظه ليله كاملة …

ولما روح …

-نوريه / توة ماكش بروحك ياراجل..درت عويلة يبوك ..كانا نشتاقك ولا نترزا فيك منو بيا وانت عارفنى لا ام ولا بو

-مختار متأثر/ معقولة ايقولى كانا اينوض العياط فى حوشك مانجى…هدا كفر هدا

وتلفتلها / اسمعى يانوريه ..من اليوم حتى انا قاطعته ..تلكليك زايد مانبيش ..

-نوريه / انت الكبير يامختار ..كيف تقاطع خوك

-مختار / صكرى فمك ..انتى مش بتورينى

__________________________________

خلااااص صارت القطيعه …

ومرت الايام

نورية بعد ولدها عبدالرحيم بسنتين جابت بنوته زى القمر سمتها امينه …وبعد امينه جابت ولد سماته هيثم

عبدالرحيم م 83 وامينه 85 وهيثم 89

اما سالمه بعد صغارها كمال وايمن جابت بنت سمتها ندى وبعدها ولد اسمه اكرم

كمال م 80 وايمن 81 … ندى 88 واكرم 89

وفاتت سنين وكبرو الصغار وهما مايعرفوش بعض

كل حد فى حاله …

خاصه كمال كبر وهوا حاقد على عمه وصغار عمه

هما ساكنين فى الحوش طويل وعريض فى السراج..وهوا وخوته فى شقه فى عمارات غرغور

سنه 2005….

كمال يقرا فى كليه الهندسه تخصص اتصالات ..قريب يتخرج ….

-سالمه / سلم وليدى هالموضوع بين بوك وعمك ماليناش علاقه بيه
-كمال متعصب/ تى كيف متليناش علاقه بيه ..مش تريس احنا ياخد مننا الحوش هوا وصغاره عين تضحك عين تبكى

-سالمه/ ياوليدى كان تبينى نرضى عليك اطلع منه الموضوع
الحوش حقهم
-كمال يشالى بايديه/ تى كيف تقولى حقهم يااام
-سالمه مخلوعه / اشششش نقص صوتك ..يسمعك بوك ايطلقنى
-كمال / امالا معش تعصبينى وتقولى الكلام هدا

وطلع من الحوش وسكر الباب وراه

-ايمن / غير اتعبى فى روحك ياااام ..كلنا مقتنعين انهم خنبو مننا الحوش ..غير تعب زايد عليك
-سالمه / انا مانبيكمش تمشو على طريق بوكم راهى غلط
..كيف خوت حتى العيد العايد مايسلموش على بعض

-ايمن / لاااا هدا ماناقص غير نسلم عليهم

طلعت ندى من الدار …

-ندى/ ايمن برة جيبلى كراسات ..غدوة اول يوم فى القرايه
-ايمن / بتخشى علمى ولا ادبي
-ندى/ اولى ثانوى مافيهاش تخصص ..عامه
-ايمن / بعتالى وانا مروح تو نجيبلك
-ندى/ باهى

_______________________________

ثانى يوم …

فاقت ندى وجهزت نفسها ولبست البدلة الرصاصيه متع الثانوى ولبست حجاب عالابيض وطلعت مشت للمدرسه

طبعا زمان الثانويات فيهم عسكريه ضرورى
ضرورى جنود فى المدرسه عشان حصة العسكريه

ولازم يكون عندهم آمر مقيم

المدرسه الامر متاعها اسمه عبدالرحيم مختار البهلول

عبدالرحيم كبر وخش الكليه العسكريه وقاعد يقرا مزال مش متخرج … وزعوهم وحطوه هوا مبدئيا فى ثانوية

