روايات كاملة

من الحب ماقتل للكاتبة ميرا ياسر

هادي هدية مني وان شاء الله تعجبكم تفاعلوا😝

الحلقة ~ 16 💜

عند لجين ونادر …

نادر .. لجين ، كان بوك موافقش ترجعي مش ح تجي الكلية تاني؟ يعني معاش بنشوفك!
لجين.. العلم عند الله
نادر.. لجين .. انا نحبك ..وحق ربي ندير المستحيل باش متبعديش عليا .. اني ماصدقت لقيت البنت الي خلت قلبي يدق .. وخلتني نحبها ونحب روحي معاها.. اني ديما ف مشاكل الخدمة والقراية والحوش لين وصلت للحالة الي تشوفي فيها.. معنديش صحاب غير محمد.. ومش لاقي راحة فالدنيا …
لجين.. بس نادر ،،
نادر.. يا لجين.. انتي راحتي.. اني لما نشوفلك ونكون معاك.. زي العيل الصغير الي كان ضايع ولقي بيته ومطرحه.. ولقي المكان الي يحس بيه بالراحة والأمان ..

ولجين قعدت ساكتة وعيونها دمعو … لان الي كانت تحس بيه كان نفس الشي واكتر .. بس خايفة انها تكرر معاه نفس التجربة الي مرت بيها ..

نادر.. لجين ردي عليا.. اني نبيك !
قولي باهي .. وراسك الا غدوا نجيب امي ونخطبك .. اعطيني فرصة بس .. وافتحيلي قلبك ومش هاتندمي.. هانسيك كل وجع مريتي بيه … وكل شي فالماضي .. بس قولي باهي
لجين وهيا تبكي .. نادر انا خايفة .. خايفة نصارحك ب اللي نحس بيه .. ونعلق روحي بأمل واحلام وفجأة يختفي كل شي مني .. ونعيش نفس الي عشته من قبل وانا والله ماقادرة نتحمل
نادر .. قوليها
لجين.. شن هيا
نادر .. الكلمة
لجين .. اما كلمة ؟
نادر .. ههه قوليها وكل شي هايبدا تمام.. وعد
لجين ………….
نادر .. هيا ،،
لجين ..انحبك

نادر مسكلها ايدها وقالها .. وانا هانعيش عمري كله باش نسعدك ..

لجين …
نادر.. نبي نجي نخطبك ..
لجين.. بسرعة هكي هههه
نادر.. منبيش حد يفتح عليك فمه ب نص كلمة .. ع الاقل تبدي خطيبتي قدام الناس ..
لجين وهيا متحشمة.. اوك.. نكلم بابا ونقولك ع موعد 🙈
نادر.. ههههه مية مية.. هدا رقمي ..092***** كلميه وكلميني 😉
لجين.. حاضر
نادر.. هههه هي لازم نمشي توا.. ديري بالك ع روحك اوك ؟
لجين.. اوك..وحتى انت
نادر.. هههه حاضر سلام

