يوميات الليبي مع كورونا

فريق النشر
منوعات
فريق النشر22 مارس 2020آخر تحديث : منذ سنتين
يوميات الليبي مع كورونا
#يوميات_الليبي_مع_كورونا 🖤

رن رن رن

فتحي : تي وين ياصقري
جلال : في الحوش
فتحي : ماتقوليش طبقت حجر صحي 😂
جلال : حاجة زي هيكي ههه
فتحي : تعالى للحوازة اني وشباب مدايرين بكبوكي
جلال : لالا فوتها ، مرة ثانية
فتحي : هههه تبي تقعد زي البنات في حوش خوف من الكورونا
جلال : مش هيكي ياراجل ، مش خوف عليا لكن تعرف انه أمي عندها امراض مزمنة مش ناقصها كورونا
فتحي : عيب يابرو كلهم جماعتنا

جلال سكت وقعد يفكر يمشي او لا ،، كان قعد بيضحكو عليه شعبنا العزيز ويقولو عليه زي بنية خايف ،، وكان امشي خايف يجيب الفيروس لي أمه ،، لكن بعد تفكير احني كا شعب شجاع والعناد يمشي في دمه اكيد بيمشي

جلال : تم ، نغيير دبشي وانجي
فتحي : تم

.
.
.
.
.
.
.
.

الأم : كح كح
رانيا : هاك دواءك ياماما
الأم : يبارك فيك يابنيتي
جلال : تبو شيء
الأم : وين ياولدي
جلال : فتحي وشباب مدايرين بكبوكي نمشيلهم
الأم : لكن ياولدي قالو اقعدو أسبوعين في الحوش
جلال : متخافيش ياأمي شباب معروفين
الأم : على أقل ألبس كمامة وقوانطي وخوذ معقم
جلال : ههههه ياأمي شباب سالمين مافيهم شيء
الأم : إحتياط ياولدي
جلال : فكيني من تسهويكهم يانبع الحنان ، لكن صدقيني اخر مرة نطلع 😉

وكالعادة زي ام ليبية مش هتقدر على ولدها وبتسكت

طلع جلال ولحقاته رانيا

رانيا : ماتمشيش
جلال ” يلبس في سبيدروه ” : تتسهوكي
رانيا : شني نتسهوك ،، مرض هذا مافيش تسهويك ولا بصارة
جلال : اني مش خايف
رانيا : كان مش خايف على روحك خاف على أمك على أقل
جلال : ملا تبيني نقعد في حضن أمي زي البنت
رانيا : شني مشكلة هما أسبوعين بس وبعتالي دير الي تبيه
جلال ” تلفتت وكيف بيطلع ”
رانيا : تسحابها شجاعة هاذي ،، والله ماهي شجاعة هذا غباء وتهور
جلال : رانيا 😡
رانيا : أمي لو صارلها حاجة بسببك مش هنسامحك ياجلال ” وخشت لي أمها ”

.
.
.
.
.
.
.

وجلال تلاقا مع صحابه ومع صحاب صحابه سلم عليهم كالعادة وكلي معاهم ولمس اشياء الي لمسوهم وكأنه مافيش وباء عالمي إسمه كورونا

نعمان : اوووه وين ياراس مختفي
جلال : في حجر صحي 😂😂

وسلمو على بعض وكأنها إشتياق وحب نزل عليهم الا توا وهما تلقيهم في قلوبهم مايحبوش يشوف وجوه بعض ،، شعب منافق 😒

نعمان : كح كح
جلال : شنو خوي ماتقوليش كورونا
نعمان : هههه تي لا ياراجل واخذ بردة

وهوووب رذاذ نعمان المعبي بي فيروس يتجه لي جلال واهنيء عمنا كورونا يضحك متشمت ويقول

كورونا 🦠 : نحب ناس مستهترة زيك ياريت الكل زيك

جلال : ههههه الله غالب شعب خنايسي وموسوس هههه
نعمان : ههههه

كانك خنايسي وموسوس علاش ماديريش تدابير الوقاية لكن كيف خايف صحابك يضحكو عليك 😒

علي قولت دكتور حمزة خضر إحني شعب العيب انديروه قبالة وبكل صحة وجه والحاجة عادية نتحشمو منها شعب عنده معادلة عكسية مع شعوب الأخرى 😂😂😂

.
.
.
.
.

جلال وهو في طريقه للحوش وقف على محل ،، لمس مقبض الباب وسلم على عمه منعم صحاب المحل وبعتالي روح للحوش

سالم : السلام عليكم
عم منعم : ياأهلا وسهلا بي سلومه

وسلمو على بعض كالعادة ،، شعب يحب العناد 😂😂

.
.
.
.