الجنود واقفين بيديرو من الطالبات رئيسه سريه ..
وعريفات فصائل

واقف الجندى ويسمى فى اساميهم …

وصل فى العريفه ندى مصطفى البهلول

عبدالرحيم / 😳😳

زبط الاسم انها ممكن تكون بنت عمه …

سأل واستقصى ولقاها بالفعل بنت عمه

وفى يوم ندى صارت معاها مشكله مع ابله

وقف معاها عبدالرحيم ..وخدالها حقها …لقاها تبكى

نداها لمكتبه وعرفها على نفسه

وطلعت ندى عارفاته ولد عمها وهايمه فيه من زمان منغير ماتتكلم

-عبدالرحيم / قصدك عارفه ان احنا صغار العم
-ندى بخجل وصوت واطى / ايه عارفه

-عبدالرحيم / وعلاش ماقلتيليش
-ندى / تحشمت منك الحق

قامت راسها لقاته يشبحلها باعجاب … وهيا نفس الشى واضح عليها الاعجاب

_______________________________

وفاتو سنتين

سنه 2007 ندى فى ثالثه ..والباين ان زاد الاعجاب بينها وبين عبدالرحيم ولد عمها ..واعترفلها بحبه ..وهيا نفس الشى اعترفتله باعجابها وبحبها ليه

.
مقعمزة هيا وعبدالرحيم فى نفس المكان فى مكتبه فى المدرسه

-ندى تبكى / لا والله ماضربنى
-عبدالرحيم / امالا خيرك تبكى شن دارلك

-ندى تمسح فى دموعها/ مادارلى شى ..يبى يحولنى من المدرسه وانا حرشت بوى قلتله نبى نقعد مع صاحباتى
-عبدالرحيم / قصدك هوا عرف انى نشتغل هنايا

-ندى / ايه عرف
-عبدالرحيم / ومن قاله
-ندى / وين نعلم انا

-عبدالرحيم / باهى اهدى حبيبتى
-ندى / معش نقدر نبعد عليك ونكون فى مكان ثانى
-عبدالرحيم مسك ايديها الزوز / ولا انا مزال نتحمل فراقك

-ندى/ باهى كيف نديرو
-عبدالرحيم / انا العام هدا بنتعلى رتبه ..وبنبدا ضابط
…خلينى نتوضف بالرتبه الجديدة ..وبعدها ولازم اندير حد للمهزلة هادى اللى بين بوى وعمى
-ندى / انا خايفه من ايمن يقول لكمال ..
-عبدالرحيم / ماتحافيش والله مايقدر ايديرلك حاجه ..ولو صار ماصار نمشيلهم راجل من الباب
-ندى / قصدك بتخطبنى 😍
-عبدالرحيم يضحك / بنخطبك ياهبله امالا نخلي واحد ثانى ياخدك 😁

________________________________

فى حوش مختار

امينه فتحت الباب وخشت للحوش

-امينه / السلام عليكم
-نوريه / وعليكم السلام
-امينه / وين بوى
-نوريه / بوك مزال ماروحش ..شنو جبتى وراقيك
-امينه / رفعتهم للاكاديميه طول
-نوريه / وقداش عام بتقري فيها
-امينه / هما سته سمسترات بنقراهم فى عامين ..خاطر بنقرا حتى فى السميستر الصيفى
-نوريه / انا حايرة غير شن بديرى بيها بس..مش كان خديتى صالح ولد خوى محمد خيرلك.. هوينا دار توامه زى الفرح والسعد
-امينه / نكمل قرايتى وبعتالى ابديلى فى سريب الماخدة والزواج😊 لكن توة مافى فى دماغى شى غير قرايتى وبس

_______________________________

فى حوش مصطفى

ايمن وكمال مقعمزين فى دار نومهم المشتركه ويهدرزو

-ايمن / تى اقسم بالله كان نشم انه كلمها ولا جى جيهتها نهاره لاحرف
-كمال / خلاص عاد يا ايمن انهيلنا هالموضوع ..انا سالتها بكرى وطلعت متعرفش ان عندها اقارب فى المدرسه .غافله ماتعرفاش اصلا

-ايمن / يا كمال انت تساير فيها هلبا .. شن قعدها فى مكان فيه واحد من صغار عمك مختار
-كمال / ماتقولش عمك ..هدا لا عمى ولا نعرفه ..اعطينى شهرين ثانيات والحوش ورثه جدى بادن الله بنرده من هالنصابه هادو