وطلع نادر وهوا بيطير من الغررحة وكدلك لجين…

واول ما طلع نادر طلعت لجين تليفونها وكلمت نهى…

لجين.. نهى نهى..اني فرحااااااانة بنطيييير😍 .. وزغرطي يا انشراح على الي جاي والي رااح 💃💃👏👏
نهى.. هبلتي ؟😂😂😂😂 فرحيني معاك به هههههههههه
لجين.. انا وناادر 🙊
نهى.. شنوو 😍
لجين.. بيجيي يخطبني 😍😍😍
نهى.. ههههههههههههه خطووبة مرة وحدة اششيه اشييه لنقنه خاش طول الولد.. وانتي شن قلتي
لجين.. قتله نكلم باابا ونعطيك علم 🙈
نهى .. ههههههههه والله فرحتلك ي حمارة وفرحانة انك مبسوطة ونادر شاب شهم وهاتعيشي معاه احلى ايام حياتك
الف الللف مبرررروك 😍
لجين .. ههههههههههه الله يبارك فييك وعقبالك .. انا وانتي عرسنا مع بعض😍

~~~~~~~~~~

وروحت لجين للحوش …

لجين .. مااما.. ماميتووو 😇
امها .. بسم الله الرحمان الرحيم.. شن صايرلك يابنتي كل يوم ب حال بديت نخاف عليك اني 😳
لجين.. هههههههه مه نبي نتكلم معاك ف موضوع
امها.. خيييير 😐
لجين.. هوا في واحد معاي فلكلية.. مش معاي يعني مع نهى فلكلية المهم جي كلمني اليوم ووو….
امها.. و شني 😐
لجين.. قالي يبي يجي يكلم بابا 🙊
امها.. وشن يبي ف بوك 😐
لجين.. تي يبي يخطب يا مامااا 😭😭
امها.. اااهااا 😅
لجين.. اي هي شنو بتقولي لبوي امتى يقابله
امها.. غير احكيلي من يكون و ولد شكون وشن يخدم و كم عمره فهميني راسي من رجليا باش نعرف شن نقول لبوك
لجين.. اسمه نادر .. عمره 24سنة ويقرا سنة 3 هندسة … بوه متوفي وعنده 4 خوت بنات .. ويساعد بو صاحبه فشركة ويتدرب ف مكتب هندسي .. وبس
امها.. مش صغير هدا وقاعد يقرا ؟ بيخليك تكملي قرايتك
لجين.. ي امي مش صغير اكبر مني ب سنتين واصلا هوا سنتين ويتخرج وانا مزالي 3 سنين وسنة امتياز يقعدوله سنة ونص بعد مايتخرج يكون فيهم نفسه مابين اني ماتخرجت ونديرو العرس طول باذن الله.. بيخليني نكمل اي ..
ام لجين.. اوك خلاص نكلم بوك ونشوف شن يصير ….

ومشت لجين ل دارها وهي الفرحة مش سايعاها وحست ب قلبها رجع يدق من جديد .. زي الميت الي ردت فيه الروح الحب ممكن يرجع انسان للحياة مرة تانية وينسيه كل جروح الماضي بس يكون مع الانسان صح…

عند نادر …
اتصل نادر ب محمد

محمد.. اه يابرو .. شنجك
نادر.. تماام التمام.. عزومة اليوم ع حسابي 🌚
محمد.. خير ان شاء الله 😳
نادر.. هههههههههه كلمتها يامحمد كلمتها
محمد.. ايااااااه.. وش صار 😂
نادر.. قلتلها بنخطبك و وافقت.. وتوا بتكلم بوها وبتعطيني خبر
محمد.. الف الف مبروك ياراس.. والله صحة ليك اصغر مني وخطبت قبلي🌚😂
نادر.. هههههههههه الله يبارك فيك وعقبالك
محمد.. ايي نبو الزردة 😜
نادر .. علاش ؟ 🌚
محمد.. بمناسبة الخطوبة 😃
نادر.. اما خطوبة 🐸 من بيخطب انتا ؟ الف مبروك
محمد.. ههههههههههههههه اي استعبط ياخويا استعبط ..
نادر.. 😂😂غدوا عازمك عالغدي 😂
محمد.. تم 😂

وسكر نادر ومشي لامه …..
نادر.. ياست الحباايب 😀
