روايات كاملة

لا تسألنى من انا للكاتبة زهور جمال الدين

لا تسألنى من انا للكاتبة زهور جمال الدين

#لاتسألنى_من_انا
.
.
🌷بقلم زهور جمال الدين 🌷
.
.
🌺الحلقة الاولى🌺
.
.
.
حكايتنا بدايتها على بنات الدار💔
ايه ايه دار الرعايه ….

راهم حتى هما بنادمية وخلقهم ربي

الله غالب فى اللى اهلها معروفين شكون …وتوفو ..
و ضروف اقاربهم صعب تحتويهم ولدلك حطوهم فى الدار لانها ائمن مكان ليهم …….مرات معدورين

وفى اللى اهلها مش معروفين منهما .. لقوها قدام الباب..ماعرفولها اصل من فصل

*فى اللى بنت حلال…

**وفى اللى الله غالب مش دنبها ..طلعت ع الدنيا غير شرعيه …الدنب دنب بوها وامها

فى اللى مرتاحة ومقتنعه بعيشتها فى الدار

وفى اللى متمردة وتقول ليش انا من دون بنات الناس

وفى اللى جامحه زى الفرس..داسه فى قلبها وساكته وتراجى فى فرصه للتخلص من السجن هدا

عموما فى خاطرى حكايه ونبى نحكيهالكم ….

___________________________________
.
.

سنه1980…..

خالد خطب نجاة ….
هيا كانت زميلته فى العمل …وقبلها كانت معاه زميلة دراسه
متعرفين قديم من وقت كانو يقرو مع بعض
خالد ونجاة يشتغلو فى وزارة الزراعه ..
تخرجو من الكلية واشتغلو مع بعض …. وكانو يحبو بعض من ايامات الكليه وبعد اشتغلو خطبها
بس هوا وخوتها ماتحابوش من البدايه …عندها خوها لامين دكتور جراح وخشمه فى السما…شهادته جايبها من بريطانيا
..وخوها الثانى يقولوله مختار ..صاحب محلات كبار هلبا لبيع الاثاث فى قلب طرابلس …
خوتها معبيين وفلوس ودايرين روحهم حاجه كبيرة ..وحتى بوها عنده الرزق …
طبعا هيا امها متوفيه ..واللى وقف معاها فى الزواج من خالد بوها …لما لقاها تبيه

وخالد كان انسان بسيط و متواضع مايلعبش معاه الجو متع خوتها والنفخة الزايدة ..ولدلك قعد شاد روحه عليهم…

قولو تزوجو شهر 1 فى سنه81 … وعلى طول حملت نجاة

وفى شهر 12سنه 1981..

جابت نجاة بنت وووسمتها رواسى …الاسم ماكانش متداول هلبا فى ليبيا هداكة الوقت ..بس كانت معاهم مهندسة عراقيه مسميه بنتها رواسى..وسمت نجاة بنتها بنفس الاسم لانه عجبها ….

شهر 6 سنه 1984توفى بو نجاة ..وخلالهم رزق ماشاء الله …وكانو ناوين بعد شهور من الوفاة يقسمو الورثه مع اختهم

..وفى شهر 8 سنه 1984 بعد وفاة بو نجاة بشهرين ممكن..رواسى عمرها سنتين و8 شهور

بوها وامها كانو فرحانين بيها …لكن الله غالب الحلو مايكملش ….
فى ليله سودة مافيهاش ضى قمر …كانت نجاة فى حوش اماليها..لان خالد عنده طلعه للجبل ..ولما روح فات عليها
بيروح بيها ..ركبت هيا وبنيتها معاه فى السيارة وروحو ..
فتحو باب الحوش وخشو …مالاحظوش شى غريب …

بس لما خشت نجاة لدار النوم لقت راجل لابس قوانتى يفتش فى القجورة وماحسش بيهم ..
بدت نجاة تعيط متوقعاته يبي يخنب دهبها …..جاها الخناب يجرى وشد فمها يبي يسكتها .. لكن هيا ربي يهديها ولا قالت نسكت …
سمع خالد عياطها جى يجرى للدار يلقى راجل مضبطها من الخلف وحاط يده على فمها ايسكرلها فيه

نجاة تعيط وخالد هجم …الخناب بيدافع على روحه ..وفى لحظه يلوح نجاة من يده منغير مايقصد يجيبلها راسها على حاشيه السرير…واغمى عليها
وبدى يتعارك باليدين مع خالد ..وجت رواسى تجرى تتفرج انخلعت وبدت اتعيط
خالد لفتت انتباهه بنته مايبيهاش تشوف هدا كله ..وفى لحظه سهو وهوا يشبحلها يضربه الخناب عالحيط يفتحله جبهته على زوز ..وطاح حتى هوا داخ
وطلع الخناب يجرى ورواسى واقفه وطالقه السارينه عياطات

بعد ساعه ….