سالم روح للحوش

سالم : خيرية
خيرية : اهلا وسهلا
سالم : هاكي الكيسة وجيبيلي الغذي
خيرية : هيا خمسة دقايق

رفعت خيرية الكيسة للمطبخ وخشيت وراها بنتها نجوى

نجوى : روح بابا
خيرية : ايه

شافت الكيسة وكأي بنت ليبية يضربها فضول شني جاب بوها حتى لو تعرف انه بيجيب زيت ،، وفتحت الكيسة

نجوى : شني جاب

كورونا 🦠 : هيا بينا يااخوتي لي احتلال العالم

.
.
.
.
.
.
.
.

بعد أيام

فتحي : تي وين
جلال : شني فيه ، وقت قولت تعالى بسرعة حتى من تيشرت لبسته مقلوب
فتحي : بنخشو انديرو تحليل
جلال : تحليل شنو ياراجل
فتحي : متع كورونا
جلال : ليش شني فيه
فتحي : تي نعمان **** طلع عنده فيروس كورونا
جلال : شني 😨
فتحي : تعالى خلي انديرو ونطمئنو بإذن الله تحاليل سليمة

خش جلال يجري يدير في تحليل مش خوف على روحه خوف على أمه
دار تحاليل وقعد من صبح لحد الليل وهو يستنى في نتيجة وقريب يموت وبعد وقت طلع تحليل وكان إيجابي مصير كل واحد مستهتر يدير روحه قرندايزر

.
.
.
.
.
.
.

بعد أسابيع زاد عدد حالات مصابة بسبب جلال وأمه مسكينة من ضمنهم وبسبب إمكانيات العظيمة لي دولتنا الحبيبة الي يموتو ضعف الي يموت في دول العظمى

جلال : كيف حال أمي يارانيا
رانيا : أمي ، أمنا ياجلال ” ونهارت بالبكاء ”

كان يكلمو في بعض من وراء المرش

جلال : تكلمي خيرها أمك
رانيا : ما خلونيش نودعها ياجلال ،، أمشيت بدون وداع 😭😭😭😭
جلال : ك كيف 😨
رانيا : رفعوها بعيد وحتى صلاة جنازتها مافيهاش الا ثلاثة 😭😭😭😭
جلال : لالالا مستحيل
رانيا : راحت أمنا وقعدنا يتامى من غير أب وأم ،، راحت الغالية وكلها بسببك ،، مش هنسامحك ليوم دين اخذيت مني الحاجة الوحيدة الي محسستني بالحياة مش هنسامحك 😭😭😭😭😭😭😭

جلال في صدمة وافكار ترفعه واتجيبه ومش مصدق انه امه امشيت وخلاته ،، وذكريات ابديت تنهمر عليه ،، واحساس باللوم وتأنيب الضمير وانه سبب في موت أمه 💔

جلال : سامحيني ياأميمتي سامحيني 😭😭😭😭😭😭😭😭

وهاذي نبذة صغير على بيصير لو شعب الليبي قعد هيكي وقعد مستهتر ومش معدل 💔

.
.
.
.

فيروس كورونا يحب يفاجئ البشر يقعد في فترة حضانة ومايطلعيش لي عند يلعب بي عشرة عشرين ثلاثين …. الخ شخص وبعتالي يديرلهم سبرايز
وفاجأة من زيروو يكتبولكم 100 شخص مصاب بي فيروس كورونا وبعتالي تبدا تسأل في نفسك كيف أمس كانو مافيش ولا حالة ،، لا ياعيني أنت زي جلال مستهتر تسلم على هذاكه وتلمس هذاكه وبعتالي تمشي تلمس مكان ثاني ويجي شخص يلمسه وهذاكه شخص يمشي لي مرته وصغاره وبعتالي مرته تمشي لي أهلها وأهلها يمشو لي أهلهم لعند ينتشر الوباء في يوم وليلى وبدون ماتندري وتأخذ أعز ناس منك زي مااخذي من جلال أمه 💔💔

ساد إستهتار ،، راهو الي تسحابه شجاعة راهو غباء وجهل ،، والي بيقولي (( لن يصيبنا الا ماكتب الله لنا )) ونعم بالله وربي قال (( ولا تلقو بأيديكم الي التهلكه )) ،، يعني مش عيب تحمي روحك حتى تحمي أحبابك لانه حماية نفسك بحماية أهلك ،، هما أسبوعين بس استحملهم كيف مايجيء أحسن ماتندم في مستقبل واتقول ياريت ياريت

وكان بتقول لا ومانعرفيش شني ملا برا تسكع مع صحابك وموت انت وياهم وخليك بعيد عن اهلك وعن بشر لانه يوم دين كل انسان انت سبب في اذيت احبابه هيكون خصيمك وهتتحاسب عليه حتى لو بدون قصد لانك لو قعدت في حوشك مصاريش شيء

#أمك_وبوك_أمانة_في_رقبتك
#الزم_بيتك_من_أجل_صحتك_وصحتي_أنا

ديرو مشاركة خلي الكل يعرف شني نهاية الاستهتار 💔

#هدو
#hadoo_al

رابط مختصر

رأيك يهمنا

error: Content is protected !!