امه .. اهلين ياوليدي
نادر..نبيك ف موضوع
امه..خير ان شاء الله ..
نادر.. في بنت نبيك تخطبيهالي
امه .. من هيا ؟
نادر .. تتفكري في البنات الي عزمتهم ف عرس اختي ؟
امه.. اي اي، اما وحدة فيهم؟
نادر.. لجين
امه..😍😍 يازين ماخترت ياولدي البنت اخلاق وجمال بعد هكي مفيش ❤❤
نادر .. هههههههه الحمدلله انها عجباتك وانك راضية عليا
امه.. ياولدي انت ماقصرت معانا ف شي انا وخواتك والي تبيها هيا ليك.. راضية عليك دنيا واخرة.. حدد موعد ونمشي نخطبهالك ونكلم عمك باش يتفاهم مع بوها ❤
نادر.. حاضر

وباس نادر راس امه
وخش بعدها لداره وقعد يفكر لحد مانعسه النوم….

《 عند نهى 》

تاني يوم الصبح الساعة 10

كانت تضم ف دارها وتغني وترقص🎤💃 😂

والدنياا حلوة واحلى سنيين 🎶🎶
بنعشها واحنى ياناس عاشقين ❤🎵
ننسى الي فتنا ونعيش حياتنا عالحب متواعدين وانسى… 💃🎼

خش عليها وليد…

وليد..وهيييي والعب عالشط 😂😂😂 خير ان شاء الله ههههههههههه شن جايك ع صبح ربي ..
نهى.. اس ياسخيف الادب مرة تانية طقطق قبل لاتخش -.-
وليد.. اي صح بالك تطلعي متحزمة وترقصي لازم نستأذن.. شن مش ماشية اليوم؟
نهى.. معنديش محاضرات😆
وليد.. اه😂 به انزلي افطري قتلك امي ..
نهى..هي هي 😆✌

ونزلت نهى تفطر مع عيلتها ❤

نهى .. مامااا بنقوولك
امها.. قولي
نهى.. لجين جاها عريس 😍
امها.. باهي الف مبروك ليها ان شاء الله.. ربي يتمملها ع خير
نهى.. واني نبي نمشي يوم الي يجو الناس باش نكون معاها ونساعدها ف اللبس والقضية وهكي
بوها .. وشن بديري حضرتك يعني ؟
نهى.. بنساعدها يابابا هيا ماعندهاش حد لا خوت يوقفولها…
بوها.. ماشي ماشي.. خلي خوك هوا الي يرفعك ويجيبك …
نهى.. حاضر بابا
وليد.. حتى اني نبي نخطب
بوه.. شني هوا ؟
وليد.. بنرتبط 😂
امه.. ربطوك ب تل ف رقبة نعجة ان شاء الله.. كمل تسمسيم ونوض
وليد.. حاضر ☺

وفطرت نهى ومشت لدارها واتصلت بيها نادين

نادين.. صبااحو ❤
نهى.. صباحو اشطهه وعسل وكريب وبريووش 😍
نادين.. هههههههههه اشيه اشيه شن الدلع هدا كله
نهى.. لجين 🙊🙊
نادين.. كنها
نهى.. بيخطبها ناادر واخيرااا 😍😍😍😍
نادين.. اه ، به الف مبروك
نهى.. خيرك؟
نادين.. شي خيرني
نهى.. شي بس حسيتك اضايقتي
نادين.. اكيد اضايقت.. كنت نتمنى نكون مع صاحبتي ف يوم زي هدا ونفرح معاها بس مش مشكلة يلا.. انا وانتي واحد ❤ وردي بالك تخليها ف يوم زي هدا ❤
نهى.. اي عندك حق.. يارب نرجعو زي ماكنا 😓
نادين.. اي اي.. هي لازم نمشي.. سلام ياعمري
نهى.. سلامات ياروحي ومش ح نخليها وعد ❤

وسكرت …

نادين.. ههههههه اي اصلا .. لازم متخليهاش

يتبع…………

#mera 🌼

تقييم المستخدمون: 4.18 ( 4 أصوات)

1 2 3 4 5 6 7 8 9 10 11 12 13 14الصفحة التالية
الوسوم

رأيك يهمنا

زر الذهاب إلى الأعلى
error: Content is protected !!

أنت تستخدم إضافة Adblock

برجاء دعمنا عن طريق تعطيل إضافة Adblock