فاق خالد على عياطات بنته وهيا تهز فى امها ..وتنادى ياماما ….
طلع يجرى فزع الجيران ودورة جت المباحث وبدت اتحقق

نجاة يانارى توفت من تحت هاديكه الضربه .. رحمه الله عليها …منزلما رفعوها قاللهم الدكتور متوفيه
وحكالهم خالد على الخناب وكيف تعارك معاه …
وبالطبع رفعوه للمركز بيش يحققو معاه كيف صارت الحادثه
لكن تحقيقات البحث الجنائي اثبتت ان مفيش كسر فى باب الحوش الخارجى … ولا فى اثار لبصمات فى غرفه النوم غير بصماته هوا وزوجته وبنته ..يعنى مفيش وجود لشخص كسر باب وخش يخنب ولا فى بصمات

وخوتها عاد راسهم والف سيف ان راجلها هوا اللى قتلها
…ووجهوله اتهام رسمى استوجب مدكرة توقيف وبدو يستجوبو فيه من اول وجديد بطريقه متهم وليس شاهد

وداروله خوتها ديباجة على اساس انه تعارك معاه وضربها عالسرير ..بعد تاكد انها ماتت ضرب راسه عالحيط وفتحه بيش ينفى التهمه عنه

وانشهرت فى طرابلس حكايه الراجل اللى قتل مرته …

وبدت القضيه على هيئة جلسات والبنية عند حوش خالها مختار….طبعا سنتين و8 شهور مش صغيرة بكل تنطق فى بعض الكلمات …
تقول لخالها : لازل ضلب ماما على لاسها ( راجل ضرب ماما على راسها 😁)
ومختار مش منتبهلها بكل ..او فى عقله الباطن يبيش ينتبه لانه مصّر ان خالد هوا اللى قتل اخته

__________________________________
.
.
فى جلسات المحكمه …

خالد يانارى ايعيط عيب عليكم ياناس وانا ليش بنقتلها
جاب محامى واثنين وثلاثه …التهمه لابساته لابساته
وشهد خوها مختار بالكدب انها كانت غضبانه عنده ليها يومين لانه كان ايهدد فيها بالقتل
وخالد بين عيونه شكل الحرامى اللى قتل مرته ..وصفه ليهم وشى شى

خلاصه الموضوع …

اتهموه ظلم بقتل زوجته .. وبعد مدكرة التوقيف اللى داروها فيه نساباته…ثبتت عليه التهمه ..و حكم عليه القاضى بالحبس عشرين عام …
وبالرغم القاضى جاب البنية رواسى كشاهد …والشى الوحيد اللى تقول فيه انها تعيطت بابا ماقتلش ماما ..لان صغار خالها الله لاتربحهم قالولها بوك قتل امك ..وشى مادورها حد ….ولا خدو باقولها لانها بيبي سنتين وسته شهور …
اصلا حتى كلامها مش مفهوم …

ورواسى لما حكمو على بوها بالحبس خدوها خوالها… لان خالد ماعنداش اقارب درجه اولى ..راس اخ اسمه محمد وساكن فى امريكا..وعمام خوت بوه ماعنداش ..عنده عمه وحدة ومتوفيه . ..
ولدلك استلمها خاها مختار …

____________________________
.
.
خالد فى الحبس ..ايفكر وايخمم
ماطابش على خاطره يحبسوه ظلم وياخدو منه بنته ثانى..

ولما كان فى الحبس تعرف على واحد نوعه مجرم قطاع خاص😁… يعنى اى حاجه مش مزبوطه يخدمها …
طلب منه يطلعله كدا ورقه من الحوش ..لانه متسكر بالشمع الاحمر …طبعا هوا يعرف كيف اخشله بطريقته لانه حرامى

وطلب منه طلب ثانى …
طلب خطير …

-خالد : اسمع يا اسعد ..انا منبيش منك غير الاوراق بس..نبى منك خدمه ثانيه ..لكن نقولهالك بعد مانقابل الشخص اللى بيزورنى اليوم
-اسعد : اللى تبيه انديره .. لكن كل شى بحسابه راهو
-خالد : خوى محمد بيبعتلى فلوس توة .. وحنزيد نطلب منه ثانى لين نوفيك حسابك
-اسعد : غريبه ايصير فيك هدا كله ومايجيش ايعاونك
-خالد عيونه دموعو وصوته انخنق: تى كيف ماساعدنيش
..امالا حق المحاميين وكل شى من دفعه ماهو هوا
-اسعد : تى باهى خيره ما روحش
-خالد : الكلام فى سرك …خوى هارب وداير لجؤ سياسى فى امريكا
-اسعد : تى شن تقول انت ..خيره ماروحش لما هدمو السجن فى اصبح الصبحُ.. وكل الناس دارولها اعفاء
-خالد : خوى محمد كان خاش فى انقلاب وقصه طويلة
..يخاف ايجى ايشدوه طول..حتى انا مانخليشى ايجى ونضيعله عمره
-اسعد : عموما شوف ضيفك وفالليل قولى اخر المستجدات
-خالد : تم