-ايمن / وكيف بدير بيش ترده
-كمال تلفتله /بنديرلهم قضيه شرف
-ايمن استغرب /مفهمتش … كيييف يعنى 🤔🤔
-كمال😊 / ماتحطش فى بالك يا ايمن ..فوت الموضوع توة

__________________________________

.
.
وفاتو الشهرين …

كمال يخدم فى شركه ليبيانا للاتصلات فى بوسته

بمعاشه بخدمته …جى لامه طلب منها طلب خلاها تتفاجأ

-سالمه / انت منين تعرفها امينه بنت عمك بيش تبينى نمشى نخطبهالك
-كمال / نبى انحل الخلاف اللى بينا وبين حوش عمى
..وماينحلش الخلاف هدا الا بالنسبه

-سالمه / انت اخر واحد نصدق انه يبي يحل المشكله اللى بينكم وبين حوش عمك
-كمال / توة بتكلمى بوى ولا كيف
-سالمه / كانا عليا انا تو نقوله …ونشوفه شن بيقول

وكلمت سالمه عمك مصطفى ان كمال يبي يخطب امينه بنت مختار خوه
وقام الحوش وماقعد …

مصطفى ايعارك / مزال نسمع ..غير نمشى لمربوعه مختار نخطب بنته

وايمن حاير شن جد وشن غير راى كمال فيهم وكيف الكره تحول حب …وين شافها بيش شاد فيها الشدة هادى كلها

وندى عاد وين تلقيها …قريب حزمت ورقصت ..العرقله تمت كانا كمال خدى امينه …معناها هيا طول بتاخد عبدالرحيم منغير مشاكل …

واصر كمال على رايه / يابوى هادى بنت عمى وانا اولى بيها
….والحوش لازم انرده بالنسبه اللى بتصير بينى وبين عمى
-مصطفى / وكيف بترده الحوش بعد ماتناسبهم يافالح
-كمال / مش شغلك انت يابوى هدا شغلى انا ..وانا نعرف نتصرف فيه

-سالمه / باهى وين بتسكن
-كمال / نسكن معاكم فى دارى مؤقتا مابين مالقيت سكن

-مصطفى / مدامك بترد الحوش …دير رايك انت وامك …

وتلفت لسالمه / ابعتيلهم حد قبل ماتمشيلهم …كانا وافقو بري واخطبي …وكانا رفضو انكرى الكلام كله احنا لا مشينا ولا خطبنا

-كمال / عين العقل

_________________________________

.
.
وبعتت سالمه نزيهه جارتهم…هيا جارتهم وفى نفس الوقت عندهم بيها قرابه

وخشت لنوريه شربت العصير والشاهى

وبعدها …

-نزيهه / انا باعتينى ليكم ناس على امينه بنتك
-نوريه / ياريت يانزيهه ياوخيتى …تشبحى فيها كل مرة يجينا حد عليها وهيا شى مصكرة راسها قرايتها وبس

-نزيهه ضحكت / مش لين تعرفى العريس منهوا ..وبعتالى ردى عليا
-نوريه / منهوا

-نزيهه / كمال
-نوريه / من كمال …ولد شكون

-نزيهه / كمال ولد مصطفى سلفك
-نوريه انصدمت/ اااه

تبو الحق ..نوريه فرحت بى كمال هلبا …لما صغير كانت متعلقه بيه …وتحبه …وفى قلبها ماعندهاش مانع تعطيه بنتها ……لكن هيهات مختار راجلها يسكت !!!

___________________________________

تمت ….ويتبع

اووووف الحلقه مطولها 😁😁👆

عموما غدوة نكملو قصتنا وكيف بيصير فيهم
هيثم واكرم ماتكلمناش عليهم شن بيكون وضعهم زعماا

وعمتك ندى اللى هايمه فى عبد الرحيم ولد عمها كيف بيصير فيها هيا وياه

وعلى فكرة الرواية عشر حلقات بس ..

رابط مختصر

رأيك يهمنا

error: Content is protected !!