وانفتح باب الحبس: مسجون خالد عندك زيارة

وطلع خالد ايشوف فى الشخص اللى بعتله مع ناس طلب زيارته

______________________________________

بعد ساعه …..

رجع خالد من الزيارة ….
توضى وصلى المغرب …وصلى بعدها صلاة الاستخارة …
.
ونادى اسعد على تركينه ….

يدوو مع بعض ويتهامسو ..وكل مايعلى صوت اسعد ينخصه خالد اينقص حسه لان الموضوع خطير

-اسعد : باهى بعد مانخطفها كيف بنديرلها ووين نرفعها
-خالد: اتصل بالرقم الارضى اللى عطيتهولك وقول للشخص ايجى يستلمها منك
-اسعد : تى كيف ياراجل..نكشف نفسى..كان يسألو البنيه ثلاثه سنين مش صغيرة …..ولايشدو الراجل ويعترف عليا

-خالد : ماتخافش انا الراجل واثق فيه …وهيا بياخدوها للمركز اسبوع تحرى .. ولما مايلقوش عليها بلاغ ..ولا فى حد ايدور فيها ح ايضموها للدار طول كحل مؤقت

-اسعد : تى ماهو خوالها بيبلغو شن بيسكتو
-خالد: انت ماعليك بي هالموضوع ..صاحبي اللى حكيتلك عليه يخدم فى ادارة الدار بعتله من فترة وهوا نفسه اللى جى زارنى بكرى .. وخبرته على بنتى وقالى تو نعرف كيف نتصرف ومانخلى حد يزبطها

-اسعد : يعنى الخطوات كيف
-خالد : الخطوات انك تخطفها وتعطيها لواحد اسمه عبدالحميد يخدم فى الادارة العامه للرعايه حنعطيك رقمه …بعد ماتسلمه له انت تطلع نهائي من الموضوع
-اسعد: تمام انا بعد غدوة طالع ويصير خير انشاءالله
.
.
.
وبالفعل بعد ثلاثه ايام طلع اسعد من الحبس ..وقعد يصطادكيف يحصل عالبنت بروحها … وفى ثالث يوم طلعت مع خالها لامين وبناته …رفعهم لمعرض طرابلس الدولى

..وهما فى الالعاب متع الملاهى اللى فى المعرض ..الناس زحمه والدنيل دوشه ..وفى اللحظه المناسبع خطف اسعد البنيه
قامها على كتفه …وزلبحها بكلمتين
-رواسى : بلحقه بترفعنى لبابا
-اسعد : ايه بابا فى الحوش ايراجى فينا روح من السفر
-رواسى: بنات خالى لامين قالولى بابا محبوس
-اسعد : خزيه عليهم المسمومات ..بابا طالع لامريكا يقرا
-رواسى : صف شنو يقرا بابا

وصلو السيارة ..ركبها وسكر الباب ..ولف قعمز ولع السيارة ومشى رفعها لحوشه…..

لمافقدها لامين دار عياطات ونديب وكلم خوه مختار المسؤل عليها ومشو طول مركز المدينه بلغو

اسعد خلاها معاه للمغرب وفى ادان العشى طلع بيها زى مامتفق مع عبدالحميد ..تلاقو فى مكان معين عطاها البنت …

___________________________________

طبعا عبدالحميد مدير كبير فى الدار وعنده كلمه ..
خدى البنيه ورفعها طول للدار….
-رواسى : احنا وين ماشيين مش قالى عمو بابا كان مسافر وروح
-عبدالحميد قلبه رقيق وعيونه دمعو: بابا سافر مرة ثانيه ..وقالك اقعدى عندى
-رواسى: انت عندك صغار
-عبدالحميد : عندى هلباااااا وحتحبيهم ويحبوك يابنتى

وصل للدار …

الساعه عشرة فى الليل عطاها للعاملات قاللهم رقدوها هنايا مابين مامشيت غدوة للمركز وفتحت فيها محضر…
طبعا مديرة الدار تحترم فى عبدالحميد وماتقدرش تناقشه فى اى نزيل ايجيبه هوا …

-المديرة : منهيا هادى استاد عبدالحميد ومنين جبتها
-عبدالحميد : مامعرفش يا ابله نوارة .. شرين باب الحوش فتحت المراءة ونادتنى ..قالت يبيك راجل ..طلعت لقيت البنيه واقفه ومعاها ورقه ..والراجل ماهناش
-المديرة : وشن مكتوب فيها الورقه
-عبدالحميد مجهزها : اهيا خودى اقريها

خدت المديرة الورقه وقرتها ..
” البنيه امها توفت وبوها مسافر واحنا معش قدرنا على مصروفها بالله عليكم خلوها عندكم فى الدار راهى ليبيه وبوها ليبي ”

-المديرة : وبالك حد خاطفها انت لازم تتواصل مع المركز وادير كل الخطوات وتبلغ عليها
-عبدالحميد : اكيد يا ابله نوارة منغير ماتوصى

ثانى يوم ….
مشى عبدالحميد للمركز وقدم بلاغ على بنت لقاها قدام الحوش ..فتحو المحضر وبدو ياخدو فى مواصفات البنيه بلكى حد مبلغ عليها ..
ولكن عمى عبدالحميد صلاحياته قوية فى الدار وبدل مايرفع رواسى ..رفع بنيه ثانيه فى نفس عمرها …طبعا رواسى كانت مش بيضا هلبا..قمحية وعيونها سود
..ولكن هوا رفع بنيه بيضا هلبا هلبا .. وعيونها خضر..بيش لما يجى البلاغ عن البنت الضايعه من خوالها تكون المواصفات مش متطابقه …وثانى البنت مريضه شوى وعندها تأخر فى النطق
-الشرطى : شن اسمك
-البنيه : اسمى فطومه
-الشرطى: من جابك قدام حوش عمك عبدالحميد
-فطومه : عمى عبدالحميد حلو
-الشرطى: انتى عند منو كنتى ساكنه
-فطومه : نبى ناكل
-الشرطى: ياماما …
-قص عليه عبدالحميد : يافندى تشبح فيها البنيه مريضه ومافاهمه شى ..انا قبلك سألتها وماخديت منها لا حق لاباطل

تلفت المحقق للولد اللى يكتب : اقفل المحضر فى ساعته وتاريخه ..وبعد اخد اقول المرافق والمجنى عليها قررنا ارسالها اللى دار الرعايه .. لحين ايجاد اى بلاغ عنها

وبعد اسبوع مشى الموضوع تمام وفتحو لرواسى ملف فى الدار
وطمن عبدالحميد بوها وقاله انها فى الحفظ والصون ..
وبالاتفاق مع بوها كتب على ملفها انها وجدت يوم 24/10.. ولو الفستان احمر والحداء ابيض ….

طبعا ثلاث سنوات البنت تتكلم ..
-العاملة : شن اسمك حبيبتى
-رواسى: اسمى رواسى …
-العاملة: وبابا
-رواسى : اسمه خالد
-العاملة :بابا اسمه خالد شنو..خالد عبدالله ..خالد عبدالرحمن
..خالد سالم
-رواسى تلعب بالبمبلا: منعرفش

خلتها العاملة فى الغرفه ومشت للادارة
-العاملة : على قد ماسايستها قالت اسمها رواسى ..واسم بوها خالد
-ابله نوارة المديرة شبحت لعبدالحميد : خلاص انسجلوها رواسى خالد
-عبدالحميد داير روحه مايعرفهاش : خلاص زى ماتحبي
وتلفت للعاملة: جيبي البنت بنفس اللبسه بيش انصوروها كيف ماوصلت للدار
-ابله نوارة : ماكلمك حد من المركز ماجاهمش حتى بلاغ
-عبدالحميد : شوق بلاغات لكن مواصفات ثانيه …مواصفات البنيه مافيش
-نوارة : اللى جابوها يعرفو شن ايديرو ..حطوها قدام حوشك ولابدة قالو لاقاربهم ماتت ولا ابصر شن صار معاها بيش ايدسو جريمتهم

جابت العاملة رواسى وقفوها قدام المصور وصورت صورتين ..وحطوهم فى الملف متاعها …

وخدى عبدالحميد وحدة من الصور معاه ومشى بيزور خالد بيش ايزيد ايطمنه ويعطيه صورة بنته

_____________________________

تمت ….ويتبع

القصه مشوقه ننصحكم بالمتابعه ….يلاااا اعطونى رايكم فى الحلقه الاولى
نحبكم

 

تقييم المستخدمون: 5 ( 2 أصوات)

1 2 3 4 5 6 7 8 9 10 11 12 13 14 15 16 17الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock